မြေပဲကို အကြမ်းအားဖြင့် (၁) ပင်ပြန့်မြေပဲ၊ (၂) ပင်ထောင်မြေပဲဟူ၍ နှစ်မျိုးနှစ်စား ခွဲခြား နိုင်သည်။ မြေပဲပင်သည် စိုက်ပျိုးပြီးနောက် ၅ လ မှ ၇ လခန့်ကြာလျှင် အသီးများ ရင့်မှည့်၍လာသည်။ အပင်များရှိ အရွက်များ ခြောက်သွေ့၍ လာသောအခါ မြေပဲသိမ်းရန် အချိန်တန်ပြီ ဖြစ်ပါသည်။ တစ်ဧက လျှင် မြေပဲတင်ပေါင်း (၃၀) မှ (၄၀) အထိ ထွက်ရှိပါသည်။ မြေပဲကို ဆီအတွက် အများဆုံး စိုက်ပျိုးကြ ပါသည်။ ဒါ့အပြင် သရေစာအဖြစ်ဖြင့် မြေပဲအစေ့အတိုင်း စားသုံးကြပါသည်။ မြေပဲတွင် ပရိုတင်း၊ ကာဗို ဟိုက်ဒရိတ်နှင့် အဆီများစွာပါရှိသဖြင့် အခြားမုန့်ပဲသရေစာများနှင့် အစာများတွင် ထည့်သွင်းသုံးစွဲနိုင် သော အဖိုးတန် အစားအစာတစ်မျိုးဖြစ်ပါသည်။ ယခုပြည်မြို့ မြို့မစည်ပင်သာယာဈေးကြီးနှင့် အခြား ဈေးများတွင် အနယ်နယ်အရပ်ရပ်မှဝင်ရောက်လာသော မြေပဲတောင့်များကို လှိုင်လှိုင်ရောင်းချနေပြီ ဖြစ်ပါသည်။ ရာသီပေါ် မြေပဲတောင့်များကို အတောင့်ချောတစ်ပြည်လျှင် ကျပ် (၄၀၀၀)နှင့် အတောင့် သေး တစ်ပြည်လျှင် ကျပ် (၃၅၀၀) ထိရှိပြီး အရောင်းအဝယ်ဖြစ်ကြောင်း သိရှိရပါသည်။
DOCA(ပဲခူး)