ဘူးသီးကလေး၊ ဝတုတ်တုတ်၊ ညီညီဖိုးဝရုပ် ဟူသော ကဗျာလေးကို ကြားဖူးကြမည် ဟု ထင်မိပါသည်။ ဘူးသီးသည် ရေဓာတ်ပါဝင်မှု ( ၉၂ ) ရာခိုင်နှုန်းခန့်ပါဝင်၍ လူ၏ခန္ဓာကိုယ်တွင် လိုအပ်သော ရေဓာတ်ကိုဖြည့်စွမ်းပေးနိုင်ပြီး ဗီတာမင်ဓာတ်နှင့်သတ္တုဓာတ် ကြွယ်ဝစွာပါရှိသောကြောင့် လူသားတို့အတွက် အကျိုးကျေးဇူးထူးသည့် ဖိုးဝရုပ်ကလေးများပင် ဖြစ်ပေသည်။
ဘူးသီးသည် ခန္ဓာကိုယ်အပူကို ငြိမ်းစေသည့်အပြင် စိတ်ဖိစီးမှုကို ပြေပျောက်စေ နိုင်သောကြောင့် နှလုံးကျန်းမာရေးအတွက် အလွန်သင့်တော်ကောင်းမွန်သော ဟင်းချက်စရာ ဖြစ်သည်။ ကာလသားဟင်းချက်စားသည်ဖြစ်စေ၊ ခြစ်၍သုပ်စားသည်ဖြစ်စေ၊ အမှုန့်ကပ်ကာကြော် စားသည်ဖြစ်စေ အညာကျေးလက်ရနံ့တို့ ထုံသင်းမွှေးပျံ့နေသော အသီးတစ်လုံးဖြစ်ကြောင်း တွေ့မြင် ရသည်။ ဘူးသီးပင်များသည် နွယ်ပင်များဖြစ်ရာ စင်ထိုး၍စင်တင် စိုက်ပျိုး ထားခြင်းဖြင့် အိမ်၏တနိုင်တပိုင် ထမင်းအိုးအဖြစ် စိုပြေစေနိုင်ကြောင်း တွေ့မြင်ရသည်သာမ က ရောင်းချသူစျေးသည်များ၏ လက်တွေ့အခြေခံစီးပွားရေးအဖြစ်တွေ့မြင်နိုင်သည်။ စီးပွား ဖြစ်စိုက်ပျိုးကြသည်ကိုမူ မြင်းခြံဒေသတစ်ဝိုက်တွင် မတွေ့မြင်ရသည်မှာထူးခြားသည်။
မြင်းခြံမြို့ အေးမြသီတာစျေးဝန်းအတွင်းတွင် အသီးအရွက်ရောင်းချသူအခြေခံစျေးသည် များသည် မလှူနိုင်စျေးရောင်း ဟူသော ဆိုရိုးနှင့်အညီ ဘူးသီးများကို အလုံးအကြီးအသေး အပေါ်လိုက်၍ တစ်လုံးလျှင်(၈၀၀) ကျပ်၊ (၁၀၀၀)ကျပ် စသောစျေးနှုန်းအသီးသီးဖြင့် ချိုသာစွာ ရောင်း ချလျက်ရှိကြောင်း တွေ့မြင်ရပါသည်။ လာရောက်ရောင်းချသော ဘူးသီးများကို အိုင်းမနှင့် ကွမ်းစိုက်ကျေးရွာတို့မှထွက်သည့် အိမ်စိုက်စင်တင်၍ သီးသောဘူးသီးများဖြစ်ကြောင်း ရောင်းချသူစျေးသည်၏ ပြောကြားချက်အရ သိရှိရသည်။
လူသားတို့အတွက် အကျိုးထူးပေးသော ဘူးသီးလေးများကို ဝယ်ယူအားပေးစားသုံးခြင်းဖြင့် ခန္ဓာကိုယ်၏လိုအပ်သော အာဟာရအချို့ကိုဖြည့်တင်းနိုင်ပြီး အခြေခံစျေးသည်များ၏ ဘဝကိုလည်း တစ်ဖက်တစ်လမ်းမှ ဖြည့်ဆည်းရာရောက်ပါကြောင်းရေးသားတင်ပြလိုက်ပါသည်။
DOCA(မန္တလေး)