ငါန်းဇွန်မြို့သည် စိုက်ပျိုးရေးကို အခြေခံသောမြို့တစ်မြို့ဖြစ်ပြီး မြစ်ကမ်းဘေးကျေးရွာများ နှင့် ဆည်ရေသောက်ရရှိသော ကျေးရွာများတွင် စားဖိုဆောင်သီးနှံများကိုလည်း အဓိကစိုက် ပျိုးကြကြောင်း သိရသည်။ ချဉ်ပေါင်ပင်၊ ပဲပင်၊ နံနံပင်၊ ပြောင်းဖူးပင်၊ ပဲသီးပင်၊ ခရမ်းချဉ်သီး၊ ငရုတ်သီး၊ ကြက်သွန်နီ၊ ကြက်သွန်ဖြူ စသည်ဖြင့် စိုက်ပျိုးကြပါသည်။ စိုက်ပျိုးသောကျေးရွာများမှာ ဇလုမ္ပကျေးရွာ၊ ငါန်းလွှန့်၊ ကုလားရွာ၊ ဘုရားထူး၊ မြောက်ကျွန်း၊ ရေလည်သောင်၊ တောင်လယ်တောစသည့် တို့တွင် စိုက်ပျိုးကြကြောင်း၊ ထွက်ရှိသော သီးနှံများကို ငါန်းဇွန်မြို့ မြို့မစည်ပင်သာယာဈေးနှင့် မြို့သာမြို့ စည်ပင်သာယာဈေးသို့ အချို့က ဖောက်သည်ပေးပြီး အချို့က ကိုယ်တိုင် ရောင်းချကြကြောင်း၊ ဒေသတွင်း ပဲသီးများ မပေါ်ချိန်တွင် မန္တလေးမြို့ ဝယ်ယူရောင်းချကြောင်း သိရသည်။ ဒီဇင်ဘာလဆန်း ငါန်းဇွန်မြို့ မြို့မစည်ပင်သာယာဈေးတွင် ရောင်းချသော ပဲသီးတောင့်ရှည် ဈေးနှုန်းမှာ(၂၅)ကျပ်သားလျှင် (၁၀၀၀)ကျပ်နှင့် တစ်ပိဿာလျှင် (၃၅၀၀) ကျပ်ဖြင့် အရောင်းအဝယ်ဖြစ်လျက်ရှိကြောင်း သိရသည်။
DOCA(မန္တလေး)