တောင်ငူမြို့ ဈေးများသို့ မြို့၏အနီးရှိ ကျေးရွာများဖြစ်သော ဆိတ်ဖူးတောင်၊ ဒိုးသောင်၊ ရှမ်းဝတီးနှင့် ဗမာဝတီးစသည့်ကျေးရွာများမှ စိုက်ပျိုးထားသည့် ဆောင်းသီးနှံပြောင်းဖူးများ ဈေးကွက်အတွင်း ရောင်းချလျက်ရှိရာ ဈေးနှုန်းအနေဖြင့် မိုးရာသီကာလတွင် ရောင်းချခဲ့သော ပြောင်းဖူးများထက် ဈေးပိုရရှိကြောင်း သိရှိရသည်။
ပြောင်းဖူးမှာ အဖြူနှင့် အဝါ ဟူ၍ နှစ်မျိုးရှိပြီး ပြောင်းဖူးကိုပြုတ်စားခြင်း၊ မီးကင်စားခြင်း၊ ကြော်စားခြင်းတို့ဖြင့် စားသုံးကြပြီး ပြောင်းဖူးအဝါကို ကော်ပြန့်ဖတ်နှင့် လိပ်၍ ပြောင်းဖူးကော်ပြန့်လိပ် ပြုလုပ်စားသုံးခြင်းအပြင် လူငယ်များကြိုက်နှစ်သက်သော မာလာရှမ်းကောစားစရာ ထဲတွင်လည်း ပါဝင်အသုံးပြုကြသည်။
ဈေးနှုန်းများအနေဖြင့် ပြောင်းဖူးအဖြူ အသေးတစ်ဖူးလျှင် ၆၀၀ ကျပ်၊ ၁၀ ဖူးလျှင် ၅၀၀၀ကျပ်၊ အလတ်၁ဖူးလျှင် ၈၀၀ ကျပ်၊ ၁၀ ဖူး လျှင် ၇၀၀၀ ကျပ်၊ အကြီး ၁ ဖူးလျှင် ၁၀၀၀ ကျပ်၊ ၁၀ ဖူးလျှင် ၉၀၀၀ ကျပ် ဖြင့် အဖူးအရွယ်အစားပေါ်မူတည်၍ ရောင်းချလျက်ရှိရာ ပြောင်းဖူးအဝါ အသေး ၁ ဖူးလျှင် ၇၀၀ ကျပ်၊ ၁၀ ဖူးလျှင် ၆၀၀၀ ကျပ်၊ အလတ် ၁ဖူးလျှင် ၉၀၀ ကျပ်၊ ၁၀ ဖူးလျှင် ၈၀၀၀ ကျပ်၊ အကြီး ၁ဖူးလျှင် ၁၂၀၀ ကျပ်၊ ၁၀ ဖူးလျှင် ၁၀၀၀၀ ကျပ်မှ ၁၁၀၀၀ ကျပ်ထိ ဈေးနှုန်းအသီးသီးရှိပြီး ပြောင်းဖူး အဖူး (၁၀၀)ဝယ်ယူမှသာ ဈေးနှုန်းအပြောင်းအလဲရှိကြောင်းကို ပြောင်းဖူးရောင်းချသူများထံမှ သိရှိရပါသည်။
DOCA(ပဲခူး)