ပဲကြီးသည်အဖြူရောင်ဖြစ်ပြီး များသောအားဖြင့် အရွယ်အစားတူညီလေ့ရှိသည်။ ပဲကြီးသည် ချိုသောအရသာရှိသဖြင့် စွတ်ပြုတ်ပြုလုပ်ရာတွင် အသုံးပြုလေ့ရှိပြီး၊ ဟင်းသီးဟင်းရွက် ဟင်းအဖြစ်သော်လည်းကောင်း၊ ပဲအနှစ်အဖြစ်သော်လည်းကောင်း စားသုံးတတ်ကြပါသည်။ ပဲကြီးကို လှော်၍ဖြစ်စေ၊ ကျော်၍ဖြစ်စေ လဘက်ရည်ကြမ်းဖြင့် တွဲဖက်၍အမြည်းအဖြစ် စားသုံးတတ်ကြပါသည်။ ထို့အပြင် ပဲကြီးအိုးကပ်နှပ်၊ သတ်သတ်လွတ်စားသူများအတွက် သက်သက်လွတ်ပဲကြီးနှပ်၊ ပဲကြီး ဆူးပုတ်ရွက်ဟင်းချိုအဖြစ်လည်းကောင်း၊ ပဲကြီးကို အသားမျိုးစုံဖြင့် မိမိတို့ဒေသကိုလိုက်၍ နည်းမျိုးစုံချက်ပြုတ်စားသောက်ကြကြောင်း သိရှိရပါသည်။ ယခုနောက်ပိုင်းတွင် ပဲကြီးကို Ready made ဗူးများဖြင့် ဈေးကွက်ထဲသို့ design မျိုးစုံဖြင့် တံဆိပ်မျိုးစုံ ဒေသထွက်ကုန်အနေဖြင့် ရောင်းချလာကြပါသည်။ ထို့ကြောင့်ပဲကြီးသည် စီးပွားရေးအရတွက်ခြေကိုက်သော သီးနှံဖြစ်လာသည်အလျောက် တစ်နေ့ထက်တစ်နေ့ စိုက်ပျိုးမှုသည် ပိုမိုများပြားလာခဲ့ပါသည်။ ပဲကြီး၏အကျိုးကျေးဇူးများမှာ များပြားလှပါသည်။ ပဲကြီးပင်ကို သစ်စိမ်းမြေသြဇာ (သို့မဟုတ်) ကျွဲစာ၊ နွားစာအဖြစ်အသုံးပြုကြပါသည်။ ပဲကြီးပင်သည် နိုက်ထရိုဂျင် ဖမ်းယူမှုအားကောင်းသော သီးနှံလည်းဖြစ်ပါသည်။ အသီးတောင့်ကို ဟင်းသီးဟင်းရွက် သီးနှံအဖြစ် စားသုံးကြပါသည်။ အစာချေဖျက်မှုအတွက် အလွန်ကောင်းမွန်လှပါသည်။ ပဲကြီးတွင် ကျန်းမာရေးအတွက် အထောက်အကူပြုသော အမျှင်ဓာတ်များ ပါဝင်ခြင်းကြောင့် ဝမ်းချုပ်ခြင်းမှလည်း ကာကွယ်ပေးပါသည်။ ပဲကြီးကို စားသုံးခြင်းဖြင့် ကိုယ်အလေးချိန်ကျစေသည်။ ပဲကြီးတွင် ပရိုတိန်းဓာတ်များ မြင့်မားစွာပါဝင်သောကြောင့် အစာလည်းဆေး ဆေးလည်းအစာအဖြစ် ကျန်းမာရေးအတွက်များစွာ အထောက်အကူဖြစ်စေပါသည်။ ပဲကြီးသည် စိုက်ပျိုးသောနည်းစနစ် အပေါ်မူတည်၍ သော်လည်းကောင်း၊ မျိုးပေါ်လိုက်၍သော်လည်းကောင်း အထွက်နှုန်း ကွာခြားနိုင်ပါသည်။ တစ်ဟက်တာတွင် အသီးတောင့် ၁၀,၀၀၀ ကီလို မှ ၁၂,၀၀၀ ကီလို အထိ ထွက်ရှိနိုင်ကြောင်း သိရှိရပါသည်။ ပဲကြီး ၅ တန် မှ ၁၀ တန်အထိ တိရိစ္ဆာန်အစာ အဖြစ်သော်လည်းကောင်း၊ သစ်ရွက်စိမ်း မြေသြဇာအဖြစ်သော်လည်းကောင်း သစ်စိမ်းဓာတ်များ ရရှိနိုင်ပါသည်။ ပဲကြီးကို ပြည်မြို့ မြို့မစည်ပင် သာယာဈေးကြီးနှင့် အခြားဈေးများတွင် ပဲကြီးအစိမ်း တစ်ဆယ်သားလျှင် ကျပ် (၁၀၀၀) နှုန်းဖြင့် အရောင်းအဝယ်ဖြစ်လျက်ရှိပါသည်။ ပဲကြီးကို Value added ပြုလုပ်၍ ပဲကြီး ready made အခြောက်ပြုလုပ်၍ တစ်ထုတ်လျှင် ကျပ် (၁၀၀၀) ကျပ်ဖြင့် စားသုံးသူများအနေဖြင့် အချိန်မရွေး လွယ်ကူစွာ ဈေးကွက်ထဲတွင် အလွယ်တကူ ဝယ်ယူစားသုံးနိုင်ခြင်းကြောင့် အရောင်းအဝယ်ဖြစ်ကြောင်း သိရှိရပါသည်။
DOCA(ပဲခူး)