တစ်နှစ်မှတစ်ရာသီတွင် စားသုံးရသော ဒန့်သလွန်သီးများမှာ ပုသိမ်ခရိုင်၊ ပုသိမ်မြို့နယ် အတွင်းရှိဈေးများတွင် ရောင်းချလာကြောင်းတွေ့ရပါသည်။ တစ်တောင့်လျှင် ပေါ်ဦးပေါ်ဖျား (၅၀၀) ကျပ်ဖြစ်သော်လည်း ယခုအခါတွင် (၂၀၀) ကျပ်သာရှိပြီး၊ နောင်လှိုင်လှိုင်ပေါလာသည်နှင့်အမျှ ဈေးနှုန်း မှာလည်း ကျဆင်းလာနိုင်ကြောင်းသိရပါသည်။
ဒန့်သလွန်သီးကို ကိုင်းခရမ်းချဉ်သီး၊ ဘူးသီးတို့နှင့်တွဲဖက်၍ချဉ်ဟင်းချက်စားခြင်း၊ ငါးခြောက်၊ ငါးခြောက်ရိုးများနှင့်ချက်စားခြင်းဖြင့် ထမင်းမြိန်စေသော ဟင်းတစ်ခွက်ရရှိစေနိုင်ပါသည်။ ကျန်းမာ ရေးအတွက်လည်းအရမ်းကောင်းမွန်စေပြီး ဒန့်သလွန်သီးစားသုံးခြင်းဖြင့် သွေးတိုးကျစေခြင်း၊ မျက်လုံး ကျန်းမာစေနိုင်သည့်အပြင် ကျောက်ကပ်ကိုလည်း အထူးကောင်းမွန်စေကြောင်းသိရပါသည်။ ဒန့်သလွန်သီးစေ့၊ ဒန့်သလွန်ရွက်အပြင်၊ ဒန့်သလွန်ခေါက်အထိပါ ကျန်းမာရေးအတွက် အသုံးဝင်သော အပင်တစ်မျိုးဖြစ်ကြောင်း သိရပါသည်။ ထို့ကြောင့် ရာသီပေါ်ဒန့်သလွန်သီးကို ကျန်းမာရေးအတွက် လည်းကောင်း၊ ထမင်းမြိန်စေသော ဟင်းတစ်ခွက်အဖြစ်လည်းကောင်း စားသုံးနိုင်သော အစား အစာတစ်ခုဖြစ်ကြောင်းသိရှိရပါသည်။
DOCA(ဧရာဝတီ)