ဧရာဝတီတိုင်းဒေသကြီး၊ ညောင်တုန်းမြို့နယ်၊ တာကွေ့ကျေးရွာ၌ လယ်ကိုင်းစိုက်ပျိုးခြင်း လုပ်ကိုင်ကြပြီး ပဲကြီး၊ ပြောင်း၊ မတ်ပဲ၊ ပဲတီစိမ်း စသည့်သီးနှံများ၊ ဟင်းသီးဟင်းရွက်သီးနှံများကို နှစ်စဉ်စိုက်ပျိုးလျက်ရှိရာ ဆောင်းသီးနှံတစ်မျိုးဖြစ်သည့် ပဲကြီးသီးနှံကို စိုက်ဧက ၁၉၄ ဧကခန့် စိုက်ပျိုးထားကြောင်း သိရသည်။
ပဲကြီးသီးနှံကို ၂၀၂၅ခုနှစ် နိုဝင်ဘာလတွင် စတင်စိုက်ပျိုး၍ စိုက်ပျိုးပြီး ၄ လခန့် အကြာတွင် ခူးဆွတ်ရိတ်သိမ်းရကြောင်း၊ ပဲကြီးစိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် စိုက်ပျိုးကြပြီး တစ်ဧကလျှင် မျိုး ၁၀ ပြည်ခန့် ကုန်ကျကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစုများနှင့် လုပ်သားခအပါအဝင် တစ်ဧကလျှင် စုစုပေါင်းငွေကျပ် ၇ သိန်းခန့်ကုန်ကျကြောင်း၊ ယခင်နှစ် အထွက်နှုန်းအနေဖြင့် တစ်ဧကလျှင် ပဲကြီး ၁၀-၁၂ တင်း ခန့်ထွက်ရှိပြီး ပဲကြီးတစ်တင်း လျှင် ငွေကျပ် ၉၀၀၀၀- ၁၀၀၀၀၀ ဖြင့် အရောင်းအဝယ်ဖြစ်ခဲ့ရာ အကျိုးအမြတ်အနေဖြင့် ငွေကျပ် ၅၀၀၀၀၀ ခန့်ရရှိခဲ့ကြောင်း၊ ဈေးကွက်အနေဖြင့် ပဲကြီးသီးနှံများကို ညောင်တုန်းပဲပွဲရုံများနှင့် ပဲကြော်ဖိုလုပ်ငန်းများ၊ ဟင်းသီးဟင်းရွက်ဈေးကွက်သို့ တင်ပို့ရောင်းချကြကြောင်း ပဲကြီးအစို ၁ပြည် လျှင် ၃၅၀၀-၄၀၀၀ ကျပ် ဖြင့်ရောင်းချကြောင်း သိရသည်။
အရောင်းအဝယ်ဖြစ်မှုအနေဖြင့် မတ်လတွင် ပဲကြီးတစ်တင်းလျှင် ငွေကျပ် ၁၀၀၀၀၀ ဖြင့် အရောင်းအဝယ်ဖြစ်လျက်ရှိကြောင်း၊ ယခုအချိန်တွင် ပဲကြီးသီးနှံစိုက်ခင်းများ အောင်မြင်ဖြစ်ထွန်းလျက်ရှိပြီး ဒေသတွင်း ပဲသီးခူးသူများလည်း ဝင်ငွေရရှိကြောင်း သိရပြီး၊ သီးနှံပေါ်ချိန်တွင် အထွက်နှုန်းကောင်းမွန်၍ ဈေးကောင်းရရှိပါက အကျိုးအမြတ်များ ပိုမိုရရှိနိုင်မည်ဖြစ်ကြောင်း ပဲကြီးစိုက်တောင်သူတစ်ဦးထံမှ သိရှိရပါသည်။
DOCA(ဧရာဝတီ)