တနင်္သာရီတိုင်းဒေသကြီး၊ မြိတ်မြို့ပေါ်တွင် မိုးရာသီတွင် ရာသီစာသီးနှံများ အများအပြား ရောင်းဝယ်စည်ကားလျက်ရှိပြီး အနံ့မွှေးပြီးအရသာရှိသော သြဇာသီးသည်လည်း အရောင်းအဝယ် ကောင်းလျက်ရှိပါသည်။ သြဇာသီးသည် အစိမ်းရောင်ရှိပြီး မှည့်လာချိန်တွင် အနည်းငယ်အဝါရောင် သန်းကာအသားမှာနူးညံ့၍ အနံ့မွှေးကြိုင်သောသစ်သီးတစ်မျိုးဖြစ်ပါသည်။ အရသာချိုမြိန်ပြီး သဘာဝသကြားဓာတ်ပါဝင်မှု မြင့်မားသောကြောင့် ကလေးများမှစ၍ လူကြီးများအထိ နှစ်သက်စွာ စားသုံးကြပါသည်။ မြိတ်မြို့ပေါ်ရှိစျေးများနှင့် သစ်သီးဆိုင်များတွင် သြဇာသီးကို ဒေသထွက်သီးနှံများနှင့် အတူရောင်းချလျက်ရှိပြီး ရှမ်းပြည်နယ်မှ သယ်ယူရောင်းချကြကြောင်း သိရှိရပါသည်။ ရာသီစာဖြစ်သောကြောင့် ဝယ်လိုအားမြှင့်တက်လျက်ရှိကြောင်း သိရပါသည်။ ဒူးရင်းသြဇာနှင့် ဆင်သြဇာ(မြိတ် ဒေသအခေါ်-သဲသြဇာ) ဆိုပြီးနှစ်မျိုးရှိပြီး မြိတ်ဒေသတွင် ဒူးရင်းသြဇာမှာပိုပြီး လူကြိုက်များကြကြောင်း သိရသည်။
သြဇာသီးတွင် ဗီတာမင် C၊ ဗီတာမင် B6၊ အမျှင်ဓာတ်များစွာ ပါဝင်သဖြင့် ကိုယ်ခံအားကောင်းမွန်စေရန်၊ အစာချေစနစ်ကို အထောက်အကူပြုရန်နှင့် စွမ်းအင်ဖြည့်တင်းပေးနိုင်ရန် အကျိုးပြုသော သစ်သီးတစ်မျိုးအဖြစ် သတ်မှတ်ထားကြပါသည်။ မြိတ်မြို့ပေါ်ရှိ စျေးကွက်တွင် သြဇာသီး၏ စျေးနှုန်းများမှာ အရွယ်အစားနှင့် အရည်အသွေးအလိုက် တစ်လုံးလျှင် (၅၀၀၀)မှ (၆၀၀၀) အထိ ရောင်းချနေကြောင်းသိရှိရပါသည်။
DOCA(တနင်္သာရီ)