ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် ဒေးဒရဲမြို့နယ်စားသုံးသူရေးရာဦးစီးဌာနတို့ ပူးပေါင်း၍ (၂.၄.၂၀၂၆)ရက်နေ့၊ နေ့လယ်(၁၂:၀၀)နာရီအချိန်တွင် ထုတ်ကုန်ဘေးကင်းလုံခြုံမှယုံကြည်စိတ်ချစားသုံးသူဘ၀အသိပညာပေး Talk Show ကို ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (CommunityCentre)ခန်းမ၌ကျင်းပပြုလုပ်ခဲ့သည်။
အဆိုပါ Talk Show အခမ်းအနားတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ဒုတိယဦးစီးမှူးဒေါ်အေးမြမွန်က ယခု Talk Show ပြုလုပ်ရခြင်း၏ရည်ရွယ်ချက်ကိုပြောကြားခဲ့ပြီး၊ စားသုံးသူရေးရာဦးစီးဌာနမှ ဒုတိယ-လက်ထောက်ကြီးကြပ်ရေးမှူးဦးခန့်စည်သူက ထုတ်ကုန်များဘေးကင်းလုံခြုံမှုရှိစေရန် စားသုံးသူရေးရာဦးစီးဌာနအနေဖြင့် ကျောင်းများ၊ ဈေးများ၊ ကျေးရွာများ၊ ရပ်ကွက်များ၊ အသင်းအဖွဲ့များ၊ ဌာနဆိုင်ရာများနှင့် တက္ကသိုလ်အသီးသီးတွင် စားသုံးသူကာကွယ်ရေးအသိပညာပေးလုပ်ငန်းများကို ဆောင်ရွက်လျက်ရှိသလို စက်လုပ်/အလုပ်ရုံများမှာလည်း ထုတ်ကုန်လုံခြုံစိတ်ချရမှုရှိစေရေး အသိပညာပေးဟောပြောပွဲများကို ဆောင်ရွက်လျက်ရှိပြီး ဒါအပြင်ကုန်စည်နှင့် ၀န်ဆောင်မှုများအား ဈေးကွက်စောင့်ကြည့်စစ်ဆေးခြင်းကို သက်ဆိုင်ရာမိတ်ဖက်ဌာနများနှင့်ပေါင်းစပ် ဆောင်ရွက်လျက်ရှိပါကြောင်းနှင့် စားသုံးသူကာကွယ်ရေးဥပဒေ အခန်း(၁၁)၊ ကုန်စည်နှင့်စပ်လျဉ်း၍ အာမခံချက်ပေးခြင်းနှင့် ပတ်သက်ပြီး ပုဒ်မခွဲ(၂၂)နှင့်(၂၃)၊ ဒါအပြင်အခန်း(၁၂) ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူကတောင်းဆိုနိုင်သည့် အခွင့်အရေးများမှ ပုဒ်မခွဲ(၂၄)နှင့် (၂၅)တို့ကို ရှင်းလင်းပြောကြားခဲ့ပြီး စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေပါကုန် အညွှန်းအမှတ်အသားပါအချက်များကိုအလေးထားဆောင်ရွက်မှသာ အရည်အသွေးကောင်းမွန်သော ကုန်ပစ္စည်းများကို ထုတ်လုပ်နိုင်မှာဖြစ်ပြီး စားသုံးသူများအတွက်လည်း ဘေးအန္တရာယ်ကင်းရှင်းစေမှာဖြစ်ပြီး ထုတ်ကုန်ဘေးကင်းလုံခြုံမှ ယုံကြည်စိတ်ချစားသုံးသူဘ၀ကို ရရှိစေနိုင်မှာဖြစ်ကြောင်း သိရှိရပါသည်။
DOCA(ဧရာဝတီ)