စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးအနေဖြင့် ဝန်ကြီးဌာန၏မျှော်မှန်းချက်များ၊ ရည်မှန်းချက်များကို လိုက်ပါအကောင်အထည်ဖော် ဆောင်ရွက်လျက်ရှိပါသည်။ စားသုံးသူရေးရာဦးစီးဌာနနှင့် မြန်မာနိုင်ငံဆန်စပါး အသင်းချုပ်( MRF)တို့ ပူးပေါင်း၍ မြန်မာဆန်စပါးအွန်လိုင်း( My RO)ကို ၂၀၂၃ခုနှစ်၊ နိုဝင်ဘာလ ၃ ရက်နေ့မှ စတင်အကောင်အထည်ဖော် လျက်ရှိပြီး ဒီဂျစ်တယ်စနစ်ဖြင့် မှတ်ပုံတင်ခြင်း၊ သက်တမ်းတိုးခြင်းနှင့် ဆန်စပါးသိုလှောင်မှုများကို အချိန်နှင့်တပြေးညီ သိရှိနိုင်ရန်အတွက် စနစ်အတွင်းသို့ ကုန်ရ၊ ကုန်ထုတ်၊ ကုန်လက်ကျန်စာရင်း ဖြည့်သွင်းခြင်းလုပ်ငန်းများကို ဆောင်ရွက်လျက်ရှိကြောင်း သိရပါသည်။
စစ်ကိုင်းတိုင်းဒေသကြီးအနေဖြင့် ၂၀၂၆ခုနှစ်၊ ဇွန်လ ၁၀ ရက်နေ့အထိ သိုလှောင်ရုံ စုစုပေါင်း (၁၈၈)လုံးအား မှတ်ပုံတင်ခြင်းလုပ်ငန်းကို ဆောင်ရွက်နိုင်ခဲ့ပြီး လုပ်ငန်းရှင်များအား နည်းပညာရပ်ဆိုင်ရာ အကူအညီများကို ကူညီဆောင်ရွက်ပေးလျက်ရှိပါသည်။ အဆိုပါသိုလှောင်ရုံများနှင့် ပတ်သက်၍ ၂၀၂၆ခုနှစ်၊ ဇွန်လ ၁၀ ရက်နေ့တွင် ဆန်စက်၊ ဆန်ဆိုင်နှင့် ဆန်ကုန်သည်များအား မြန်မာဆန်စပါးအွန်လိုင်း ( My RO) စနစ်အတွင်းသို့ ကုန်ရ၊ ကုန်ထုတ်နှင့် ကုန်လက်ကျန်စာရင်းများ စနစ်တကျ ဖြည့်သွင်းတတ်စေရန် အသိပညာပေးဆွေးနွေးခဲ့ပြီး လုပ်ငန်းရှင်များမှ သိရှိလိုသည့် အချက်များအပေါ် သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲ တာဝန်ခံအရာရှိမှ ပြန်လည်ဖြေကြားပေးခဲ့ကြောင်း သတင်းရရှိပါသည်။
DOCA(စစ်ကိုင်း)