စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၌ ယခုတစ်ပတ်အတွင်း နှမ်းနက်၊ နှမ်းဖြူနှင့် နေကြာသီးနှံများ အရောင်းအဝယ်ဖြစ်လျက်ရှိသော်လည်း တောင်သူများ၏ လက်ကျန် ပစ္စည်းနည်းပါးလာခြင်းနှင့် ဝယ်လိုအားပုံမှန်သာရှိနေခြင်းတို့ကြောင့် ဈေးကွက်အခြေအနေမှာ တည်ငြိမ်လျက်ရှိကြောင်း၊ ဒေသခံကုန်သည်များထံမှ သိရသည်။
ကန့်ဘလူမြို့နယ်၌ နှမ်းနက်တစ်တင်းလျှင် ကျပ် ၁၈၇၀၀၀၊ နှမ်းဖြူတစ်တင်းလျှင် ကျပ် ၁၀၄၀၀၀နှင် နေကြာတစ်တင်းလျှင် ကျပ် ၅၆၀၀၀ ဖြင့် အရောင်းအဝယ်ဖြစ်လျက်ရှိကြောင်း သိရသည်။ မန္တလေးဈေးကွက်နှင့် နှိုင်းယှဉ်ပါက ကန့်ဘလူမြို့နယ်မှ သီးနှံများမှာ သယ်ယူပို့ဆောင် ရေးကုန်ကျစရိတ်နှင့် အရည်အသွေးအလိုက် ဈေးနှုန်းအနည်းငယ်ကွာခြားမှုရှိသော်လည်း အခြေခံ ဈေးနှုန်းမှာတည်ငြိမ်နေကြောင်း သိရသည်။ နှမ်းနက်နှင့် နှမ်းဖြူတို့သည် ဆီစက်လုပ်ငန်းများနှင့် ပြည်ပတင်ပို့မှုလိုအပ်ချက်ကြောင့် ဝယ်လိုအားဆက်လက်ရှိနေပြီး နေကြာမှာလည်း စားသုံးဆီထုတ် လုပ်ရေးလုပ်ငန်းများ၏ ဝယ်ယူမှုကြောင့်ပုံမှန် အရောင်းအဝယ်ဖြစ်လျက်ရှိသည်။
ဒေသခံကုန်သည်တစ်ဦးက “လက်ရှိမှာ တောင်သူလက်ထဲသီးနှံများ လက်ကျန် နည်းသော်လည်း ပုံမှန်အရောင်းအဝယ်ဖြစ်နေကြောင်း၊ မန္တလေးဈေးကွက်နှင့် အရောင်းအဝယ်ပြု လုပ်သည့်အတွက် ဈေးနှုန်းအနည်း ငယ် အတက်အကျရှိနိုင်ပြီး လတ်တလောတော့ တည်ငြိမ် နေကြောင်း ” သိရသည်။
ယခုမိုးရာသီကာလအတွင်း စိုက်ပျိုးရေးလုပ်ငန်းများ ဆက်လက်ဆောင်ရွက် နေပြီဖြစ်ရာ ရာသီဥတုအခြေအနေနှင့် မန္တလေးဈေးကွက်ဝယ်လိုအားအပေါ်မူတည်၍ နှမ်းနှင့်နေကြာဈေးနှုန်းများ အပြောင်အလဲရှိလာနိုင်ကြောင်း သီးနှံရောင်းဝယ်ရေးလုပ်ငန်းရှင်များက သုံးသပ်ထားသည်။ ကန့်ဘလူမြို့နယ်တွင် ဆီထွက်သီးနှံများ ဈေးကွက်ခိုင်မာလာခြင်းကြောင့် တောင်သူများအနေဖြင့် မိုးရာသီနှင့် လာမည့်ဆောင်းရာသီ စိုက်ပျိုးရာသီများ၌ ဆီထွက်သီးနှံ စိုက်ပျိုးထုတ်လုပ်မှုကို ပိုမိုတိုးမြှင့်လုပ်ကိုင်ရန် ပြင်ဆင်လျက်ရှိကြောင်း သတင်းရရှိသည်။
DOCA(စစ်ကိုင်း)