ပြည်သူများ ဘေးကင်းလုံခြုံပြီး အရည်အသွေးပြည့်မီသော အဖျော်ယမကာနှင့် အချိုရည်များကို ဝယ်ယူစားသုံးနိုင်စေရေးအတွက် မြို့နယ်အထွေထွေအုပ်ချုပ်ရေးဦးစီးဌာနနှင့် မြို့နယ်စားသုံးသူရေးရာဦးစီးဌာန၊ မြို့နယ်ကျန်းမာရေးဦးစီးဌာနတို့ ဦးဆောင်၍ ၂၀၂၆ ခုနှစ်၊ ဇူလိုင်လ (၁၀) ရက်နေ့တွင် မြို့နယ်အတွင်းရှိ စတိုးဆိုင်များ၊ ကုန်စုံဆိုင်များနှင့် အရောင်းဆိုင်များ၌ ရောင်းချလျက်ရှိသော အဖျော်ယမကာနှင့် အချိုရည်အမျိုးမျိုးအား ကွင်းဆင်းစစ်ဆေးခဲ့ကြောင်း သိရသည်။
ကွင်းဆင်းစစ်ဆေးရာတွင် ကုန်ပစ္စည်းများ၌ မြန်မာဘာသာဖြင့် ကုန်အညွှန်းအမှတ်အသား ပြည့်စုံစွာဖော်ပြထားခြင်း ရှိ/ မရှိ၊ ထုတ်လုပ်သည့်ရက်စွဲနှင့် သက်တမ်းကုန်ဆုံးရက် ဖော်ပြထားမှု၊ စားသုံးရန်သင့်လျော်သော အခြေအနေရှိ/ မရှိ၊ သိုလှောင်ရောင်းချမှု အခြေအနေနှင့် သက်တမ်းလွန်ကုန်ပစ္စည်းများ ရောင်းချခြင်းရှိ/ မရှိတို့ကို စိစစ်စစ်ဆေးခဲ့ကြောင်း သိရသည်။
ထို့အပြင် အရောင်းဆိုင်ပိုင်ရှင်များအား စားသုံးသူကာကွယ်ရေးဥပဒေနှင့် အညီ ကုန်အညွှန်းအမှတ်အသား ပြည့်စုံသော ကုန်ပစ္စည်းများကိုသာရောင်းချရန်၊ သက်တမ်းလွန်နှင့် အရည်အသွေးမပြည့်မီသော ကုန်ပစ္စည်းများကို မရောင်းချရန်နှင့် စားသုံးသူများ၏ ကျန်းမာရေးနှင့် ဘေးကင်းလုံခြုံရေးကို အလေးထားဆောင်ရွက်ကြရန် အသိပညာပေးဆွေးနွေးခဲ့ကြောင်း သိရှိရပါသည်။
DOCA(ဧရာဝတီ)