ကယားပြည်နယ်တွင် ပြောင်းကိုအဓိကစိုက်ပျိုးပြီး အစေ့ထုတ်ပြောင်းနှင့် ဖူးစားပြောင်း (၂)မျိုးစလုံးစိုက်ပျိုးကြပါသည်။ ဖူးစားပြောင်းတွင် ရှမ်းပြောင်းဖူးနှင့် သကြားပြောင်းဖူးဟူ၍ ရှိပါသည်။ အစေ့ထုတ်ပြောင်းကို မိုးရာသီနှင့် ဆောင်းရာသီတွင်စိုက်ပျိုးကြပြီး ဖူးစားပြောင်းများကို (၁၂) ရာသီ စိုက်ပျိုးကြပြီး (၃)လကြာလျှင် ဈေးကွက်သို့ ရောင်းချနိုင်၍ ငွေပေါ်လွယ်သောသီးနှံဖြစ်ပါသည်။ ရှမ်းပြောင်းဖူးနှင့် သကြားပြောင်းဖူးကို လွိုင်ကော်မြို့နယ် မှုံပြာ၊ လင်ဖုံလေး၊ လွိုင်လင်လေး၊ လောပိတကျေးရွာများ နှင့် နန်းမယ်ခုံကျေးရွာများတွင် စိုက်ပျိုးထွက်ရှိလျက်ရှိပြီး ယခုဒီဇင်ဘာလတတိယပတ် တွင် ဈေးကွက်အတွင်း ရှမ်းပြောင်းဖူး တစ်ဖူးလျှင် (၃၅၀) (၄၀၀) ကျပ်၊ သကြားပြောင်းဖူး တစ်ဖူး လျှင် (၅၀၀) (၆၀၀) ကျပ်ဖြင့် ရောင်းချလျက်ရှိ၍ ယခင်နိုဝင်ဘာလတတိယပတ်နှင့် ဈေးနှုန်းနှိုင်းယှဉ်လျှင် အတက်အကျမရှိဘဲ ဈေးနှုန်းတည်ငြိမ်လျက်ရှိရာ ပြောင်းဖူးစိုက်ပျိုးရောင်းချသူများ ဈေးကောင်းရ၍ အရောင်းအဝယ်သွက်လျက်ရှိကြောင်း နောင်ယားဈေးရှိ ပြောင်းဖူးရောင်းချသူတစ်ဦးထံမှ သိရပါသည်။
DOCA(ကယား)