မန္တလေးတိုင်ဒေသကြီး၊ တံတားဦးခရိုင်၊ ငါန်းဇွန်မြို့နယ်သည် လယ်ယာစိုက်ပျိုးရေးကို လုပ်ကိုင်သော မြို့နယ်တစ်ခုဖြစ်ပြီး ဒေသခံများသည် ရာသီအလိုက် ပဲ၊ ပြောင်း၊ နှမ်း၊ မြေပဲ၊ ဝါ၊ ဂျုံ နှင့် စားဖိုဆောင်သီးနှံများကို အဓိကထားစိုက်ပျိုးလုပ်ကိုင်ကြပါသည်။ စိုက်ပျိုးသီးနှံများမှ ဆီထွက်သီးနှံ ဖြစ်သော မြေပဲသီးနှံကို မိုးနှင့်ဆောင်းနှစ်ရာသီတွင်စိုက်ပျိုးလျက်ရှိရာ ၂၀၂၆-၂၀၂၇ ခုနှစ် မိုးမြေပဲ (၁၈၉၇၀)ဧက စိုက်ပျိုးရန် လျာထားခဲ့ပြီး၊ စိုက်ပျိုးမှုအနေဖြင့် ဇူလိုင်လကုန်ထိ (၅၆၀၂)ဧကစိုက်ပျိုးပြီး စီးပြီ ဖြစ်ကြောင်း သိရသည်။ ယခင်နှစ် စိုက်ပျိုးမှုအနေဖြင့် ((၁၉၈၄၃)ဧက စိုက်ပျိုးခဲ့ကြောင်း၊ ထွက်ရှိမှုအနေဖြင့် အထွက်နှုန်း(၄၉.၃၅)တင်းနှင့် အထွက်တင်းပေါင်း (၉၇၉၂၅၂)တင်း၊ ဆောင်းမြေပဲ လျာထားဧက (၃၃၂၃)ဧကနှင့် စိုက်ပျိုးဧက (၃၃၀၃)ဧက စိုက်ပျိုးရိတ်သိမ်းပြီး အထွက်နှုန်းမှာ (၆၃.၁၀)တင်းနှင့် အထွက်တင်းပေါင်း (၂၀၈၄၁၉)တင်း ထွက်ရှိကြောင်း သက်ဆိုင်ရာဌာနစာရင်းအရ သိရသည်။ မျိုးအသုံးချမှုအနေဖြင့် တစ်ဧကလျှင်(၁၈)ပြည်ခန့် စိုက်တန်းချစနစ်ဖြင့် စိုက်ပျိုးကြကြောင်း၊ မျိုးဈေးနှုန်းမှာ မြေပဲဆံ တစ်ပိဿာလျှင် (၁၂၀၀၀/၁၃၀၀၀)ကျပ်ဖြစ်ကြောင်း သိရသည်။ စိုက်ပျိုးသော မျိုးများမှာ ဆင်း-၁၁၊ SP-121၊ ကျောင်းကုန်းမျိုးနှင့် ဒေသမျိုးများကိုသာ အဓိကထား စိုက်ပျိုးကြောင်း သိရသည်။ မိုးမြေပဲစိုက်ပျိုးမှုအများဆုံးအနေဖြင့် စီထိန်း၊ တမာပင်၊ အောက်ရိုး၊ ရွာသာ၊ နတ်စိမ်း၊ ထနောင်းပင်၊ မြို့သာ၊ သရက္ကန်၊ အောင်ချမ်းသာကျေးရွာ နှင့်ကုန်းသာကျေးရွာ စသည့်ကျေးရွာများ ဖြစ်ပါသည်။ မြေပဲတစ်ဧကစိုက်ပျိုးမှု ကုန်ကျစရိတ်အနေဖြင့် မျိုး၊ မြေယာပြုပြင်မှု၊ သွင်းအားစု၊ လုပ်သားခများအပါအဝင် (၄၅၀၀၀၀)ကျပ်ဝန်းကျင်ခန့် ကုန်ကျမှုရှိပါသည်။ တောင်သူအကျိုးအမြတ်အ နေဖြင့် (၃၀၀၀၀၀)ကျပ် ဝန်းကျင်သာရှိပြီး ဒေသထွက်မြေပဲ များကို ရောင်းဝယ်မှုဈေးကွက်အနေဖြင့်မန္တလေးမြို့နှင့်ကျောက်ဆည်မြို့များသို့တောင်သူများဈေးဝယ်လိုက်ရင်းဖြင့်သော်လည်းကောင်း၊ ကားတင်ပေး၍ သော် လည်းကောင်း အများဆုံးရောင်းချကြပါသည်။ တောင်သူများအတွက် သီးနှံစိုက်ပျိုး ရာတွင် ရာသီဥတုကောင်းမွန်ရန် လိုအပ်သလို ရေခံမြေခံနှင့်မျိုးစေ့များလည်း ကောင်းမွန်၍ ဈေးကွက် ခိုင်မာမှုရှိမှသာ သင့်တင့်လျှောက်ပတ်သော အကျိုးအမြတ်များရရှိနိုင်မည်ဖြစ်ကြောင်း သိရှိရပါသည်။
DOCA(မန္တလေး)