ဧရာဝတီတိုင်းဒေသကြီး၊ ဟင်္သာတကုန်စည်ဒိုင်တွင် ဒီဇင်ဘာလ ၁၃ ရက်မှစ၍ မတ်ပဲအသစ်များ ဈေးကွက်ဝင်ရောက်လာပြီး မတ်ပဲအသစ် တစ်တင်းလျှင် ၆၀၀၀၀ ကျပ်၊ အဟောင်းတစ်တင်းလျှင် ၅၉၅၀၀ ကျပ် ဖြင့်အရောင်းအဝယ်ဖြစ်လျက်ရှိပါသည်။ ယခုနှစ် ဟင်္သာတခရိုင်တွင် ဧရာဝတီမြစ်ရေသည် စိုးရိမ်ရေမှတ်ထက် ကျော်လွန်ခြင်းမရှိသဖြင့် မြေနုကျွန်းများ ရေနစ်မြုပ်မှုမရှိသည့်အတွက် ဇူလိုင်လကုန်ကပင် ကိုင်းသီနှံများ စိုက်ပျိုးကြာရာ မြေနုကျွန်းရှိသော ဟင်္သာတ၊ ဇလွန်၊ အင်္ဂပူ၊ မြန်အောင်၊ ကြံခင်းမြို့နယ်များမှ မတ်ပဲအသစ်များ ဒီဇင်ဘာလဆန်းတွင် စတင်ထွက်ရှိပြီး ဈေးကွက်ဝင်ရောက်လာခြင်းဖြစ်ပါသည်။ ယခင်နှစ် ကာလတူအချိန်တွင် မတ်ပဲတစ်တင်းလျှင် ၄၂၀၀၀ ကျပ်ခန့်သာရှိသည့်အတွက် ယခုနှစ်တွင် ၁၈၀၀၀ ကျပ်ခန့် ဈေးပိုရရှိပြီး တောင်သူများဈေးကောင်းရလျက်ရှိပါသည်။ ဟင်္သာတကုန်စည်ဒိုင်တွင် နေ့စဉ် မတ်ပဲ(အဟောင်း) အိတ် ၁၂၀၀ ခန့်၊ မတ်ပဲ(အသစ်) အိတ် ၂၀၀ ခန့် အရောင်းအဝယ်ဖြစ်လျက်ရှိပါ သည်။
DOCA(ဧရာဝတီ)