ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်အတွင်း တိုင်းရင်းဆေးဝါးကုန်ကြမ်းဖြစ်ပြီး ဈေးကွက်ရှိသော တောက်တာဥများ ရောင်းဝယ်လျက်ရှိရာ ဒေသခံကုန်သည်များမှ သာယာဝတီမြို့နယ်၊ ဝဲကြီးဆည်ဘောင်တဝိုက် ကျေးရွာများတွင် အဝယ်ဒိုင်ဖွင့်လှစ်ကာ တောက်တာဥ အများဆုံး ဝယ်ယူလျက် ရှိပါသည်။ ဖေဖော်ဝါရီလမှ ဧပြီလ ပထမပါတ်အထိ လှိုင်လှိုင်ရရှိပြီး ကုန်ချိန်ပိဿာ (၂သောင်း၊ ၃သောင်း) အထိရရှိကြောင်း သိရှိရသည်။
တောက်တာဥ ပရေဆေးကုန်ကြမ်းအခြောက် ရရှိရန်အတွက် တောက်တာဥအစိုကို အရင်ဆုံး ပြုတ်ရ ပါသည်။ ပြုတ်ပြီးမြေပြင်ကျယ်တွင် ၂ပါတ်ခန့်နေလှန်းပေးရပါသည်။ တောက်တာဥအစို ခြောက်ပိဿာ နေလှန်းပါက အခြောက် တစ်ပိဿာခန့်ရရှိပြီး အခြောက်တစ်ပိဿာ (၅၀၀၀) ကျပ်မှ (၅၅၀၀) ကျပ်အထိ ဈေးရရှိသဖြင့် မန္တလေး၊ ပြည် လက္ကားဒိုင်များသို့ တင်ပို့ရောင်းချရာ ကုန်ချိန်ရသ၍ ဈေးကွက်ရှိကြောင်း သိရပါသည်။
ဈေးကွက်အရောက် တောက်တာဥအခြောက်ကုန်ကြမ်းများရရှိရန် လုပ်သားအမျိုးသား(၂)ဦး၊ အမျိုးသမီး (၁) ဦး အသုံးပြုရပြီး အမျိုးသားတစ်ဦး (၇၀၀၀) ကျပ် ၊ အမျိုးသမီးတစ်ဦး (၅၀၀၀) ကျပ် ပေးရကြောင်း ၊ တောက်တာဥအခြောက် တစ်ပိဿာ ရရှိရန် ကုန်ကျစရိတ်မှာ (၄၀၀၀) ကျပ် ခန့်ဖြစ်ပြီး အခြောက်တစ်ပိဿာ ပေါက်ဈေး မှာ (၅၅၀၀) ကျပ် ဖြစ်သဖြင့် တစ်ပိဿာ (၁၅၀၀) ကျပ် အမြတ်အစွန်းရှိကြောင်း သိရပါသည်။ လုပ်ငန်းကာလ (၃) လအတွင်း အစိုပိဿာ (၃၀၀၀၀) ခန့်ထွက်ရှိ၍ အခြောက်ပိဿာ (၅၀၀၀)ခန့် ရရှိသဖြင့် အကျိုးအမြတ်အားဖြင့် (၇၅) သိန်းခန့်ရရှိနေသော ဈေးကွက်ရှိ သီးနှံဖြစ်ပါကြောင်း သိရှိရပါသည်။
DOCA(ပဲခူး)