မန္တလေးတိုင်းဒေသကြီး၊ကျောက်ဆည်ခရိုင်သည် ရေးစီးရေလာနှင့် မြေဆီမြေသြဇာကောင်း မွန်သောဒေသဖြစ်သည့်အလျှောက် စပါး၊ပဲမျိုးစုံ၊ပြောင်း၊ဆီထွက်သီးနှံများနှင့် ဟင်းသီးဟင်းရွက် သစ်သီးဝလံများအပြင် လေ့ကျပေါက် ဆေးဘက်ဝင်အပင်များလည်း ပေါက်ရောက်ရာဒေသဖြစ်ပါ သည်။ ၄င်းအပင်များအနက် ဆေးဘက်ဝင်အပင်တစ်မျိုးဖြစ်သည့် ဟင်းငုတ်ပွင့် (ခ) သခွပ်ပွင့်များမှာ ယခုလို မိုးဦးကျအချိန်များတွင် အများဆုံးပွင့်ကြပါသည်။ ဟင်းငုတ်ပင်များ အများဆုံးပေါက်ရောက်သော အညာဒေသတွင် ဟင်းငုတ်ပွင့်များကို စျေးများတွင် ရောင်းချလျက်ရှိပါသည် ။ ဆေးဘက်ဝင် အရသာရှိသော ဟင်းငုတ်ပွင့်အခြောက် လက်လီရောင်းစျေးအနေဖြင့် (၁၀)ကျပ်သားလျှင်(၁၀၀၀/-) ကျပ်ဖြင့်ရောင်းချကြသလို စျေးများတွင် အပုံလေးများပုံ၍ (၁)ပုံလျှင် (၂၀၀/-)ကျပ် ၊ (၃)ပုံယူလျှင် (၅၀၀/-)ကျပ်ဖြင့် ကိုယ်စားချင်သလောက် တစ်နိုင်ဝယ်ယူ၍ စားသုံးကြပါသည် ။ ဖောက်သည်စျေးအနေဖြင့် ဟင်းငုတ်ပွင့်အခြောက် (၁)ပိဿာလျှင်(၇၀၀၀/-)ကျပ်ဖြင့် ဝယ်ယူရောင်းချကြပါသည် ။ ဟင်းငုတ်ပင် အပင်ကြီး(၂-၃)ပင်ရှိသောသူများမှာ ရာသီပေါ်ချိန်တွင် (၁)နှစ်လျှင် ဟင်းငုတ်ပွင့် အခြောက်(၆-၇)ပိဿာအထိရရှိကြောင်း၊အိမ်သုံးစရိတ်များရရှိသည့်အပြင် ဟင်းစားအတွက်လည်း မပူရကြောင်း၊ဟင်းငုတ်ပွင့်ကို ပြုတ်၍တို့စားကြသလို အပွင့်ကိုပြုတ်ပြီး ဆီချက်၍ မြေပဲဆံများဖြင့်လည်း သုပ်၍စားကြပါသည်။ ဟင်းငုတ်ပွင့်ကိုရေစိမ်ပြီး ကြာဇံဖြင့်လည်းကြော်၍လည်း စားသုံးကြပါသည်။ ဟင်းငုတ်ပွင့်အခြောက်ကို ရေနွေးထဲသို့ခပ်၍စားသုံးပါက အဆိပ်အတောက်ကို ပြေစေပါသည်။ ဘီပိုး ၊ စီပိုးများကိုလည်း ဟင်းငုတ်ပွင့်စားသုံးခြင်းဖြင့်ပြေပျောက်လျော့နည်းစေနိုင်ပါသည် ။ အဆိပ်ရှိသော မြွေ၊ကင်းများကိုက်ပါက အခေါက်ကိုဝါးစား၍ အဆိပ်ကိုထိန်းထားနိုင်ကြောင်း၊ ကိုယ်လက် အင်္ဂါများကိုက်ခဲ့ပါက အခေါက်ကိုပြုတ်၍ ရေချိုးလျှင်လည်းသက်သာနိုင်ပါသည် ။ ဟင်းငုတ်ပင်၏ အရွက်နုများကိုလည်း ဟင်းခါးချက်၍ စားသုံးကြပါသည်။ ကလေးသူငယ်များ ရေကျောက်ပေါက်ပါက ဟင်းငုတ်ပင်အရွက်ကိုပြုတ်၍ တိုက်လျှင် သက်သာပျောက်ကင်းစေပါသည်။ ဟင်းငုတ်ပင်သည် တစ်ပင်လုံးအသုံးဝင်ပြီး ကျန်းမာရေးအတွက်လည်း ဆေးဘက်ဝင်အပင်ဖြစ်သည့်အပြင် အရသာ လည်းရှိ ဟင်းအဖြစ်ချက်ပြုတ်စားသုံး၍ရသောကြောင့် ဟင်းငုတ်ပွင့်များကို အိမ်ရှင်မများဝယ်ယူ စားသုံးသင့်ပါကြောင်း ရေးသားတင်ပြအပ်ပါသည်။
DOCA(မန္တလေး)