စစ်ကိုင်းတိုင်းဒေသကြီး၊ မုံရွာမြို့နယ်တွင် ရာသီစာပေါ်ဦးပေါ်ဖျား မန်ကျည်းရွက်နုများ ကန်သာယာဈေးသို့ လာရောက်ရောင်းချနေပြီဖြစ်ရာ တစ်ပိဿာ ၇၀၀၀-၈၀၀၀ ကျပ်ဖြင့် ရောင်းချနေရခြင်းကြောင့် မန်ကျည်းရွက်နု ခူးယူရောင်းချနေသူများ လတ်တလော စီးပွားရေးတွက်ခြေကိုက်နေကြကြောင်း မန်ကျည်းရွက်ခူးယူရောင်းချနေသူများထံက သိရသည်။
ရာသီစာမန်ကျည်းရွက်နုများ ခူးယူရောင်းချခြင်းဖြင့် မန်ကျည်းရွက်နု ပေါ်ဦးပေါ်ဖြားအချိန်တွင် ဈေးနှုန်းကောင်းဖြင့်ရောင်းချနေရပြီး ဖောက်သည်သွင်းဈေး တစ်ပိဿာ ၇၀၀၀ ကျပ်ဖြင့် ရောင်းချနေရပြီး၊ တစ်ရက်လျှင် မန်ကျည်းရွက် သုံးပိဿာမှငါးပိဿာအထိ ခူးဆွတ်ရောင်းချနေရကြောင်း သိရသည်။ ရာသီစာမန်ကျည်းရွက်နုများကို အိမ်ရှင်မတိုင်းဝယ်ယူတတ်ကြပြီး မန်ကျည်းရွက်နုကို ကုလားပဲချက်၊ ကြက်သွန်၊ မြေပဲလှော်တို့ဖြင့် သုပ်စားခြင်း၊ မန်ကျည်းရွက်နုနှင့် အုတ်သျှစ်ရွက်ရောကာချက်စားခြင်း၊ မန်ကျည်းရွက်နုနှင့်ငါးနီတူ၊ ငါးကြီးခြောက်၊ ငါ့ရံ့လုံး၊ ဒန့်သလွန်သီးတို့ဖြင့်ရောချက်စားကြကြောင်း၊ ပူပြင်းပြီးလူတိုင်းနီးပါး အစားအသောက်ပျက်ချိန် ရာသီစာမန်ကျည်းရွက်နုဖြင့် ဟင်းအမယ်စုံ ချက်စားခြင်းက ခံတွင်းမြိန်စေကြောင်းလည်း သိရသည်။
ရာသီစာမန်ကျည်းရွက်နုများ ခူးယူရောင်းချခြင်းဖြင့် မိသားစုအပိုဝင်ငွေရရှိနေပြီး အရောင်းအဝယ်ဖြစ်နေကြောင်း မန်ကျည်းရွက်နုခူးယူရောင်းချနေသူများထံမှ သိရပါသည်။
DOCA(စစ်ကိုင်း)