HighLight News

     ပြည်တွင်းကုန်ထုတ်လုပ်မှုမြင့်မားတိုးတက်စေရေးအတွက် အသေးစားအလတ်စားစက်မှုလုပ်ငန်းများဖွံ့ဖြိုးတိုးတက်ရေးကို ဦးစားပေးကဏ္ဍတစ်ခုအဖြစ် တွန်းအားပေးဆောင်ရွက်လျက်ရှိပါသည်။ ဒေသတွင်းစက်မှုလုပ်ငန်းများဖွံ့ဖြိုးတိုးတက်ရေးအတွက် စက်မှုလုပ်ငန်းများထုတ်လုပ်မှု အခြေအနေ၊ ကုန်ကြမ်း၊ ကုန်ချော၊ ဈေးနှုန်း၊ ဈေးကွက်အခြေအနေနှင့်စပ်လျဉ်း၍ မိတ္ထီလာမြို့၊ စက်မှုဇုန်ရှိ စိန်ရွှေမိုးဆီးခွဲစက်ရုံ၊ ဂွမ်းဖွစက်၊ စက်ရက္ကန်းလုပ်ငန်းများအား (၇-၆-၂၀၂၄) ရက်နေ့၌ စက်မှုကြီးကြပ်နှင့်စစ်ဆေးရေးဦးစီးဌာန၊ စားသုံးသူရေးရာဦးစီးဌာန၊ စက်မှုဇုန်တာဝန်ရှိသူများနှင့် ပူးပေါင်းကွင်းဆင်းဆောင်ရွက်ခဲ့ပါသည်။

    ထိုသို့ကွင်းဆင်းဆောင်ရွက်ရာတွင် စိန်ရွှေမိုးဆီးခွဲစက်ရုံမှ တစ်လလျှင် ဇီးစံပိဿာ (၃၀၀၀) ထိထုတ်လုပ်နိုင်ပြီး၊ ကုန်ကြမ်းကို မိတ္ထီလာခရိုင်အတွင်းကျေးရွာများမှဝယ်ယူပြီး ထွက်ရှိလာသောကုန်ချောကို မန္တလေးမြို့သို့ အဓိကတင်ပို့ကြောင်း၊ မန္တလေးမှတစ်ဆင့် တရုတ်နိုင်ငံသို့ တင်ပို့ကြောင်း၊ ကုန်ကြမ်းဆီးသီးတစ်တင်းလျှင် (၁၃၀၀၀) ကျပ်ဖြင့်ဝယ်ယူရပြီး၊ ကုန်ချောဆီးဆံတစ်ပိဿာလျှင် (၅၀၀၀၀) ကျပ်ဈေးနှုန်းရှိပြီး လုပ်ငန်းများပုံမှန်လည်ပတ်ထုတ်လုပ်လျက်ရှိကြောင်း၊ ဦးကျော်စိုး စက်ရက္ကန်းစက်ရုံမှာ တစ်လလျှင် အင်္ကျီစကိုက် (၄၅၀၀) ကိုက်နှင့် ပုဆိုး (၃၀၀၀) ကွင်း ထုတ်လုပ်နိုင်ကြောင်း၊ ကုန်ကြမ်းချည်ကို မန္တလေးနှင့်ဝမ်းတွင်းမြို့များမှ ဝယ်ယူရကြောင်း၊ ထွက်ရှိသောကုန်ချောများကို ဒေသတွင်းနှင့် မန္တလေးသို့ တင်ပို့ရောင်းချကြောင်း၊ ကုန်ကြမ်းချည်တစ်ထုပ်လျှင် (၈၂၀၀၀) ကျပ်ဖြင့်ဝယ်ယူရပြီး ကုန်ချောအင်္ကျီစတစ်ကိုက်လျှင် (၃၀၀၀-၃၅၀၀) ကျပ်၊ ပုဆိုးတစ်ကွင်းလျှင် (၆၅၀၀-၇၀၀၀) ကျပ်ဖြင့်ရောင်းချလျက်ရှိကြောင်း၊ ထုတ်လုပ်မှုအနေဖြင့် ဈေးကွက်လိုအပ်ချက်ပေါ်မူတည်၍ ထုတ်လုပ်လျက်ရှိကြောင်းသိရှိရပါသည်။

         သရဖူဂွမ်းပွလုပ်ငန်းအနေဖြင့် တစ်လလျှင် ကုန်ချော(၁၅၃၀၀) ခန့်ထုတ်လုပ်နိုင်ပြီး၊ လိုအပ်သောကုန်ကြမ်းများကို မိတ္ထီလာမြို့၊ သဖန်းနှင့်ရန်ကုန်မြို့မှဝယ်ယူပြီး ထွက်ရှိသောကုန်ချောများကို ဒေသတွင်း၊ တောင်ကြီး၊ ကလော၊ အောင်ပန်းမြို့များသို့ တင်ပို့ရောင်းချကြကြောင်း၊ ကုန်ကြမ်းတစ်ပိဿာလျှင် (၁၀၀) ကျပ်ရှိပြီး၊ ကုန်ချောအနေဖြင့် ခေါင်းအုံး၊ ဖက်လုံး၊ မွေ့ရာများပြုလုပ်ပြီး ခေါင်းအုံးတစ်လုံးလျှင် (၂၅၀၀) ကျပ်၊ ဖက်လုံးတစ်လုံးလျှင် (၃၀၀၀) ကျပ်၊ မွေ့ရာတစ်ချပ်လျှင် (၄၀၀၀၀-၅၀၀၀၀) ကျပ်ဖြင့် တင်ပို့ရောင်းချလျက်ရှိကြောင်း၊ ထုတ်လုပ်မှုများရာသီချိန်တွင် ပိုမိုထုတ်လုပ်ရကြောင်း၊ စက်မှုလုပ်ငန်းများအနေဖြင့် ကုန်ကြမ်းပြတ်လပ်မှုမရှိဘဲ ထုတ်လုပ်မှုလုပ်ငန်းများလည်း ဈေးကွက်အခြေအနေပေါ်မူတည်၍ လည်ပတ်လျက်ရှိကြောင်း၊ ပြည်ပမှ သွင်းကုန်အစားထိုးလုပ်ငန်းများနှင့် ပြည်ပဝင်ငွေရှာဖွေပေးသော လုပ်ငန်းများဖြစ်၍ တွန်းအားပေးဆောင်ရွက်သင့်သော လုပ်ငန်းများဖြစ်ကြောင်းသိရှိရပါသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများ၊ စီးပွားရေးလုပ်ငန်းရှင်များနှင့်တွေ့ဆုံပြီး ဥပဒေ၊ အမိန့်နှင့်ညွှန်ကြားချက်များအား ရှင်းလင်းဆွေးနွေးခြင်းများဆောင်ရွက်လျက်ရှိသည့်အပြင် ထုတ်ကုန်လုံခြုံစိတ်ချမှုရှိစေရေးနှင့် ကုန်အညွှန်းအမှတ်အသားများပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများနှင့် အထူးဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိရာ (၁၁-၆-၂၀၂၄) ရက်နေ့၊ နံနက် (၁၀:၀၀) နာရီအချိန်မှစတင်၍ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး၏ လမ်းညွှန်ချက်ဖြင့် ပျော်ဘွယ်မြို့နယ်တာဝန်ခံနှင့် မလှိုင်မြို့နယ်တာဝန်ခံတို့သည် အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ဆေးနှင့်ဆေးပစ္စည်းအရောင်းဆိုင်  (၆) ဆိုင်ရှိ ဆေးနှင့်ဆေးပစ္စည်းများအား အထူးဈေးကွက်စောင့်ကြည့်စစ်ဆေးခဲ့ပါသည်။

    ထိုသို့ဆောင်ရွက်ရာတွင် စာသုံးသူပြည်သူများဘေးအန္တရာယ်ကင်းရှင်းစေရေးအတွက် မြန်မာနိုင်ငံဆေးဝါးမှတ်ပုံတင်အမှတ်မပါရှိသည့် တရားမဝင်ဆေးဝါးများနှင့် Online ပေါ်မှတစ်ဆင့် ဖြန့်ချိရောင်းချနေသော တရားမဝင်ဆေးဝါးများရောင်းချနေမှုရှိ/မရှိစစ်ဆေးခြင်း၊ သက်တမ်းကုန်လွန်သောဆေးဝါးများနှင့် ဆေးပစ္စည်းများရောင်းချနေမှုရှိ/မရှိ စစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

DOCA(မန္တလေး)

        ၂၀၂၄ခုနှစ်၊ ဇွန်လ (၁၁) ရက်နေ့ ၊ နံနက် (၁၀း၀၀) နာရီအချိန်တွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ပျော်ဘွယ်မြို့နယ်တာဝန်ခံနှင့် ဝန်ထမ်းများသည် ပျော်ဘွယ်မြို့နယ်၊ ယာကြီးကျေးရွာ၌ စားသုံးသူကာကွယ်ရေးအသိပညာပေးဟောပြောပွဲ ကျင်းပပြုလုပ်ခဲ့ရာ ကျေးရွာနေပြည်သူစုစုပေါင်း (၆၈) ဦးတက်ရောက်ခဲ့ပြီး လက်ကမ်းစာစောင်များဖြန့်ဝေပေးခဲ့ပါသည်။

      အဆိုပါဟောပြောဆွေးနွေးပွဲတွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးမှ ဦးစန်းအောင် (ဒု-ဦးစီးမှူး) က စားသုံးသူကာကွယ်ရေးဥပဒေ၏ ရည်ရွယ်ချက်၊ စားသုံးသူအခွင့်အရေး (၈) ချက်၊ တာဝန်(၄)  ချက်၊ ကုန်အညွှန်းအမှတ်အသားနှင့်ပတ်သက်သည့် သိရှိလိုက်နာရမည့်အကြောင်းအရာများနှင့် စားသုံးသူများဖြစ်သည့်အတွက် စာသုံးသူအခွင့်အရေးနစ်နာဆုံးရှုံးမှုများရှိခဲ့လာပါက တိုင်းဒေသကြီး/ ပြည်နယ်နှင့် ခရိုင်ရုံးများတွင်ဖွင့်လှစ်ထားသော စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ရုံးများတွင် တိုင်ကြားနိုင်ကြောင်း၊DOCA Myanmar Application နှင့် စားသုံးသူရေးရာဦးစီးဌာန၏ Website www. doca. gov. mm တွင် ဝင်ရောက်လေ့လာတိုင်ကြားနိုင်ကြောင်း၊ Consumer Call Center နံပါတ် (၁၅၃၅) သို့လည်း ရုံးချိန်အတွင်း ဆက်သွယ်မေးမြန်းဆောင်ရွက်နိုင်ကြောင်းကို ရှင်းလင်းပြောကြားခဲ့ပြီး  နံနက် (၁၁:၀၀) နာရီအချိန်တွင် ဆွေးနွေးပွဲရုပ်သိမ်းခဲ့ကြောင်းသိရှိရပါသည်။

DOCA(မန္တလေး)                                             

    မန္တလေးတိုင်းဒေသကြီး၊ ကျောက်ဆည်ခရိုင်၊ အသေးစားစက်မှုလက်မှုလုပ်ငန်းဦးစီးဌာနနှင့် ကျောက်ဆည်တက္ကသိုလ် ရုက္ခဗေဒဌာနတို့ပူးပေါင်း၍ ကျောက်ဆည်မြို့နယ်၊ ဟံမြင့်မိုရ်ကျေးရွာ၌ပြုလုပ်သည့် (၃-၆-၂၀၂၄)ရက်နေ့မှ (၉-၆-၂၀၂၄)ရက်နေ့အထိ (၇)ရက်ကြာဖွင့်လှစ်သော သရက်သီး (ယို၊ ဖျော်ရည်၊ ဝိုင်) ထုတ်လုပ်မှုနည်းပညာသင်တန်းသို့ (၈-၆-၂၀၂၄)ရက်နေ့တွင်သွားရောက်ကာ ကျောက်ဆည်ခရိုင်၊ စားသုံးသူရေးရာဦးစီးဌာနမှ ဦးဇော်မင်းလတ်(ဦးစီးမှူး)က စားသုံးသူကာကွယ်ရေးဥပဒေပါ လုပ်ငန်းရှင်များ၏တာဝန်များ၊ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာအချက်အလက်များနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါ အချက်အလက်များအား အကျယ်တဝင့်ရှင်းလင်းပြောကြားခဲ့ပါသည်။ ၄င်းသင်တန်းသို့ ဟံမြင့်မိုရ်ကျေးရွာအနီးရှိ သရက်သီးလုပ်ငန်းလုပ်ကိုင်သည့် လုပ်ငန်းရှင်(၂၀)ဦးတက်ရောက်ခဲ့ပြီး ကုန်အညွှန်းအမှတ်အသားနှင့်ပတ်သက်သည့် လက်ကမ်းစာစောင်များလည်းဖြန့်ဝေပေးခဲ့ကြောင်း သတင်းရရှိပါသည်။

DOCA(မန္တလေး)

     မန္တလေးတိုင်းဒေသကြီး၊ ပြင်ဦးလွင်ခရိုင်၊ ကျန်းမာရေးဦးစီးမှူးရုံး၌ (၇-၆-၂၀၂၄)ရက်နေ့၊ နေ့လယ်(၁၄:၀၀)နာရီအချိန်တွင် ခရိုင်ပြည်သူ့ကျန်းမာရေးဦးစီးဌာနဦးဆောင်၍ ခရိုင်အထွေထွေအုပ်ချုပ်ရေး‌ဦးစီးဌာန၊ မြို့နယ်စည်ပင်သာယာရေးအဖွဲ့နှင့် စားသုံးသူရေးရာဦးစီးဌာနတို့ပူး‌ပေါင်း၍ ပြင်ဦးလွင်ခရိုင်အတွင်းရှိ ဆေးဆိုင်ဖွင့်လှစ်ရောင်းချသည့် လုပ်ငန်းရှင်များအား တွေ့ဆုံဆွေးနွေးခဲ့ပါသည်။ အဆိုပါတွေ့ဆုံပွဲတွင် ခရိုင်ပြည်သူ့ကျန်းမာရေးဦးစီးဌာနမှ ဒေါက်တာအိအိဖြိုးအောင်က ဆေးဝါးနှင့်ပတ်သက်၍ ဌာနမှချမှတ်ထားသည့် အမိန့်ညွှန်ကြားချက်များကို အသေးစိတ်ရှင်းလင်းခဲ့ပြီး လုပ်ငန်းရှင်များအနေဖြင့်လည်း ၄င်းအမိန့်ညွှန်ကြားချက်များအား လိုက်နာဆောင်ရွက်ရန်လိုအပ်ကြောင်း ဆွေးနွေးပြောကြားခဲ့ပါသည်။ စားသုံးသူရေးရာဦးစီးဌာနမှ ဦးသက်လွင်ထူး (ဦးစီးအရာရှိ) က ဆေးဆိုင်ရောင်းချသည့် လုပ်ငန်းရှင်များအနေဖြင့်  ဝယ်ယူသည့်စျေးနှုန်းနှင့် ရောင်းချသည့်စျေးနှုန်းများကွာဟမှုမရှိစေရေး၊ ဈေးနှုန်းမြှင့်တင်ရန်ရည်ရွယ်ချက်ဖြင့် သိုလှောင်ထားရှိမှုမရှိစေရေး၊ ပစ္စည်းပြတ်လပ်မှုမရှိစေရေး အရေးကြီးကြောင်း၊ ထုတ်ကုန်လုံခြုံစိတ်ချရမှုမရှိစေရေးအတွက် တချို့ဆေးဝါးများတွင် ကုန်အညွှန်းအမှတ်အသားများဖော်ပြရာ၌ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခုဖြင့်ဖြစ်စေ ဘာသာနှစ်မျိုးဖြင့်ဖော်ပြစေရေး စသည်ဖြင့် စားသုံးသူကာကွယ်ရေးဥပဒေများကို‌ရှင်းလင်းပြောကြားခဲ့ပါသည်။ ဆက်လက်၍ တက်ရောက်လာသော လုပ်ငန်းလုပ်ငန်းရှင်များနှင့် တာဝန်ရှိသူများ၏ သိရှိလိုသည်များ မေးမြန်းဆွေးနွေးခဲ့ကြောင်းနှင့် တွေ့ဆုံဆွေးနွေးပွဲသို့ လုပ်ငန်းရှင်(၁၂၀)ဦးတက်ရောက်ခဲ့ကြောင်း သတင်းရရှိပါသည်။

DOCA(မန္တလေး)