သတင်းနှင့် လှုပ်ရှားမှုများ

         မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် စားသုံးသူကာကွယ်ရေးဥပဒေ ၂၀၁၉၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း ၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉)နှင့်အညီ ပြည့်စုံစွာ ထည့်သွင်းဖော်ပြလာစေရေးအတွက် (၄.၂.၂၀၂၂)ရက်နေ့ နေ့လည်(၁၂:၃၀)အချိန်တွင် စားသုံးသူရေးရာ ဦးစီးဌာနမှ အရာထမ်း/အမှုထမ်းများသည် မကွေးမြို့ပေါ်နှင့် ကျေးလက်ဒေသများအထိ ဝယ်ယူ စားသုံးမှု မြင့်မားနေသော ပေါင်မုန့်၊ ကိတ်မုန့်၊ ကိတ်ခြောက်၊ ကွတ်ကီးနှင့် မွေးနေ့ကိတ် များ ထုတ်လုပ်ရောင်းချ ဖြန့်ဖြူးလျက်ရှိသည့်လုပ်ငန်းသို့ သွားရောက် အသိပေးရှင်းလင်းဆွေးနွေးခြင်းများ ဆောင်ရွက်ခဲ့ပါသည်။

         အဆိုပါ လုပ်ငန်းသည် ကိုဗစ်ကာလနောက်ပိုင်းတွင် မကွေးမြို့၌ နာမည်ကြီး လူသုံးများ လာသည့်အတွက် အသေးစားစက်မှုလုပ်ငန်းဦးစီးဌာနသို့ မှတ်ပုံတင်လျှောက်ထားလာရာ မိမိတို့ဌာန အနေဖြင့်လည်း စားသုံးသူများ ဘေးအန္တရာယ်ကင်းရှင်းစေရေးအတွက် ကုန်အညွှန်းအမှတ်အသား ပြည့်စုံစွာ ဖော်ပြလာစေရေး ထုတ်လုပ်သည့် လုပ်ငန်းခွင်သို့ သွားရောက်၍ စားသုံးသူကာကွယ်ရေး ဥပဒေအား ချပြအသိပေး ဆွေးနွေးခြင်းများဆောင်ရွက်ခဲ့ရာ ဦးစီးအရာရှိ ဒေါ်အေးမဥ္ဇူခိုင်မှ အစား အသောက်အုပ်စု အသင့်စားမုန့်အမျိုးအစားတွင် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုး အမည်၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းပုံအညွှန်း၊ ဓါတ်မတည့် ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်ရက်စွဲနှင့် သက်တမ်းကုန် ရက်စွဲများကိုလည်း ထည့်သွင်းဖော်ပြရမည် ဖြစ်သည့်အပြင် မိမိထုတ်လုပ်သည့် ကုန်စည်နှင့်ပတ်သက် ၍ ဘေးအန္တရာယ်ကင်းရှင်းမှုကို အာမခံမှုပေးရမည်ဖြစ်ကြောင်း၊ အသေးစိတ်ရှင်းလင်းဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ အခက်အခဲတစ်စုံတစ်ရာရှိပါက မိမိတို့ဌာနသို့ လာရောက်အကူအညီတောင်းခံနိုင်ပါကြောင်း၊ အဆိုပါလုပ်ငန်းမှ ကိတ်မုန့်များမှာ မကွေးမြို့တွင် လူသုံး များသည့်အပြင် ရန်ကုန်/ မန္တလေးမှလာသည့် နာမည်ကြီး ကိတ်မုန့်/ ပေါင်မုန့်များနှင့် အရည်အသွေး တူပြီး ဈေးနှုန်းပိုမိုသက်သာသည့်အတွက် ကုန်အညွှန်းအမှတ်အသား ဖော်ပြမှုပြည့်စုံပါက ဒေသတွင်း သာမက အခြားအမြို့မြို့အနယ်နယ်များအထိပါ ဖြန့်ဖြူးရောင်းချနိုင်မည်ဖြစ်ကြောင်း ရှင်းလင်းဆွေးနွေး ခဲ့ပါသည်။

          ဤကဲ့သို့ ဒေသတွင်း တစ်ပိုင်တစ်နိုင် ထုတ်လုပ်ရောင်းချသည့် လုပ်ငန်းများသို့ သွားရောက် အသိပညာပေးဆွေးနွေးခြင်းအားဖြင့် စားသုံးသူပြည်သူများအနေဖြင့် ဘေးကင်းလုံခြုံမှုရှိ၍ အာမခံမှု ပေးနိုင်သည့် ကုန်စည်များကို ရွေးချယ်ဝယ်ယူနိုင်မည့် အခွင့်အလမ်းများပိုမိုရရှိလာမည် ဖြစ်သည့်အပြင် လုပ်ငန်းရှင်များအနေဖြင့်လည်း မြန်မာနိုင်ငံတစ်ဝန်းသို့ တင်ပို့ရောင်းချလာနိုင်ခြင်းဖြင့် ဒေသတွင်း အလုပ်အကိုင်အခွင့်အလမ်းများ ပိုမိုဖန်တီးပေးနိုင်မည်ဖြစ်ပါကြောင်း သုံးသပ်တင်ပြအပ်ပါသည်။

DOCA(မကွေး)

          မကွေးတိုင်းဒေသကြီး ၊ စားသုံးသူရေးရာဌာနသည် စားသုံးသူပြည်သူများ လုံခြုံစိတ်ချမှု ရှိစေရန်အတွက် စားသုံးသူကာကွယ်ရေးဆိုင်ရာ အသိပညာပေးဆွေးနွေးခြင်း စားသုံးသူကာကွယ်ရေး ဥပဒေပါ ပြဌာန်းချက်များအား စီးပွားရေးလုပ်ငန်းရှင်များ သိရှိလိုက်နာနိုင်စေရန် စက်ရုံ အရောက် လုပ်ငန်းခွင်အရောက်သွားရောက်တွေ့ဆုံ အသိပညာပေးဆွေးနွေးခြင်း ဘေးကင်းလုံခြုံမှုရှိသည့် ကုန်စည်များ ရွေးချယ်ဝယ်ယူနိုင်ရေးအတွက် ဈေးကွက်စောင့်ကြည့်စစ်ဆေးခြင်း စီးပွားရေးလုပ်ငန်းရှင်များနှင့်် ပြည်သူများသို့ သတင်းအချက်အလက်များ ဥပဒေပါပြဌာန်းချက်များနှင့် နည်းပညာများ ဖြန့်ဝေပေးခြင်း ပြည်တွင်းကုန်သွယ်မှုကဏ္ဍတိုးတက်လာစေရေးအတွက် စိုက်ပျိုးမွေးမြူသူတောင်သူများ စီးပွားရေးလုပ်ငန်းရှင်များနှင့်တွေ့ဆုံ၍ လိုအပ်သည့်အခက်အခဲများအား ကူညီဖြေရှင်းပေးခြင်း စီးပွားရေးသံမှူးများမှ ပေးပို့လာသည့် ဈေးကွက်သတင်းများအား ဖြန့်ဝေပေးခြင်းများ ဆောင်ရွက်လျက် ရှိပါသည်။

          တိုင်းဒေသကြီးဦးစီးမှူး၏ လမ်းညွှန်မှုအရ အသေးစားစက်မှုလုပ်ငန်း မှတ်ပုံတင်ရယူထားသည့် မကွေးမြို့ ၊ မစိုးရိမ်ရပ်ကွက်ရှိ “ sk ” ဒိန်ချဉ် ထုတ်လုပ်ဖြန့်ဖြူးရောင်းချရေးလုပ်ငန်းသို့ (၄.၂.၂၀၂၂) ရက်နေ့ (၁၃:၀၀)နာရီအချိန်တွင် ဦးစီးအရာရှိ ဒေါ်အေးမဉ္ဇူခိုင် ဦးဆောင်သောအဖွဲ့မှ သွားရောက်၍ စားသုံးသူကာကွယ်ရေးဥပဒေ(၂၀၁၉)ပါ စီးပွားရေးလုပ်ငန်းရှင်၏ လိုက်နာရမည့်တာဝန်များ မိမိထုတ်လုပ်သည့် ကုန်စည်သည် စားသုံးသူပြည်သူများအတွက် ဘေးကင်းလုံခြုံမှုရှိရမည်ဖြစ်ပြီး မိမိကုန်စည်ကြောင့် စားသုံးသူထိခိုက်နစ်နာမှုမရှိစေရေး အာမခံရမည်ဖြစ်ကြောင်း၊ နို့ကိုအခြေခံ ထုတ်လုပ်ထားသည်ဖြစ်၍ သန့်ရှင်းမှုနှင့်လတ်ဆတ်မှုကို အဓိကထား ထုတ်လုပ်သွားရန်လိုကြောင်း၊ မိမိထုတ်လုပ်သည့် ကုန်စည်ကို မူလတန်းအရွယ် ကလေးငယ်မှ စ၍ အလွယ်တကူ ဖတ်ရှုနားလည်နိုင် စေရန် ကုန်ပစ္စည်းအမျိုးအမည် ၊ အရေအတွက် (သို့) အသားတင်ပမာဏ ၊ သုံးစွဲပုံ နည်းလမ်း ၊ ထားသိုသိမ်းဆည်းပုံ၊ ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များကို ဒိန်ချဉ်၏ ကုန်အမှတ်တံဆိပ်ပေါ်တွင် မြန်မာဘာသာဖြင့် ထင်ရှားစွာ ထည့်သွင်းအသိပေးသွားရန်နှင့် အခက်အခဲ ရှိပါက မိမိတို့ဌာနသို့ လာရောက်၍ ကူညီတောင်းခံနိုင်ပါကြောင်း နှင့် ကုန်အမှတ်တံဆိပ်များကို စားသုံးသူကာကွယ်ရေး ဥပဒေနှင့်အညီ ဖော်ပြပေးခြင်းဖြင့် “SK” ဒိန်ချဉ်အပေါ် စားသုံးသူပြည်သူများ ယုံကြည်မှု ပိုမိုရရှိစေပြီး ဈေးကွက်အနေဖြင့်လည်း မြန်မာတပြည်လုံးသို့ ဖြန့်ချီသွားနိုင်မည်ဖြစ်ကြောင်း အသိပေးရှင်းလင်း ဆွေးနွေးခဲ့ပါသည်။

DOCA(မကွေး)

        မန္တလေးတိုင်းဒေသကြီး၊ မိတ္ထီလာခရိုင်၊ သာစည်မြို့နယ်အတွင်းရှိ ကျွဲတပ်ဆုံကျေးရွာအနီး (မိတ္ထီလာ-တောင်ကြီး) ကားလမ်း၊ မိုင်တိုင်အမှတ် (၃၁/၁-၂) မိုင်ရှိ စက်သုံးဆီအရောင်း ဆိုင်များသို့ (၂၈.၁.၂၀၂၂) ရက်နေ့ (၁၂) နာရီအချိန်တွင်  စားသုံးသူရေးရာဦးစီးဌာန၊သာစည်မြို့နယ် တာဝန်ခံသည် စည်ပင်သာယာရေးဝန်ထမ်းများနှင့်အတူ “Moon Sun” စက်သုံးဆီအရောင်းဆိုင်၊ “ ကျော်စံ” စက်သုံးဆီအရောင်းဆိုင်၊ “ ရှမ်းရွှေတောင်” စက်သုံးဆီအ ရောင်းဆိုင်များသို့ သွားရောက်၍  စက်သုံးဆီများ အား အထူးစျေးနှုန်းဖြင့် ရောင်းချမှုအခြေအနေများ၊ အချင်အတွယ်ပြည့်ဝမှန်ကန်မှုရှိစေ ရေးနှင့် သတ်မှတ် ထားသည့် ခွဲတမ်း၊ စျေးနှုန်းများမှန်ကန်မှုရှိစေရေး စျေးကွက်စောင့်ကြည့်စစ်ဆေးခြင်းများ ကွင်းဆင်း ဆောင်ရွက်ခဲ့ပါသည်။

        စျေးကွက်စောင့်ကြည့်စစ်ဆေးခြင်းများ ဆောင်ရွက်ရာတွင် လုပ်ငန်းရှင်များအနေဖြင့် မိမိတို့ ရောင်းချသော ကုန်စည်တို့နှင့်ပတ်သက်၍ သတင်းအချက်အလက်များအား အများပြည်သူတို့ ရှင်းလင်းစွာ သိရှိနိုင်ရန် အတွက် ပြည့်စုံမှန်ကန်သော သတင်းအချက်အလက်ဖြန့်ဝေပေးကြရန် သတ်မှတ်အရည်အသွေး ပြည့်မှီသော စက်သုံးဆီများကိုသာ ရောင်းချကြရန်နှင့် အထူးစျေးနှုန်းဖြင့် ရောင်းချမည်ဆိုပါက စည်းကမ်းချက် များနှင့်အညီ မှန်ကန်စွာ ရောင်းချ ‌‌ပေးကြရန် အသိပေးပြောကြားဆောင်ရွက်ခဲ့ပါသည်။

DOCA(မန္တလေး)

          စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန် မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း၊ ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည် ချေးငှားပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုပါသည်။

          စားသုံးသူကာကွယ်ရေးဥပဒေ(၂၀၁၉)အရ စားသုံးသူများသည် စားသုံးသူအခွင့်အရေးကို သိရှိပြီး ဌာနနှင့်ပူးပေါင်း ဆောင်ရွက်လာသည်မှာလည်း ကျေနပ်စရာပင်ဖြစ်သည်။ စားသုံးသူကာကွယ်ရေးဥပဒေမှ စားသုံးသူအခွင့်အရေးများဖြစ်သည့် စားသုံးသူများ၏ အခြေခံလိုအပ်ချက်များပေါ် တွင် စိတ်ကျေနပ်မှုရရှိစေခြင်း၊ ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ လိုအပ်သော သတင်းအချက်အလက်များပြည့်စုံမှန်ကန်စွာသိရှိခွင့်နှင့် ပြေစာ၊ အထောက်အထားရယူခွင့်ရှိခြင်း၊ စိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ နစ်နာဆုံးရှုံးမှုနှင့်စပ်လျဉ်း၍ ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်ခြင်း၊ နစ်နာဆုံးရှုံးမှုနှင့်စပ်လျဉ်း၍ ကုစားခွင့်ရရှိခြင်း၊ အသိပညာဗဟုသုတများ၊ အခွင့်အရေးများနှင့်လိုအပ်သော အချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန် သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့်ရရှိစေခြင်းတို့ဖြစ်သည်။ စားသုံးသူတို့က စားသုံးသူအခွင့်အရေး များကို သိရှိပြီး ယခုအချိန်တွင် စားသုံးသူအခွင့်အရေးများကို ရယူသုံးစွဲလာသည်ကို တွေ့ရှိရသည်။

          စားသုံးသူအခွင့်အရေးများကို ရယူသုံးစွဲသည့် စားသုံးသူများအား ကုန်စည် သို့မဟုတ် ဝန်ဆောင်မှုတို့ကို သုံးစွဲရာတွင် လိမ်လည်လှည့်ဖြားမှုမခံရစေရန် ဥပဒေအရ ကာကွယ်ရေး ဆောင်ရွက်မှုများကိုလည်း ဆောင်ရွက်လျက်ရှိသည်။ စားသုံးသူများ အမှန်တကယ် နစ်နာဆုံးရှုံးမှု နှင့် ကြုံတွေ့လာလျှင်လည်း ကူညီဖြေရှင်းပေးနိုင်ရန်အသင့်ရှိပါသည်။ စားသုံးသူကာကွယ်ရေးနှင့် ပတ်သက်သည့်ကိစ္စရပ်များကို မေးမြန်းလိုပါကလည်း ဆက်သွယ်မေးမြန်းနိုင်သည်။

       စားသုံးသူအနေဖြင့် ကုန်စည် သို့မဟုတ် ဝန်ဆောင်မှုတို့ ဝယ်ယူသုံးစွဲရာမှ နစ်နာဆုံးရှုံးမှု ကြုံတွေ့ရပါက နစ်နာဆုံးရှုံးမှုနှင့်စပ်လျဉ်း၍ ရှင်းလင်းတင်ပြခွင့် နှင့် တိုင်ကြားခွင့်ရရှိနိုင်ခြင်းအား သိရှိပြီး လုပ်ဆောင်လာသည်ကိုလည်းတွေ့ရှိရသည့်။ တိုင်ကြားမှု အမျိုးမျိုးဖြင့် စားသုံးသူရေးရာဦးစီးဌာနသို့ တိုင်ကြားလာသည်ကိုလည်း တွေ့ရှိရပြန်သည်။

        တိုင်ကြားသူများမှာကုန်စည်နှင့်ပတ်သက်သော တိုင်ကြားခြင်းကိုလည်းကောင်း၊ ဝန်ဆောင်မှုနှင့်ပတ်သက်သော တိုင်ကြားခြင်းများကိုလည်းကောင်း၊ စားသုံးသူရေးရာဦးစီးဌာန၊ စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)တွင် တိုင်ကြားလာခြင်း၊ တိုင်ကြားမှုအားစိစစ်၍ ဖြေရှင်းဆောင်ရွက်ရေးတို့ကို နေပြည်တော်နှင့် တိုင်းဒေသကြီး၊ ပြည်နယ်ဦးစီးမှူးရုံးရှိ စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC)တာဝန်ခံများက ညှိနှိုင်းဖြေရှင်းဆောင်ရွက်ကြသည်။

        တိုင်ကြားမှုပြုလုပ်ရန် အမှန်တကယ်လိုအပ်လာလျှင် တိုင်ကြားမှုအကြောင်းအား သိရှိရ ပါမည်၊ အကျဉ်းချုပ်ဖော်ပြရလျှင် စားသုံးသူကာကွယ်ရေးဥပဒေအရ ပုဂ္ဂိုလ်ရေးရာ၊ မိသားစု သို့မဟုတ် အိမ်ထောင်စုအတွက် ရည်ရွယ်ချက်ဖြင့် ဝယ်ယူသုံးစွဲသည့် ကုန်စည် သို့မဟုတ် ဝန်ဆောင်မှုနှင့်ပတ်သက်သည့် တိုင်ကြားမှုများ သို့မဟုတ် ယင်းရည်ရွယ်ချက်ဖြင့် လုပ်ဆောင် သည့် ကြော်ငြာ၊ရောင်းချရန်ကမ်းလှမ်းခြင်း၊ အရောင်းမြှင့်တင်ခြင်းတို့နှင့်ပတ်သက်သည့် တိုင်ကြား မှုများကိုသာ ဖြေရှင်းဆောင်ရွက်ပေးလျှက်ရှိပါသည်။

        တိုင်ကြားမှုနှင့် ဆက်နွယ်မှုမရှိသော ပုဂ္ဂိုလ်ရေးရာ အချက်အလက်များနှင့်ငွေရေးငွေကြေးဆိုင်ရာ သတင်းအချက်အလက်များကို ချန်လှပ်ထားနိုင်ပါသည်။ တိုင်ကြားမှုနှင့်ပတ်သက်၍ စားသုံးသူရေးရာဦးစီးဌာနက ဖုန်း(သို့မဟုတ်)Email ဖြင့် ဆက်သွယ်မှုများကို တိုင်ကြားသူမှ ပြန်လည်ဖြေကြားပေးခြင်း၊ ပူးပေါင်းဆောင်ရွက်ပေးခြင်းအားဖြင့် တိုင်ကြားမှုများကို အောင်မြင်စွာ ဖြေရှင်းပေးနိုင်မည်ဖြစ်ပါသည်။  တိုင်ကြားစာပုံစံတွင် တိုင်ကြားသူ၏ အချက်အလက်၊ စီးပွားရေးလုပ်ငန်းရှင်အချက်အလက်များနှင့် တိုင်ကြားစာဖော်ပြချက်တို့ကို ဖြည့်သွင်းရန် တိုင်ကြားသည့် လူကြီးမင်း၏ လက်မှတ်နှင့်တိုင်ကြားသော နေ့ရက်ပါရှိရပါမည်။

          စားသုံးသူရေးရာဦးစီးဌာန မွန်ပြည်နယ်ဦးစီးမှူးရုံး၊ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (CICC) တွင် တိုင်ကြားမှုအရေအတွက် ၂၀၂၀ပြည့်နှစ် အတွင်း ၃၀ခု၊ ၂၀၂၁ခုနှစ်အတွင်း ၁၃ခုတို့ကို Covid-19 စည်းကမ်းနှင့်အညီ ညှိနှိုင်းဖြေရှင်း ဆောင်ရွက်ပေးခဲ့သည်။

          တိုင်ကြားမှုအမျိုးအမည်များကို ခွဲခြားစိတ်ဖြာလျှင် ကုန်စည် အမျိုးအစားနှင့်ဝန်ဆောင်မှု အမျိုးအစား တိုင်ကြားစာများဖြစ်ပါသည်။ကုန်စည်အမျိုးအစားအားဖြင့် အစားအသောက်၊ ဆေးဝါး၊ အိမ်သုံး၊ လျှပ်စစ်ပစ္စည်းကိုလည်းကောင်း၊ လူသုံးကုန်ပစ္စည်း၊ ဆက်သွယ်ရေးပစ္စည်း၊ စိုက်ပျိုးရေးသုံးပစ္စည်းကိုလည်းကောင်း ဝန်ဆောင်မှုအမျိုးအစားတွင် Broadcasting ၊ ကြော်ငြာ၊ ပညာရေး၊ ကျန်းမာရေး၊ ရောင်းချပြီးနောက် အာမခံပေးအပ်ခြင်း၊ ဆက်သွယ်ရေး၊ ခရီးသည်၊ ကုန်စည်၊ ဟိုတယ်၊ စားသောက်ဆိုင်၊ ငွေရေးကြေးရေး၊ E-commerce တိုင်ကြားမှုတို့ဖြစ်ကြသည်။

     တိုင်ကြားသူများမှာ စားသုံးသူရေးရာဦးစီးဌာန မွန်ပြည်နယ် စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ(CICC)၏ ညှိနှိုင်းဆောင်ရွက်ပေးမှုအပေါ် အောင်မြင်စွာ ဖြေရှင်းပေးနိုင်မှုတို့ကို တိုင်ကြားသူတို့က စိတ်ကျေနပ်မှုရရှိခြင်း၊ ကျေးဇူးတင်ခြင်း၊ ဌာန၏လုပ်ငန်းဆောင်ရွက်မှုကို ပိုမိုအလေးထားလာခြင်း စားသုံးသူရေးရာကိစ္စရပ်များကိုလည်း ပိုမိုစိတ်ဝင်တစားရှိလာခြင်း၊ စားသုံးသူရေးရာဦးစီးဌာန ဝန်ထမ်းများကလည်း စားသုံးသူများအတွက် အမြဲမပြတ် ကူညီဆောင်ရွက်ပေးလျက်ရှိကြောင်း တင်ပြအပ်ပါသည်။

စားသုံးသူရေးရာဦးစီးဌာန

မွန်ပြည်နယ်

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ် ဦးစီးမှူးရုံး(တောင်ကြီး)မြို့တွင် ဝန်ထမ်းများအား ရုံးလုပ်ငန်းဆိုင်ရာကိစ္စရပ်များ၊ အထွေထွေစီမံခန့် ခွဲမှုဆိုင်ရာကိစ္စရပ်များ သိရှိကျွမ်းကျင်နိုင်ရန်ရည်ရွယ်၍ ဝန်ထမ်းစွမ်းဆောင်ရည်မြှင့်သင်တန်းအမှတ်စဉ် (၁/၂၀၂၂)အား ဇန်နဝါရီလ(၃၁)ရက်နေ့၊ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံး၊ အစည်းအဝေးခန်းမတွင် ကျင်းပခဲ့ပါသည်။ အဆိုပါသင်တန်းသို့ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးတင့်လွင်ဦး တတ်ရောက်၍  အဖွင့်အမှာစကားပြောကြားခဲ့သည်။ ပြည်နယ်ဦးစီးမှူးမှ သင်တန်းသားဝန်ထမ်းများအား ရုံးလုပ်ငန်းစီမံခန့်ခွဲမှုဆိုင်ရာ အသိပညာနှင့် အတတ်ပညာများ မြင့်တက်လာစေရေးရည်ရွယ်၍ ဖွင့်လှစ်ခြင်းဖြစ်ကြောင်း၊ သင်တန်းကာလမှာ ဇန်နဝါရီလ (၃၁)ရက် နေ့မှ ဖေဖော်ဝါရီလ(၂၈)ရက်နေ့အထိ ကျင်းပမည်ဖြစ်ကြောင်း၊ သင်တန်းဆိုင်ရာဘာသာရပ်များ အနေဖြင့် နိုင်ငံ့ဝန်ထမ်းဥပဒေ/နည်းဥပဒေများ၊ ရုံးလုပ်ငန်း လက်စွဲ၊ ဝန်ထမ်းရေးရာလုပ်ထုံးလုပ်နည်း များ၊ စားသုံးသူရေးရာဦးစီးဌာနနှင့် ဆက်စပ်အကြောင်းအရာများ၊ ကုန်သွယ်ရေးဦးစီးဌာနနှင့် ဆက်စပ်အကြောင်းအရာများ၊ မူပိုင်ခွင့်ဦးစီးဌာနှင့်ဆက်စပ်အကြောင်း အရာများ၊ မြန်မာ့ကုန်သွယ်မှု မြှင့်တင်ရေးအဖွဲ့ဆက်စပ်အကြောင်းအရာများအား သင်ကြားပို့ချပေးသွားမည်ဖြစ်ကြောင်း ပြောကြားခဲ့သည်။ ထို့နောက် သင်တန်းကြီးကြပ်ရေးလုပ်ငန်းကော်မတီအဖွဲ့မှ အဖွဲ့ခေါင်းဆောင် ဦးခွန်ကျော်ဌေး(လက်ထောက်ညွှန်ကြားရေမှူး)မှ သင်တန်းဆိုင်ရာ စည်းမျဉ်း/ စည်းကမ်းများကို သင်တန်းသားများသို့ ဆက်လက် ပြောကြားခဲ့ပါသည်။

          အဆိုပါ သင်တန်းအား အချိန်ကာလအားဖြင့် တစ်လခန့်ကြာမည်ဖြစ်ပြီး တစ်ရက်လျှင် သင်တန်းချိန်(၂)ချိန် ဖြင့် သင်ကြားပေးသွားမည်ကြောင်း သိရှိရပါသည်။

စားသုံးသူရေးရာဦးစီးဌာန

ရှမ်းပြည်နယ်