သတင်းနှင့် လှုပ်ရှားမှုများ

           ပဲခူးတိုင်းဒေသကြီး ၊ ညောင်လေးပင်ခရိုင် ဒိုက်ဦးမြို့နယ်တွင် သြဂုတ်လ ၁၇ ရက်နေ့ မွန်းလွဲ ၁ နာရီအချိန်က မဟာဝိဇိတာရာမ အလံပြ ဘုန်းတော်ကြီးကျောင်း အခြေခံပညာ မူလတန်းလွန်ကျောင်း၌ ပြန်ကြားရေးနှင့်ပြည်သူ့ဆက်ဆံရေး ဦးစီးဌာန ၊ စားသုံးသူရေးရာဦးစီးဌာနတို့ ပူးပေါင်းကာ အသိပညာ ပေးဟောပြောပွဲ ကျင်းပ ပြုလုပ်ခဲ့ကြောင်း သိရှိရပါသည်။

          ရှေးဦးစွာ ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဒေါ်ဆွေသက်အောင်က ကျောင်းသား၊ ကျောင်းသူများအနေဖြင့် သိသင့်သိထိုက်သော ဗဟုသုတရဖွယ် အကြောင်းအရာများအား ဟောပြောခဲ့ပြီး စားသုံးသူရေးရာဦးစီးဌာန မြို့နယ်တာဝန်ခံ ဦးမျိုးမြင့်က စားသုံးသူကာကွယ်ရေး ဉပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ အချက်များအား အသိပညာပေး ရှင်းလင်း ပြောကြားဆွေးနွေးခဲ့ကြောင်း သိရှိရပါသည်။

          ထို့နောက် အခမ်းအနားသို့တက်‌ရောက်လာသော ကျောင်းသား၊ ကျောင်းသူများအား ဒုတိယ ဦးစီးမှူး ဒေါ်အေးအေးစိုးက ပုံပြင်များပြောပြခဲ့ပြီး ကိုယ်လက်လှုပ်ရှားအားကစားများလည်း ပြုလုပ်ခဲ့ကြောင်း သိရှိရပါသည်။

DOCA(ပဲခူး)

           ပဲခူးတိုင်းဒေသကြီး ၊  ညောင်လေးပင်ခရိုင် ၊ ဒိုက်ဦးမြို့နယ်၊ သုံးခွကျေးရွာ ဘုန်းတော်ကြီး ကျောင်း၌ သြဂုတ် ၁၉ ရက် နံနက် ၁၁:၀၀ နာရီအချိန်က စိုက်ပျိုးရေး မွေးမြူရေးနှင့် ကုန်ထုတ်လုပ်မှု ဖွံ့ဖြိုးတိုးတက်ရေး နည်းပညာပေး သင်တန်းဆွေးနွေးပွဲ ကျင်းပပြုလုပ်ခဲ့ပါသည်။

        အဆိုပါ အခမ်းအနားတွင် မြို့နယ် အုပ်ချုပ်ရေးမှူး ဦးကျော်ဆန်းဦးက အဖွင့်အမှာစကား ပြောကြားပြီးနောက် မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန အရာရှိဦးအောင်မြင့်ထွန်း၊ မြို့နယ်စားသုံးသူရေးရာဦးစီးဌာန မြို့နယ်တာဝန်ခံ ဦးမျိုးမြင့် ၊ မွေးမြူရေးနှင့်ကုသရေးဦးစီးဌာန လက်ထောက်ဦးစီးမှူး ဦးစိုးသန်း၊ စိုက်ပျိုးရေး ဦးစီးမှူး ဦးဇော်သိန်းနိုင်၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန လက်ထောက်ဦးစီးမှူး ဦးရဲနိုင်နှင့် ကျေးလက်လမ်းဦးစီးဌာန ဦးစီးမှူး ဒေါ်နွယ်နီထွန်းတို့ တက်ရောက်၍ မိမိတို့သက်ဆိုင်ရာ ကဏ္ဍအလိုက် ကိစ္စရပ်များအား ရှင်းလင်းပြောကြားပြီး ဆွေးနွေးပွဲသို့တက်ရောက်လာကြသော တောင်သူကြီးများ၏ သိလိုသည်များ ရှင်းလင်းပြောကြားခဲ့ကြောင်း သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ ဒိုက်ဦးမြို့နယ် ၊ ပန်းကိုင်ကျေးရွာ ၊ ဘုန်းတော်ကြီးကျောင်း ဓမ္မာရုံ၌  (၂၂.၈.၂၀၂၂ )ရက်နေ့တွင်  မြို့နယ်အုပ်ချုပ်ရေးမှူး ဦးဆောင်၍ ဌာနပေါင်းစုံ (၈) ဌာနမှ ပူးပေါင်းကာ စိုက်ပျိုး မွေးမြူရေးနှင့် ကုန်ထုတ်လုပ်မှု ဖွံဖြိုးတိုးတက်ရေး နည်းပညာပေး ဆွေးနွေးပွဲအား ကျင်းပ ပြုလုပ်ခဲ့ရာ စားသုံးသူရေးရာဦးစီးဌာန ဒိုက်ဦးမြို့နယ်တာဝန်ခံ ဦးမျိုးမြင့်မှ စားသုံးသူကာကွယ်ရေး အသိပညာပေးဆိုင်ရာ အကြောင်းအရာများကို  ဟောပြောခဲ့ပါသည်။

         တက်ရောက်လာသော တောင်သူများအား စားသုံးသူရေးရာဦးစီးဌာနမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ သမိုင်းကြောင်း ၊ စားသုံးသူရေးရာဦးစီးဌာန ဖြစ်ပေါ်လာပုံ ၊ ဌာန၏ မျှော်မှန်းချက် ၊ ရည်မှန်းချက်များအကြောင်း ၊ စားသုံးသူကာကွယ်ရေးဉပဒေပါ အကြောင်းအရာ များအား ရှင်းလင်းဆွေးနွေးခဲ့ပါသည်။ စားသုံးသူပြည်သူများ ဝယ်ယူသုံးစွဲသော ကုန်ပစ္စည်းတိုင်းတွင် ကုန်အညွှန်းအမှတ်အသားများ ပြည့်စုံစွာ ပါရှိရမည့် အချက်များအား ရှင်းလင်းပြောကြားခဲ့ပြီး လိုက်နာမှု မရှိသည့် လုပ်ငန်းရှင်များအားလည်း အရေးယူမှု အပိုင်းများကို ထည့်သွင်းပြောကြားခဲ့ပါကြောင်း သိရှိရပါသည်။

DOCA(ပဲခူး)

        တောင်ငူခရိုင် ၊ ရေတာရှည်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၏  ဖိတ်ကြားချက်အရ ဩဂုတ်လ ၁၈ ရက်နေ့ မွန်းလွဲပိုင်းက ရေတာရှည်မြို့ ရွှေကြက်ယက် အခြေခံပညာ အထက်တန်းကျောင်းတွင် ကျင်းပသည့် အသိပညာပေးဟောပြောပွဲတွင် စားသုံးသူ ရေးရာ ဦးစီးဌာန တောင်ငူခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်က စားသုံးသူကာကွယ်ရေးဆိုင်ရာများ ကို အသိပညာပေးဟောပြောခဲ့ပါသည်။

      ဟောပြောပွဲတွင် ရေတာရှည်မြို့နယ် အမျိုးသမီးရေးရာအဖွဲ့ချုပ် ဥက္ကဌ ဒေါ်ငုဝါကျော်က မိုးရာသီတွင်ဖြစ်ပွားတတ်သော ရောဂါများအကြောင်းကိုလည်းကောင်း၊ မီးသတ်ဦးစီးဌာနမှ ဒုတိယ ဦးစီးမှူး ဦးသန်းစိုးအောင်က မီးဘေးအန္တရာယ် တားဆီးကာကွယ်ရေးဆိုင်ရာများကိုလည်းကောင်း ဟောပြောပါသည်။

      ဆက်လက်၍ စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဦးစောသန်းထိုက်ကျော်က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးနှင့်တာဝန်များ၊ ကုန်စည်ထုတ်လုပ်သူများအနေဖြင့် မိမိတို့ထုတ်လုပ်သည့် ကုန်စည်များပေါ်တွင် ကုန်အညွှန်းအမှတ် အသားအများ ပြည့်စုံစွာဖော်ပြရန် စားသုံးသူ ကာကွယ်ရေးဥပဒေတွင် ပြဌာန်းထားပြီးဖြစ်ပါသဖြင့် ကုန်စည်များဝယ်ယူရာတွင် ကုန်အညွှန်းအမှတ်အသားကို ဦးစားပေးဖတ်ရှုသင့်သည့် အကြောင်းများ၊ စားသုံးသူနစ်နာဆုံးရှုံးမှုများ မဖြစ်စေရေးအတွက် စစ်ဆေးရေးအရာရှိများ ခန့်အပ်၍ ဈေးကွက် စောင့်ကြည့်လေ့လာခြင်းများ ဆောင်ရွက်နေမှုများ ၊ စားသုံးသူ နစ်နာဆုံးရှုံးမှုများ ဖြစ်ပေါ်ပါက တိုင်ကြားနိုင်ခြင်းများကို ဟောပြောခဲ့ပါသည်။

       ထို့နောက် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အေးဆုစံ က လူကုန်ကူးမှုအန္တရာယ်တားဆီးကာကွယ်ရေးအကြောင်းကို ဟောပြောခဲ့ကြောင်းနှင့် ဟောပြော ပွဲသို့ ကျောင်းသားကျောင်းသူ ၁၆၀ ဦးတက်ရောက်ကြောင်း သိရှိရပါသည်။

DOCA(ပဲခူး)

           စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ စာကြည့်တိုက်သို့ လာရောက်လေ့လာသည့် ကျောင်းသားကျောင်းသူများအား စားသုံးသူကာကွယ်ရေးဆိုင်ရာ သိကောင်းစရာများကို (၁၉.၈.၂၀၂၂)ရက်နေ့ ၊ နံနက် (၁၀: ၀၀)နာရီအချိန်တွင် ဟောပြောခဲ့ပါသည်။

       မြို့နယ်တာဝန်ခံက စားသုံးသူ၏ အခွင့်အရေးများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများ ဦးစားပေးဖတ်ရှုသင့်သည့်အကြောင်းများ၊ စားသုံးသူနစ်နာဆုံးရှုံမှုများ ဖြစ်ပေါ်ပါက စားသုံးသူရေးရာဦးစီးဌာနက ဖွင့်လှစ်ထားသည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC များတွင် တိုင်ကြားနိုင်ခြင်းများကို ရှင်းလင်း ဟောပြောပါသည်။

        ဟောပြောပွဲသို့ စာကြည့်တိုက်သို့ လာရောက်လေ့လာသူ ကျောင်းသားကျောင်းသူ မြို့မ (၁)အခြေခံပညာမူလတန်းလွန်ကျောင်းမှ ကျောင်းသားကျောင်းသူ ၂၄ ဦး တက်ရောက်ကြောင်း သိရှိရပါသည်။

DOCA(ပဲခူး)