ပြည်တွင်းကုန်သွယ်မှုသတင်း

      ဘူးသီးပင်သည် မြန်မာနိုင်ငံ အပူပိုင်းနှင့်သမပိုင်းရာသီဥတုတွင် ကောင်းစွာဖြစ်ထွန်း သော ဟင်းသီးဟင်းရွက်အပင်မျိုးဖြစ်ပြီး နွယ်ပင်အမျိုးအစာဖြစ်ပါသည်။ ဘူးသီးပင်မှ ဘူးသီး များအပြင် ဘူးရွက်များလည်း စားသုံးနိုင်ကြပါသည်။ ဘူးပင်နှင့် ကျောက်ဖရုံသီးပင်သည် အိမ်တိုင်းနီးပါ စိုက်ပျိုးလေ့ရှိရာ စိုက်ပျိုးရလွယ်ကူပြီး အာဟာရဓာတ် ကြွယ်ဝသော အသီးအနှံ ဖြစ်သောကြောင့် နေ့စဉ်စားသင့်ကြောင်း သိရှိရသည်။

   ၂၀၂၅ ခုနှစ်၊ စက်တင်ဘာလ စတုတ္ထပတ်တွင် မုံရွာမြို့၊ မြသလ္လာဈေးကွက်တွင် ဘူးသီး တစ်လုံးလျှင် (၁၃၀၀-၁၅၀၀-၂၅၀၀) ကျပ် ပေါက်ဈေးများရှိပြီး အသီးလတ်ဆက်မှုနှင့် အရွယ် အစားအကြီး၊ အသေးပေါ်တွင်မူ၍ ဈေးနှုန်းများကွာခြားလျက်ရှိပြီး ကျောက်ဖရုံသီး  အကြီး တစ်လုံးလျှင် (၄၃၀၀)ကျပ်၊ အလတ်တစ်လုံးလျှင် (၃၇၀၀) ကျပ်၊ အသေးတစ်လုံးလျှင် (၂၈၀၀)ကျပ်နှင့် ရောင်းချကြောင်း သိရှိရပါသည်။ စားသုံးမှုများ၍ ဈေးကွက်တွင် ရောင်းအား ကောင်းကြောင်း၊ ကုန်စိမ်းရောင်းချသူတစ်ဦး၏ ပြောပြချက်အရ သိရှိရသည်။

DOCA(စစ်ကိုင်း)

     မုံရွာမြို့ ပတ်ဝန်းကျင်ရှိ ကျေးရွာများမှာ သာစည်ဈေးအတွင်းသို့ ရာသီစာ အသီးအရွက်များအပြင် ဗုံလုံးသီးနှင့် ပဲတောင့်ရှည်များလည်း လာရောက်ရောင်းချကြပါသည်။ ဗုံလုံသီး(ခေါ်)ပဲလင်းမြွှေသီးများကို ပုစွန်ဖြင့်အစာသွပ်၍လည်းကောင်း၊ ကြက်ဥဖြင့်ရောမွှေ၍ ကြောက်ချက်၍သော်လည်းကောင်း၊ ဝက်သားဖြင့် ရောက်ချက်၍လည်းကောင်း စားသုံးနိုင်ကြပါသည်။ ပဲတောင့်ရှည်သည် လူတိုင်းကြိုက်ကြသည့် အသီးတစ်မျိူးလည်းဖြစ်ပြီး အကြော်၊ အတို့၊ အမြုပ်၊ သီးစုံပဲဟင်း စသည်တို့ဖြင့် အမျိုးမျိုး စားသုံးကြသည်။

          မုံရွာမြို့၊ သာစည်ဈေးတွင်  ၂၀၂၅ ခုနှစ်၊ စက်တင်ဘာလ စတုတ္တပတ်တွင် ဖြစ်ပေါ်နေ သော  ဗုံလုံသီး (ခေါ်) ပဲလင်းမြွှေသီး ဈေးနှုန်းများမှာ ဗုံလုံသီး(ခေါ်) ပဲလင်းမြွေသီး အကြီး တစ်တောင့်လျှင် (၁၀၀၀)ကျပ်၊ ဗုံလုံသီး(ခေါ်) ပဲလင်းမြွေသီး အလတ်တစ်တောင့်လျှင် (၉၀၀) ကျပ် နှင့် ဗုံလုံသီး(ခေါ်) ပဲလင်းမြွေသီး အသေးတစ်တောင့်လျှင်(၈၀၀)ကျပ်ဖြစ်ပြီး ပဲတောင့်ရှည် စျေးနှုန်းမှာ တစ်ပိဿာလျှင် ၃၀၀၀- ၃၅၀၀ ကျပ်ထိ ရောင်းချလျက်ရှိကြောင်း ကုန်စိမ်း ရောင်းသူများထံမှ သိရှိရပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံး သူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် အခြေခံ စားကုန်ဈေးနှုန်းများကိုလည်း အပတ်စဉ် တင်ပြလျက်ရှိကြောင်း ၂၀၂၅ခုနှစ်၊ စက်တင်ဘာလ တတိယပတ်တွင် မြင်းခြံမြို့စားသုံးဆီလက်လီလက်ကား အရောင်းဆိုင်များ၌ ရောင်းချနေသော စားအုန်းဆီလက်လီတစ်ပိဿာလျှင် (၇၇၉၀)ကျပ်၊ လက်ကားတစ်ပိဿာလျှင် (၇၅၄၀) ကျပ် သင့်တင့်မျှတသောဈေးနှုန်းများဖြင့်‌နေ့စဉ် ရောင်းချလျက်ရှိ‌ကြောင်း၊  မြေပဲဆီတစ်ပိဿာလျှင် (၁၆၀၀၀) ကျပ်၊ နှမ်းဆီတစ်ပိဿာလျှင် (၁၇၀၀၀) ကျပ်ခန့်ပေါက်ဈေးများဖြင့်‌ရောင်းချကြောင်း၊ ယခင်လဩဂုတ်လတတိယပတ်တွင်စားအုန်းဆီလက်လီတစ်ပိဿာလျှင် (၇၄၅၀) ကျပ်၊ လက်ကား တစ်ပိဿာ လျှင်(၇၂၅၅)ကျပ်သင့်တင့်မျှတသောဈေးနှုန်းများဖြင့်‌နေ့စဉ် ရောင်းချလျက်ရှိကြောင်း၊  မြေပဲဆီတစ်ပိဿာလျှင် (၁၇၅၀၀)ကျပ်၊ နှမ်းဆီတစ်ပိဿာလျှင် (၁၈၅၀၀)ကျပ်ခန့် ပေါက်ဈေး များဖြင့်ရောင်းချကြောင်း၊ ကာလတူနှိုင်းယှဉ်ပါက ယခင်လထက် ယခုလတွင် စားအုန်းဆီလက်လီ တစ်ပိဿာလျှင် (၃၄၀)ကျပ်၊ လက်ကားတစ်ပိဿာလျှင် (၂၈၅)ကျပ်ခန့် ဈေးနှုန်းမြင့်တက် ခဲ့ကြောင်းနှင့် မြေပဲဆီ၊နှမ်းဆီတစ်ပိဿာလျှင် (၁၅၀၀)ကျပ်ခန့်ဈေးနှုန်းများကျ ဆင်းခဲ့ကြောင်း စားသုံးဆီလက်လီ၊ လက်ကား အရောင်းဆိုင်များမှသိရှိရသည်။

DOCA(မန္တလေး)

   မိုးနှောင်းရာသီကာလများတွင် ရာသီစာဖြစ်သော အညာမှိုဟင်းလေး တစ်ခွက်ကို လူတိုင်းနီးပါး စားဖူးကြမည်ထင်ပါသည်။ အညာမှိုဟင်းဟုခေါ်သော်လည်း သူ၏အဖူးလေးသည် ကြာဖူးကလေးနှင့် တူသည်။ ထို့ကြောင့် အညာတွင်သူ့ကို ပဒုမ္မာဖူးဟုလည်းခေါ်သည်။ တဇောင်းဖူး၊ရွှေကြာဖူးဟူ၍လည်း ခေါ်ကြပြန်သည်။ သူသည် အိမ်၏အန္တရာယ်ကိုလည်း ကာကွယ်ပေးသည့် ဒေသပေါက်ပင်ဖြစ်သဖြင့် ခြံစည်းရိုးပင်ဟုလည်းခေါ်ကြပြန်သည်။

   ပင်စည်ထိပ်တွင်ပွင့်လန်းသည့် အထွတ်အထိပ်ပန်းဖြစ်သကဲ့သို့ ဓါးထက်ထက်ကဲ့သို့သော အစွမ်းကို ပိုင်ဆိုင်ထားပြန်သည်။ ထိုအစွမ်းဖြင့် ဆီးချိုရောဂါနှင့် နှလုံးရောဂါကိုလည်း ကာကွယ်‌ ပေးသည်သာမက သွေးတိုး‌ရောဂါကိုလည်းကာကွယ်‌‌ပေးနိုင်သည်။ အပွင့်ကိုပြုတ်ထားသည့် အရည်ကို သောက်သုံးပေးခြင်းဖြင့် အစာအိမ်နှင့်အူလမ်းကြောင်းမှ ရောဂါပိုးများကို ဖယ်ရှားရှင်းလင်းနိုင်ပြီး ဆီးချိုသွေးချိုရောဂါကို ပျောက်ကင်းသက်သာစေနိုင်ကြောင်းသိရှိရသည်။

   မြင်းခြံမြို့၊ အေးမြသီတာစျေးရှိ စျေးဗန်းထဲတွင် ဖူးငုံစီရီနေသော ထိုကန္တာရနတ်ပန်းပင် လေးများ ၏ အဖူးအငုံလေးများကို စျေးနှုန်းချိုသာစွာဖြင့် ရောင်းချလျက်ရှိကြောင်း တွေ့မြင်ရသည်။ နေပူစပ်ခါး တွင် ဆူးစူးခံကာခူးယူကြရကြောင်း ရောင်းချသူ‌စျေးသည်တစ်ဦးကဆိုသည်။ (၂၅)ကျပ်သားလျှင်  (၁၀၀၀)ကျပ်စျေးဖြင့်‌ရောင်းချကြောင်း ခူးယူရောင်းချသူ အိုင်းမ‌ကျေးရွာမှဒေသခံစျေးသည် တစ်ဦး၏ ပြောကြားချက်အရသိရှိရသည်။

DOCA(မန္တလေး)

   မြန်မာတို့သည် အစဉ်အလာကိုနှစ်သက်မြတ်နိုးကြသည့် ယဥ်ကျေးမှုမြင့်မားကြသည့် လူမျိုးစု များဖြစ်သည့် အားလျော်စွာ “ရိုးရာပယ်လျှင်မွဲတတ်သည်” ဟူသောဆိုရိုးနှင့်အညီ ရိုးရာအစဉ်အလာ အတိုင်း မည့်သည့်အခမ်းအနားတွင်မဆို ငှက်ပျောပွဲ၊ အုန်းပွဲများကို တင်လေ့ရှိကြသည်။ ငှက်ပျောပင်မှထွက်သော ငှက်ပျောသီးအဖီးအစုံနှင့် ကန်တော့ပွဲကိုမြင်ရသည်မှာ ကြည်နူးဖွယ် ယဉ်ကျေးမှုပြယုဂ် တစ်ခုပင်ဖြစ်သည်။ မသိ၍ဖြစ်စေ၊ သိ၍ဖြစ်စေ၊ ကံသုံးပါးဖြင့် ပြစ်မှားမိသမျှကို ဝန်ချတောင်းပန်ရန် ငှက်ပျောသီးကလေးများသည် ကာယကံရှင်၏ရှေ့ဆော်ပြေးစေတနာအဖြစ် နေရာ ယူနေကြသည်။ ထို့သို့သော နေရာတွင်သာမက အဆာပြေစားရန်၊ လှူဒါန်းရန်၊ ပေးကမ်းရန်၊ ဧည့်ခံရန် နေရာမျိုးစုံတွင် သူမပါလျှင်မပြီး အသွင်အမျိုးမျိုးဖြင့် နေရာယူတတ်သည့်  အလွန်တင့်တယ်သော အသီးကလေးများသည် ငှက်ပျောသီးကလေးများပင်ဖြစ်သည်။ ငှက်ပျောသီးသည် အာဟာရ ဓာတ်ပြည့်ဝကြောင်းကို လူတိုင်းသိရှိကြပြီး ဖြစ်ပါသည်။ အထူးသဖြင့် ငှက်ပျောသီးသည် ပိုတက်ဆီယမ် ဓာတ်ကြွယ်ဝသည့်အတွက် အင်အားချိနဲ့သူများအတွက် အားကိုးရဆုံး သစ်သီးတစ်လုံးဆိုလျှင် မည်သူမျှ ငြင်းဆိုမည်မဟုတ်ချေ။ အစာအိမ်အနာကို ပျောက်ကင်းစေနိုင်ပြီး အစာချေစနစ်ကို ကောင်းမွန်စေသည့်အပြင် ကျောက်ကပ်ကျန်းမာ‌ရေးကို အထောက်အကူပြုစေ၍ လေဖြတ်နိုင်ချေကို လျော့နည်းအောင်စွမ်းဆောင်ပေးနိုင်သည့် အစွမ်းထက်သော သစ်သီးတစ်လုံးပင်ဖြစ်သည်။ထိုသို့သော အာနိသင် ပြည့်ဝသောဖီးကြမ်းငှက်ပျောသီးများကိုမြင်းခြံမြို့၏ အေးမြသီတာစျေးတွင် ဆိုင်ခန်းများစွာ ဖြင့် ရောင်းချလျက်ရှိကြောင်းကို တွေ့မြင်ရသည်။

  မြင်းခြံမြို့တွင် ဝယ်ယူရရှိနိုင်သော ငှက်ပျောသီးအဖီးအခိုင်များသည် ‌ရွှေဘိုမြို့နှင့်ကျောက် ဆည် ဟန်မြင့်မိုရ်နယ်၊ ပခုက္ကူမြို့အနီးရှိကျေးရွာများမှ ငှက်ပျောစိုက်တောင်သူများမှ လာရောက် ရောင်းချခြင်းဖြစ်ကြောင်း ဒေသခံ ငှက်ပျောကုန်သည်တစ်ဦး၏ပြောကြားချက် သိရှိရသည်။

DOCA(မန္တလေး)