ပြည်တွင်းကုန်သွယ်မှုသတင်း

     မန္တလေးတိုင်းဒေသကြီး ၊‌ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံကို ရာသီအလိုက် စိုက်ပျိုးလျက်ရှိပါသည်။ ယခုမတ်လဆန်းမှစတင်၍ နွေစပါးစိုက်ပျိုးရန် အတွက်မျိုးများ စတင်ပျိုးထောင်လျက်ရှိပါသည်။အများဆုံးပျိုးထောင်သောမျိုးများမှာ ဧရာပဒေသာမျိုးနှင့် မနောသုခမျိုးများကိုသာ အဓိကထားပျိုးထောင်ကြပါသည်။ ယခင်နှစ်နွေစပါးပျိုးထောင်ချိန် တွင်ပဒေသာတစ်တင်းလျှင်(၁၀၀၀၀)ကျပ်နှင့် မနောသုခတစ်တင်းလျှင် (၇၅၀၀)ကျပ်ဖြင့် ဝယ်ယူ ပျိုးထောင်ခဲ့ရပြီး ယခုနှစ်နွေစပါးပျိုးထောင်ချိန်တွင် ဧရာပဒေသာမျိုး တစ်တင်းလျှင် (၃၃၀၀၀)ကျပ်နှင့် မနောသုခမျိုးတစ်တင်းလျှင် (၂၄၀၀၀)ကျပ် ဈေးများဖြင့် ဝယ်ယူပျိုးထောင်ရကြောင်း ၊ တစ်ဧက စိုက်ပျိုးရန်အတွက် စပါးမျိုး(၂)တင်းပျိုးထောင်ရကြောင်း သိရှိရပါသည်။ ပျိုးထောင်ရန်အတွက် ဆည်‌ရေများ ပေးဝေနေပြီဖြစ်သောကြောင့် မျိုးများ စတင်ပျိုးထောင်လျက်ရှိပါသည်။ ပျိုးထောင်စိုက်ပျိုးမှုအတွက် ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် (၁၆၅၀၀၀/-)ကျပ်ဝန်ကျင်ကုန်ကျကြောင်း၊ပျိုးထောင်(၇၅)ရက်အကြာတွင် ပျိုးများနှုတ်၍ ပြောင်းရွှေ့စိုက်ပျိုးနိုင်ပြီဖြစ်‌ကြောင်း နွေစပါးပျိုးထောင်သောတောင်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)

    မန္တလေးတိုင်းဒေသကြီး၊‌‌ ကျောက်ဆည်ခရိုင်အတွင်းရှိ ‌ကျေးလက်နေတောင်သူများသည် စပါး၊ ပဲ၊ပြောင်း၊နှမ်း စသည့်သီးနှံများစိုက်ပျိုးသည့်အပြင် ဟင်းသီးဟင်းရွက်နှင့် သစ်သီးဝလံများကိုလည်း နှစ်စဉ်ရာသီအလိုက် စိုက်ပျိုးကြပါသည်။ ၄င်းသီးနှံများအနက်မှ ဆေးဖက်ဝင်ဟင်းချက်စားသုံးရသော ရုံးပတီသီးသီးနှံများကို ယခင်က မိသားစုစားသုံးရန်နှင့် အပိုဝင်ငွေရရှိရေးအတွက် တစ်နိုင်တစ် ပိုင်စိုက်ပျိုးရာမှ ယခုအခါ စီးပွားဖြစ်စိုက်ပျိုးလာကြပါသည်။ ရုံးပတီပင်သည် ရာသီမရွေးစိုက်ပျိုးနိုင် ပြီး ဝင်ငွေရလွယ်သော သီးနှံတစ်မျိုးဖြစ်သည့်အတွက် တောင်သူများတွက်ချေကိုက်၍ စိုက်ပျိုးသင့် သောသီးနှံတစ်မျိုးဖြစ်ပါသည်။ စိုက်ပျိုးသောမျိုးများမှာ ပင်ပုမျိုး၊ပင်လတ်မျိုး၊ပင်မြင့်မျိုးကို အများဆုံးစိုက်ပျိုးကြပါသည်။ တစ်ဧကလျှင် မျိုးစေ့ (၁၀)ကီလိုဂရမ် စိုက်ပျိုးရပါသည်။ တစ်ဧကကုန်ကျ စရိတ်အနေဖြင့် (၃၅၀၀၀၀/-)ကျပ်ဝန်းကျင်ခန့် ကုန်ကျကြောင်း၊ စိုက်ပျိုးပြီး ပန်းပွင့်ပြီးတစ်ပတ်အကြာတွင် စတင်ခူးဆွက်ရပါသည်။ ထိုသို့ ခူးဆွတ်မှသာ စားကောင်းသောအနေတော်ရုံးပတီသီးများ ရရှိမည်ဖြစ်ပါသည်။ ခူးဆွတ်မှုအနေဖြင့် နှစ်ရက်ခြားတစ်ကြိမ် ခူးဆွတ်ပေးရပါသည်။ ပူပြင်းသော ရာသီဉတုတွင် အသီးရင့်မှည့်လွယ်သောကြောင့် နှစ်ရက်တစ်ကြိမ် ခူးဆွတ်ရခြင်းဖြစ်ကြောင်း၊ စျေးနှုန်းအနေဖြင့် တစ်ပိဿာလျှင် (၁၅၀၀ - ၁၆၀၀) ကျပ် စျေးနှုန်းရရှိပြီး တစ်ဧကအထွက်နှုန်းအနေဖြင့် ပိဿာ(၁၁၀၀)ခန့်ထွက်ရှိကြောင်း အကျိုးအမြတ်အနေဖြင့် စျေးနှုန်းပေါ်မူတည်ပြီး အကျိုး အမြတ် ရကြောင်း ရုံးပတီသီးစားသုံးခြင်းဖြင့် ဆီးချိုရောဂါအတွက် သင့်တော်သောအစားအစာ ဖြစ်ပြီး နှလုံးရောဂါနှင့် ကင်ဆာရောဂါများကိုလည်း သက်သာပျောက်ကင်းစေပါသည်။ ဒူးနှင့် ပတ်သက်သောရောဂါများနှင့် ရိုးတွင်းချဉ်ဆီကို အားကောင်းစေကြောင်း သိရှိရပါသည်။ စားသုံးသူအတွက် ဆေးဖက်လည်းဝင် မိသားစုဝင်ငွေတိုးသည့်အတွက် ဟင်းစားရုံးပတီသီးပင်အား တိုးချဲ့စိုက်ပျိုးသင့်သောသီးနှံတစ်မျိုးဖြစ်ကြောင်း ရေးသားတင်ပြအပ်ပါသည်။

DOCA(မန္တလေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါဆောင်ရွက်လျက်ရှိရာ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့တွင် မိသားစုစားဝတ်နေရေးအတွက် အပိုဝင်ငွေရရှိရန် ဥစားကြက်မွေးမြူရေးလုပ်ငန်းများလုပ်ကိုင်လျက်ရှိကြောင်းသိရှိရပါသည်။

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့ပြင် ကြက်မွေးမြူရေးဇုန်ရှိ ဦကိုကြီး၏ CP ဥစားကြက်မွေးမြူရေးလုပ်ငန်းသို့ သွားရောက်လေ့လာခဲ့ရာ ကြက်ခြံပိုင်ရှင်မှာ ၎င်းအနေဖြင့် ယခင်နှစ်တွင် ကြက်ခြံ (၂/၃)ခြံမွေးမြူထားခဲ့ပြီး ယခုနှစ်တွင် တစ်ခြံသာမွေးမြူထားကြောင်း၊ ကြက်ခြံတစ်ခြံလျှင် ကြက်အကောင်ရေ(၁၀၀၀)ထားရှိကြောင်း၊ ကြက်ပေါက်တစ်ကောင်လျှင် (၂၀၀၀)ကျပ်နှုန်းဖြင့် မန္တလေးမြို့မှဝယ်ယူကာ မွေးမြူထားကြောင်းသိရှိရပါသည်။

      ကြက်ပေါက်ကလေးများအား မန္တလေးမြို့မှ  မိမိတို့ခြံရောက်သည့်အချိန်ထိ ကြက်ပေါက်သက်တမ်းမှာ (၂/၃)ရက်သားသာရှိပြီး တစ်လပြည့်သည်အထိ အနွေးဓာတ်ရစေရန် မီးအပူပေးရကြောင်း၊ ကြက်ပေါက်(၂/၃)ရက်သားမှ (၄)လသားအရွယ်အထိ အစာအလွတ်ကျွေးထားရပြီး (၄)လသားပြည့်မှသာ ကြက်ဥစမ်းဥကြောင်း၊ ကြက်သက်တမ်းတစ်နှစ်ခွဲသည်အထိ ကြက်ဥ ဥနိုင်နှုန်းရှိသေး၍ မွေးမြူခြင်းဖြစ်ကြောင်း၊ တစ်နှစ်ခွဲကျော်လျှင် ဥနှုန်းကျပြီး သက်တမ်းကုန်ကြက်ဖြစ်၍ ၎င်းကြက်များကိုရောင်းကာ အသစ်ထပ်ထည့်ပေးရကြောင်း၊ ဥစားကြက် (၄)လသားအရွယ်မှ (၁၀)လသားအထိ နေ့စဉ် ကြက်ဥနှုန်းမှာ (၉၀)ရာခိုင်နှုန်းထိ ‘ ဥ ’ ဥနိုင်ပြီး (၁၀)လသားကျော်မှ တစ်နှစ်ခွဲသက်တမ်းအထိ နေ့စဉ် ကြက်ဥ ‘ ဥ ’ နိုင်မှုနှုန်းမှာ (၅၀)ရာခိုင်နှုန်းကျော်ထိသာဥနိုင်ကြောင်းသိရှိရပါသည်။

     ယခုလက်ရှိကြက်များမှာ တစ်နှစ်ခွဲသားများဖြစ်၍ သက်တမ်းကုန်ကြက်များဖြစ်သည့်အတွက် တစ်ရက်လျှင် ဥအလုံးအရေအတွက် (၅၀၀)ကျော်သာရှိပြီး ကြက်ဥအသေး၊ အလတ်၊ အကြီးပေါ်မူတည်၍ တစ်လုံးလျှင် (၂၅၀/၂၇၀/၃၀၀)ကျပ်နှုန်းဖြင့် အစားစားရောင်းချရကြောင်း၊ လက်ရှိကြက်များကိုကျွေးနေသော ကြက်စာအမျိုးအစားမှာ CP မှထွက်ရှိသော 8008 ဥစားကြက်ရောစပ်စာ (၅၀)ကီလိုအိတ်နှင့် ပြောင်းဆံများကို ကြိတ်ခွဲ၍ကျွေးရကြောင်း၊ တစ်လလျှင် ကြက်စာအိတ် (၂၀)နှင့် ပြောင်းဆံတင်း (၆၀)ကုန်ကျကြောင်း၊ တစ်ရက်လျှင် (၂)ကြိမ်သာကျွေးကြောင်း၊ အစာအိတ်တစ်အိတ်လျှင် (၈၇၀၀၀)ကျပ်၊ ပြောင်းဆံတစ်တင်းလျှင် (၂၀၀၀၀)ကျပ်နှုန်းဖြင့် တစ်လလျှင် အစာဖိုး (၂၉၄၀၀၀၀)ကျပ်ခန့်ကုန်ကျပြီး တစ်ရက်လျှင် ကြက်ဥအလုံးရေမှာ ပျမ်းမျှအားဖြင့် (၅၀၀)လုံးရရှိပြီး ရောင်းရသည့်ဈေးနှုန်း (၂၇၀)ကျပ်နှုန်းဖြင့် ပျမ်းမျှတွက်ကြည့်ပါက  တစ်လအကျိုးအမြတ်မှာ ကျပ်(၁၁)သိန်းခန့်ကျန်ရှိကြောင်း ကြက်ခြံပိုင်ရှင်ထံမှသိရှိရပါသည်။

DOCA(စစ်ကိုင်း)

    ၁၉.၃.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    ၁၉.၃.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။