ပြည်ပကုန်သွယ်မှုသတင်းများ

အစီရင်ခံစာအမှတ် - ၁/၂၀၂၅

တရုတ်နိုင်ငံသို့ ဆန်တင်ပို့ခွင့်ခွဲတမ်း တန်ချိန် ၅ သိန်း ကမ္ဘောဒီးယား တိုးမြှင့်ရရှိ

 ကမ္ဘောဒီးယားနိုင်ငံအနေဖြင့် တရုတ်နိုင်ငံသို့ ကြိတ်ခွဲပြီးဆန်တင်ပို့မှုကို တန်ချိန် ၄ သိန်း ခွဲတမ်းရရှိခဲ့ရာမှ သဘောတူညီချက်အသစ်တစ်ရပ်ကို လက်မှတ်ရေးထိုးပြီး ၂၅ ရာခိုင်နှုန်းမြှင့်တင် လျက် ဆန်တန်ချိန် ၅ သိန်းအထိ တင်ပို့ခွင့်ရရှိခဲ့ကြောင်း ခမာတိုင်းမ် သတင်းဌာနက ဖော်ပြပါ သည်။

  ကမ္ဘောဒီးယား စီးပွားရေးနှင့် ကူးသန်းရောင်းဝယ်ရေးဝန်ကြီးဌာန လက်အောက်ရှိ နိုင်ငံပိုင် ထောက်ပံ့ပို့ဆောင်ရေးနှင့် ကုန်သွယ်ရေးလုပ်ငန်းဖြစ်သော Green Trade ကုမ္ပဏီသည် တရုတ် နိုင်ငံရှိ အစိုးရပိုင် စားသောက်ကုန်လုပ်ငန်းဖြစ်သည့် COFCO ကော်ပိုရေးရှင်းနှင့် ဆန်ကုန်သွယ်မှု ဆိုင်ရာ နားလည်မှုစာချွန်လွှာ အသစ်တစ်ရပ်ကို လက်မှတ်ရေးထိုးလျက် တရုတ်နိုင်ငံသို့ ဆန် တင်ပို့ခွင့်ခွဲတမ်းကို တန်ချိန် ၅ သိန်းသို့ တိုးမြှင့်နိုင်ခဲ့သည်ဟု ၂၀၂၄ ခုနှစ် ဒီဇင်ဘာလလယ်ပိုင်း၌ ထုတ်ပြန်သည့် နှစ်ပတ်လည် အစီရင်ခံစာ၌ အဆိုပါဝန်ကြီးဌာနက ဖော်ပြခဲ့ခြင်းဖြစ်သည်။

 ဝန်ကြီးဌာနအနေဖြင့် Green Trade ကုမ္ပဏီမှတစ်ဆင့် ဒေသတွင်းရှိ အချို့သောနိုင်ငံများ ထံသို့ ကမ္ဘောဒီးယား၏ ဆန်ဈေးကွက်ကို ချဲ့ထွင်နိုင်ရေး စေ့စပ်ညှိနှိုင်းမှုများ လုပ်ဆောင်လျက် တစိုက်မတ်မတ် ကြိုးပမ်းဆောင်ရွက်လျက်ရှိကြောင်း၊ ကမ္ဘောဒီးယား - တရုတ် လွတ်လပ်စွာ ကုန် သွယ်မှု သဘောတူစာချုပ်အရ ဆန်တင်ပို့မှုဈေးကွက်မြှင့်တင်ရန် လုပ်ဆောင်လျက်ရှိကြောင်းဖြင့် ကမ္ဘောဒီးယား ကူးသန်းရောင်းဝယ်ရေးဝန်ကြီး Cham Nimul က ပြောကြားခဲ့သည်။

၂၀၁၄ ခုနှစ် ဩဂုတ်လ၌ ကမ္ဘောဒီးယားနှင့်တရုတ် နှစ်နိုင်ငံအကြား သဘောတူ လက်မှတ် ရေးထိုးခဲ့သည့် ပထမဦးဆုံး ဆန်တင်ပို့ခွင့်ခွဲတမ်း သတ်မှတ်ချက်မှာ တန်ချိန် ၁၀၀၀၀၀ သာ ရှိခဲ့ ရာမှ တဖြည်းဖြည်း တိုးမြင့်လာခဲ့ခြင်းဖြစ်သည်။

 ကမ္ဘောဒီယားနိုင်ငံသည် ၂၀၂၄ ခုနှစ် ပထမ ၁၁ လအတွင်း ပြည်ပသို့ ဆန် ၅၇၅၅၆၂ တန်ကို တင်ပို့လျက် ဝင်ငွေ ဒေါ်လာ ၄၁၃.၉ သန်းရရှိခဲ့ကြောင်း၊ ကုမ္ပဏီ ၅၅ ခုမှ နိုင်ငံပေါင်း ၆၇ နိုင်ငံသို့ တင်ပို့ခဲ့ခြင်းဖြစ်ကြောင်း၊ တရုတ်နိုင်ငံသည် အဓိကဈေးကွက်အဖြစ် ဆက်လက်ရပ်တည်နေပြီး အဆိုပါ ကာလအတွင်း တန်ဖိုးဒေါ်လာ သန်း ၇၀ ရှိသော ဆန်တန်ချိန် ၁၀၉၄၄၈ တန်ကို တင်ပို့ခဲ့ ခြင်းဖြစ်ကြောင်း ကမ္ဘောဒီးယား ဆန်စပါးအသင်းချုပ်၏ သတင်းထုတ်ပြန်ချက်အရ သိရှိရသည်။

တရုတ်နိုင်ငံ၌ ကျင်းပခဲ့သော တရုတ်-အာဆီယံ အရည်အသွေးမြင့် အင်ဒီကာဆန်မျိုးများ ၏ အရသာအရည်အသွေး သုံးသပ်အကဲဖြတ်ပြိုင်ပွဲတွင် ကမ္ဘောဒီးယား၏ Sen Kra Ob ဆန်မွှေး သည် အကောင်းဆန်အဖြစ် ပထမဆုရရှိထားသည်။ အဓိက ဈေးကွက်ဖြစ်သော တရုတ်နိုင်ငံသို့ ဆန်တင်ပို့ခွင့်ခွဲတမ်း တိုးချဲ့နိုင်ခြင်းက ကမ္ဘောဒီးယား၏ ဆန်တင်ပို့မှုကို တိုးမြှင့်နိုင်မည်ဖြစ် သကဲ့ သို့ နိုင်ငံ၏ လယ်ယာကဏ္ဍကိုလည်း သိသာစွာ မြှင့်တင်နိုင်လိမ့်မည်ဟု ခမာတိုင်းမ် သတင်းဌာနက ဖော်ပြထားသည်။

Source: Khmer Times, 1 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

            ၂၀၂၄ ခုနှစ်တွင် ဗီယက်နမ်၏စိုက်ပျိုးမွေးမြူရေး-သစ်တော-ငါးလုပ်ငန်းတင်ပို့မှုမှ တစ်ဆင့် အမေရိကန်ဒေါ်လာ ၆၂ ဘီလီယံကျော်ရရှိရန်ခန့်မှန်းရပြီး ၂၀၂၅ တွင်လည်း ဆက်လက်ကြီးထွား နိုင်ကြောင်း ဒီဇင်ဘာလ ၁၆ ရက်နေ့က ဟိုချီမင်းမြို့တော်တွင်ကျင်းပခဲ့သည့် ကွန်းဖရန့်တွင် အရည်အသွေး၊ပြုပြင်ထုတ်လုပ်ခြင်းနှင့်စျေးကွက်ဖွံ့ဖြိုးတိုးတက်‌ရေးဦးစီးဌာန ဒုတိယညွှန်ကြား ရေးမှူးဖြစ်သူ Le Thanh Hoa က ပြောကြားခဲ့ကြောင်းသိရပါသည်။ ၂၀၂၄ ခုနှစ်တွင် ဗီယက်နမ်၏ စိုက်ပျိုးမွေးမြူရေးကဏ္ဍသည် ထုတ်လုပ်မှုတွင်သာမက တင်ပို့မှုတွင်ပါကြီးထွား ခဲ့ကြောင်းသိရပါသည်။ ထုတ်လုပ်မှုတန်ဖိုးသည် ၂၀၂၃ ခုနှစ်ကထက် ၃.၂ ရာခိုင်နှုန်းနှင့် တင်ပို့မှု သည် ၁၈ ရာခိုင်နှုန်းမြင့်တက်ရန်မျှော်မှန်းရကြောင်းသိရပါသည်။ သစ်နှင့်သစ်ထုတ်ကုန် (အမေရိကန်ဒေါ်လာ၁၆.၁ဘီလီယံ)၊ သစ်သီးနှင့်ဟင်းသီးဟင်းရွက် (အမေရိကန်ဒေါ်လာ၇.၁ ဘီလီယံ)၊ ဆန်(အမေရိကန်ဒေါ်လာ၅.၈ဘီလီယံ)၊ ကော်ဖီ(အမေရိကန်ဒေါ်လာ၅.၄ ဘီလီယံ)၊ သီဟိုဠ်စေ့များ (အမေရိကန်‌ဒေါ်လာ၄.၃ ဘီလီယံ)၊ ပုဇွန်(အမေရိကန်ဒေါ်လာ၃.၈ ဘီလီယံ)နှင့် ရာဘာ(အမေရိကန်ဒေါ်လာ ၃.၂ ဘီလီယံ)တို့ပါဝင်သော ထုတ်ကုန် ၁၁ ခုမှာ တင်ပို့မှုတန်ဖိုး အနည်းဆုံး အမေရိကန်ဒေါ်လာ ၁ ဘီလီယံကျော်ခဲ့ကြောင်းသိရပါသည်။ ကြီးထွားနှုန်းတွင် လည်း နှစ်ဆမြင့်တက်ခဲ့သည့် အချို့ထုတ်ကုန်များမှာ ကော်ဖီ(၅၆.၉ ရာခိုင်နှုန်း)၊ ငရုတ်ကောင်း အနက် (၅၃.၃ ရာခိုင်နှုန်း)၊ ရာဘာ(၂၄.၆ ရာခိုင်နှုန်းနှင့် ဆန်(၁၀.၆ ရာခိုင်နှုန်း)တို့ ဖြစ်ကြောင်းသိရ ပါသည်။ ယခုနှစ်၏ပထမ ၁၁ လတွင်အမေရိကန်သည် အမေရိကန်ဒေါ်လာ ၁၂.၃ ဘီလီယံဖြင့် ဗီယက်နမ်၏အကြီးမားဆုံး စိုက်ပျိုးမွေးမြူရေးထုတ်ကုန်တင်ပို့ရာ ဈေးကွက်ဖြစ်ပြီး ၎င်းတို့၏နောက်တွင် တရုတ်၊ ဥရောပသမဂ္ဂ၊ ဂျပန်နှင့် တောင်ကိုရီးယားတို့ ရပ်တည်နေကြောင်းသိရ ပါသည်။ ခန့်မှန်းတင်ပို့မှုတန်ဖိုး အမေရိကန်ဒေါ်လာ ၆၂ ဘီလီယံဖြင့် ဗီယက်နမ်သည် ကုန်သွယ်ရေးပိုငွေ အမေရိကန်ဒေါ်လာ ၆ ဘီလီယံကျော်ရရှိခဲ့ကြောင်း သိရပါသည်။ Hoa က ဗီယက်နမ်လက်မှတ်ရေးထိုးခဲ့သည့် လွတ်လပ်သောကုန်သွယ်ရေး သဘောတူညီချက်များက ထိုသို့အောင်မြင်မှုများရရှိစေခဲ့ခြင်းဖြစ်ကြောင်း ပြောကြားခဲ့ကြောင်းသိရှိရပါသည်။

Vietnam Plus

DOCA(ရန်ကုန်)

          ဘင်္ဂလားဒေ့ရှ်နိုင်ငံဆိုင်ရာဗီယက်နမ်သံရုံးနှင့် ဗီယက်နမ်စီးပွားရေးကိုယ်စားလှယ်အဖွဲ့ကို ဦးဆောင်လာသည့် သံအမတ်Nguyen Manh Cuong သည် ဘင်္ဂလားဒေ့ရှ်နိုင်ငံ Sylhet မြို့တော် မှ အစိုးရအေဂျင်စီများ၊ စီးပွားရေးမိတ်ဖက်များနှင့် တွေ့ဆုံဆွေးနွေးမှုများပြုလုပ်ခဲ့ကြောင်း သိရပါသည်။ ထိုအစည်းအဝေးတွင် နှစ်ဖက်စလုံးသည် ယဉ်ကျေးမှုဖလှယ်ရန်၊ ခရီးသွားကဏ္ဍနှင့် စီးပွားရေးချိတ်ဆက်ရေးနှင့် နှစ်နိုင်ငံလုံးမှပြည်သူများကြား အပြန်အလှန်နားလည်မှုမြှင့်တင်ရန် သဘောတူခဲ့ကြကြောင်းသိရပါသည်။ Sylhet မြို့တော်အုပ်ချုပ်ရေးအဖွဲ့၏ခေါင်းဆောင်ဖြစ်သူ Muhammad Sher Mahbud Murad က မြို့တော်သည် လတ်တလောတွင် ခရီးသွားကဏ္ဍ အားကောင်းမှု၊ စိုက်ပျိုးမွေးမြူရေးထုတ်လုပ်မှုနှင့် သဘာဝဂတ်စ်ငွေ့ထုတ်ယူမှုတို့တွင် အားကောင်းမှုနှင့်အတူ နိုင်ငံတွင် ဖွံ့ဖြိုးတိုးတက်မှုအမြန်ဆုံးမြို့တော်ထဲမှ တစ်ခုအဖြစ်ရပ်တည် နေကြောင်းပြောကြားခဲ့ပါသည်။ သို့သော်ရာသီဥတုပြောင်းလဲမှုနှင့် သဘာဝပတ်ဝန်းကျင် ညစ်ညမ်းမှုတို့ကြောင့် ၎င်းတို့သည် ရေလွှမ်းမိုးမှုနှင့် အပူလှိုင်းအစရှိသည့် ပြင်းထန်သော ရာသီဥတု အခြေအနေများနှင့်ရင်ဆိုင်နေရကြောင်းသိရပါသည်။ ပြည်တွင်းအစိုးရသည် ရာသီဥတု ပြောင်းလဲမှု ၏ဆိုးကျိုးသက်‌ရောက်မှုများကို လျှော့ပါးသက်သာစေရန်နှင့် တုန့်ပြန်နိုင်ရန် နိုင်ငံတကာ အတွေ့အကြုံ အထူးသဖြင့်ဗီယက်နမ်၏အတွေ့အကြုံကို တက်ကြွစွာသုတေသန ပြုလျှက်ရှိ ကြောင်းသိရပါသည်။ထို့ပြင် Murad က ၎င်းသည် ပြည်တွင်းအစားအစာဖူလုံမှုရှိရေးနှင့် တင်ပို့ နိုင်ရန်အတွက် စိုက်ပျိုးမွေးမြူရေးကဏ္ဍတွင် တည်ငြိမ်မှုရှိရန် မြင့်မားသောနည်းပညာ ဖွံဖြိုး တိုးတက်ရေးအတွက် ဗီယက်နမ်ထံမှအကြံဉာဏ်ရယူလိုကြောင်းပြောကြားခဲ့ပါသည်။ သံအမတ် Cuong က ၎င်းသည် Sylhet မြို့တော်အား အနာဂတ်တွင် စံပြခရီးသွား မြို့တော်အဖြစ် အောင်မြင်စွာဖွံဖြိုးတိုးတက်ပြီး ဘင်္ဂလားဒေ့ရှ်၏အဓိကစီးပွားရေးအချက်အချာဖြစ်လာမည်ဟု ယုံကြည်ချက်ရှိနေကြောင်းပြောကြားခဲ့ပါသည်။ ဗီယက်နမ်သည်စိုက်ပျိုးမွေးမြူရေးနှင့် ခရီးသွား ကဏ္ဍအတွက် ဖွံ့ဖြိုးတိုးတက်ရေးအတွက် သင့်လျှော်သည့်ကမ်းရိုးတန်းနိုင်ငံဖြစ်သည့်အတွက် သံအမတ်ကြီးက နှစ်ဖက်စလုံးအနေဖြင့်‌ ဒေသများအကြားချိတ်ဆက်မှုနှင့် မိတ်ဖက်ဖွဲ့မှု အလားအလာများကိုရှာဖွေရန်၊ ထိုမှတစ်ဆင့်စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု အစရှိသည့်များစွာသောနယ်ပယ်များတွင် ဖွံ့ဖြိုးတိုးတက်မှုအတွေ့အကြုံကိုဝေမျှရန်နှင့် ပူးပေါင်းဆောင်ရွက်မှုမြှင့်တင်ရန် အကြံပြုခဲ့ကြောင်းသိရပါသည်။ ထို့နောက်ဗီယက်နမ်ကိုယ်စားလှယ်အဖွဲ့ သည် Moulvibazar ပြည်နယ်နှင့် Habiganj ပြည်နယ်တို့သို့ သွားရောက် လည်ပတ်ကာ ကုန်သွယ်ရေးနှင့်အစားအစာပို့ကုန်-သွင်းကုန်အစရှိသည်တို့တွင် ပူးပေါင်းဆောင်ရွက်ရန် အခွင့် အလမ်းများကိုရှာဖွေခဲ့ကြကြောင်းသိရပါသည်။ ထို့ပြင်သံရုံးသည် လတ်တလောတွင် ဘင်္ဂလားဒေ့ရှ်၌ စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှုဝန်းကျင်နှင့် နှစ်နိုင်ငံ စီးပွားရေးလုပ်ငန်းများကြား ပူးပေါင်းဆောင်ရွက်မှုအလားအလာအပေါ် ဆွေးနွေးပွဲကျင်းပရန် ဘင်္ဂလားဒေ့ရှ်-ဗီယက်နမ် ကုန်သည်နှင့်စက်မှုလုပ်ငန်းရှင်များအသင်းနှင့် ညှိနှိုင်းဆွေးနွေးခဲ့ကြောင်း သိရှိရပါသည်။

Vietnam Plus

DOCA(ရန်ကုန်)                 

      ကမ္ဘောဒီးယားနိုင်ငံသည် ၂၀၂၄ ခုနှစ်၊ ပထမ (၁၁) လအတွင်း အထည်ချုပ်၊ ဖိနပ်နှင့် ခရီးသွားကုန်ပစ္စည်းတင်ပို့မှုသည် အမေရိကန်ဒေါ်လာ ၁၂.၂၂ ဘီလီယံရရှိခဲ့ပြီး ၂၄.၉ ရာခိုင်နှုန်းတိုးတက်လာကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ၁၉-၁၂-၂၀၂၄ ရက်နေ့ထုတ်ပြန်ခဲ့သော အစီရင်ခံစာအရသိရသည်။ အစီရင်ခံစာအရ အထည်ချုပ် ထုတ်ကုန်တင်ပို့မှုမှ အမေရိကန်ဒေါ်လာ ၈.၉၄ ဘီလီယံ၊  ဖိနပ်ထုတ်ကုန်များတင်ပို့မှုမှ  ကန်ဒေါ်လာ ၁.၅ ဘီလီယံနှင့် ခရီးသွားကုန်ပစ္စည်းတင်ပို့မှုမှ ကန်ဒေါ်လာ ၁.၇၈ ဘီလီယံ အသီးသီးရရှိခဲ့သည်။ ASEAN+3 Macroeconomic Research Office မှ စီးပွားရေးပညာရှင် Hoe Ee Khor က အထည်ချုပ်၊ ဖိနပ်နှင့်ခရီးသွားကုန်ပစ္စည်း (GFT) ကဏ္ဍသည် ကမ္ဘောဒီးယားနိုင်ငံ ၏ စီးပွားရေးတိုးတက်မှုအတွက် အဓိကအခန်းကဏ္ဍဖြစ်ကြောင်းနှင့် ထိုကဏ္ဍတိုးတက်မှုနှုန်းသည် အဆင့်မြင့်ဈေးကွက်များတွင် လူသုံကုန်ပစ္စည်းများဝယ်လိုအားပိုမိုအားကောင်းလာသောကြောင့် ၂၀၂၄ ခုနှစ်အတွင်း ပြန်လည်ဦးမော့လာကြောင်းပြောကြားခဲ့သည်။ (GFT) ကဏ္ဍသည် အရှေ့တောင်အာရှနိုင်ငံများတွင် နိုင်ငံခြားဝင်ငွေအများဆုံးရရှိသော ကဏ္ဍတစ်ခုဖြစ်ပြီး လက်ရှိ ကမ္ဘောဒီးယားနိုင်ငံ၏ အဆိုပါကဏ္ဍတွင် စက်ရုံပေါင်း ၁,၅၈၃ ခန့်ရှိပြီး အလုပ်သမား ၉၁၃,၀၀၀ ခန့်ရှိကြောင်း အသက်မွေးဝမ်းကြောင်းလေ့ကျင့်ရေးဝန်ကြီးဌာနမှ ထုတ်ပြန်ထားသည်။

Source : Khmer Times

DOCA(ရန်ကုန်)

     စက်မှု၊ သိပ္ပံ၊ နည်းပညာနှင့် တီထွင်ဆန်းသစ်မှုဝန်ကြီးဌာန (MISTI) နှင့် ကမ္ဘောဒီးယား နိုင်ငံပီလောပီနံအသင်းချုပ် (CFC) တို့သည် ဒေသတွင်းပီလောပီနံထုတ်လုပ်မှုကို တိုးမြှင့်ရန် မဟာဗျူဟာများကို ၁၉-၁၂-၂၀၂၄ ရက်နေ့ကဆွေးနွေးမှုများပြုလုပ်ခဲ့ကြသည်။  ကမ္ဘောဒီးယား နိုင်ငံသည် ပီလောပီနံစိုက်ခင်း ဟက်တာ ၆၀,၀၀၀ မှ ၈၀,၀၀၀ အထိရှိပြီး အာရှတွင် စတုတ္ထ မြောက်အများဆုံးပီလောပီနံတင်ပို့သည့်နိုင်ငံဖြစ်သည်။ ဝန်ကြီး Hem Vanndy က Chray Son ဦးဆောင်သော ကမ္ဘောဒီးယားနိုင်ငံ ပီလောပီနံအသင်းချုပ် (CFC)မှ ကိုယ်စားလှယ် အဖွဲ့ဝင်များ နှင့်တွေ့ဆုံစဉ် ပီလောပီနံများကို ပြည်တွင်းပြုပြင်ခြင့်မှ ပြည်ပသို့တင်ပို့ရာတွင် မြင့်မားသော တန်ဖိုးဖန်တီးခြင်း၊ လယ်သမားများ၏ အသက်မွေးဝမ်းကြောင်းမြှင့်တင်ခြင်းနှင့် ကမ္ဘောဒီးယား ၏ စက်မှုလုပ်ငန်းများကွဲပြားစေရန်အတွက် မရှိမဖြစ်လိုအပ်သည်ဟုပြောကြားခဲ့ သည်။ သန့်စင် သောထုတ်လုပ်မှုနည်းလမ်းများချမှတ်ရန်နှင့် ပီလောပီနံတန်ဖိုးကွင်းဆက် တည်ဆောက်ရန် (CFC) ၏အဆိုပြုချက်ကိုထောက်ခံကြောင်း ထပ်မံပြောကြားခဲ့သည်။ (CFC) ကို စီးပွားရေးစီမံကိန်း ရေးဆွဲခြင်း၊ ဈေးကွက်ဝင်ရောက်ကြည့်ရှုခြင်းနှင့် နိုင်ငံတကာကုန်စည် ပြပွဲများတွင် ပါဝင်ခြင်းတို့ အတွက် Khmer Enterprise နှင့် ပူးပေါင်းဆောင်ရွက်ရန် Hem Vanndy မှ တိုက်တွန်းခဲ့သည်။ (CFC) ဥက္ကဋ္ဌ Chray Son မှ လက်ရှိတွင် ကမ္ဘောဒီးယားသည် ပီလောပီနံ ၉၅ ရာခိုင်နှုန်း တင်ပို့ လျက်ရှိပြီး ပြည်တွင်း၌ ၅ ရာခိုင်နှုန်းသာ စီမံဆောင်ရွက်နေပြီး နိုင်ငံတော်စီးပွားရေးအတွက် ကန်ဒေါ်လာ ၇၂၈ သန်းပံ့ပိုးပေးနိုင်ခဲ့ကြောင်း ပြောကြားခဲ့သည်။

Source : Khmer Times

DOCA(ရန်ကုန်)