ပြည်ပကုန်သွယ်မှုသတင်းများ

      ၂၀၂၄ ခုနှစ်၏ ပထမနှစ်ဝက်တာကာလတွင် ကုန်သွယ်ရေးအားကောင်းစွာ တိုးတက်လာမှုကြောင့် ယခုနှစ်တွင် ဗီယက်နမ်နှင့်တရုတ်နိုင်ငံအကြား အပြန်အလှန်ကုန်သွယ်မှုသည် အမေရိကန်ဒေါ်လာ ၂၀၀ ဘီလီယံရောက်ရှိရန် ခန့်မှန်းရကြောင်း သိရပါသည်။ ဗီယက်နမ်နိုင်ငံ စက်မှုနှင့်ကုန်သွယ်ရေးဝန်ကြီးဌာန(MOIT)၏ ထုတ်ပြန်ချက်အရ နှစ်နိုင်ငံအကြား အပြန်အလှန် ကုန်သွယ်မှုသည် ၂၀၂၄ ၏ ပထမနှစ်ဝက်တွင် အမေရိကန်ဒေါ်လာ ၉၅ ဘီလီယံနီးပါးဖြင့် အားကောင်းစွာ ပြန်လည်နာလန်ထူလာကြောင်း သိရပါသည်။ အဆိုပါကာလအတွင်း ဈေးကွက် ကြီးများမှ မှာယူမှုများမှာ သိသာစွာမြင့်တက်ခဲ့ပြီး တင်ပို့မှုလုပ်ရန်အတွက် ထုတ်လုပ်ခြင်း ဆောင်ရွက်ပေးမည့် စက်ယန္တရားနှင့် စက်ပစ္စည်းများတင်သွင်းရန် ဝယ်လိုအားမြင့်တက်ခဲ့ကြောင်း သိရပါသည်။ ရလဒ်အနေဖြင့် ဗီယက်နမ်စီးပွားရေးလုပ်ငန်းများသည် တရုတ်ထံမှ အမေရိကန် ဒေါ်လာ ၆၇ ဘီလီယံဖိုးတင်သွင်းခဲ့ပြီး အမေရိကန်ဒေါ်လာ ၂၇.၈ ဘီလီယံဖိုး ပြန်လည် တင်ပို့ခဲ့ကြောင်း သိရပါသည်။

      တရုတ်နိုင်ငံသည် ဗီယက်နမ်နိုင်ငံအတွက် ပစ္စည်းများ အဓိကပံ့ပိုးသည့်နိုင်ငံဖြစ်ပြီး လွန်ခဲ့သည့်(၆)လအတွင်း ဗီယက်နမ်၏တင်သွင်းမှု စုစုပေါင်းတန်ဖိုး၏ ၃၇.၆ ရာခိုင်နှုန်းနီးပါးရှိကြောင်း သိရပါသည်။ အကယ်၍ ပထမနှစ်ဝက် ကုန်သွယ်ရေးကြီးထွားနှုန်းကို ထိန်းနိုင်ခဲ့ပါက နှစ်ကုန်လျှင် နှစ်နိုင်ငံကုန်သွယ်မှု အမေရိကန်ဒေါ်လာ ၁၉၀ ဘီလီယံရောက်ရှိနိုင်ပြီး ပိုမို ကောင်းမွန်အောင် မြှင့်တင်နိုင်ပါက အမေရိကန်ဒေါ်လာ ၂၀၀ ဘီလီယံထိရောက်ရှိနိုင်ကြောင်း သိရပါသည်။ လွန်ခဲ့ သည့်နှစ်တွင် ဗီယက်နမ်-တရုတ် အပြန်အလှန်ကုန်သွယ်မှုတန်ဖိုးသည် အမေရိကန်ဒေါ်လာ ၁၇၁.၉ ဘီလီယံရှိခဲ့ပြီး ဗီယက်နမ်မှတင်ပို့မှုသည် အမေရိကန်ဒေါ်လာ ၆၁.၂ ဘီလီယံရှိကာ အမေ ရိကန်ဒေါ်လာ ၁၁၀.၆ ဘီလီယံတန်ဖိုး ပြန်လည်တင်သွင်းခဲ့ကြောင်း သိရပါသည်။ စီးပွားရေးလုပ်ငန်းများသည် အာဆီယံ-တရုတ် လွတ်လပ်စွာ ကုန်သွယ်ရေး ဧရိယာ(ACFTA)နှင့် ဒေသတွင်း စဉ်ဆက်မပြတ်စီးပွားရေး မိတ်ဖက်ဆောင်ရွက်မှု (RCEP) တို့ကဲ့သို့သော လွတ်လပ်စွာကုန်သွယ်ရေး သဘောတူညီမှုများထဲမှ အကောက်ခွန်အားသာချက် အကျိုးကျေးဇူးများ ရရှိမှုကြောင့် ရင်းနှီးမြှုပ်နှံမှုများ လျှင်မြန်စွာပြုလုပ်လာကြကြောင်း သိရပါသည်။ အတွင်းကျကျသိသူများကလည်း ၎င်းတို့သည် ဗီယက်နမ်နှင့်တရုတ်တို့အတွက် အပြန်အလှန်ကုန်သွယ်ရေးတိုးချဲ့ရန်အတွက် လုံလောက်သော အခန်းကဏ္ဍရှိနေသည်ဟု ယုံကြည်ကြောင်း ပြောကြားခဲ့ပါသည်။ တရုတ်နိုင်ငံ၊ ဘေဂျင်းမြို့တွင် စက်တင်ဘာလ၌ ကျင်းပမည့် “ဝန်ဆောင်မှုကဏ္ဍတွင် ကုန်သွယ်ရေးအတွက် တရုတ်နိုင်ငံ တကာပြပွဲ” သည် စွမ်းအင်၊ ချောပို့၊ ကြေးနန်းဆက်သွယ်ရေး၊ ငွေကြေး၊ ပညာရေး၊ ရိုးရာ ယဉ်ကျေးမှု၊ ခရီးသွားကဏ္ဍနှင့် ထောက်ပံ့မှုကွင်းဆက်အစရှိသည့် ကဏ္ဍများကို အဓိကထားကြောင်း သိရပါသည်။ အဆိုပါပြပွဲသည် တရုတ်နှင့်ဗီယက်နမ်စီးပွားရေးလုပ်ငန်းများအကြား ပိုမိုအားကောင်းသော မိတ်ဖက်ဖြစ်မှုရရှိရန် မျှော်လင့်ရကြောင်း သိရပါသည်။

Source: Vietnam Plus

DOCA(ရန်ကုန်)

      ဖိလစ်ပိုင်နိုင်ငံသည် အစားအသောက်ဖူလုံမှုရှိစေရေးအတွက် ဗီယက်နမ်နှင့် ဆန်တွင် ပူးပေါင်းဆောင်ရွက်မှုမြှင့်တင်ရန်အလိုရှိကြောင်း ဖိလစ်ပိုင်နိုင်ငံစိုက်ပျိုးမွေးမြူရေး အတွင်းရေးမှူး Francisco Tiu Laurel က ဗီယက်နမ်နိုင်ငံသို့လည်ပတ်ခဲ့သည့်ခရီးစဉ်တွင် ပြောကြားခဲ့ပါသည်။ Laurel သည် ဗီယက်နမ်၏အဓိက ဆန်ထုတ်လုပ်သည့်ဧရိယာများထဲမှတစ်ခုဖြစ်သည့် AnGiang ၏ မဲခေါင်ဒယ်တာစီရင်စုသို့ လည်ပတ်ခဲ့ကြောင်း စီရင်စု၏ပြည်သူ့ကော်မတီက ၈-၇-၂၀၂၄ က ထုတ်ပြန်ချက်တွင် ပြောကြားခဲ့ကြောင်း သိရပါသည်။ ဗီယက်နမ်နိုင်ငံသည် ကမ္ဘာ့တတိယအကြီးဆုံး ဆန်တင်ပို့သူဖြစ်ပြီး ဖိလစ်ပိုင်နိုင်ငံသည် လတ်တလောနှစ်များအတွင်း ၎င်းတို့၏ အကြီးမားဆုံး ဝယ်ယူသူဖြစ်ကြောင်း သိရပါသည်။ ယခုနှစ်၏ ပထမငါးလတွင် ဖိလစ်ပိုင်နိုင်ငံသို့ ဗီယက်နမ်၏ ဆန်တင်ပို့မှုသည် ၎င်းတို့၏စုစုပေါင်းဆန်တင်ပို့မှု၏ ၄၅.၄ ရာခိုင်နှုန်းရှိကြောင်း သိရပါသည်။

     Laurel  က ဖိလစ်ပိုင်လူဦးရေသည် နှစ်စဉ် ၁.၅ ရာခိုင်နှုန်းတိုးပွားလာသည့်အတွက် ဆန်ဝယ်လိုအားမြင်တက်မှုဆီကို မောင်းနှင်နေကြောင်း၊ ပြည်တွင်းထောက်ပံ့မှုများမှာ မလုံ‌လောက် နိုင်သည့်အတွက် ဗီယက်နမ်ဆန်ကုမ္ပဏီများကို ဖိလစ်ပိုင်တွင် ရင်းနှီးမြှုပ်နှံရေးစဉ်းစားရန် အလိုရှိကြောင်း ဗီယက်နမ်အာဏာပိုင်များကို ပြောကြားခဲ့သည်ဟု သိရပါသည်။ ဗီယက်နမ်နှင့်ဖိလစ်ပိုင်တို့သည် ဖိလစ်ပိုင်သမ္မတဖာဒီနန်မားကို့စ်ဂျူနီယာ၏ ဇန်နဝါရီလက နိုင်ငံတော်အဆင့်ခရီးအတွင်း ဆန်ကုန်သွယ်ရေးနှင့် စိုက်ပျိုးမွေးမြူ‌ရေးတို့တွင် ပူးပေါင်းဆောင်ရွက်ရန် သဘောတူညီမှုရရှိခဲ့ကြောင်း သိရပါသည်။ ငွေကြေးဖောင်းပွမှုဖိအားကိုစီမံရန် ဖိလစ်ပိုင်သည် ဆန်အပေါ်အကောက်ခွန်ကို ၃၅ရာခိုင်နှုန်းမှ ၁၅ ရာခိုင်နှုန်းအထိ လျှော့ချခဲ့ကြောင်း သိရပါသည်။

Source: Bangkok Post

DOCA(ရန်ကုန်)

     ပြည်တွင်း ဆီအုန်းသီးခိုင်ဈေးနှုန်း တည်ငြိမ်စေရန် ရည်ရွယ်လျက် ယခုနှစ်တွင် စားအုန်း ဆီကြမ်း တန်ချိန် ၈ သိန်းတင်ပို့ရန် ထိုင်းနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်တွင်းကုန်သွယ်ရေးဌာနကမျှော်မှန်းထားကြောင်း Bangkok Post သတင်းဌာနက ၈-၇-၂၀၂၄ ရက်နေ့တွင် ဖော်ပြပါသည်။

    ထိုင်းနိုင်ငံ၌ ပြည်တွင်းဆီအုန်းသီးဈေးနှုန်းများသည် ဧပြီလမှ မေလအတွင်း ကျဆင်းခဲ့ပြီးနောက် တစ်ကီလိုဂရမ်အပေါ် ၅ ဘတ်ကျော်အထိ ပြန်လည်မြင့်တက်လာကြောင်း၊ ပြည်တွင်း ကုန်သွယ်ရေးဦးစီးဌာနသည် ဆီအုန်းရောင်းလိုအား ပိုလျှံနေမှုကို လျှော့ချရန်အတွက် စားအုန်းဆီ စဉ်ဆက်မပြတ်တင်ပို့နိုင်ရေး စီစဉ်လျက်ရှိပြီး ဆီအုန်းသီး ဈေးနှုန်းမြှင့်တင်မှုကို အထောက်အကူ ပြုမည်ဖြစ်ကြောင်း၊ ယခုနှစ် ပထမနှစ်ဝက်တွင် ထိုင်းနိုင်ငံမှ စားအုန်းဆီကြမ်း တန်ချိန် ၄ သိန်းခန့် တင်ပို့ခဲ့ပြီး ဒုတိယနှစ်ဝက်တွင်လည်း တန်ချိန် ၄ သိန်းခန့် တင်ပို့နိုင်မည်ဟု ခန့်မှန်းထားကြောင်း၊ ယခုနှစ် စားအုန်းဆီကြမ်းတင်ပို့မှုပမာဏသည် ယခင်နှစ်နှင့်အလားတူပင် စုစုပေါင်းတန်ချိန် ၈ သိန်းခန့်ရှိနိုင်ကြောင်း၊ ပြည်တွင်းဈေးနှုန်းနှင့် ကမ္ဘာ့ဈေးနှုန်းတို့မှာ တူညီသည့်အဆင့်၌ ရှိသဖြင့် ထိုင်းနိုင်ငံမှ ထွက်ရှိသည့် စားအုန်းဆီကြမ်းသည်  ကမ္ဘာ့ဈေးကွက်တွင် ယှဉ်ပြိုင်နိုင်မှုရှိကြောင်း  ပြည်တွင်းကုန်သွယ်ရေးဦးစီးဌာနမှ ညွှန်ကြားရေးမှူးချုပ် Mr. Wattanasak Suriam က ပြောဆို ခဲ့သည်။

      ထိုင်းစားအုန်းဆီကြမ်းဈေးနှုန်းသည် ဇွန်လတွင် တစ်ကီလိုဂရမ်လျှင် ၃၂.၆၃ ဘတ်ရှိရာမှ လက်ရှိကာလ၌ တစ်ကီလိုဂရမ်လျှင် ၃၃.၂၅ ဘတ်ရှိကြောင်း၊ ကမ္ဘာ့စားအုန်းဆီကြမ်း ဈေးကွက်တွင်မူ ဇွန်လ၌ တစ်ကီလိုဂရမ်လျှင် ၃၁.၃၅ ဘတ်ရှိခဲ့ရာမှ ယခု ၃၂.၇၂ ဘတ်ခန့် ဖြစ်ပေါ်နေသည့်အတွက် ဈေးနှုန်းမြင့်တက်လာကြောင်း သိရပါသည်။

     ထိုင်းနိုင်ငံတွင် ပြည်တွင်းစားသုံးမှုအတွက် စားအုန်းဆီကြမ်းလိုအပ်ချက် စုစုပေါင်း တန် ချိန် ၁၁၀၀၀၀၊ ဇီဝဒီဇယ်ထုတ်လုပ်မှုအတွက် တန်ချိန် ၁၂၀၀၀၀ နှင့် ပြည်ပတင်ပို့ရန် တန်ချိန် ၈၀၀၀၀၀ မှ ၉၀၀၀၀၀ ခန့်ရှိပြီး အိန္ဒိယနိုင်ငံသည် ထိုင်းနိုင်ငံ၏ အဓိက စားအုန်းဆီ ဈေးကွက်ဖြစ် ကြောင်း ဖော်ပြထားပါသည်။

   ထိုင်းနိုင်ငံ၌ လက်ရှိကာလတွင် စားအုန်းဆီကြမ်း တန်ချိန် ၃၀၀၀၀၀ လက်ကျန် သိုလှောင် ထားကြောင်း၊ ဘတ်ငွေတန်ဖိုးကျဆင်းခြင်းက နိုင်ငံ၏စားအုန်းဆီကြမ်း တင်ပို့မှုအတွက် အကျိုး ဖြစ်ထွန်းစေမည်ဖြစ်ကြောင်း၊ ထိုင်းပြည်တွင်းကုန်သွယ်ရေးဌာနသည် ဆီအုန်းသီးဝယ်ယူသူများ နှင့် စားအုန်းဆီထုတ်လုပ်သည့် စက်ရုံများအား ပုံမှန်အတိုင်း ဆက်လက်ဝယ်ယူရန်နှင့် ဆီအုန်း သီးများ သဘာဝအလျောက် ရင့်မှည့်မှုမဟုတ်ပဲ အချိန်မတိုင်မီ ဆွတ်ခူးယူခြင်းမှ ရှောင်ကြဉ်ရန် ညွှန်ကြားထားကြောင်း၊  အဆိုပါတားမြစ်ချက်ကို ဖောက်ဖျက်ပါက ၁၉၉၉ ခုနှစ် ကုန်စည်နှင့် ဝန်ဆောင်မှုများ အက်ဥပဒေအရ ထောင်ဒဏ် ၅ နှစ်၊ ဒဏ်ငွေ ဘတ် ၁၀၀၀၀၀ သို့မဟုတ် ဒဏ်နှစ် ရပ်လုံး ချမှတ်ခံရနိုင်ကြောင်း၊ သတ်မှတ်ထားသည့် ဆီအုန်းသီးဈေးနှုန်းအောက် လျှော့ချဝယ်ယူ ပါက အမြင့်ဆုံးထောင်ဒဏ် ၇ နှစ်၊ အမြင့်ဆုံးဒဏ်ငွေ ဘတ် ၁၄၀၀၀၀ သို့မဟုတ် ဒဏ်နှစ်ရပ်လုံး ဖြစ်စေ ချမှတ်နိုင်သည်ဟု အဆိုပါအမိန့်တွင် ဖော်ပြထားကြောင်း ညွှန်ကြားရေးမှူးချုပ် Mr. Wattanasak ကပြောဆိုပါသည်။

   ထို့အပြင် အဆိုပါအမိန့်စာတွင် စားအုန်းဆီထုတ်လုပ်သည့် စက်ရုံများလုပ်ငန်းရှင်များသည် ၎င်းတို့၏ လုပ်ငန်းဆောင်ရွက်မှုများကို ဦးစီးဌာနသို့ နေ့စဉ်အစီရင်ခံ တင်ပြရန်နှင့် အဓိကအားဖြင့် စားအုန်း သီးဝယ်ယူမှုပမာဏ၊ ဝယ်ယူသည့် နှုန်းထားများနှင့် စားအုန်းဆီ ထုတ်ယူဆီပမာဏတို့ ပြုစု တင်ပြရမည်ဖြစ်ကြောင်း၊ အဆိုပါစည်းကမ်းချက်ဖြစ်သည့် ထုတ်ယူထားသော ဆီပမာဏနှင့် သိုလှောင်ရာနေရာကို အစီရင်ခံရန် ပျက်ကွက်ပါက အများဆုံးထောင်ဒဏ် ၁ နှစ်၊ အမြင့်ဆုံး ဒဏ်ငွေ ဘတ် ၂၀၀၀၀ သို့မဟုတ် ဒဏ်နှစ်ရပ်လုံးဖြစ်စေ ချမှတ်ခံရမည်ဖြစ်ကြောင်း ဖော်ပြထားပါသည်။

   လယ်သမားများ ခေါင်းပုံဖြတ်ခံရခြင်းမှ ကာကွယ်ရန်အတွက် ဆီအုန်းစိုက်ခင်းများနှင့် စားအုန်းဆီ ထုတ်လုပ်သည့်လုပ်ငန်းများတွင် အချိန်အတွယ်များ မှန်ကန်မှုရှိ/မရှိ စစ်ဆေးရန် ဦးစီး ဌာနမှ တာဝန်ရှိသူများအား ညွှန်ကြားထားကြောင်း၊ ဈေးကောင်းရရှိရန်အတွက် ဆီအုန်းသီးများ သဘာဝအလျောက် ရင့်မှည့်ကြွေကျချိန်ရောက်ရှိမှသာ ဖြတ်တောက်ခူးဆွတ်ရန် တောင်သူများ အား တိုက်တွန်းခဲ့ကြောင်း၊ ၂၀၂၄ ခုနှစ်တွင် လတ်ဆတ်သော ဆီအုန်းသီးခိုင် တန်ချိန် ၁၈ သန်းခန့် ထွက်ရှိပြီး ယခင်နှစ်ကဲ့သို့ အလားတူ စားအုန်းဆီကြမ်း တန်ချိန် ၃ သန်းခန့် ထုတ်လုပ်နိုင်မည်ဟု ခန့်မှန်းထားရှိကြောင်း သတင်းရရှိပါသည်။

Source: Bangkok Post, 8 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ကမ္ဘာ့ထိပ်တန်း ဆန်တင်ပို့သူ အိန္ဒိယသည် အောက်တိုဘာလတွင် ကောက်ပဲသီးနှံသစ်များ ဈေးကွက်သို့မရောက်မီ နိုင်ငံတွင်း ဆန်ပိုလျှံမှုလွန်ကဲခြင်းမရှိစေရေးအတွက် အချို့သော ဆန် မျိုးကွဲများ တင်ပို့မှုအပေါ် ကန့်သတ်ချက်များကို ဖြေလျှော့သွားဖွယ်ရှိသည်ဟု အဆိုပါကိစ္စနှင့် နီးစပ်သူများထံမှ သိရသည်။

     အစိုးရသည် ပုံသေပို့ကုန်အခွန်နှုန်းထားဖြင့် ဆန်ဖြူတင်ပို့ခွင့်ပြုရန် စဉ်းစားနေကြောင်း အမည်မဖော်လိုသူ ပုဂ္ဂိုလ်အချို့က ပြောကြားခဲ့သည်။ ကုန်စည်တင်ပို့ရာ၌ တန်ဖိုးလျှော့၍ ဖော်ပြမှု များကို တားဆီးရန်အတွက် အာဏာပိုင်များသည် ပေါင်းဆန်တင်ပို့မှုအပေါ် အခွန် ၂၀% စည်းကြပ်မည့်အစား ပုံသေအခွန်နှုန်းထား သတ်မှတ်ခြင်းကို လုပ်ဆောင်ဖွယ်ရှိသည်ဟု ၎င်းတို့က ပြောဆို ခဲ့သည်။

      အဓိကကျသော ဆန်မျိုးကွဲများ တင်ပို့ရောင်းချခြင်းကို ၂၀၂၃ ခုနှစ်တွင် အိန္ဒိယနိုင်ငံက စတင်ကန့်သတ်ခဲ့ပြီးနောက် ဇန်နဝါရီလတွင် ၁၅ နှစ်ကျော်အတွင်း အမြင့်ဆုံးသို့ရောက်ရှိခဲ့သည့် အာရှဆန်စျေးနှုန်းများ တည်ငြိမ်စေရန် ထိုကဲ့သို့သော ပြောင်းလဲလုပ်ဆောင်မှုက အထောက်အကူ ဖြစ်စေနိုင်ပြီး စားနပ်ရိက္ခာ လိုအပ်ချက်အရ အိန္ဒိယကို မှီခိုနေရသော အနောက်အာဖရိကနှင့် အရှေ့အလယ်ပိုင်းရှိ နိုင်ငံအချို့အတွက် သတင်းကောင်းတစ်ခုဖြစ်ကြောင်း သိရှိရပါသည်။ စားနပ်ရိက္ခာနှင့် ကူးသန်းရောင်းဝယ်ရေးဆိုင်ရာဝန်ကြီးဌာန နှစ်ခုလုံးကို ကိုယ်စားပြုသည့် ပြောရေးဆိုခွင့်ရှိသူကမူ ယခုကိစ္စရပ်အပေါ် သဘောထားမှတ်ချက်ပြန်ကြားမှု တစ်စုံတစ်ရာမျှ မရှိသေးကြောင်း သိရှိရသည်။

    အိန္ဒိယ၏ စုစုပေါင်းဆန်တင်ပို့မှုသည် ဧပြီလ ၁ ရက်နေ့မှစတင်သည့် လက်ရှိဘဏ္ဍာရေးနှစ် ပထမနှစ်လတွင် ယခင်နှစ်ကာလတူထက် ၂၁ ရာခိုင်နှုန်း လျော့နည်းလျက် တန်ချိန် ၂.၉ သန်းသို့ ကျဆင်းသွားခဲ့ကြောင်း၊ အဆိုပါကာလအတွင်း ဘာစမာတီမဟုတ်သောဆန် တင်ပို့မှုသည် ၃၂ ရာခိုင်နှုန်း လျော့ကျလျက် တန်ချိန် ၁.၉၃ သန်းသာ ရှိကြောင်း အစိုးရ၏ အချက်အလက်များအရ သိရသည်။

    မုတ်သုံရာသီစတင်ချိန်တွင် အိန္ဒိယလယ်သမားများသည် ၎င်းတို့၏ အဓိကစပါးသီးနှံကို စိုက်ပျိုးလျက်ရှိရာ ဇူလိုင်လတွင် စိုက်ပျိုးမှု အမြင့်မားဆုံးဖြစ်ပြီး စက်တင်ဘာလ နှောင်းပိုင်းမှ စတင် ရိတ်သိမ်းမည်ဖြစ်သည်။ အိန္ဒိယ စိုက်ပျိုးရေးဝန်ကြီးဌာန၏ စာရင်းများအရ ဇူလိုင်လ ၈ ရက်နေ့အထိ စပါးစိုက်ပျိုးပြီးစီးမှု ဧရိယာ ဟက်တာ ၆ သန်း (ဧက ၁၄.၈ သန်း) ရှိပြီး ယခင်နှစ်ကာလတူကထက် ၁၉ ရာခိုင်နှုန်း ပိုမိုခဲ့ကြောင်း သိရပါသည်။

Source: Economic Times, 8 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ထိုင်းနိုင်ငံ ပြည်ပကုန်သွယ်ရေးဦးစီးဌာနက ဦးဆောင်လျက် ထိုင်းဆန်တင်ပို့သူများ ပါဝင်သော ကိုယ်စားလှယ်အဖွဲ့သည် ၂၀၂၄ ခုနှစ် ဇူလိုင်လ ၃ ရက်နေ့မှ ၅ ရက်နေ့အထိ ဖိလစ်ပိုင်နိုင်ငံသို့ သွားရောက်သော ခရီးစဉ်အတွင်း တန်ဖိုးအားဖြင့် ဘတ်ငွေ ၂.၈ ဘီလီယံရှိမည့် ဆန်တန်ချိန် စုစုပေါင်း ၁၃၀၀၀၀ ကို တင်ပို့ရန်အတွက် နားလည်မှုစာချွန်လွှာ ၉ စောင်ကို ဖိလစ်ပိုင်ရှိ ဆန်တင် သွင်းသူ လုပ်ငန်းရှင်များနှင့် လက်မှတ်ရေးထိုးနိုင်ခဲ့ကြောင်း သိရှိရသည်။

    ထိုင်းပြည်ပကုန်သွယ်ရေးဦးစီးဌာန အနေဖြင့် မနီလာမြို့ရှိ ထိုင်းကူးသန်းရောင်းဝယ်ရေးရုံးနှင့် ပူးပေါင်းလျက် ထိုင်းဆန်အရောင်းမြှင့်တင်ရေးပြပွဲတစ်ရပ်ကိုလည်း ကျင်းပခဲ့ကြောင်း၊ ၎င်းပြပွဲ သို့ သွင်းကုန်လုပ်ငန်းရှင်များ၊ ဆန်ကုန်သည်များ၊ လက်လီရောင်းချသူများ၊ ဆန်စပါးလုပ်ငန်းနယ်ပယ်၌ အဓိကလုပ်ကိုင်နေသူများ၊ အစိုးရဌာနများမှ ကိုယ်စားလှယ်များနှင့် သတင်းမီဒီယာများ အပါအဝင် လူဦးရေ ၇၀ ကျော် တက်ရောက်ခဲ့ကြကြောင်း၊ ၎င်းပြပွဲအား ထိုင်းစားသောက်ကုန် အသိအမှတ်ပြု ပရီမီယံအဆင့်အတန်းရှိသည့်ထိုင်းဆန် (Premium Thai Rice with Authentic Thai Food) ဟူသော သဘောထားအမြင်ဖြင့် ဆောင်ရွက်လျက်ရှိသည့် ထိုင်းစီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ Thai Select အသိအမှတ်ပြုလက်မှတ် ရရှိထားသော Mango Tree Manila စားသောက်ဆိုင်တွင် ကျင်းပခဲ့ခြင်းဖြစ်ကြောင်း၊ ထိုင်းအစိုးရ၏ နိုင်ငံတကာ ၌ ထိုင်းဆန်များ စားသုံးမှုမြှင့်တင်ရေးနှင့် ထိုင်းအစားအစာများ ဈေးကွက်မြှင့်တင်ရေး မူဝါဒကို တစ်စိတ်တစ်ဒေသဖော်ဆောင်ခြင်းလည်းဖြစ်ကြောင်း The Nation Thailand သတင်းဌာနက ဖော်ပြထားသည်။

     အဆိုပါပြပွဲတွင် ထိုင်းဟင်းလျာ ၃ မျိုးနှင့် ထိုင်းစံပယ်ဆန်မွှေး (Jasmine Rice) နှင့် ထိုင်း ငချိတ်ဆန် (Riceberry Rice) တို့အား ချက်ပြုတ်သရုပ်ပြသလျက် တည်ခင်းဧည့်ခံခဲ့ရာ ထိုင်းဆန် အမျိုးအစားများနှင့် အရည်အသွေးသည် ဖိလစ်ပိုင်စားသုံးသူများ၏ လိုအပ်ချက်ကို ဖြည့်ဆည်း ပေးနိုင်မှုရှိသည်ဟု တက်ရောက်လာသူများ၏ တုံ့ပြန်မှတ်ချက်ပြုခြင်းကို ခံရကြောင်း ထိုင်းပြည်ပ ကုန်သွယ်ရေးဦးစီးဌာနမှ ဖော်ပြချက်အရ သိရှိရသည်။

     ထိုင်းနိုင်ငံမှ ဌာနဆိုင်ရာအရာရှိများသည် ဖိလစ်ပိုင်စားနပ်ရိက္ခာအာဏာပိုင်အဖွဲ့ (NFA) မှ တာဝန်ရှိသူများနှင့်လည်း တွေ့ဆုံခဲ့ပြီး ဖိလစ်ပိုင်အစိုးရ၏ ဆန်သွင်းကုန်အပေါ် အခွန် ၃၅ ရာခိုင် နှုန်းမှ ၁၅ ရာခိုင်နှုန်းသို့ လျှော့ချမည့် မူဝါဒ အပါအဝင် ဆန်ဈေးကွက် သတင်းအချက်အလက်များ မျှဝေဖလှယ်မှုကို လုပ်ဆောင်ခဲ့ကြောင်း၊ သွင်းကုန်အခွန် စည်းကြပ်မှုအား ၄ လ ၁ ကြိမ် ပြန်လည် သုံးသပ်ခြင်းနှင့်အတူ အဆိုပါ အကောက်ခွန်နှုန်းလျှော့ချသည့် အစီအစဉ်ကို ယခုနှစ် ဇူလိုင်လ လလယ်ပိုင်းမှ စတင်၍ ၂၀၂၈ ခုနှစ်အထိ ဖော်ဆောင်လိမ့်မည်ဟု မျှော်လင့်ရကြောင်းဖြင့် ထိုင်း ပြည်ပကုန်သွယ်ရေးဦးစီးဌာန၏ ညွှန်ကြားရေးမှူးချုပ် Ronnarong Phoolpipat က ပြောကြားခဲ့သည်။

     ဖိလစ်ပိုင်လွှတ်တော်၌ တင်သွင်းအဆိုပြုထားသည့် အရေးပေါ်အခြေအနေတွင် ဖိလစ်ပိုင် စားနပ်ရိက္ခာအာဏာပိုင်အဖွဲ့အား ဆန်တင်သွင်းမှု လုပ်ကိုင်ခွင့်ပြုမည့် ဥပဒေတစ်ရပ်အား ပြင်ဆင် ပြဋ္ဌာန်းနိုင်မည့် အလားအလာနှင့်စပ်လျဉ်း၍လည်း ထိုင်းကိုယ်စားလှယ်အဖွဲ့က မေးမြန်းဆွေးနွေး ခဲ့ပြီး ထိုင်းနိုင်ငံအနေဖြင့် ဖိလစ်ပိုင်၏ စားနပ်ရိက္ခာဖူလုံရေးအတွက် ဆန်ထောက်ပံ့ပေးသွင်းရန် အသင့်ရှိနေသည်ကို အာမခံပြောကြားခဲ့ကြောင်း သိရှိရသည်။

    ညွှန်ကြားရေးမှူးချုပ် Ronnarong က ထိုင်းကိုယ်စားလှယ်အဖွဲ့၏ ဖိလစ်ပိုင်ခရီးစဉ်သည် အောင်မြင်မှု မြင့်မားစွာရရှိခဲ့ကြောင်း၊ ထိုင်းဆန်၏ အရည်အသွေးနှင့် အရသာကောင်းမွန်မှု ဂုဏ် သတင်းကို ပြသနိုင်ခဲ့ကြောင်း၊ ယခုကဲ့သို့ ဆောင်ရွက်ခဲ့ခြင်းက ဖိလစ်ပိုင်ဈေးကွက်တွင် ထိုင်းဆန်၏ ဈေးကွက်ဝေစုရရှိမှုကို တိုးတက်စေမည်ဟု မျှော်မှန်းထားကြောင်း ပြောဆိုခဲ့သည်။

    ထိုင်းနိုင်ငံသည် ၂၀၂၄ ခုနှစ် ဇန်နဝါရီလမှ ဇွန်လအထိ ဆန်တန်ချိန် ၂၉၉၇၈၇ တန်ကို ဖိလစ်ပိုင်ဈေးကွက်သို့ တင်ပို့ခဲ့ပြီး ယခင်နှစ်ကာလတူနှင့်နှိုင်းယှဉ်ပါက ၃၈၁.၆၆ ရာခိုင်နှုန်း တိုး တက်မှု ရရှိခဲ့သည်။ တန်ဖိုးအားဖြင့်မူ အမေရိကန်ဒေါ်လာ ၁၆၇ သန်းရှိပြီး ယခင်နှစ်ကာလတူထက် ၅၅၈.၉၇ ရာခိုင်နှုန်း တိုးတက်ခဲ့ခြင်းဖြစ်သည်။ ဖိလစ်ပိုင်နိုင်ငံအနေဖြင့် ၂၀၂၄ ခုနှစ်အတွင်း ဆန်တန်ချိန် ၄.၁ သန်းခန့် တင်သွင်းရဖွယ်ရှိသည်ဟု သတင်းများထွက်ပေါ်ခဲ့ပြီးနောက် ဖိလစ်ပိုင် ဈေးကွက်သို့ ထိုင်းဆန်များကို တိုးမြှင့်တင်ပို့နိုင်ရေး ကြိုးပမ်းဆောင်ရွက်ရန် ထိုင်းစီးပွားရေးနှင့် ကူးသန်းရောင်းဝယ်ရေးဝန်ကြီး Phumtham Wechayachai က ညွှန်ကြားချက်တစ်ရပ် ထုတ်ပြန် ထားခဲ့ကြောင်း သိရှိရသည်။

Source: The Nation Thailand, 10 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)