အထူးစီးပွားရေးဇုန်များမှတဆင့် ပို့ကုန်သည် ၁၁ လအတွင်း ကန်ဒေါ်လာ ၅.၄ ဘီလီယံအထိ ရောက်ရှိခဲ့
အထူးစီးပွားရေးဇုန်များ (SEZs) မှတဆင့် ကမ္ဘောဒီးယားနိုင်ငံ၏ ပို့ကုန်သည် ၂၀၂၄ ခုနှစ်၊ ပထမ (၁၁) လအတွင်း အမေရိကန်ဒေါ်လာ ၅.၄ ဘီလီယံအထိရောက်ရှိခဲ့ကြောင်း ၂၅-၁၂-၂၀၂၄ ရက်နေ့ကထုတ်ပြန်ခဲ့သော စီးပွားရေးနှင့်ကူးသန်းရောင်းဝယ်ရေးဝန်ကြီးဌာမှ အစီရင်ခံစာအရ သိရသည်။ Preah Sihanouk ပြည်နယ်တွင်တည်ရှိသော တရုတ်နိုင်ငံပိုင် Sihanoukville SEZ သည် ၂၀၂၄ ခုနှစ်၊ ဇန်နဝါရီလမှ နိုဝင်ဘာလအတွင်း စုစုပေါင်းပို့ကုန် အမေရိကန်ဒေါ်လာ ၁.၄၉ ဘီလီယံနှင့် Royal Group Phnom Penh SEZ မှ ၁.၀၈ ဘီလီယံ ရရှိခဲ့ကြောင်းသိရသည်။ အထူးစီးပွားရေးဇုန်များသည် ကုန်ထုတ်လုပ်မှု၊ နည်ပညာနှင့်ထောက်ပံ့ပို့ဆောင်ရေးအပါအဝင် စက်မှုလုပ်ငန်းမျိုးစုံတွင် ရင်းနှီးမြှုပ်နှံသူများကိုဆွဲဆောင်နေကြောင်း ကမ္ဘောဒီးယားနိုင်ငံ ဖွံ့ဖြိုး တိုးတက်ရေးကောင်စီ (CDC) ၏ အထွေထွေအတွင်းရေးမှူး Chea Vuthy ပြောကြားခဲ့သည်။ SEZs များသည် ရင်းနှီးမြှုပ်နှံသူများကို သွင်းကုန်နှင့်ပို့ကုန်များအတွက် “one-stop” ဝန်ဆောင်မှု ပေးနိုင်ရန်နိုင်ငံတစ်ဝှမ်းတွင် တည်ထောင်ထားပြီး ၎င်းတို့သည် ကုန်သွယ်မှုကိုများစွာလွယ်ကူ ချောမွေ့စေကြောင်းနှင့် အဆိုပါအချက်အချာကျသောနေရာများသည် အမျိုးသားစီးပွားရေးဖွံ့ဖြိုး တိုးတက်မှုတွင် အဓိကကျပြီးသယ်ယူပို့ဆောင်ရေးလမ်းကြောင်းများနှင့် ပိုမိုချိတ်ဆက်လျက်ရှိ ကြောင်း ထပ်မံပြောကြားခဲ့သည်။ အထူးစီးပွားရေးဇုန်များသည် အထည်ချုပ်၊ ဖိနပ်နှင့် ခရီးသွား ထုတ်ကုန်များ၊ မော်တော်ကားအစိတ်အပိုင်းများ၊ လျှပ်စစ်ပစ္စည်းများ၊ ကားတာယာထုတ်လုပ်မှု၊ မော်တော်ကားနှင့် စက်ဘီးတပ်ဆင်သည့်ကဏ္ဍများကို အဓိကအာရုံစိုက်လျက်ရှိသည်။ ကမ္ဘောဒီးယားနိုင်ငံသည် ၎င်း၏အခြေခံအဆောက်အအုံများ ဆက်လက်ဖွံ့ဖြိုးတိုးတက် လျက်ရှိပြီး စီးပွားရေးပတ်ဝန်းကျင်ကိုမြှင့်တင်ပေးသည့်အနေဖြင့် အထူးစီးပွားရေးဇုန်များသည် လာမည့်နှစ်များတွင် စီးပွားရေးတိုးတက်မှုတွင်အရေးပါသော အခန်းကဏ္ဍမှပါဝင်လာမည်ဟု မျှော်လင့်ထားကြောင်း Vuthy ကပြောကြားခဲ့သည်။ နိုင်ငံခြားရင်းနှီးမြှုပ်နှံမှုများကို ဆွဲဆောင်ခြင်းနှင့် အထူးစီးပွားရေးဇုန်များအတွင်း ဆန်းသစ်တီထွင်မှုမြှင့်တင်ခြင်းတို့အပေါ် အစိုးရ၏အာရုံစိုက်မှုသည် အဆိုပါအထူးစီးပွားရေးဇုန်များ၏ အလားအလာကို အကောင် အထည်ဖော်ရန်အရေးကြီးကြောင်း ဝန်ကြီးချုပ် Hun Manet မှ မကြာသေးမီက တိုက်တွန်းထားခဲ့ကြောင်းသိရှိရပါသည်။
Source : Khmer Times
DOCA(ရန်ကုန်)
တိုယိုတာကုမ္ပဏီ၏ဥက္ကဌဖြစ်သူ Akio Toyoda ကထိုင်းနိုင်ငံတွင် Hybrid ကားများ ထုတ်လုပ်မှုတိုးချဲ့ရန်အတွက် ဘတ် ၅၅ ဘီလီယံရင်းနှီးမြှုပ်နှံရန် ကတိကဝတ်ပြုခဲ့ကြောင်း ထိုင်းအစိုးရ၏အဆိုအရသိရပါသည်။ ထိုရင်းနှီးမြှုပ်နှံမှုတွင် Hybrid မော်တော်ယာဉ်နှစ်မျိုးစလုံး အတွက် ဘက်ထရီလျှပ်စစ်မော်တာများနှင့် လောင်စာအင်ဂျင်များထုတ်လုပ်ခြင်းလုပ်ငန်းများ ပါဝင်ကြောင်းနှင့် ထိုရင်းနှီးမြှုပ်နှံမှုသည် အလုပ်အကိုင်အခွင့်အလမ်းများဖန်တီးခြင်း၊ နည်းပညာ လွှဲပြောင်းခြင်းနှင့် လူ့စွမ်းအားအရင်းအမြစ်ဖွံ့ဖြိုးတိုးတက်ရေးတို့ကို အထောက်အကူပေးနိုင် ကြောင်း ထိုင်းနိုင်ငံစက်မှုဝန်ကြီးဖြစ်သူ Akanat Promphan ကထိုင်းနိုင်ငံဝန်ကြီးချုပ်နှင့် Mr Toyoda တို့ ဒီဇင်ဘာ ၁၈ရက်နေ့က ထိုင်းအစိုးရရုံးတွင်ပြုလုပ်ခဲ့သည့်အစည်းအဝေးအပြီးတွင် ပြောကြားခဲ့ပါသည်။ ထိုင်းအစိုးရပြောရေးဆိုခွင့်ရှိသူ၏အဆိုအရ ဝန်ကြီးချုပ်သည် ကားလုပ်ငန်း နယ်ပယ်၏ လိုအပ်ချက်များနှင့် အစိုးရ၏မူဝါဒများကြားချိန်ငြှိရန်နှင့် ထုတ်လုပ်သူနှင့် သုံးစွဲသူ နှစ်ဦးနှစ်ဖက် စီးပွားရေးအကျိုးအမြတ်ရရှိစေရန်အတွက် ဆောင်ရွက်သွားရန် အစိုးရ၏ အဆင်သင့်ဖြစ်နေမှုကို ထပ်မံအာမခံခဲ့ကြောင်းပြောကြားခဲ့ပါသည်။ ထိုင်းအစိုးရသည် နိုင်ငံတွင် ဂျပန်၏ကုန်ထုတ်လုပ်မှုကဏ္ဍ၊ ဆက်စပ်နေသည့်လုပ်ငန်းနယ်ပယ်များရှိ ထိုင်းစီပွားရေး လုပ်ငန်းများနှင့် ပြည်တွင်းအစိတ် အပိုင်းထုတ်လုပ်သူများအပေါ်တွင် ယုံကြည်ချက် မြှင့်တင်ရန် နှင့် ရင်းနှီးမြှုပ်နှံမှုများကိုပံ့ပိုးပေးရန် အာမခံခဲ့ကြောင်းသိရပါသည်။ အစိုးရ၏မူဝါဒများတွင် အစိမ်းရောင်စွမ်းအင်ပမာဏအဆင့် မြှင့်တင်ရန်လုပ်ဆောင်နေစဉ်အတွင်း လျှပ်စစ်ကားလုပ်ငန်း စဉ်ဆက်မပြတ်ကြီးထွားမှု မြှင့်တင်ရေး ပါဝင်ကြောင်းသိရပါသည်။ Mr Toyoda က လုပ်ငန်း နယ်ပယ်အတွက် ထိုင်းဝန်ကြီးချုပ်နှင့် အစိုးရ၏ ကာလကြာရှည် ပံ့ပိုးပေးခဲ့မှုကို ကျေးဇူးတင် ကြောင်းနှင့် ထိုင်းနိုင်ငံထုတ်မော်တော်ယာဉ် အစိတ်အပိုင်းများသည် ဂျပန်ထုတ်ပစ္စည်းများနှင့် အရည်အသွေးနှင့်စံနှုန်းတွင်တူညီသည်ဟု အသိအမှတ်ပြုခံရကြောင်းပြောကြားခဲ့ပါသည်။ တိုယိုတာသည် ထိုင်းနိုင်ငံတွင်လုပ်ငန်းလုပ်ကိုင်လျှက်ရှိသည်မှာ နှစ် ၆၀ ကျော်ပြီးဖြစ်ပြီး အဓိက ထုတ်လုပ်ရာအချက်အချာအဖြစ် အသုံးပြုလျှက် ရှိကြောင်းသိရပါသည်။ နှစ်ဖက်စလုံးသည် ထိုင်းနိုင်ငံတွင်မော်တော်ယာဉ်လုပ်ငန်းအားကောင်း လာစေရန်အတွက် မဟာဗျူဟာများကို ဆွေးနွေးခဲ့ကြောင်းသိရပါသည်။ ထို့ပြင်မူဝါဒများနှင့် စီမံချက်များသည် မော်တော်ယာဉ် အသုံးပြုသူများနှင့် စီးပွားရေးလုပ်ငန်းများအထူးသဖြင့် Hybrid မော်တော်ယာဉ်များ ထုတ်လုပ် ခြင်းတွင် လိုအပ်ချက်နှင့်ကိုက်ညီရန်အရေးကြီးကြောင်းကို သဘော တူညီခဲ့ကြကြောင်းသိရပါ သည်။ ကမ္ဘာ့အကြီးမားဆုံးကားကုမ္ပဏီဖြစ်သည့် တိုယိုတာသည် လျှပ်စစ်ကားရောင်းချရမှု အရေအတွက် အလွန်နည်းပါးသည့်အတွက် ဝေဖန်မှုများခံခဲ့ရသော်လည်း Hybrid မော်တော်ယာဉ် ထုတ်လုပ်မှုကိုအာရုံစိုက်ရန် ၎င်းတို့ဆုံးဖြတ်ချက်သည် ဘဏ္ဍာရေးပိုင်းအရ အောင်မြင်မှုရနေပြီ ဖြစ်ကြောင်းသိရပါသည်။
