HighLight News

           စားသုံးသူရေးရာဦးစီးဌာန၊ ပဲခူးခရိုင်ဦးစီးမှူး၊  ဒိုက်ဦးမြို့နယ်တာဝန်ခံနှင့်အဖွဲ့သည် ဇွန်လ ပထမပတ်တွင် ဒိုက်ဦးမြို့ပေါ်ရှိ ဦးမောင်မောင် ဓာတ်မြေဩဇာနှင့် ပိုးသတ်ဆေးအရောင်းဆိုင်၊ ချင်ကွန်းအလှကုန်အရောင်းဆိုင်သို့ သွားရောက်၍ ဓာတ်မြေဩဇာ ဈေးနှုန်း/ဈေးကွက်အခြေအနေများ နှင့် အလှကုန်အရောင်းဆိုင်ရှိ ဆပ်ပြာခဲများတွင် ကုန်အညွှန်းအမှတ်အသား ပြည့်စုံမှု ရှိ/မရှိ တို့ကို ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးရာတွင် ဇွန် ပထမပတ် ဓာတ်မြေဩဇာဈေးနှုန်းများမှာ ယူရီးယား(လုံးကြီး) မြင်းပျံတစ်အိတ်လျှင် ၈၇၅၀၀ ကျပ်၊ ယူရီးယား (လုံးကြီး)  MC တစ်အိတ်လျှင် ၉၀၅၀၀ ကျပ်၊ ယူရီးယား (လုံးသေး) အာမို တစ်အိတ်လျှင် ၈၇၅၀၀ ကျပ်၊ ယူရီးယား (လုံးသေး)  သြဘာတစ်အိတ်လျှင် ၈၅၀၀၀ ကျပ် ၊ ယူရီးယား (လုံးသေး) ရွှေနဂါးတစ်အိတ်လျှင် ၉၈၀၀၀ ကျပ်၊ ယူရီးယား (လုံးသေး)  MPE တစ်အိတ်လျှင် ၉၅၀၀၀ ကျပ်၊ တီစူပါ (သံကွင်း) တရုတ်တစ်အိတ်လျှင် ၇၉၀၀၀ ကျပ်၊ ရွှေကောမတ် (မြန်မာသြဘာ) တစ်အိတ်လျှင် ၉၂၀၀၀ ကျပ်၊ ပိုတက်( ဂျာမနီ) တစ်အိတ်လျှင် ၉၉၀၀၀ ကျပ်၊ ကွန်ပေါင်းအာမိုတစ်အိတ်လျှင် ၉၀၀၀၀ ကျပ်၊ ကွန်ပေါင်း (သြဘာ) တစ်အိတ်လျှင် ၉၀၀၀၀ ကျပ်ဖြစ်ကြောင်းသိရှိရပြီး တောင်သူများ သီးနှံစိုက်ပျိုးကာလဖြစ်သဖြင့် သွင်းအားစု အဝယ်လိုက်ခြင်းကြောင့် ဈေးနှုန်းမြင့်တက်ခြင်းဖြစ်ကြောင်း သိရှိရပါသည်။ ထို့နောက် အလှကုန်အရောင်းဆိုင်ရှိ ဆပ်ပြာခဲများအား ကုန်အညွှန်းအမှတ်အသား ပြည့်စုံမှု ရှိ/မရှိ ကြည့်ရှုစစ်ဆေးရာ ပြည့်စုံမှန်ကန်မှုရှိသည်ကို  တွေ့ရှိရကြောင်း သတင်းရရှိပါသည်။

DOCA(ပဲခူး)

      စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ ဘီးလင်း မြို့နယ်တာဝန်ခံနှင့် ဝန်ထမ်းများသည် ၁၄.၆.၂၀၂၂ ရက်နေ့တွင် မြို့နယ်ပြည်သူ့ကျန်းမာရေးဦးစီးဌာန၊ မြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ရပ်/ကျေးအုပ်ချုပ်ရေး မှူးများနှင့်ပူးပေါင်း၍ ဘီးလင်းမြို့နယ်ရှိ ဆေးဆိုင် (၄) ဆိုင်အား ဆေးဝါးရောင်းချခွင့်လိုင်စင် အသစ်လျှောက်မှုအပေါ် ဆေးဆိုင်အင်္ဂါရပ်နှင့်အညီ ဆောင်ရွက်ထားရှိမှု ရှိ/မရှိ စစ်ဆေးခဲ့ကြောင်း သိရှိရသည်။ ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ မြို့နယ်တာဝန်ခံက သက်ဆိုင်ရာထောက်ခံချက်များ ပါရှိသော ဆေးဝါးများကိုသာရောင်းချကြရန် အသိပညာပေးပြောကြားခဲ့ပြီး စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်း အမှတ်အသားဖော်ပြခြင်းနှင့်ပတ်သက်၍ သိကောင်းစရာများ ဖော်ပြပါရှိသော လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိပါသည်။

DOCA(မွန်)

          ပဲခူးတိုင်းဒေသကြီး၊ သာယာဝတီခရိုင် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်အေးသန္တာထွန်းသည် သာယာဝတီမြို့နယ်အတွင်း ရောင်းချနေသောစိုက်ပျိုးရေးဆေးဆိုင်များသို့ ၈.၆.၂၀၂၂ ရက်နေ့တွင် ကွင်းဆင်းလေ့လာခဲ့ပါသည်။

          စိုက်ပျိုးရေးဆေးဆိုင်ပိုင်ရှင် ကောင်းသန့်မင်းမှ ပြောကြားခဲ့ရာတွင် တောင်သူများအကြား သုံးစွဲမှုများသောတံဆိပ်မှာ မြင်းပျံတံဆိပ်ဖြစ်ပြီး ကီလိုဂရမ် ၅၀ ပါဝင်ပါသည်။ တစ်အိတ်ဈေးနှုန်းမှာ ၉၈၀၀၀ ကျပ်ဖြစ်ကြောင်း၊ တောင်သူများအကြား အများဆုံးသုံးစွဲသော ပိုးသတ်ဆေးအမျိုးအစားမှာ ၅၀၅ တံဆိပ်ဖြစ်ပြီး တစ်လီတာ ၁ ဗူးလျှင် ၂၈၀၀၀ ကျပ်ဖြင့် ရောင်းချလျှက်ရှိကြောင်း၊ ယခင်မြေဆီ တစ်အိတ်လျှင် ၂၃၀၀၀ ကျပ်ဖြစ်၍ အိတ် ၁၀၀ ထိ သိုလှောင်ရောင်းချနိုင်ခဲ့ပြီး ယခုအခါတွင် မြေဆီတစ်အိတ်လျှင် ကျပ်တစ်သိန်းဝန်းကျင်ခန့် ဈေးနှုန်းမြင့်မားနေသဖြင့် တစ်ခါဝယ်ယူသိုလှောင်လျှင်  ၁၀ အိတ်သာ ဝယ်ယူသိုလှောင်ရောင်းချနိုင်တော့ပါကြောင်း သိရှိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်မင်းသည် (၇.၆. ၂၀၂၂)ရက်နေ့ (၁၃း၀၀) နာရီအချိန်တွင် မိတ္ထီလာခရိုင်ဦးစီးမှူးရုံးခန်းအတွင်း မိတ္ထီလာခရိုင်အတွင်း စားသောက်ကုန်ထုတ်လုပ်ဖြန့်ဖြူးရောင်းချနေသော စီးပွားရေးလုပ်ငန်းရှင်များ နှင့် စားသုံးသူအသိပညာပေးဟောပြောပွဲ ပြုလုပ်ခဲ့ပါသည်။

          အဆိုပါတွေ့ဆုံမှုတွင် စားသုံးသူရေးရာဦးစီးဌာန၏ မျော်မှန်းချက်၊ ရည်မှန်းချက်နှင့်တာဝန်များကို ရှင်းလင်းပြောကြားခဲ့ပြီး၊ စီးပွားရေးလုပ်ငန်းရှင်များအနေဖြင့် စားသုံးသူများ ဘေးအန္တရာယ်ကင်းရှင်း၍ မိမိတို့လုပ်ငန်းများ ထုတ်ကုန်လုံခြုံစိတ်ချမှုရှိပြီး အကျိုးစီးပွားဖြစ်ထွန်းစေရန်အတွက် စားသုံးသူကာကွယ်ရေးဥပဒေပါ ပြဌာန်းချက်များအား လိုက်နာစေလိုကြောင်း၊ စားသုံးသူကာကွယ်ရေးဥပဒေ (၂၀၁၉) အခန်း(၁၈)ပါ ကုန်အညွှန်းအမှတ်အသားဖော်ပြချက်များနှင့် မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသော ညွှန်ကြားချက်ပါ သက်ဆိုင်ရာကုန်စည်အုပ်စုအလိုက် မြန်မာဘာသာဖြင့်ထည့်သွင်းဖော်ပြရမည့် အချက်အလက်များနှင့်ပတ်သက်၍ ရှင်းလင်းပြောကြားခဲ့ပြီး၊ တားမြစ်ချက်များ၊ ပြစ်မှုပြစ်ဒဏ်များအကြောင်းကို အကျယ်တဝင့်ရှင်းလင်းပြောကြားခဲ့ပြီး၊ မည်သည့်လုပ်ငန်းရှင်မဆို စားသုံးသူကာကွယ်‌ပေးရေးဥပဒေပါ တားမြစ်ချက်များကို ဖောက်ဖျက်ပါက စားသုံးသူကာကွယ်ပေးရေးဥပဒေအရ အရေးယူခံရမည်ဖြစ်ကြောင်းနှင့် စီးပွားရေးကျင့်ဝတ်နှင့်အညီ လုပ်ကိုင်‌ဆောင်ရွက်ခြင်းဖြင့် စျေးကွက်များ ပိုမိုရရှိလာနိုင်ပြီး စားသုံးသူများမှလည်း လုံခြုံစိတ်ချရသောကုန်စည်များအား ရွေးချယ်ဝယ်ယူသုံးစွဲလာနိုင်၍ နှစ်ဦးနှစ်ဖက် အကျိုးကျေးဇူးများရရှိစေလာမည်ဖြစ်ကြောင်း၊ သိရှိလိုသည်များ၊ အခက်ခဲများကို ရင်းနှီးပွင့်လင်းစွာတင်ပြစေလိုကြောင်း ဆွေးနွေးခဲ့ပြီး စီးပွားရေးလုပ်ငန်းရှင်များအနေဖြင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို သိရှိလိုပါက www.doca.gov.mm Website တွင်ဝင်ရောက်လေ့လာနိုင်ကြောင်း အသိပညာပေး ဆွေးနွေးခဲ့ပါသည်။

DOCA(မန္တလေး)

           စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာကွယ်ရေးအသိပညာပေးဟောပြောပွဲလုပ်ငန်းများဆောင်ရွက်ခြင်းနှင့် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း လုပ်ငန်းများ လုပ်ဆောင်လျှက်ရှိပါသည်။ ၂၀၂၂ ခုနှစ်၊ ဇွန်လ ၈  ရက်နေ့ (၁၀း၀၀)အချိန်တွင် စားသုံးသူရေးရာဦးစီးဌာန၊ ခရိုင်ဦးစီးမှူး၏လမ်းညွှန်ချက်ဖြင့် မိတ္ထီလာခရိုင်ဦးစီးမှူးရုံးမှဝန်ထမ်းများသည် (မိတ္ထီလာ/ ရမည်းသင်း)ခရိုင်အတွင်း မြို့နယ်များရှိ တိုင်းရင်းဆေးရောင်းချသည့်ဆေးဆိုင်များသို့ သွားရောက်၍ ရသေ့ဆေး(သို့) ထိုင်းတိုင်းရင်းဆေးများ ရောင်းချခြင်းရှိ/မရှိ စျေးကွက်စောင့်ကြည့်စစ်ဆေးခဲ့ပါသည်။

           ထိုသို့ကွင်းဆင်းဆောင်ရွက်ရာတွင်  “ ရသေ့ဆေး(သို့)ထိုင်းတိုင်းရင်းဆေး ”သည် အကိုက်ခဲပေါင်းစုံပျောက်သည်ဟုဆိုကာ ကြောငြာရောင်းချလျက်ရှိကြောင်းနှင့် ထိုင်းနိုင်ငံ၏ FDA က ဘေးအန္တရာယ်ရှိသည့်ဆေးအဖြစ် ထုတ်ပြန်ထားကြောင်း၊ မြန်မာနိုင်ငံအစားအသောက်နှင့်ဆေးဝါးကွပ်ကဲ ရေးဦးစီးဌာနသို့ အကြောင်းကြားညှိနှိုင်းခဲ့ရာ အစားအသောက်နှင့်ဆေးဝါးကွပ်ကဲရေးဦးစီးဌာနမှလည်း အဆိုပါ ဗိန်းတောဆေးသည် မြန်မာနိုင်ငံတွင်လည်း တရားဝင်မှတ်ပုံထားခြင်းမရှိကြောင်းနှင့် ဘေးအန္တရာယ်ဖြစ်စေသည့် တိုင်းရင်း‌ဆေးဝါးဖြစ်ကြောင်း၊ စားသုံးသူပြည်သူများအား ဘေးဥပါဒ်ဖြစ်စေသော ပစ္စည်းများ တရားမဝင်တင်သွင်းရောင်းချခြင်းဖြစ်သဖြင့် စားသုံးသူနစ်နာမှုများရှိခြင်းကြောင့် ရောင်းချရန်မသင့်ကြောင်း၊ ရောင်းချပါက ဥပ‌ဒေအရ အရေးယူခံရမည်ဖြစ်ကြောင်း တိုင်းရင်းဆေးရောင်းချသည့် ဆေးဆိုင်များသို့ ရှင်းလင်းပြောကြားခဲ့ပါသည်။ (မိတ္ထီလာ/ရမည်းသင်း)ခရိုင် အတွင်း “ ရသေ့ဆေး(သို့)ထိုင်းတိုင်းရင်းဆေး ”များ ရောင်းချမှုမရှိကြောင်း စစ်ဆေးတွေ့ရှိခဲ့ပါသည်။

DOCA(မန္တလေး)