သတင်းနှင့် လှုပ်ရှားမှုများ

        မြိတ်ခရိုင်တွင် ဆန်စျေးကွက်စျေးနှုန်းအား ဒေသတွင်းဖြစ်သင့်ဖြစ်ထိုက်သောစျေးဖြင့်ရောင်း ဝယ်ဖောက်ကားမှုရှိစေရေးအတွက် စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် ခရိုင်ကုန်‌စျေးနှုန်းတည်ငြိမ်ရေးအဖွဲ့ဝင်များဖြစ်ကြသော ဗဟိုစာရင်းအင်းအဖွဲ့၊ စည်ပင်သာယာရေးအဖွဲ့၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ စီမံကိန်းရေးဆွဲရေးဦးစီးဌာနတို့သည် ၂၀၂၆ ခုနှစ်၊ အောက်တိုဘာလ ၉ ရက်နေ့၊ နံနက် (၁၀း၀၀) နာရီအချိန်တွင် မြိတ်မြို့၊ နောက်လယ်ရပ်၊ နောက်လယ် ၂ လမ်း၊ ၃ လမ်း၊ ၄ လမ်းတို့ရှိ ဆန်အ‌ရောင်းဆိုင်များအား ရှောင်တခင်ကွင်းဆင်း စစ်ဆေးခဲ့ကြောင်း သိရှိရပါသည်။

     စစ်ဆေးရာတွင် မြိတ်မြို့အတွင်းရောင်းချနေသော ဆန်ဈေးနှုန်းများအား သတ်မှတ်ထုတ်ပြန်ထားသည့် ရည်ညွှန်းဈေးနှုန်းများအတိုင်းရောင်းချနေခြင်း ရှိ/ မရှိ၊ အလေးချိန်၊ အချိန်အတွယ်မှန် ကန်မှုရှိစေရေးနှင့် ဈေးကွက်/ ဈေးနှုန်း တည်ငြိမ်စေရေးအတွက် ဆန်များအားဈေးကစားရန် ရည်ရွယ်ချက်ဖြင့် သိုလှောင်ထားရှိခြင်း၊ ဈေးနှုန်းမြှင့်တင်ရောင်းချခြင်းများမရှိစေရန် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(တနင်္သာရီ)

       ၂၀၂၆ ခုနှစ်၊ အောက်တိုဘာလ၊ ၉ ရက်နေ့၊ နံနက် (၀၉း၀၀) နာရီအချိန်တွင် စားသုံးသူရေးရာ ဦးစီးဌာန၊ မြိတ်ခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် ဗဟိုစာရင်းအင်းအဖွဲ့၊ စည်ပင်သာယာရေးအဖွဲ့၊ ပြည်သူ့ကျန်းမာရေးဦးစီးဌာန၊ ကျေးလက်ဒေသဖွံဖြိုးတိုးတက်ရေးဦးစီးဌာနတို့ဖြင့် ပူးပေါင်း၍ မြိတ်မြို့၊ နောက်လယ်ရပ်၊ နောက်လယ်(၄)လမ်းနှင့် မြို့သစ်ရပ်ရှိ စားအုန်းဆီအရောင်းဆိုင်များတွင် ရောင်းချလျက်ရှိသော စားအုန်းဆီများအား သတ်မှတ်ရည်ညွှန်းဈေးနှုန်းများအတိုင်း ရောင်းချနေခြင်း ရှိ/ မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်းသိရှိရပါသည်။

       စစ်ဆေးခြင်းဆောင်ရွက်ရာတွင် မြိတ်မြို့အတွင်း စားအုန်းဆီရောင်းချနေသော အရောင်းဆိုင်များ၌ သတ်မှတ်ရည်ညွှန်းဈေးနှုန်းဖြင့် ဗီနိုင်းများကပ်၍ရောင်းချနေကြောင်း ရှိ/ မရှိ၊ သတ်မှတ်ထုတ်ပြန်ထားသော ထုတ်ပြန်ချက်များနှင့်အညီ ခွဲဝေရောင်းချပေးနေမှုများ ရှိ/ မရှိ၊ အလေးချိန်/အချိန် အတွယ် မှန်ကန်စွာ ချိန်တွယ်ရောင်းချနေမှုများ ရှိ/မရှိ စစ်ဆေးခြင်းနှင့် ဈေးကစားရန်ရည်ရွယ်ချက် ဖြင့်သိုလှောင် ထားခြင်းမျိုးမဖြစ်ပေါ်စေရေး ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(တနင်္သာရီ)

      စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

          စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ အောက်တိုဘာလ ၁၆ ရက်နေ့မှ ၂၂ ရက်နေ့အထိ ရန်ကုန် အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၇,၃၆၉ ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေး ကော်မတီ က အသိပေးထုတ်ပြန် ကြေညာထားကြောင်း သိရှိရပါ​သည်။  

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

                 တောင်သာမြို့နယ်သည်     နွေနှမ်းစိုက်ပျိုးခြင်းကို ဖေဖော်ဝါရီလနှင့် မတ်လတို့တွင် စိုက်ပျိုး ပြီး ဇွန်လနှင့် ဇူလိုင်လတို့တွင်ရိတ်သိမ်းထွက်ပေါ်ကြောင်း စိုက်ပျိုးထားရှိမှုမှာ တောင်သာမြို့နယ် ချုပ်အနေဖြင့် (၆၉၈) ဧကစိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရသည်။ နှမ်းစိုက်ပျိုးမှု အနေဖြင့် ဘောင်ကြောင်းပေးစနစ်ဖြင့် စိုက်ပျိုးကြပြီး အများဆုံး စိုက်ပျိုးသော မျိုးများမှာ နှမ်းဖြူနှင့် နှမ်းညိုများကိုစိုက်ပျိုးကြသည်။ မျိုးစေ့တစ်ပြည်လျှင် (၉၀၀၀) ကျပ်ရှိကြောင်း ၊ တစ်ဧကစိုက်ပျိုးရာတွင်မျိုး (၄ပြီ) ခန့်စိုက်ပျိုးရကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင်  စုစုပေါင်း (၅၀၀၀၀၀) ကျပ်ခန့် ကုန်ကျကြောင်း၊ စိုက်ပျိုးသောကျေးရွာများမှာ ဆီမီးကန်ရွာ၊ ရုံးတောရွာ၊ ထန်းပင်ကန်ရွာ၊ ကျောက်ကွဲရွာ၊ ဇဂျမ်းရွာ၊ သာယာကြီးရွာနှင့် ကြီးပင်တဲရွာတို့တွင် နွေးနှမ်းများကို မြေအောက် ရေပေးစနစ်ဖြင့် စိုက်ပျိုးထားကြောင်း၊ တစ်ဧကအထွက်နှုန်းအနေဖြင့် (၁၀-၁၁) တင်းခန့် ထွက်ရှိကြောင်း၊ နွေနှမ်းများကို ဇူလိုင်လကုန်တွင် ရိတ်သိမ်းပြီးဖြစ်ကြောင်း၊ ဩဂုတ်လလယ်၌ ဈေးကွက်တွင် လှိုင်လှိုင်ရောင်းဝယ်လျှက်ရှိကြောင်း၊ ၂၀၂၆ခုနှစ်၊ အောက်တိုဘာလ ပထမပတ်တွင် မြင်းခြံကုန် စည်ဒိုင်ဈေးကွက်၌ နှမ်းဖြူတစ်တင်းလျှင် (၁၆၁၅၀၀-၁၆၃၀၀၀)ကျပ်၊ နှမ်းညိုတစ်တင်း လျှင် (၁၆၃၀၀၀-၁၆၅၀၀၀) ကျပ်ခန့် ပေါက်ဈေးများရှိကြောင်း၊  နှမ်းဆီတစ်ပိဿာလျှင် (၂၀၀၀၀-၂၁၀၀၀) ကျပ်ခန့် ပေါက်ဈေးများရှိကြောင်း၊  ဒေသတွင်းထွက်ရှိသော နှမ်းများကို တောင်သူများ ကိုယ်တိုင်တောင်သာမြို့၊ မြင်းခြံမြို့ ရှိပွဲရုံများသို့ တင်ပို့ရောင်းချသလို   ထိုပွဲရုံများမှတဆင့် မန္တလေးမြို့၊ မကွေးမြို့ သို့လည်းကောင်း၊ ရန်ကုန်တိုင်းအတွင်းရှိ ဘုရင့်နောင်ပွဲရုံနှင့်  ရွှေပြည်သာမြို့ များသို့လည်း တိုက်ရိုက် တင်ပို့ရောင်းချကြကြောင်း၊ စားသုံးဆီ ဖူလုံစေရေးအတွက်  တောင်သူများ မှာနှမ်းကို ဆီထွက်သီးနှံ အဖြစ် တိုးချဲ့စိုက်ပျိုးလျက်ရှိကြောင်း၊ ကုန်ကျစရိတ်များနုတ်ပြီး တစ်ဧက လျှင် (၆၅၀၀၀၀) ကျပ်ခန့် အကျိုးအမြတ်လည်းရရှိကြောင်း ထွက်ပေါ်ချိန်တွင် ဈေးကွက်၌ ဒေသစုံမှ အဝယ်လိုက်လာသဖြင့် နှမ်းစိုက်တောင်သူများ ဈေးကောင်းရရှိကြောင်း ရသာကျေးရွာမှ နှမ်းစိုက် တောင်သူများ၏ ပြောပြချက် အရသိရှိရသည်။

DOCA(မန္တလေး)      

          မွန်ပြည်နယ်၊ စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံ ဦးမင်းနောင် သည် ခရိုင်အထွေထွေအုပ်ချုပ်ရေးဦးစီးဌာန၏ လမ်းညွှန်ချက်နှင့်အညီ ၁၃.၁၀.၂၀၂၆ ရက်နေ့ တွင် သက်ဆိုင်ရာဌာနဆိုင်ရာများနှင့် ပူးပေါင်း၍ ကျိုက်မရောမြို့ပေါ်ရှိ အခြေခံပညာကျောင်း များမှ ကျောင်းမုန့်ဈေးတန်းများနှင့် ကျောင်းပတ်ဝန်းကျင်ရှိ ဈေးဆိုင်များအား ကွင်းဆင်း စစ်ဆေးခဲ့ကြောင်း သိရသည်။

          အဆိုပါ ကွင်းဆင်းစစ်ဆေးရာတွင် ကျိုက်မရောမြို့နယ်အထွေထွေအုပ်ချုပ်ရေးဦးစီး ဌာန၊ စည်ပင်သာယာရေးအဖွဲ့၊ ကျန်းမာရေးဦးစီးဌာန၊ မွေးမြူရေးနှင့်ကုသရေးဦးစီးဌာနနှင့် မြန်မာနိုင်ငံရဲတပ်ဖွဲ့ဝင်များ ပူးပေါင်းပါဝင်ခဲ့ကြသည်။

          ထိုသို့စစ်ဆေးရာတွင် ကျောင်းဝင်းအတွင်းရှိ ကျောင်းမုန့်ဈေးတန်းများနှင့် ကျောင်းပတ် ဝန်းကျင်ရှိ ဈေးဆိုင်များ၏ သန့်ရှင်းသပ်ရပ်မှု ရှိ/မရှိ၊ အစားအသောက်များတွင် ဆိုးဆေး အန္တရာယ် ရှိ/မရှိ၊ တားမြစ်အစားအစာများ ရောင်းချခြင်း ရှိ/မရှိနှင့် စားသုံးသူများ သိရှိနိုင်ရန် မြန်မာဘာသာဖြင့် ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြထားခြင်း ရှိ/မရှိတို့ ကို စစ်ဆေးဆောင်ရွက်ခဲ့ကြသည်။

          အဆိုပါစစ်ဆေးမှုသည် ကျောင်းသား၊ ကျောင်းသူများ ဘေးအန္တရာယ်ကင်းရှင်းပြီး အရည်အသွေးပြည့်ဝသော အစားအသောက်များကို စားသုံးနိုင်ရေး၊ စားသုံးသူအခွင့်အရေးများ ကို ကာကွယ်ပေးနိုင်ရေးနှင့် အစားအသောက်ရောင်းချသူများအနေဖြင့် သက်ဆိုင်ရာ စည်းမျဉ်းစည်းကမ်းများနှင့်အညီ ရောင်းချဆောင်ရွက်နိုင်ရေးတို့အတွက် ရည်ရွယ်၍ ပူးပေါင်း ကွင်းဆင်းစစ်ဆေးခြင်းဖြစ်ကြောင်း သိရသည်။

DOCA (မွန်)