သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံသည်(၁၁.၁၁.၂၀၂၅)ရက်နေ့ နံနက်(၀၉:၃၀) အချိန်တွင် ဇလွန်မြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre)စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်အနေဖြင့် ကုန်စည်နှင့် စပ်လျဉ်း၍ အာမခံချက်ပေးခြင်းအကြောင်း အသိပညာပေး Talk Show အစီအစဉ်ကို ဆောင်ရွက်ခဲ့ပါ သည်။

       အဆိုပါ အစီအစဉ်တွင် မြို့နယ်တာဝန်ခံ ဦးသန့်ဇင်ဦးက စီးပွားရေးလုပ်ငန်းရှင်များသည် မိမိတို့ ရောင်းချသည့် ကုန်စည်တွင် သာမန်အားဖြင့် မမြင်နိုင်သော သဘာဝပြောင်းလဲနိုင်မှုနှင့် စပ်လျဉ်းသည့် အချက်အလက်များကို စားသုံးသူအား ထင်ရှားစွာ ဖော်ပြ၍ အသိပေးရမည်ဖြစ်ကြောင်း၊ ‌ရောင်းချမည့် ကုန်စည်နှင့်စပ်လျဉ်း၍ ဖော်ပြရမည့် အာမခံချက်များတွင် စားသုံးသူက လက်ခံသုံးစွဲနိုင်သော အရည် အသွေးရှိခြင်း၊ ဘေးအန္တရာယ်ကင်းရှင်းစေခြင်း၊ ကုန်စည်၏ အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိခြင်း၊ စားသုံးသူများ သုံးစွဲရာတွင် လိုအပ်ချက်အတွက် သင့်လျော်မှုရှိခြင်း၊နမူနာ ပစ္စည်းတွင် ဖော်ပြထားသည့်အတိုင်း တူညီစွာပါရှိခြင်း၊ အာမခံချက်ပေးထားသည့်ကာလ (သို့) အသုံး ပြုနိုင်မည့်ကာလအတွင်း အပိုပစ္စည်း ရရှိနိုင်ခြင်း၊ ပြန်လည်ပြုပြင်နိုင်ခြင်း(သို့) လဲလှယ်နိုင်ခြင်း၊ ကုန် စည်ပေါ်တွင် ဖော်ပြထားသော ကုန်အညွှန်းအမှတ်အသားပါ အချက်အလက်၊ ကြော်ငြာ၊ ကမ်းလှမ်း ချက် သို့မဟုတ် အရောင်းမြှင့်တင်ခြင်းတွင် ပါဝင်သော ဖော်ပြချက်နှင့် ကိုက်ညီမှုရှိခြင်းစသည့် အာမခံ ချက်များ ပါရှိရမည်ဖြစ်ကြောင်း စသည်တို့ကို အကျယ်တဝင့် အသိပညာပေးရှင်းလင်းခဲ့ကြောင်း သိရှိ ရပါသည်။

 (DOCA ဧရာဝတီ)

     ပုသိမ်ခရိုင်၊ သာပေါင်းမြို့နယ်၊ မြို့နယ်ဦးစီးမှူးရုံးမှ ဒု-ဦးစီးမှူး ဒေါ်မြတ်မြတ်စိုးသည် (၁၃.၁၁.၂၀၂၅) ရက်နေ့၊ နံနက် (၁၁း၀၀) အချိန်တွင် သာပေါင်းမြို့၊ သီရိရွှေသာဈေးရှိ ဆန်အရောင်းဆိုင်များတွင် ဆန်အမျိုးအစားများ မေးမြန်း၍ ဆန်တစ်အိတ်လျှင် ရှိသင့်သော ပေါင်ပြည့်မှီရေးနှင့် ဈေးကွက်အတွင်း ရောင်းချလျက်ရှိသော ဆန်ဈေးနှုန်းမှန်ကန်စေရေး ဆိုင်များအား ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

(DOCA) ဧရာဝတီ

     ပုသိမ်ခရိုင်၊ သာပေါင်းမြို့နယ်၊ မြို့နယ်ဦးစီးမှူးရုံးမှ ဒု-ဦးစီးမှူး ဒေါ်တင်တင်နိုင်သည် ပြန်ကြားရေးနှင့် ပြည့်သူ့ဆက်ဆံရေးရုံး၌ ကျောင်းသား/ကျောင်းသူ (၁၅) ဦးအား စားသုံးသူကာကွယ်ရေးဥပဒေပါ စားသုံးသူ၏ အဓိပ္ပါယ်နှင့် စားသုံးသူများ ရရှိနိုင်မည့် အခွင့်အရေးနှင့် တာဝန်များ၊ လိုက်နာဆောင်ရွက်ရမည့် စည်းကမ်းချက်များကို ကျောင်းသား/ကျောင်းသူများ နားလည်လွယ်အောင် အသိပညာပေးဟောပြောခဲ့ပြီး လက်ကမ်းစာစောင်များ ပေးဝေခဲ့ကြောင်း သိရှိရပါသည်။

(DOCA) ဧရာဝတီ

       စားသုံးသူရေးရာဦးစီးဌာနအနေဖြင့်  စားသုံးသူကာကွယ်ရေးဥပဒေပါအကြောင်းအရာများ၊  Online ဝန်ဆောင်မှုလုပ်ငန်းဆိုင်ရာများနှင့် အခါအားလျော်စွာသတ်မှတ်ပြဌာန်းထုတ်ပြန်ချက်များကို စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံး သိရှိစေနိုင်ရေးအတွက် နည်းလမ်းပေါင်းစုံဖြင့် အသိပညာပေးလျက်ရှိရာ(၂၇.၁၀.၂၀၂၅)ရက်နေ့၊ နံနက်(၁၁:၀၀)နာရီအချိန်တွင် ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံးရှိ  လူထုအခြေပြုဗဟိုဌာန (Community Center) ခန်းမ၌ စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးတင်ဇော်ထွေး (ဦးစီးအရာရှိ)သည် ဆန်စပါးသိုလှောင်ရုံမှတ်ပုံတင်ခြင်းဆိုင်ရာ (MyRO)နှင့် ပတ်သက်၍ အသိပညာပေး Talk Show အစီအစဉ်အား ဆောင်ရွက်ခဲ့ပါသည်။

          အဆိုပါအသိပညာပေးဆွေးနွေးပွဲ(Talk Show)တွင် ဒု-ခရိုင်ဦးစီးမှူး ဦးတင်ဇော်ထွေးက ဆန်စပါးသိုလှောင်ရုံမှတ်ပုံတင်ခြင်းနှင့် ပါတ်သက်၍ ဆွေးနွေးရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း၍ ဆန်စပါးသိုလှောင်မှုလုပ်ငန်းများ၊ သိုလှောင်မှုအခြေအနေများနှင့်နိုင်ငံအနှံ့ရှိ သိုလှောင်ရုံများကို      ဒီဂျစ်တယ်နည်းလမ်းဖြင့်စနစ်တကျမှတ်ပုံတင်နိုင်သည့် မြန်မာဆန်စပါးအွန်လိုင်း(Myanmar Rice Online-My RO )အား အစိုးရ-ပုဂ္ဂလိကပူးပေါင်းဆောင်ရွက်မှုပုံစံဖြင့် ၂၀၂၃ ခုနှစ်၊ နိုဝင်ဘာလ(၃)ရက် နေ့မှစ၍ မှတ်ပုံတင်ခြင်းများကို ဆောင်ရွက်လျက်ရှိပါကြောင်း၊ ဆန်စပါးသိုလှောင်ရုံမှတ်ပုံတင်ခြင်း ဆိုင်ရာအမိန့်အရ စီးပွားရေးလုပ်ငန်းဆောင်ရွက်ရန်အလို့ငှာ ဆန်တန်ချိန်(၂၅)တန်နှင့်အထက် သိုလှောင်ရုံ သို့မဟုတ် စပါးတင်း(၂၅၀၀)နှင့်အထက် သိုလှောင်ရုံတစ်မျိုးမျိုးကို ပိုင်ဆိုင်သူသည် www.myro.com.mm တွင် အမိန့်ထုတ်ပြန်ပြီး(၂)လအတွင်း မှတ်ပုံတင်လျှောက်ထားရမည်ဖြစ်ပြီး မှတ်ပုံတင်လျှောက်ထားပြီးသည့် လုပ်ငန်းရှင်များအနေဖြင့်လည်း အဆိုပါစနစ်တွင် ကုန်ရ၊ ကုန်ထုတ်၊ ကုန်လက်ကျန်လချုပ် Update စာရင်းရေးသွင်းခြင်းကို လစဉ် လကုန်ပြီး(၇)ရက်အတွင်း မပျက်မကွက် ဆောင်ရွက်ရမည်ဖြစ်ကြောင်းနှင့် ဆန်စပါးလုပ်ငန်းလုပ်ကိုင် နေသောသူများအနေဖြင့် MyRO တွင် မှတ်ပုံတင်ရမည်ဖြစ်ပြီး သတ်မှတ်ပမာဏကို သိုလှောင်ထားရှိပြီး မှတ်ပုံတင်လျှောက်ထားမှုမရှိသည်ကို စိစစ်တွေ့ရှိပါက စီမံခန့်ခွဲမှုပြစ်ဒဏ်များ ချမှတ်ခံရမည်ဖြစ်ပါ၍ သတ်မှတ်ထားသည့် ပမာဏများကို သိုလှောင်ထားရှိသည့် ဆန်စပါးသိုလှောင်ရုံလုပ်ငန်းရှင်များအနေဖြင့် My RO တွင် မှတ်ပုံတင်ကြရန် လိုအပ်ပါကြောင်းနှင့် ဆန်စပါးသိုလှောင်ရုံများ  မှတ်ပုံတင်ရာတွင် လုပ်ဆောင်ရမည့်လုပ်ငန်း အဆင့်ဆင့်များအား ဆွေးနွေးပြောကြားခဲ့ကြောင်း သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊ ညောင်ဦးမြို့နယ် အခြေခံပညာအထက်တန်းကျောင်း၌ သန့်ရှင်း၍စိမ်း လန်းစိုပြေသောကျောင်းများ အကောင်အထည်ဖော်ဆောင်ရေးလုပ်ငန်းအခြေအနေများအား သတ်မှတ်ထားသည့် အခြေခံစံနှုန်း(၄)ချက်၊ အညွှန်းကိန်း(၁၇)ချက်နှင့်အညီ အကောင်အထည်ဖော်ဆောင်ရွက် ထားရှိမှုတို့အား ခရိုင်အဆင့်လုပ်ငန်းအဖွဲ့မှ မြေပြင်ကွင်းဆင်းစစ်ဆေးခြင်းကို အောက်တိုဘာလ (၁၇) ရက်နေ့၊ နံနက် (၀၉:၃၀) နာရီအချိန်တွင် ကွင်းဆင်းစစ်ဆေးကြည့်ရှု့ခဲ့ပါသည်။

          အဆိုပါခရိုင်အဆင့် မြေပြင်ကွင်းဆင်းလုပ်ငန်းအဖွဲ့သည် အခြေခံပညာအထက်တန်းကျောင်း (ညောင်ဦး)ဝန်းအတွင်း ကျောင်းသား/ ကျောင်းသူများ လက်တွေ့အကောင်အထည်ဖော်ဆောင်ရွက်ထားရှိသည့် သစ်ပင်ပန်းမံများ၊ ကလေးကစားကွင်းဆောင်ရွက်ထားရှိမှု၊ အရိပ်ရသစ်ပင်များစိုက်ပျိုးထားရှိမှု၊ ကားတာယာကွင်းအဟောင်းများ အသုံးပြုကာ ကျောင်းပတ်ဝန်းကျင် သာယာလှပစေရေး ဆောင်ရွက်ထားရှိမှု၊ သစ်ခွမျိုးစုံစိုက်ပျိုးထားရှိမှု၊ စက္ကူအသုံးပြုရုပ်ပုံဖန်တီးထားရှိမှုနှင့်ချည်လုံး၊ ချည်ထိုးကာ သစ်ပင်ပုံဖန်တီးထားရှိမှုတို့အား စစ်ဆေးခဲ့ကြောင်း သိရှိရပါသည်။

DOCA(မန္တလေး)