သတင်းနှင့် လှုပ်ရှားမှုများ

           မန္တလေးတိုင်းဒေသကြီး မြင်းခြံခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူး ဦးတင်ဇော်ထွေးနှင့် ဝန်ထမ်းများ၊ မြို့နယ်ဆီအသင်းတာဝန်ခံတို့သည် ၂၀၂၆ ခုနှစ်၊ ဇူလိုင်လ(၈)ရက်နေ့ နံနက်(၀၈:၀၀)နာရီအချိန်တွင် မြင်းခြံမြို့ရှိ အများပြည်သူသို့ သက်သာသောဈေးနှုန်းဖြင့် စားအုန်းဆီ များရောင်းချပေးနေသော လက်လီဆီကိုယ်စားလှယ် အရောင်းဆိုင်များသို့ ကွင်းဆင်းကြီးကြပ်မှုများ ဆောင်ရွက်ခဲ့ပါသည်။

          နိုင်ငံတော်မှ စားသုံးသူပြည်သူများသို့ သက်သာသော သတ်မှတ်ရည်ညွှန်းဈေးဖြင့် ဝယ်ယူ စားသုံးနိုင်ရန်ထုတ်ပေးသော စားအုန်းဆီများကို စားအုန်းဆီလက်လီအရောင်းဆိုင်များမှ ရောင်းချ ရာတွင် ဈေးနှုန်းများမှန်ကန်မှုရှိစေရေး၊ အလေးချိန်ပြည့်ဝစေရေး၊ အချိန်အတွယ်မှန်ကန်မှုရှိစေရေး၊ နိုင်ငံတော်မှ သတ်မှတ်ထုတ်ပြန်ထားသော သတ်မှတ်ချက်များအတိုင်းရောင်းချမှုရှိစေရေး၊ စားအုန်း ဆီများဖြန့်ဖြူးရောင်းချရာတွင် အများပြည်သူမြင်သာစေရန် ရောင်းချသည့်နေ့ရက်နှင့် ဈေးနှုန်းများကို ဗီနိုင်းတွင်ရေးသား၍  ချိတ်ဆွဲရောင်းချစေရေး၊ ခွဲတမ်းရရှိထားသော ပမာဏများအလိုက် ပြည့်ဝစွာ ရောင်းချစေနိုင်ရေး၊ ဖြန့်ဝေထုတ်ထားပေးသော ဆီများကိုသာရောင်းချမှုရှိစေရေးနှင့် အဆိုပါစားအုန်း ဆီများအား စားသုံးသူပြည်သူများထံသို့ အပြည့်အဝရောက်ရှိစေရေး၊ ဈေးကစားရန်ရည်ရွယ်ချက်ဖြင့် သိုလှောင်ထားမှုမရှိစေရေး၊ စားသုံးသူလက်ဝယ်သို့ အမှန်တကယ် တိုက်ရိုက်ရောက်ရှိစေရေး၊ ဌာနမှ သတ်မှတ်ထုတ်ပြန်ထားသည့် အမိန့်နှင့်ညွှန်ကြားချက်များနှင့်အညီ လိုက်နာရောင်းချစေရေးတို့အတွက် ကွင်းဆင်းကြီးကြပ်မှုများ ဆောင်ရွက်ခဲ့ကြောင်းနှင့် စားအုန်းဆီရောင်းချပေးနေမှုများအား အစဉ်တစိုက်ကြီးကြပ်စိစစ်မှုများ ဆောင်ရွက်လျက်ရှိကြောင်း သိရသည်။

DOCA(မန္တလေး)

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ၏လမ်းညွှန်မှုဖြင့် မိတ္ထီလာမြို့နယ်တာဝန်ခံ ဒေါ်စိမ်းစိမ်းထွေး(ဦးစီးမှူး)နှင့် ဝန်ထမ်းများသည် ဦးစားပေးရွှေးချယ်ထားသည့်   ကုန်စည်၊ ဝန်ဆောင်မှုများအား ဈေးကွက်စောင့်ကြည့်စစ်ဆေးခြင်း အနေဖြင့် အစားအသောက်ရောင်းချသည့် ဝန်ဆောင်မှုဖြစ်သော စားသောက်ဆိုင်များ၊ အစားအသောက် ဝန်ဆောင်မှုပေးသည့်လုပ်ငန်းများအား အထွေထွေအုပ်ချုပ်ရေးဦးစီးဌာန၊ မြို့နယ်ပြည်သူ့ကျန်မာရေး ဦးစီးဌာနနှင့် မြို့နယ်စည်ပင်သာယာရေးအဖွဲ့တို့နှင့်ပူပေါင်း၍ မိတ္ထီလာမြို့နယ်အတွင်း မင်းမြန်မာစား သောက်ဆိုင်အား ၂၀၂၆ ခုနှစ်၊ ဇူလိုင်(၉)  ရက်နေ့တွင်ကွင်းဆင်း၍ လုပ်ငန်းရှင်နှင့်တွေ့ဆုံခဲ့ကြောင်း သိရှိ ရသည်။

          ထိုသို့ကွင်းဆင်းစစ်ဆေးရာတွင် ပြုပြင်ရောင်းချမှုတွင်သန့်ရှင်းသပ်ရပ်မှုရှိ/မရှိ၊ အစားအသောက် များ သန့်ရှင်းလတ်ဆက်မှု ရှိ/မရှိ၊ဝန်ဆောင်မှုပေးသူများ တစ်ကိုယ်ရည် သန့်ရှင်းမှု ရှိ/မရှိပေးအပ်သည့် ဝန်ဆောင်မှုနှင့်စပ်လျဉ်း၍ စားသုံးသူများအား လုံလောက်သည့်သတင်း အချက်အလက်များကို အသိပေးခြင်းရှိ/မရှိ၊ ဝန်ဆောင်မှုပေးအပ်သည့် အဖိုးအခမည်မျှ ကောက်ခံသွားမည်ကို ကြိုတင်အသိပေး ဖော်ပြထားခြင်းရှိ/မရှိ၊ ဝန်ဆောင်မှုပေးအပ်သည့် အဖိုးအခ ကောက်ခံခြင်းရှိ/မရှိ၊ ဈေးနှုင်း (Menu) ကဒ် ထားမှုရှိ/မရှိ၊ လုပ်သားများ ဆေးစစ်ထားမှုရှိ/မရှိ၊ ကုန်ကြမ်းများသန့်ရှင်းလတ်ဆတ်မှုနှင့် ဘေးအန္တ ရာယ်ကင်းရှင်းမှုရှိ/မရှိ၊ အသား၊ငါးသိုလှောင်တဲ့ အခြေအနေ (ရေခဲသေတ္တာ၊ စားဖိုဆောင်စသဖြင့်) သန့်ရှင်သပ်ရပ်မှုရှိ/မရှိ စစ်ဆေးခဲ့ကြောင်း သိရှိရသည်။

DOCA(မန္တလေး)

                  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်း ဒေသကြီးဦးစီးမှူးရုံးတွင် ၇.၇.၂၀၂၆ ရက် အင်္ဂါနေ့ နေ့လည်(၁၄:၀၀)နာရီအချိန်တွင်  သတင်းနှင့် ဆောင်းပါးရေးသားမှုဆုချီးမြှင့်ခြင်း အခမ်းအနားကျင်းပခဲ့ပါသည်။    အဆိုပါဆုပေးပွဲတွင် မန္တလေးတိုင်းဒေသကြီး ဦးစီးမှူး၊ဦးဇေယျာဆွေမှ နှုတ်ခွန်းဆက်အမှာစကားပြောကြားပြီးနောက် ယနေ့ကျင်းပသည့်ဆုပေးပွဲမှာ   ၂၀၂၅ ခုနှစ်နိုဝင်ဘာလမှစ၍ ၂၀၂၆ ခုနှစ်ဧပြီလအထိ တိုင်းဦးစီးမှူးရုံး၊ ကျောက်ဆည်ခရိုင်၊ မြင်းခြံခရိုင်နှင့် မိတ္ထီလာခရိုင်ဦးစီးမှူးရုံးရှိ အရာထမ်းနှင့်အမှုထမ်းများမှ စားသုံးသူရေးရာဦးစီးဌာန၏ Website  www.doca.gov.mm  ၊ Commerce Journal နှင့် နိုင်ငံပိုင် သတင်းစာများတွင် သတင်းနှင့် ဆောင်းပါးများ ရေးသားပါဝင်မှုများအား ဆုပေးသည့် အခမ်းအနား ဖြစ်ပြီး၊ မန္တလေးတိုင်းဒေသကြီးဦးစီးမှူးအဖြစ် တာဝန်ယူသည့်ကာလမှစ၍ တတိယအကြိမ်မြောက် ဆုပေးသည့်အခမ်းအနားဖြစ်ပါကြောင်း၊သတင်းရေးသားရာတွင် စေတနာထား၍ ရေးသားခြင်းဖြင့် အချင်းချင်းအပြန်အလှန်ယုံကြည်မှု၊ ပူးပေါင်းဆောင်ရွက်မှု၊ တစ်ဦးစေတနာ၊  တစ်ဦးမေတ္တာခံယူမှု၊ စိတ်ဖိစီးမှုနည်း၍ လုပ်ငန်းစွမ်းဆောင်ရည်မြှင့်မားလာစေပါကြောင်း၊  ဌာန၏နာမည်ဂုဏ်သတင်း ကောင်းများဖန်တီးဆောင်ရွက်သွားကြရန်နှင့် သတင်းရေးသားရာတွင် AI Application တွင်လည်း ရှာဖွေ၍ အချက်အလက်များတိတိကျကျဖြင့် သိချင်သည်များမေး၍ကိုးကားနိုင်သည့်အချက်အလက် များရယူနိုင်ပါကြောင်း ပြောကြားပါ သည်။  ဆက်လက်၍ တိုင်းဒေသကြီးဦးစီးမှူး ဦးဇေယျာဆွေမှ သတင်းပါဝင်မှုအများဆုံးဖြစ်သည့် မြင်းခြံခရိုင်ဦးစီးမှူးရုံးမှလက်ထောက်ညွှန်ကြားရေးမှူးဦးသန်းစိုး အား ပထမဆုချီးမြှင့်ခြင်း၊ တစ်ဦးချင်းသတင်းအများဆုံး ရေးသားပါဝင်သည့် မြင်းခြံခရိုင်ဦးစီးမှူးရုံး မှ ဒု-ဦးစီးမှူးဒေါ်သူဇာမိုးအား ပထမဆုချီးမြင့်ခြင်း၊ ဒုတိယတိုင်းဒေသကြီးဦးစီးမှူး၊ ဦးရဲလင်းထက်မှ ခရိုင်အလိုက်ဒုတိယသတင်းအများဆုံး ရေးသားသည့် မိတ္ထီလာခရိုင်ဦးစီးမှူး ဦးဇော်မင်းအား ဆုချီးမြှင့်ခြင်းနှင့် တစ်ဦးချင်းသတင်းရေးသားပါဝင်မှုအနေဖြင့်    ဒုတိယအများဆုံးဖြစ်သည့် မန္တလေးတိုင်းဒေသကြီးဦးစီးမှူးရုံး မှ ဦးစီးအရာရှိ ဒေါ်ယဉ်ယဉ်ရွှေ အား ဆုချီးမြှင့်ခြင်း၊ လက် ထောက်ညွှန်ကြားရေးမှူး ဒေါ်သင်းသင်းအိမှခရိုင်အလိုက် တတိယသတင်းအများဆုံး ရေးသား ပါဝင်သည့် ကျောက်ဆည်ခရိုင်ဦးစီးမှူး၊ ဦးမောင်ထူးအား တတိယဆုချီးမြှင့်ခြင်းနှင့် တစ်ဦးချင်း ရေးသားမှု တတိယအများဆုံးဖြစ်သည့် မြင်းခြံခရိုင်ဦးစီးမှူးရုံး မှ ဒေါ်သင်းသင်းဆွေအားလည်း ကောင်း၊သတင်းနှင့်ဆောင်းပါးအထူးဆုအဖြစ် ညောင်ဦးခရိုင် ဦးစီးမှူးရုံးမှ ဦးစီးအရာရှိဦးတင်မျိုးခိုင် အား လည်းကောင်း အသီးသီးပေးအပ်ခဲ့ကြောင်း သိရှိရပါ သည်။နိဂုံးချုပ်အနေဖြင့် တိုင်းဒေသကြီး ဦးစီးမှူး ဦးဇေယျာဆွေမှ သတင်းများအား အရေအတွက် သာမက အရည်အသွေး ကောင်းသော သတင်းများ ရေးသားကြဖို့ တိုက်တွန်းပြောကြားခဲ့ပြီး၊အဆိုပါဆုပေးပွဲအခမ်းအနား တွင်မန္တလေး တိုင်းဒေသကြီးဦးစီးမှူးရုံးရှိအရာထမ် နှင့် အမှုထမ်း များ၊ ကျောက်ဆည်ခရိုင်၊မိတ္ထီလာ ခရိုင်၊ မြင်းခြံခရိုင်ဦးစီးမှူးများမှ  In Person ဖြင့် တက် ရောက်ခဲ့ပြီး၊ စုစုပေါင်း(၅၅) ဦး တက်ရောက်ခဲ့ကြောင်း သိရှိရပါသည်။

DOCa(မန္တလေး)

        ၂၀၂၆ ခုနှစ်၊ ဇူလိုင်လ (၁၅) ရက်နေ့ နံနက် (၁၁:၀၀) နာရီအချိန်တွင် ညောင်တုန်းမြို့နယ်၊ ဆားမလောက်ကျေးရွာအုပ်စု၊ အခြေခံပညာအထက်တန်းကျောင်း(ဆားမလောက်) မူလတန်းကျောင်း၌ ကျောင်းမုန့်ဈေးတန်းအား မြို့နယ်ကျောင်းမုန့်ဈေးတန်းစိစစ်ရေးအဖွဲ့နှင့် ပူးပေါင်း၍ ကွင်းဆင်းစိစစ် ဆောင်ရွက်ခဲ့ကြောင်း သိရသည်။

        ကွင်းဆင်းစစ်ဆေးရာတွင် ဒေါ်ချိုမီဇင် ဒုဦးစီးမှူးက ကျောင်းမုန့်ဈေးတန်း၌ ရောင်းချလျက်ရှိသော အစားအသောက်နှင့် မုန့်ပစ္စည်းများ၏ ကုန်အညွှန်းအမှတ်အသားများ ပြည့်စုံစွာဖော်ပြထားမှု၊ ထုတ်လုပ်သည့်ရက်စွဲ၊ သက်တမ်းကုန်ဆုံးရက်၊ ထုတ်လုပ်/တင်သွင်းဖြန့်ဖြူးသူ၏ အမည်နှင့် လိပ်စာဖော်ပြထားမှု၊ ထုပ်ပိုးမှုအခြေအနေနှင့် စားသုံးရန် သင့်လျော်မှုတို့ကို စနစ်တကျ စိစစ်စစ်ဆေးခဲ့ကြောင်း သိရသည်။

       ထို့ပြင် ကျောင်းမုန့်ဈေးတန်း ဆိုင်ရှင်များအား စားသုံးသူကာကွယ်ရေးဥပဒေနှင့်အညီ ဘေးအန္တရာယ်ကင်းရှင်း၍ အရည်အသွေးပြည့်မီသော အစားအသောက်များကိုသာရောင်းချရန်၊ သက်တမ်းလွန်ကုန်ပစ္စည်းများနှင့် အရည်အသွေးမပြည့်မီသော ကုန်ပစ္စည်းများကို ရောင်းချခြင်း မပြုရန်၊ ကုန်အညွှန်းအမှတ်အသား ပြည့်စုံစွာဖော်ပြထားသည့် ကုန်ပစ္စည်းများကိုသာ ရွေးချယ်ရောင်းချရန် အသိပညာပေးဆွေးနွေးမှာကြားခဲ့ကြောင်း သိရသည်။

     အဆိုပါ ကွင်းဆင်းစိစစ်ဆောင်ရွက်မှုသည် ကျောင်းသား၊ ကျောင်းသူများ ဘေးအန္တရာယ်ကင်းရှင်း၍ အရည်အသွေးပြည့်မီသော အစားအသောက်များကို စိတ်ချလက်ချ စားသုံးနိုင်စေရန်နှင့် ကျောင်းမုန့်ဈေးတန်းများ စနစ်တကျရောင်းချနိုင်စေရန် ရည်ရွယ်၍ ပူးပေါင်းဆောင်ရွက်ခဲ့ခြင်းဖြစ်ကြောင်း သိရှိရပါသည်။

DOCA(ဧရာဝတီ)

      ၂၀၂၆ ခုနှစ်၊ ဇူလိုင်လ (၁၄) ရက်နေ့ နံနက် (၀၉:၀၀) နာရီအချိန်တွင် ညောင်တုန်းမြို့နယ်၊ ဆားမလောက် ကျေးရွာအုပ်စု၊ အခြေခံပညာအထက်တန်းကျောင်း(ဆားမလောက်) အ.ထ.က (၂)၌ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်စားသုံးသူရေးရာဦးစီးဌာနနှင့် မြို့နယ်မီးသတ်ဦးစီးဌာနတို့ ပူးပေါင်း၍ လူငယ်ရေးရာ အသိပညာပေးဟောပြောပွဲကို ကျင်းပပြုလုပ်ခဲ့ကြောင်း သိရသည်။

     ဟောပြောပွဲတွင် ဌာနဆိုင်ရာ တာဝန်ရှိသူများက လူငယ်များ၏ အကျင့်စာရိတ္တ ကောင်းမွန်ရေး၊ စည်းကမ်းလိုက်နာရေး၊ စားသုံးသူကာကွယ်ရေးဆိုင်ရာ အသိပညာများ၊ စားသုံးသူကာကွယ်ရေးဥပဒေသည် ဝယ်ယူသူများ၏ ဘေးကင်းလုံခြုံရေး၊ မှန်ကန်သော သတင်းအချက်အလက်ရရှိရေးနှင့် နစ်နာမှုများ တောင်းခံနိုင်ရေး စသည့် အဓိကအခွင့်အရေး ၈ ချက်ကို ကာကွယ်ပေးသောဥပဒေဖြစ်ကြောင်း၊ စီးပွားရေးလုပ်ငန်းရှင်များအနေဖြင့်လည်း ကုန်စည်/ဝန်ဆောင်မှုများနှင့်ပတ်သက်၍ မှန်ကန်တိကျသော အချက်အလက်များကို ပြည့်စုံစွာ ဖော်ပြရန် ဘေးအန္တရာယ်ကင်းရှင်းသော ကုန်စည်နှင့် ဝန်ဆောင်မှုများကို ဈေးကွက်အတွင်း ထုတ်လုပ်ဖြန့်ဖြူးနိုင်ရန်တို့ကို အသိပညာပေးပြီး၊ မီးသတ်တပ်ဖွဲ့မှ မီးဘေးအန္တရာယ် ကြိုတင်ကာကွယ်ရေးနှင့် အရေးပေါ်အခြေအနေများတွင် လိုက်နာဆောင်ရွက်ရမည့် နည်းလမ်းများကို အသိပညာပေး ဟောပြောဆွေးနွေးခဲ့ကြောင်း သိရသည်။

       ထို့ပြင် ကျောင်းသား၊ ကျောင်းသူများက သိရှိလိုသည်များကို မေးမြန်းဆွေးနွေးခဲ့ကြပြီး သက်ဆိုင်ရာဌာနများမှ ပြည့်စုံစွာ ပြန်လည်ရှင်းလင်းဖြေကြားပေးခဲ့ကြောင်း သိရသည်။

       အဆိုပါ လူငယ်ရေးရာ အသိပညာပေးဟောပြောပွဲသို့ ကျောင်းသား၊ ကျောင်းသူ (၃၅၀)ဦး တက်ရောက်ခဲ့ကြပြီး လူငယ်များအနေဖြင့် ဗဟုသုတနှင့် အသိပညာများ တိုးပွားစေရန် ရည်ရွယ်၍ ပူးပေါင်းကျင်းပခဲ့ခြင်းဖြစ်ကြောင်း သိရှိရပါသည်။

DOCA(ဧရာဝတီ)