ပြည်တွင်းကုန်သွယ်မှုသတင်း

        Diamond Dragon Co.,Ltd ၏ တောင်ငူမြို့ ကိုယ်စားလှယ်ဖြစ်သော အောင်စားသုံးဆီ အရောင်းဆိုင်သည် တောင်ငူခရိုင်အတွင်းမှ အခြေခံလူတန်းစားများအပြင် ဌာနဆိုင်ရာဝန်ထမ်းများပါ စားသုံးဆီများအား သက်သာသောဈေးနှုန်းဖြင့် ဝယ်ယူရရှိနိုင်ရေးအတွက် Yerthetpan အမှတ်တံဆိပ် အဆင့်မြင့်စားအုန်းဆီ(အလေးချိန် ၅၀ ကျပ်သားဘူး)များကို ရောင်းချပေးလျက် ရှိပါသည်။

         ဒီဇင်ဘာလ ၁ ရက်နေ့တွင် တောင်ငူမြို့ရှိ အခြေခံပညာမူလတန်းလွန်ကျောင်းများမှ ဆရာ/ ဆရာမများနှင့် အမှတ် ၂၂ ရပ်ကွက်၊ မင်းကြီးညိုရှိ အခြေခံလူတန်းစားများအား Yerthetpan အမှတ်တံဆိပ် အဆင့်မြင့်စားအုန်းဆီများအား တစ်ပိဿာလျှင် ၅၄၀၀ ကျပ် နှုန်းဖြင့် မော်တော်ယာဉ်ဖြင့် လှည့်လည်ရောင်းချပေးလျက်ရှိရာ တောင်ငူမြို့နယ်တာဝန်ခံ ဦးမြင့်သူက ကြီးကြပ်ကူညီဆောင်ရွက်ပေးခဲ့ပါသည်။

        Diamond Dragon Co.,Ltd သည် ဇူလိုင်လမှစ၍ တောင်ငူခရိုင်အတွင်း Yerthetpan အမှတ်တံဆိပ် အဆင့်မြင့်စားအုန်းဆီ(အလေးချိန် ၅၀ ကျပ်သားဘူး)များကို သက်သာသောဈေးနှုန်းဖြင့် ရောင်းချပေးလျက်ရှိရာ ဒီဇင်ဘာလ ၁ ရက်နေ့အထိ အဆင့်မြင့်စားအုန်းဆီ ၅၀၅၁၂ ပိဿာ (၈၂.၅၀ တန်) ရောင်းချပေးခဲ့ပြီးဖြစ်ကြောင်း သိရှိရပါသည်။

DOCA(ပဲခူး)

         အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ နိုဝင်ဘာလ( ၃၀ )ရက်နေ့မှ ဒီဇင်ဘာလ( ၆ )ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်( ၁ ပိဿာ )လျှင် ကျပ် ၁၂၀၀ မှ ၂၀၀၀ အတွင်း၊ ဂေါ်ဖီထုပ်( ၁ ထုပ် )လျှင် ကျပ် ၄၀၀ မှ ၈၀၀ အတွင်း၊ ပန်းဂေါ်ဖီ( ၁ ထုပ် )လျှင် ကျပ် ၄၀၀ မှ ၈၀၀ အတွင်း၊ အာလူး( ၁ ပိဿာ )လျှင် ကျပ် ၁၈၀၀ မှ ၂၂၀၀ အတွင်း၊ မုန့်လာဥနီ( ၁ ပိဿာ )လျှင် ကျပ် ၁၅၀၀ မှ ၂၂၀၀ အတွင်း ရွှေဖရုံသီး( ၁ လုံး )လျှင် ကျပ် ၈၀၀ မှ ၅၀၀၀ အတွင်း၊ ဘူးသီး( ၁ လုံး )လျှင် ကျပ် ၇၀၀ မှ ၁၃၀၀ အတွင်း၊ မုန်ညှင်းထုပ်( ၁ ပိဿာ )လျှင် ကျပ် ၁၀၀၀ မှ ၁၅၀၀ အတွင်း၊ ကြက်သွန်နီ( ဆိပ်ဖြူ ) ( ၁ ပိဿာ )လျှင် ကျပ် ၃၂၀၀ မှ ၄၅၀၀ အတွင်း၊ ကြက်သွန်ဖြူ(ရှမ်း)( ၁ ပိဿာ )လျှင်  ကျပ် ၃၀၀၀ မှ ၄၄၀၀ အတွင်း၊ ကြက်သွန်ဖြူ (ကြူကုတ်) (၁ ပိဿာ )လျှင် ကျပ် ၃၂၀၀ မှ ၃၅၀၀ အတွင်း၊ ချင်း( ၁ ပိဿာ )လျှင် ကျပ် ၁၈၀၀ မှ ၂၀၀၀ အတွင်း၊ ဆလပ်ရွက် ( ၁ စီး ) လျှင် ကျပ် ၁၅၀ မှ ၂၀၀ အတွင်း၊ ချဉ်ပေါင်ရွက်( ၁ စီး )လျှင် ကျပ် ၆၅ မှ ၁၀၀ အတွင်း၊ ခရမ်းသီး  (ရှည်)( ၁ ပိဿာ )လျှင် ကျပ် ၈၀၀ မှ ၁၅၀၀ အတွင်း၊ သံပရာသီး( ၁ လုံး )လျှင် ကျပ် ၅၀ မှ ၂၀၀ အတွင်း၊ ငရုတ်သီးစိမ်း (ကျောက်စိမ်း) ( ၁ ပိဿာ )လျှင် ကျပ် ၁၈၀၀ မှ ၂၈၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၂၀၀၀ မှ ၇၀၀၀ အတွင်းဖြစ်ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခု ရက်သတ္တပတ်အတွင်း သံပုရာသီးအလုံးပေါင်း( ၁၉၈၁၀၀ )ကျော်၊ ခရမ်းသီး(ရှည်) ( ပိဿာ )( ၁၁၆၀၅ ) ကျော်၊ ဘူးသီးအလုံးပေါင်း ( ၄၂၇၀ )ကျော်၊ ရွှေဖရုံသီးအလုံးပေါင်း( ၆၀၂၀ )ကျော်၊ ဂေါ်ဖီထုပ်ပေါင်း ( ၅၀၇၀၀ )ကျော်၊ ပန်းဂေါ်ဖီထုပ်ပေါင်း ( ၁၉၂၀၀ )ကျော်၊ မုန်ညှင်းထုပ်(ပိဿာ)ပေါင်း ( ၁၃၄၉၀ )ကျော်၊ ဖရဲသီးလုံးပေါင်း ( ၃၀၀၀၀ )ကျော်  အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

     ပဲခူးတိုင်းဒေသကြီး၊ ပြည်ဈေးကွက်သို့ ယခုအပတ်တွင် ဆောင်းနှမ်းများ စတင်ဝင်ရောက်နေကြောင်း တွေ့ရှိရပါသည်။ ဝင်ရောက်လာသောဒေသများမှာ ပေါက်ခေါင်း၊ နတ်တလင်းနှင့် ကံမဘက်မှ နေ့စဉ် တစ်နေ့လျှင် အိတ် ၂၀၀/၃၀၀ခန့်ဝင်ရောက်လျက်ရှိပြီး မန္တလေးဝယ်လက်များက ဝယ်ယူမှုရှိသဖြင့် ဝင်သလောက် အရောင်းအဝယ်ဖြစ်လျက်ရှိပါသည်။ ဆောင်းနှမ်းအသစ်များဝင်ရောက်မှုရှိပြီး အဝယ်လိုက်နေသော်လည်း နှမ်းနီနှင့် နှမ်းနက်ဈေးမှာ ယခင်အပတ်ကထက်ကျဆင်းလာပြီး စမုံနက် နှမ်းမှာ ယခင် အပတ်ကအတိုင်း ဈေးငြိမ်နေကြောင်း သိရှိရပါသည်။ ယခု နိုဝင်ဘာလကုန်အပတ် နှမ်းနီဈေးများမှာ (၃)တင်းတစ်အိတ်လျှင် ၂၁၀၀၀၀ကျပ်ဖြင့် မြို့တွင်းဆီသမားများကအဝယ်ရှိပြီး၊ ယခင်အပတ်တွင် နှမ်းနီ(၃)တင်းတစ်အိတ်လျှင် ၂၂၀၀၀၀ကျပ်ဖြစ်ခဲ့၍ ယခင်အပတ်ထက်စာလျင် (၁၀၀၀၀)ကျပ်ခန့် ဈေးလျော့နည်းလာခဲ့ကြောင်း သိရှိရပါသည်။  ထို့အတူ နှမ်းနက်ဈေးမှာလည်း ယခုအပတ်တွင်(၃)တင်း တစ်အိတ်လျှင် ၂၃၀၀၀၀ကျပ်ဈေးဖြင့် မန္တလေးဝယ်လက်များက ဝယ်ယူမှုရှိ၍ အရောင်းအဝယ်ဖြစ်ပြီး ယခင်အပတ်တွင် (၃)တင်းတစ်အိတ်လျှင် ၂၅၀၀၀၀ကျပ်ဖြင့် ယခင် အပတ်ထက်စာလျှင် တစ်အိတ်လျှင် ၂၀၀၀၀ကျပ်ခန့် ဈေးကျလာကြောင်း တွေ့ရှိရပါသည်။ စမုံနက် နှမ်းဈေးမှာ (၃)တင်းတစ်အိတ်လျှင် ၂၇၀၀၀၀ကျပ်ဈေးဖြင့် ယခင်အပတ်ကအတိုင်း ဈေးငြိမ်နေကြောင်း တွေ့ရှိရပါသည်။

DOCA(ပဲခူး)

       ယခုကာလတွင် ပြည်မြို့ဒေသ ပတ်ဝန်းကျင်ရွာများဖြစ်‌သော မှော်ဇာ၊ တောင်လုံးညို၊ ကုန်းရိုး၊ ရွာမ၊ မထော၊ တွင်းဗြည်း၊ ခွေးရဲ စသည့်ရွာများတွင် ကြက်သွန်နီမျိုးစေ့များ ဝယ်ယူကာ ပျိုးထောင်ခြင်းများပြုလုပ်ပြီး ရက်(၂၀)ကြာလျှင် စိုက်ပျိုးကြပါသည်။ မျိုးစေ့ နို့ဆီဗူးတစ်ဗူးလျှင် ၅၅၀၀ကျပ်ဈေးရှိပြီး (၁)ဧကလျှင် မျိုးစေ့(၁၀)ဘူးခန့် စိုက်ပျိုးကြောင်း သိရှိရပါသည်။ စိုက်ပျိုးပြီး ၃လ နှင့် ၃လခွဲကြာလျှင် ထွက်ပေါ်ပြီး စိုက်ခင်းအထိ ပွဲစားဝယ်လက်များ လာရောက်ဝယ်ယူကြောင်း သိရှိရပါသည်။ ပြည်ဒေသပတ်ဝန်းကျင်တွင် ကြက်သွန်နီစိုက်ဧက (၁၀၀)ပတ်လည်ခန့်ရှိပြီး မတ်လ နှင့် ဧပြီလများတွင် လှိုင်လှိုင်ထွက်ပေါ်လျက်ရှိကြောင်းလည်း သိရှိရပါသည်။

        ပြည်ဈေးကွက်၏ ကြက်သွန်နီများမှာ ကြက်သွန်နီ အဟောင်းများ ဝင်ရောက်မှု မရှိတော့ဘဲ ပခုက္ကူနှင့် ကျောက်ပန်းတောင်းဘက်တို့မှ ကြက်သွန်နီအသစ်များသာ ဝင်ရောက်မှုရှိနေပြီး (၂၅) ပိဿာဝင်အိတ် ၄၀၀ခန့် ဝင်ရောက်မှုရှိနေကြောင်း သိရှိရပါသည်။ အသစ်မှာ ဝင်ရောက်မှုရှိသော် လည်း အဝယ်မလိုက်ဘဲ လက်ကျန်အဟောင်းများကိုသာ ပိုမိုဝယ်ယူမှုရှိနေပြီး ဈေးနှုန်းမှာ အသစ်တစ်ပိဿာလျှင် လက်လီ/လက်ကား ၃၇၀၀-၄၀၀၀ကျပ်ဈေးရှိကာ အဟောင်းတစ်ပိဿာလျှင် လက်လီ/ လက်ကား ၄၂၀၀-၄၅၀၀ကျပ်ဈေးတို့ဖြင့် ရောင်းဝယ်လျက်ရှိနေကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ဈေးကွက်တွင် ကြက်သွန်ဖြူ(ရှမ်းစ) လက်ကား(ပွဲရုံ)ဈေး တစ်ပိဿာလျှင် ကျပ် ၂၅၀၀-၂၈၀၀-၃၂၀၀-၃၆၀၀၊ လက်လီဈေး တစ်ပိဿာလျှင် ကျပ် ၃၈၀၀-၄၀၀၀၊ (ကြူကုတ်) လက်ကား (ပွဲရုံ)ဈေး တစ်ပိဿာလျှင် ကျပ် ၃၆၀၀-၃၈၀၀၊ လက်လီတစ်ပိဿာလျှင် ၃၈၀၀-၄၀၀၀ကျပ်ဈေးဖြင့် ဈေးငြိမ်နေကြောင်း သိရှိရပါသည်။ ဈေးကွက်သို့ ရှမ်းပြည်နယ် တောင်ကြီး၊ အင်းလေး၊ ပင်းတယမှ ရှမ်းကြက်သွန်ဖြူများ နေ့စဉ်အဝင်ရှိသလို မန္တလေးဘက်မှလည်း ကြူကုတ်များ နေ့စဉ်အဝင် ရှိပါသည်။ တစ်နေ့လျှင် ကြက်သွန်ဖြူ ပိဿာချိန် ၂၀၀၀ မှ၃၀၀၀အတွင်း အဝင်ရှိပြီး ပုံမှန်အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(ပဲခူး)