ပြည်တွင်းကုန်သွယ်မှုသတင်း

             ပဲခူးတိုင်းဒေသကြီး ၊ ပဲခူးခရိုင် ၊ သနပ်ပင်မြို့နယ်အတွင်းရှိ ကျေးလက်ဒေသများမှ ထွက်ရှိသော ဧည့်မထစပါးအမျိုးအစားများကို ရွှေဝါရောင်ကုမ္ပဏီမှ ဖိလစ်ပိုင်နိုင်ငံသို့ NIMBA အမှတ်တံဆိပ်ဖြင့် တင်ပို့ရန် သီးသန့်ဝယ်ယူ၍ သိုလှောင်လျက်ရှိပြီး စပါးများကို သနပ်ပင်မြို့ရှိ ချမ်းအေးဆန်စက် ၊ ရွှေနဒီဆန်စက်တို့မှ အရောင်းအဝယ်စာချုပ်များ ချုပ်ဆို၍ ကြိတ်ခွဲတင်ပို့လျက်ရှိကြောင်း သိရှိရပါသည်။ ရွှေဝါရောင်ကုမ္ပဏီမှ နိုင်ငံခြားသို့ တင်ပို့မည့် Export ဆန် ဧည့်မထ ၅% စူပါ (၅) ဆန် (၅၀)Kg အိတ်ရေ ၃၀၀၀၀ အား (၁) အိတ်လျှင် (၃၀၀၀၀) ကျပ်နှုန်းဖြင့် ရန်ကုန်သတ်မှတ်ထားသည့် နေရာအရောက်ပို့ရန် သနပ်ပင်မြို့ ၊ လမ်းမတော် ချမ်းအေးဆန်စက်ပိုင်ရှင် ဦးမြင့်ဇော်နှင့် ယခုလ ဧပြီလဆန်းပိုင်းတွင် အရောင်းအဝယ်စာချုပ်ချုပ်ဆိုထားကြပြီး၊ စက်ပိုင်ရှင်ဦးမြင့်ဇော်မှ ယခုလ ဧပြီလ ဆန်းပိုင်းမှစ၍ ဧပြီလကုန်အတွင်း ဆန်တစ်အိတ်လျှင် သယ်ယူပို့ဆောင်ခ (၇၀၀) ကျပ်ကျခံပြီး သတ်မှတ်ထားသည့် နေရာအရောက် အပြီးတင်ပို့ရမည်ဖြစ်ကြောင်း သိရှိရပါသည်။

DOCA(ပဲခူး)

           မြန်မာလူမျိုးတို့နေ့စဉ်စားသုံးနေသည့် မုန့်ပဲသရေစာတွင် မုန့်ဟင်းခါးသည် အဓိကအစား အစာတစ်ခုအဖြစ် ပါဝင်ပါသည်။ ကျေးလက်၊ မြို့ပြမကျန် နံနက်ခင်းအစားအစာအဖြစ် စားသုံးကြသဖြင့် ယခုအခါတွင် မုန်ဟင်းခါးဖတ်လုပ်ငန်းသည် အိမ်တွင်းစက်မှုလုပ်ငန်းအဖြစ်သို့ ရောက်ရှိ လာသည်ကို တွေ့ရှိရပါသည်။

        ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် မုန်ဟင်းခါးဖတ်ပြုလုပ်သူ လုပ်ငန်းရှင်(၂၁)ဦးရှိပြီး လုပ်သားအရေအတွက်မှာ (၁၁၀)ဦးရှိပါသည်။ စားသုံးသူရေးရာဦးစီးဌာန ၊ ပြည်မြို့နယ် တာဝန်ခံ ဦးထွန်းနိုင်လင်းနှင့်အဖွဲ့သည် (၇.၄.၂၀၂၂)နေ့ နံနက် (၁၀:၃၀) အချိန်တွင် ဝင်းစတား မုန့်ဟင်းခါး စက်သို့သွားရောက်ပြီး ပိုင်ရှင်ဦးသောင်းတင်နှင့်တွေ့ဆုံ၍ မုန့်ဟင်းခါးဖတ်ပြုလုပ်ပုံနှင့် ဈေးနှုန်းဈေးကွက်အခြေအနေများအား ကွင်းဆင်းလေ့လာခဲ့ပါသည်။ မုန့်ဟင်းခါးဖတ် ပြုလုပ်ရန်အတွက် ဆန်(သို့မဟုတ်) ဆန်ကွဲကို ပြည်မြို့ရှိဆန်ပွဲရုံများမှ ဝယ်ယူရပါသည်။ ကုန်ကြမ်းဆန် တစ်အိတ်လျှင် မုန့်ဟင်းခါးဖတ် (၆)ပိဿာထွက်ရှိပါသည်။ မုန့်ဟင်းခါးဖတ်ပြုလုပ်ရာတွင် လုပ်သားအရေအတွက် (၅)ဦးရှိပြီး တစ်ဦးလျှင် တစ်ရက်လုပ်အားခငွေ (၅၀၀၀)ကျပ် ပေးချေရပါသည်။ တစ်ရက်လျှင် မုန်ဖတ်ထုတ်လုပ်နိုင်မှုမှာ ၁၅၀/၂၀၀ ပိဿာထိထုတ်လုပ်နိုင်ပြီး ထုတ်လုပ်မှု ကုန်ကျ စရိတ်အနေဖြင့် ၁၅၀၀၀၀ကျပ်ခန့် ကုန်ကျသည်ဟုသိရပါသည်။ ထွက်ရှိလာသောမုန့်ဟင်းခါးဖတ်များကို ပြည်မြို့ ပေါ်ရှိ စည်ပင်သာယာဈေးများနှင့် မုန့်ဟင်းခါးဆိုင်များသို့ တစ်ပိဿာလျှင် ၉၀၀ ကျပ်ဖြင့် ရောင်းချပြီး မုန့်ဖတ်တစ်ပိဿာလျှင် အသားတင်အကျိုးအမြတ်ရရှိမှုမှာ ၂၅၀ကျပ်ခန့် ရရှိသဖြင့် တစ်ရက်လျှင် လုပ်ငန်းအကျိုးအမြတ်အနေဖြင့် ၃၀၀၀၀ကျပ်ခန့်ရရှိ၍ ထုတ်လုပ်သူအဖို့ တွက်ချေကိုက်သည့် လုပ်ငန်းဖြစ်သည်ဟု သိရှိရပါသည်။

      မုန့်ဟင်းခါးဖတ်ကို ယခင်ကမိရိုးဖလာပြုလုပ်ကြရာမှ အိမ်တွင်းစက်မှုလုပ်ငန်းအဖြစ် အသွင်ပြောင်းပြီး အရင်းအနှီးများများဖြင့် လုပ်ငန်းများကို တိုးချဲ့လုပ်ကိုင်လာနိုင်မည်ဆိုပါက အကျိုးအမြတ်များပိုမိုရရှိလာနိုင်မည်ဖြစ်ပါသည်။ ထို့အပြင် အလုပ်သမားများများဖြင့် လုပ်ငန်းများ တိုးတက်ထုတ်လုပ်လာနိုင်လျှင် ပတ်ဝန်းကျင်ရှိလူများကိုလည်း အလုပ်အကိုင်အခွင့်အလမ်းများ ဖန်တီးပေးနိုင်မည်ဖြစ်ကြောင်း သိရှိရပါသည်။

DOCA(ပဲခူး)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံဆီကုန်သည်များနှင့် ဆီလုပ်ငန်း ရှင်များအသင်းတို့ပူးပေါင်းစီစဉ်မှုဖြင့် စားသုံးသူပြည်သူများ သက်သာသောဈေးနှုန်းဖြင့်ဝယ်ယူရရှိနိုင်ရန် စားအုန်းဆီများအား သက်သာသောဈေးနှုန်းဖြင့်ဖြန့်ဖြူး ရောင်းချလျှက်ရှိပါသည်။ ပဲခူးတိုင်းဒေသကြီးအတွင်းရှိ မြို့နယ်ပေါင်း(၂၀)တွင် ပထမအကြိမ်အနေဖြင့် ၂၀၂၁ခုနှစ်၊ စက်တင်ဘာလ ၂၂ ရက်နေ့မှစတင်၍ သက်သာသောဈေးနှုန်းဖြင့် ရောင်းချခဲ့ရာ ပိဿာချိန် ၃၆၀၂၅၀ ကို တစ်ပိဿာလျှင် ၃၈၀၀-၄၄၅၀နှုန်းထားဖြင့်လည်းကောင်း၊ ၂၀၂၂ခုနှစ်၊ ဇန်နဝါရီလ ၁၁ ရက်နေ့တွင် ဒုတိယအကြိမ်အနေဖြင့်  ပိဿာချိန် ၆၆၀၀၀ကို တစ်ပိဿာလျှင်၄၄၄၀-၄၅၀၀နှုန်း ထားဖြင့်လည်းကောင်း၊ ၂၀၂၂ခုနှစ်၊ ဖေဖော်ဝါရီလ ၁၄ရက်နေ့တွင် တတိယအကြိမ်အနေဖြင့် ပိဿာချိန် ၃၈၅၀၀ကို တစ်ပိဿာလျှင် ၄၈၅၀-၄၉၀၀ နှုန်းထားဖြင့် လည်းကောင်း၊ ၂၀၂၂ခုနှစ်၊မတ်လ ၂၁ရက်နေ့တွင် စတုတ္ထအကြိမ်အနေဖြင့် ပိဿာချိန် ၃၃၀၀၀ကို တစ်ပိဿာလျှင် ၅၈၀၀ကျပ်နှုန်းဖြင့် တိုင်းဒေသကြီးအစိုးရအဖွဲ့၊ တိုင်းအထွေထွေအုပ်ချုပ်ရေးဦးစီးဌာန၊ တိုင်းရဲတပ်ဖွဲ့ရုံးနှင့် မြို့နယ်အထွေထွေအုပ်ချုပ်ရေးဦးစီးဌာနများ ဌာနဆိုင်ရာရုံး စုစုပေါင်း(၂၃)ဌာနအပါအဝင် စားသုံးသူပြည်သူများအား သက်သာသောဈေးနှုန်းဖြင့် ဖြန့်ဖြူးရောင်းချပေးခဲ့ပြီး ဖြစ်ပါသည်။ ပဲခူးတိုင်း‌ဒေသကြီးအတွင်း စားသုံးသူများကို အထူးဈေးနှုန်းဖြင့် စားအုန်းဆီပိဿာချိန်ပေါင်း  (၄၉၇၇၅၀) ပိဿာရောင်းချပေးပြီးကြောင်း သိရှိရပါသည်။

DOCA(ပဲခူး)

                ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံနှင့် တောင်ငူမြို့နယ်တာဝန်ခံတို့နှင့်အတူ ဧပြီလ ၄ ရက်နေ့ နံနက်ပိုင်းက မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ တောင်ငူခရိုင်အတွင်းရှိ စားသုံးသူ ပြည်သူများသို့ သက်သာသောနှုန်းထားဖြင့် စာအုန်းဆီရောင်းချနေမှုများကို ကြည့်ရှုစစ်ဆေးခဲ့ပါသည်။

              ခရိုင်ဦးစီးမှူးက ရောင်းချနေသော စားအုန်းဆီများ၏ အလေးချိန်နှင့်ဈေးနှုန်းမှန်ကန်ရေးကို ကြည့်ရှုစစ်ဆေးခဲ့ပြီး စားသုံးဆီဈေးနှုန်းတည်ငြိမ်ရေးအတွက် ရောင်းချပေးခြင်းဖြစ်ပါသဖြင့် သတ်မှတ်စည်းကမ်းများနှင့်အညီရောင်းချရန်၊ စားသုံးသူပြည်သူများ စိတ်ကျေနပ်မှုရှိစေရေးအတွက် ဆောင်ရွက်ပေးရန် မှာကြားခဲ့ပါသည်။

               တောင်ငူခရိုင်အတွင်း ဧပြီလပထမအပတ်တွင် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ စားအုန်းဆီ ၃၈၅၀ ပိဿာကို တစ်ပိဿာလျှင် ၅၉၀၀ ကျပ်နှုန်းဖြင့် ရောင်းချပေးကြောင်း သိရှိရပါသည်။

Bago(ပဲခူး)

        ပဲခူးတိုင်းဒေသကြီးတွင် စိုက်ပျိုးရေးကို အဓိကထားလုပ်ကိုင်ကြသော်လည်း ယခုအခါတွင် ဒေသတွင်း အသား၊ငါး စားသုံးမှုဖူလုံစေရန်နှင့် ပိုလျှံသည်များကို တိုင်းဒေသကြီးပြင်ပနှင့်  ပြည်ပနိုင်ငံများသို့ တင်ပို့ရန်ဆိုသော မွေးမြူရေးနှင့်ကုသရေးဦးစီးဌာန၏ ရည်မှန်းချက်နှင့်အညီ မွေးမြူရေးကို စီးပွားဖြစ် မွေးမြူခြင်းများ အပြင် မိသားစု တစ်နိုင်တစ်ပိုင်အပြင် စီးပွားဖြစ် မွေးမြူလာကြကြောင်း သိရှိရသည်။ မွေးမြူရေးတွင် ငါးမွေးမြူရေးအပြင် နွား၊ ကျွဲ၊ ဝက်၊ ဘဲ ၊ဆိတ်၊ ငုံးများစသည့် မွေးမြူရေးလုပ်ငန်းများ လုပ်ကိုင်လာကြကြောင်း သိရှိရသည်။ ပဲခူးတိုင်းဒေသကြီးအတွင်းရှိ မွေးမြူရေးလုပ်ငန်းများအကြောင်းကို မွေးမြူရေးနှင့်ကုသရေးဦးစီးဌာနမှ တာဝန်ရှိသူများအား သွားရောက်တွေ့ဆုံ မေးမြန်းခဲ့ပါသည်။

             ပဲခူးတိုင်းဒေသကြီးအတွင်း ၂၀၂၂ ဇန်နဝါရီလအထိ တိရစ္ဆာန် မွေးမြူမှု အခြေအနေမှာ အောက်ပါအတိုင်းဖြစ်ပါသည်_

         အဆိုပါ မွေးမြူထားရှိမှုများမှ တစ်နှစ်တာကာလတွင်း  ကျွဲ၊နွားနို့ ပိဿာ( ၉၅၂ )သိန်းခန့် ၊ ကျွဲနွားသားရေ (ချပ်ရေ) ၃ သောင်း‌ကျော်ခန့် သိုးဆိတ်သားရေ (ချပ်ရေ) ၂ သောင်းခန့် ၊ အသားထုတ်လုပ်မှု စုစုပေါင်း ပိဿာ (၈၇၄) သိန်း ခန့် ၊ ဉစုစုပေါင်း လုံးရေ သိန်း (၃၀၀၀) ခန်ထုတ်လုပ်နိုင်ခဲ့ကြောင်း သိရှိရသည်။ မွေးမြူရေးတိုးတက်လာသည်နှင့်အမျှ ပဲခူးတိုင်းဒေသကြီးအတွင်း မွေးမြူရေးအစာ ထုတ်လုပ်ရောင်းချသည့် ကုမ္ပဏီ (၈) ခုကလည်း တစ်နှစ်တာကာလအတွင်း တိရစ္ဆာန်အစာတန်ချိန် (၃) သိန်းခန့် ထုတ်လုပ်၍ မြန်မာပြည်အနှံအပြားသို့ တင်ပို့ရောင်းချနိုင်ခဲ့ကြောင်း သိရှိရပါသည်။

ကျွဲ နွားမွေးမြူရေး ဆောင်ရွက်မှုများ

     နွားမွေးမြူရေးအနေဖြင့် နွားမျိုးကောင်းမျိုးသန့်များ မွေးမြူနိုင်ရန်အတွက် မွေးမြူရေးနှင့်ကုသရေးဦးစီးဌာနမှ မေထုန်မဲ့သားစပ်လုပ်ငန်းဖြင့် တစ်နှစ်တာကာလအတွင်း ခိုင်းနွား (၁၅၂၄၈) ကောင်၊နို့စားနွား (၂၃၉၃) ကောင်၊ အသားစားနွား(၁၄၇၂) ကောင်၊စုစုပေါင်း (၁၉၁၁၃) ကောင်ကို မေထုန်မဲ့နည်းဖြင့် သားစပ်ပေးနိုင်ခဲ့ပြီး သားပေါက်ကောင်ရေ (၁၀၇၅၅) ကောင်ရှိကြောင်း သိရှိရသည်။

      ခိုင်းကျွဲနွားကောင်းများ မွေးမြူခြင်းဖြင့် လယ်ယာစိုက်ပျိုးရေးနှင့် ကျေးလက်ဒေသ သယ်ယူပို့ဆောင်ရေးတွင် တောင်သူဦးကြီးများအတွက် အထောက်အကူများစွာဖြစ်ပြီး၊ နို့စားနွားများအနေဖြင့် စားသုံးသူပြည်သူများ အာဟာရဖြည့် ဓာတ်စာအနေဖြင့် နို့မှုန်၊နို့ဆီ၊  ထောပတ်၊ ဒိန်ချဉ် လုပ်ငန်းနှင့် နို့စိမ်း လုပ်ငန်းများသို့ တင်ပို့ရောင်းချနိုင်ပြီး ၊ အသားစားနွားအနေဖြင့် ပြည်တွင်းအသားစားသုံးမှုဖူလုံစေရန်နှင့် ပိုလျှံသည်များကို ပြည်ပသို့တင်ပို့ရန် ရည်ရွယ်၍ မွေးမြူလျက်ရှိကြောင်း သိရှိရသည်။

        ခြံလှောင်စနစ်ဖြင့် နွားမွေးမြူရေးဖွံ့ဖြိုးတိုးတက်စေရန် ရည်ရွယ်၍ တိရစ္ဆာန်အစာပင်ဖြစ်သော (နေပီယာမြက်) စိုက်ပျိုးခြင်းလုပ်ငန်းများကိုလည်း ဆောင်ရွက်လျက်ရှိရာ မွေးမြူရေးနှင့်ကုသရေးဦးစီးဌာန မြို့နယ်ရုံးများတွင် စံပြစိုက်ကွက်များအဖြစ် (၂၉) ဧက ၊ ပုဂ္ဂလိက စိုက်ပျိုးထားရှိမှု (၁၁၁.၇၁) ဧက ၊ အခြားဌာန၊ တပ်ရင်းတပ်ဖွဲ့များအနေဖြင့် (၁၇) ဧက စုစုပေါင်းစိုက်ပျိုးထားရှိမှု (၁၅၇.၇၁) ဧက ရှိကြောင်း သိရှိရသည်။ စီးပွားဖြစ်နွားမွေးမြူသူများအနေဖြင့်  တိရစ္ဆာန်အစာပင်(နေပီယာ) များကို ကိုယ်တိုင်စိုက်ပျိုးကြောင်း သိရှိရပြီး  ဖြည့်စွက်နွားစာများအဖြစ် ပြောင်းဖူးဆန်၊ ဝါကြိတ်ဖတ်တို့ကို ရောနှောကျွေးမွေးကြောင်း သိရှိရသည်။

ဆိတ်မွေးမြူရေး ဆောင်ရွက်မှုများ

          ဆိတ်မွေးမြူရေးလုပ်ငန်းများကို အများအားဖြင့် မိသားစုတစ်နိုင်တစ်ပိုင်မွေးမြူကြပြီး စီးပွားဖြစ်မွေးမြူသူမှာ နည်းပါးကြောင်း၊ ကျေးရွာများတွင် တစ်နိုင်တစ်ပိုင်မွေးမြူသူများအနေဖြင့် ဆိတ်များကို အစာဝယ်မကျွေးပဲ စားကျက်ကွင်းများသို့ လွှတ်ကျောင်းစနစ်ဖြင့် မွေးမြူကြကြောင်းသိရှိရသည်။ ဆိတ်မွေးမြူရာတွင် အသားတိုး ဆိတ်နှင့် မျိုးပွားစိတ်ဟူ၍ နှစ်မျိုးမွေးမြူကြပြီး ဆိတ်မတစ်ကောင်လျှင် တစ်နှစ်  နှစ်သား ပုံမှန်မွေးဖွားကြောင်း ဆိတ်တကောင်သည် တစ်နှစ်လျှင် လေးကောင်မှ ခြောက်ကောင်အထိ မျိုးပွားနိုင်၍ ရင်းနှီးရသက်သာသည့်အပြင် အချိန်တိုအတွင်း တွက်ခြေကိုက်၍ ပဲခူးတိုင်းဒေသကြီးအတွင်းရှိ မြို့နယ်/ကျေးရွာများတွင် ဆိတ်မွေးမြူရေး လုပ်ငန်းများကိုလည်း တိုးချဲ့လုပ်ကိုင်လာကြကြောင်း သိရှိရပါသည်။

ကြက် နှင့် ဘဲ မွေးမြူရေး ဆောင်ရွက်မှုများ

          ကြက်မွေးမြူရေးလုပ်ငန်းအနေဖြင့် ပဲခူးတိုင်းဒေသကြီးအတွင်း မျိုးကြက်ဉထုတ်လုပ်သော မျိုးကြက်ခြံ ( ၁၁)  ခြံ ရှိကြောင်း သိရှိရပြီး၊ ယင်းကြက်ခြံများတွင် ကြက်ကောင်ရေ အထီး (၇၂၆၄၅) ကောင်၊ အမ (၈၁၉၀၇၁) ကောင် မွေးမြူထားကြောင်း သိရှိရသည်။ ကြက်ဉ ထုတ်လုပ်မှုအနေဖြင့် တစ်နှစ်လျှင် လုံးရေ ( ၁၂၀၀ ) သိန်းခန့် ထုတ်လုပ်နိုင်ပြီး ပဲခူးမြို့ ညောင်အင်း-၁ မျိုးကြက်ခြံမှ အများဆုံး ထုတ်လုပ်ကြောင်း သိရှိရသည်။ ကြက်ဉများကို  ပဲခူးတိုင်းနှင့် ရန်ကုန်တိုင်းတို့အား အဓိက ဖြန့်ဖြူး ရောင်းချလျက် ရှိကြောင်း သိရှိရသည်။ ကြက်သားပေါက်ထုတ်လုပ်သော ဖောက်စက်အနေဖြင့် (၆) ခုရှိပြီး တစ်နှစ်ထုတ်လုပ်မှုအနေဖြင့်  ကြက်ပေါက် ကောင်ရေ(၂၁၀) သိန်းခန့် ထုတ်လုပ်နိုင်ပြီး ပဲခူးမြို့ ညောင်အင်းစက်မူဇုန်မှ အများဆုံးထုတ်လုပ်၍  မြန်မာပြည်အနှံ ဖြန့်ဖြူးရောင်းချလျက်ရှိကြောင်း သိရှိရသည်။

          ဘဲမွေးမြူရေးအနေဖြင့် ပဲခူးတိုင်းဒေသကြီးအတွင်း သနပ်ပင်မြို့နယ်၊ ကမာစဲကျေးရွာတွင် ခေတ်မီနည်းစနစ်ဖြင့် ဘဲသားပေါက်ထုတ်လုပ်သော ဖောက်စက် ၁ ခုရှိပြီး တစ်နှစ်လျှင် ဘဲကောင်ရေ (၁၁) သိန်းခန့် ထုတ်လုပ်လျက်ရှိသည်။ မိရိုးဖလာ ဘဲလေးသားဖောက်လုပ်ငန်းအနေဖြင့် (၂) ခု ရှိပြီး တစ်နှစ် ထုတ်လုပ်မှုအနေဖြင့် ဘဲပေါက်ကောင်ရေ (၄) သိန်းခန့် ထုတ်လုပ်နိုင်ပြီး သနပ်ပင်မြို့နယ်တွင် အများဆုံး ထုတ်လုပ်ကြောင်း သိရှိရသည်။ ဘဲပေါက်များကို ရွှေဘို၊ မန္တလေး၊ ရန်ကုန်၊ ဧရာဝတီမြို့များသို့ ဖြန့်ဖြူးတင်ပို့လျက်ရှိကြောင်း သိရှိရသည်။

ဝက် မွေးမြူရေး ဆောင်ရွက်မှုများ

         ဝက်မွေးမြူရေးလုပ်ငန်းအနေဖြင့်  တစ်ပိုင်တစ်နိုင်နှင့် စီးပွားဖြစ်မွေးမြူသူများ ဝင်ငွေတိုးတက်လာစေခြင်းဖြင့် ဒေသဖွံ့ဖြိူးမှု အထောက်အကူဖြစ်စေရန် အဓိကထားမွေးမြူလျက်ရှိကြောင်း သိရှိရသည်။ ပဲခူးတိုင်းဒေသကြီးအတွင်း ဝက်သားပေါက် ထုတ်လုပ်သော လုပ်ငန်းအနေဖြင့် (၂) ခုရှိပြီး ပဲခူးတိုင်းဒေသကြီး အတွင်း တစ်နှစ်လျှင် ဝက်ပေါက်ကောင်ရေ (၂) သိန်းခန့်ထုတ်လုပ်လျက်ရှိပြီး ဒိုက်ဦးမြို့၊ ဘောနီမျိုးဝက်ခြံနှင့် ဖြူးမြို့နယ် ၊ လှေဒုံးကျေးရွာမျိုးဝက်ခြံမှ အများဆုံးထုတ်လုပ်လျက်ရှိကြောင်း သိရှိရသည်။ ဝက်ပေါက်ထုတ်လုပ်သော လုပ်ငန်းများမှ ဝက်ပေါက်များကို ပဲခူး၊တောင်ငူ၊ လှည်းကူး၊ မအူပင်၊ မန္တလေး၊ တောင်ကြီးသို့ တင်ပို့ဖြန့်ဖြူးရောင်းချလျက်ရှိကြောင်း သိရှိရသည်။

ပျားမွေမြူရေး ဆောင်ရွက်မှုများ

         ပဲခူးတိုင်းဒေသကြီးအတွင်း ပျားမွေးမြူမှု ဖွံ့ဖြိုးရေးအနေဖြင့် တစ်နှစ်တာကာလအတွင်း ပျားအုံတိုးပွားရေးအတွက် ပျားအုံပေါင်း (၅၆၀) အုံ၊ ပျားရည်ထုတ်လုပ်မှုပေါင်း (၅) သိန်းကျော်ရှိပြီး ဝတ်မှုန်ကူး ဝန်ဆောင်မှု ဧကပေါင်း (၁) သိန်းကျော်ခန့် ဆောင်ရွက်နိုင်ခဲ့ကြောင်း သိရှိရသည်။

တိရိစ္ဆာန် မွေးမြူရေးကဏ္ဍ ဝန်ဆောင်မှုများ

     မွေးမြူရေးနှင့်ကုသရေးဦးစီးဌာနအနေဖြင့် ကူးစက်ရောဂါကျရောက်ခြင်းကြောင့် တိရစ္ဆာန်များ သေဆုံးပြီး ဆုံးရှုံးမှုမရှိစေရေးအတွက်လဲ တိရစ္ဆာန်ကူးစက်ရောဂါကာကွယ်ရေးလုပ်ငန်းများအနေဖြင့် ကျွဲ၊ နွား ခွာနာလျှာနာ ‌ရောဂါကာကွယ်ဆေး၊ ကျွဲ၊နွား လည်ချောင်းကွဲရောဂါ ကာကွယ်ဆေး၊ ကျွဲ၊ နွားဒေါင့် သန်းရောဂါ ကာကွယ်ဆေး၊ ကျွဲ၊နွား ပေါင်ပုပ်ရောဂါ ကာကွယ်ဆေး၊ဝက်ဝမ်းကျရောဂါ ကာကွယ်ဆေး၊ ကြက်လည်လိမ်ရောဂါ ကာကွယ်ဆေးများ ထိုးနှံပေးလျက်ရှိကြောင်း သိရှိရသည်။

        မွေးမြူရေးလုပ်ငန်း လုပ်ကိုင်နေသူများ အနေဖြင့် မိမိတို့ တိရစ္ဆာန်များအား ဆုံးရှုံးမှု မရှိစေရန် ကာကွယ်ဆေးများ ကြိုတင်ထိုးနှံထားရန် နှင့် မွေးမြူးရေး လုပ်ငန်းများနှင့် ပတ်သက်၍ လိုအပ်သော အသိပညာများနှင့် တိရိစ္ဆာန်ကျန်းမာရေးဝန်ဆောင်မှုများကို မြို့နယ်မွေးမြူရေးနှင့် ကုသရေး ဦးစီးဌာနများကို ဆက်သွယ်၍ ဆောင်ရွက်နိုင်ကြောင်း သိရှိရပါသည်။

DOCA(ပဲခူး)