ပြည်တွင်းကုန်သွယ်မှုသတင်း

          မြန်မာနိုင်ငံတွင် အဓိကအသက်မွေးဝမ်းကျောင်းပြုနေသော စီးပွားရေးကဏ္ဍများ၌ လယ်ယာစိုက်ပျိုးရေးကဏ္ဍသည်လည်း တစ်ခုအပါအဝင်ဖြစ်ပါသည်။ သို့သော်လည်း တောင်သူ လယ်သမားများအနေဖြင့် စိုက်ဧကပိုင်ဆိုင်မှု နည်းပါးခြင်း၊ သွင်းအားစုနှင့်ငွေကြေးရင်းနှီး နိုင်မှုနည်းခြင်း၊ လုပ်သားရှားပါးခြင်း၊ ဈေးကွက်နှင့်နည်းပညာတိုးတက်မှု အားနည်းခြင်းတို့ ကြောင့် အဆင်မပြေမှုများ ကြုံတွေ့နေရပါသည်။ တောင်သူလယ်သမားများအနေဖြင့် မြန်မာ နိုင်ငံရာသီဥတုနှင့် သင့်တော်သောသီးနှံ၊ စိုက်ပျိုးနည်းစနစ်၊ ဈေးကွက်နှင့်ဝင်ငွေရရှိမှု၊ စသည် တို့ကို စနစ်တကျ ချိန်ဆတွက်ချက်၍ စိုက်ပျိုးတက်ရန် အရေးကြီးလှပါသည်။ ထို့ကြောင့် မြန်မာနိုင်ငံရာသီဥတုနှင့် ကိုက်ညီ၍ အချိန်တိုအတွင်း အကျိုးဖြစ်ထွန်းကာ မြင့်မားသောဝင်ငွေ ရရှိသည့် နှစ်ရှည်သီးနှံဖြစ်သော ကြယ်ပဲ (Sacha Inchi) ကို မြန်မာနိုင်ငံတွင် ၂၀၁၄ ခုနှစ် နောက်ပိုင်းမှစ၍ ဈေးကွက်ဝင်သီးနှံအဖြစ် စီးပွားဖြစ်စိုက်ပျိုးလာခဲ့ကြပါသည်။

          ကြယ်ပဲသည် တောင်အမေရိကတိုက်၊ အမေဇုန်တောအတွင်းရှိ ပီရူးနိုင်ငံမှ စတင်တွေ့ရှိခဲ့ သောအပင်တစ်မျိုးဖြစ်သည်။ ကြယ်ပဲသည် နှစ်ရှည်ခံနွယ်ပင်မျိုးဖြစ်၍ တစ်နှစ်အတွင်းဝင်ငွေ ရရှိနိုင်ပြီး အနှစ် ၃၀ မှ ၅၀ အထိ စီးပွားဖြစ်စိုက်ပျိုးထုတ်လုပ်နိုင်ကာ ဈေးကွက်ရနိုင်သောသီးနှံ ဖြစ်သည်။ အမွှေးထူသောအရွက်များရှိပြီး ဗီတာမင် A ၊ ဗီတာမင် E နှင့် သက်စောင့်ဓာတ်ဖြစ် သော Omega 3, 6, 9 များ ကြွယ်ဝစွာပါဝင်သောကြောင့် စားသောက်ကုန်အပြင် ဆေးဝါးနှင့် အလှကုန်ပစ္စည်းများအတွက် ကုန်ကြမ်းအဖြစ် အသုံးပြုလာကြပါသည်။ ကြယ်ပဲသည် လူတို့အ တွက် မရှိမဖြစ်လိုအပ်သော အဆီအက်ဆစ်များစွာ ပါဝင်ခြင်းကြောင့် စူပါအစားအစာ (Super Food) ဟုလည်း ခေါ်ဝေါ်သတ်မှတ်ကြသည်။ Omega ကြွယ်ဝမှု၊ ကျန်းမာရေးဆိုင်ရာအကျိုး ကျေးဇူးများ၊ ဆေးဖက်ဝင်စားသုံးဆီ၊ လူ့သုံးကုန်ဆိုင်ရာဈေးကွက် စသည့် အားသာချက်များ ကြောင့် အလားအလာကောင်းသော သီးနှံဟုဆိုကြပါသည်။

          မြန်မာနိုင်ငံတွင် ကြယ်ပဲကို ၂၀၁၄ ခုနှစ်မှ စတင်စိုက်ပျိုးပြီး မျိုးစေ့များကို ပီရူးနိုင်ငံနှင့် ထိုင်းနိုင်ငံတို့မှ ဝယ်ယူစိုက်ပျိုးခဲ့ရသော်လည်း ယခုအခါတွင် ပြည်တွင်းစိုက်ခင်းများမှ ညီညာ သန်စွမ်းသော အစေ့များကို မျိုးစေ့အဖြစ် ဝယ်ယူစိုက်ပျိုးနိုင်ပြီဖြစ်ပါသည်။ အလေ့ကျ ပေါက်ရာမှ မိရိုးဖလာ စိုက်ပျိုးမှု၊ ထိုမှတစ်ဆင့် စီးပွားဖြစ်စိုက်ပျိုးထုတ်လုပ်လာနိုင်ပြီဖြစ်သော ကြယ်ပဲသီးနှံသည် ပီရူး နိုင်ငံမှ အစပြု၍ အခြားနိုင်ငံများသို့ တဖြည်းဖြည်း ပျံ့နှံရောက်ရှိ စိုက်ပျိုးလာခဲ့ပါသည်။ မျိုးစေ့များ ရွေးချယ်ရာတွင် လတ်ဆတ်၍ အစေ့အဆံအောင်သော အသီးများကို ခြောက်သွေ့အောင်ထားရှိ ပြီးမှဆွတ်ခူးလျှင် အပင်ပေါက်နှုန်း ပိုမိုကောင်းမွန် ပါသည်။ စိုက်ပျိုးမည့်ဧကနှင့်ချိန်ဆ၍ မျိုးစေ့ များအား အညှောက်ဖောက် ပျိုးထောင်ရာတွင် စိုက်ခင်းအတွင်း အပင်သေခြင်း၊ စိုက်ကွက်တွင် မြေချစိုက်ပျိုးပါက အပင်သေ၊ အပင် ပျောက်ခြင်းများ ဖာထေးရန်အတွက် လိုအပ်သောအပင်အရေအတွက်ထက် ၁၀-၂၀ % ခန့် အပို ဆောင်းပျိုးထောင်ရပါမည်။

          ကြယ်ပဲသည် မြေအတန်းအစားမရွေး ဖြစ်ထွန်းရှင်သန်နိုင်ပြီး နုန်းတင်မြေနုလွင်များတွင် ပိုမိုဖြစ်ထွန်းသည်။ ရေစီးရေလာကောင်းပြီးအလင်းရောင်တိုက်ရိုက်ရရှိသောနေရာများကို ပိုမိုနှစ် သက်သည်။ မိုးရေချိန် ၈၅၀ မှ ၁၀၀၀ မီလီမီတာခန့်လိုအပ်ပြီး အနိမ့်ဆုံးအပူချိန် ၁၀ ဒီဂရီစင်တီ ဂရိတ်မှ အမြင့်ဆုံး ၃၆  ဒီဂရီစင်တီဂရိတ်အထိ ခံနိုင်သော်လည်း ပျှမ်းမျှအပူချိန်မှာ ၂၆  ဒီဂရီ စင်တီဂရိတ် ရှိရန် လိုအပ်ပါသည်။ အပူချိန်မြင့်မားလျှင် ပန်းပွင့်မှုကျဆင်းပြီး အသီးညံ့ဖျင်းနိုင် သည်။ အပူချိန်နိမ့်လျှင်လည်းကောင်း၊ အပူချိန်ခြောက်သွေ့ကာလကြာရှည်လျှင်လည်းကောင်း အပင်ကြီးထွားမှု အားနည်းနိုင်ပါသည်။ စိုထိုင်းဆ ၈၀ % ခန့်ရှိရန်လိုအပ်သဖြင့် ခြောက်သွေ့ကာလ များတွင် ရေသွင်းပေးရပါမည်။ စိုထိုင်းဆ မြင့်မားပြီး မိုးသည်းထန်စွာရွာသောကာလများတွင် ပိုးမွှားရောဂါများ မကျရောက်အောင် ရေနုတ်မြောင်းများ တူးဖော်၍ ရေစီးရေလာကောင်းအောင် ပြုပြင်ပေးရပါသည်။ လောင်းရိပ်များလျှင်လည်း ပန်းပွင့်မှုနည်း၍ အထွက်နှုန်းလျော့နိုင်ပါသည်။ မူရင်းဒေသမှာ အပူပိုင်းသစ်တောများဖြစ်သဖြင့် အေးလွန်း ခြောက်သွေ့လွန်သော ဒေသများမှလွဲ ၍ မည်သည့်ဒေသများတွင်မဆို အောင်မြင်စွာ စိုက်ပျိုးနိုင်ပါသည်။

          ကြယ်ပဲစိုက်ပျိုးရာတွင် တဧကလျှင် ပင်ကြားတန်းခြား ၉ ပေ ပတ်လည်ဆိုပါက အပင် ဦးရေ (၅၂၀) ပင်၊ ၆ ပေ x ၁၂ ပေ ဆိုပါက (၆၀၅) ပင် လိုအပ်ပါသည်။  တစ်ကီလိုတွင် အစေ့ပေါင်း (၈၀၀ မှ ၁၀၀၀) ခန့် ရှိသောကြောင့် တစ်ဧကခွဲခန့် စိုက်ပျိုးနိုင်ပါသည်။ မျိုးစေ့ တစ်ကီလိုလျှင် ရေအေး တစ်ဂါလံခွဲ၊ ရေနွေး တစ်ဂါလံခွဲ ရောစပ်ပြီး ရရှိလာသည့် ကြက်သီးနွေး ရေဇလုံထဲတွင် ပုဆိုး(သို့မဟုတ်) ချည်ထည် အဝတ်စဖြင့် ခပ်ဖွဖွထုပ်ကာ မျိုးစေ့များကို တညတာ (၇)နာရီခန့် ရေစိမ်ပေးရပါမည်။ နောက်တနေ့တွင် ရေစိမ်ထားသောမျိုးစေ့များကို နေထုတ်လှန်း ရပါမည်။ ထိုသို့ ရေစိမ်နေလှန်း (၃) ရက်ခန့် ပြုလုပ်ပြီးပါက အညှောက်ဖောက်ပျိုးထောင်ရန် အသင့်အနေအထားရရှိပြီဖြစ်ပါသည်။

          မျိုးစေ့များ အပင်ပေါက်လာသောအခါ မြေအောင်းရောဂါများ၊ နီမတုတ်ကဲ့သို့ မြစ်ဖုရောဂါ များ၊ ခါးရိအပင်သေရောဂါများမှ ကာကွယ်ရန် မျိုးစေ့ရေစိမ်စဉ် သင့်တော်သည့်ပိုးသတ်ဆေး ခပ်ပျော့ပျော့တစ်မျိုးဖြင့် စိမ်ပေးရပါသည်။ အညှောက်ဖောက်နေစဉ် ပင်စည်စုပ်ပိုးမှ ကာကွယ်ရန် အလွယ်ရရှိနိုင်သော ဆေးပေါ့လိပ်ဖင်စီခံ (၂၀) ခန့်ကို ရေတစ်လီတာတွင် (၁) ညခန့်စိမ်၍ ထိုရေ ဖြင့် ပျိုးပင်များကို ဖြန်းပေးနိုင်ပါသည်။ သာမာန်အားဖြင့် (၃) ရက်ခန့်တွင် အစို့များထွက်လာပြီး (၇) ရက်ခန့်၌ အမြစ်များထွက်လာချိန်တွင် မြေကြီး ၃ ဆ၊ သဲ ၂ ဆ၊ ဖွဲပြာ ၁ ဆ ရောထားသော ပျိုးအိတ်များအတွင်းသို့ ပြောင်းရွှေ့ရပါမည်။  နှစ် ၃၀ မှ နှစ် ၅၀ အထိ ပြုစုထိန်းသိမ်း ဆွတ်ခူးနိုင် သော နှစ်ရှည်ပင် ဖြစ်သောကြောင့် မြေနေရာရွေးချယ်မှု မှန်ကန်ရန် အရေးကြီးလှပါသည်။ ပျိုးပင် များပြုစုနေစဉ်တွင် စိုက်ဘောင်များကို စနစ်တကျ ပြင်ဆင်ထားရပါမည်။ စိုက်ဘောင်တန်းများ ပေါ်တွင် မြေပေါ်မှ ၅ ပေ အမြင့်ရှိသော ကွန်ကရစ်တိုင်(သို့) သစ်၊ မျောတိုင်များအား ပေ ၃၀ ခြား စိုက်ထားကာ ယိုင်နဲ့မှုမဖြစ်စေရန် ကျားကန်ခြင်း၊ ငုတ်ရိုက်ဆိုင်းကြိုးဆွဲထားခြင်း၊ မြေပြင်မှ ၃ ပေ အမြင့်တွင် သစ်သားတန်းတစ်ခုဖြင့် ၂ ပေကွာ သွပ်နန်းကြိုး ၃ တန်း ထားပေးရမည်။ တစ်ချို့က ဘူးစင်ကဲ့သို့လည်း ပြုလုပ်ကြသည်။

          ပျိုးထုပ်ထဲတွင် အပင်သက်တမ်း တစ်လကျော်သောအခါ တစ်ပေခန့်မြင့်သော အညွန့်များ ထွက်လာလျှင် ဖြတ်ပေးရမည်။ သို့မှသာ ကိုင်းတက်များ ဖြာလာနိုင်မည်ဖြစ်သည်။ ဖြတ်ထား သော ပဲညွန့်များကို ကြော်ချက်စားသုံးနိုင်ပါသည်။ အနည်းငယ်ခါးသက်သည့် အရသာရှိသော်လည်း ဗီတာမင်ဓာတ်ကြွယ်ဝသောကြောင့် စားရသည်မှာ အရသာရှိပါသည်။ ကြယ်ပဲဟုခေါ်သော်လည်း ပဲမျိုးစုံအုပ်စုတွင် မပါဝင်ဘဲ ရှားစောင်းကြက်ဆူမျိုးရင်းဝင် နှစ်ရှည်သီးနှံဖြစ်သောကြောင့် ကနဦး ကုန်ကျစရိတ်သာမက နှစ်ရှည်စိုက်ပျိုးထုတ်လုပ်နိုင်ရန် ကြိုတင်စီစဉ်ထားသင့်ပါသည်။ ကြယ်ပဲ သည် အဟာရဓာတ်တန်ဖိုးမြင့်မားစွာပါဝင်ခြင်းကြောင့် ဆေးဖက်ဝင်သော အဖိုးတန် နှစ်ရှည် ကုန်ကြမ်းသီးနှံတစ်ခု ဖြစ်ပါသည်။ ထို့ကြောင့် စိုက်ပျိုးထွက်ရှိလာသော ကြယ်ပဲစေ့များတွင် ဓာတုဓာတ်ကြွင်းများ ပါဝင်မှုမရှိစေရေးသည် အလွန်အရေးကြီးသဖြင့် ဓာတ်မြေသြဇာများ၊ ဓာတုပိုးသတ်ဆေးများသုံးစွဲမှုကို အတက်နိုင်ဆုံး လျော့ချ၍ သဘာဝပိုးသတ်ဆေး မြေသြဇာများ ကိုသာ အလေးထားအသုံးပြုသင့်ပါသည်။ ကြယ်ပဲကို စနစ်တကျမဟုတ်ဘဲ ဖြစ်သလိုစိုက်ပျိုးပါက အထွက်နှုန်းနည်းခြင်း၊ ထွက်ကုန်အရည်အသွေးညံ့ဖျင်းခြင်းနှင့် ဈေးကွက်ဆိုင်ရာ အားနည်းချက် ပြသာနာများ ကြုံတွေ့ရတက်ပါသည်။

                    ကြယ်ပဲပင်အား ပင်ပိုင်းဆိုင်ရာမျိုးပွားနည်းဖြင့် ကိုင်းဆက်ခြင်း၊ ကိုင်းဖြတ်ပျိုးထောင်မြေချ စိုက်ပျိုးခြင်း၊ မျိုးစေ့တိုက်ရိုက်အစေ့ချစိုက်ပျိုးခြင်း၊ မျိုးစေ့အညှောက်ဖောက်ပျိုးထောင်မြေချစိုက်ပျိုး ခြင်း စသဖြင့် နည်းလမ်းများစွာရှိသော်လည်း မျိုးစေ့အညှောက်ဖောက်ပျိုးထောင်မြေချစိုက်ပျိုးခြင်း နည်းစနစ်သည် အထွက်နှုန်းပိုမိုကောင်းမွန်ကာ ကျန်းမာသန်စွမ်းသော ပျိုးပင်များရရှိသောကြောင့် ၎င်းနည်းစနစ်ကိုသာ အများဆုံး စိုက်ပျိုးကြပါသည်။

          စိုက်ပျိုးပြီး ၆ လမှ ၈ လ အကြာတွင် အသီးများ စတင်ရရှိပြီး အခွံများခြောက်မှ ဆွတ်ခူးရ ပါသည်။ ထပ်မံနေလှန်းပြီးမှ ခြွေလှေ့စက်ဖြင့် ကြိတ်ခွဲရသည်။ ပထမနှစ်တွင် တစ်ပင်မှ ၂ ကီလို၊ နောင် နှစ်များတွင် ၄ ကီလိုမှ ၅ ကီလိုထိ ရရှိနိုင်ပါသည်။ ရင့်သောအရွက်ခြောက်များကို အပင်မထိခိုက် အောင် ခူးရပါမည်။ ဆေးဘက်ဝင် စားသုံးကုန်ကြမ်းသီးနှံတစ်မျိုးဖြစ်သောကြောင့် စိုက်ပျိုးထွက်ရှိ လာသော ပဲစေ့များကို ဝယ်ယူချိန်တွင် ဓာတုဓာတ်ကြွင်း ပါဝင်မှုအား ဓာတ်ခွဲစမ်းသပ်သည့်စနစ်ရှိ တက်သောကြောင့် ဓာတ်မြေသြဇာပိုးသတ်ဆေးများကို အထူးဂရုပြု သုံးစွဲသင့်ပါသည်။ ဖြစ်နိုင်လျှင် သြဂဲနစ်စနစ် စိုက်ပျိုးသင့်ပါသည်။

          ကြယ်ပဲ၏အကောင်းဆုံးဂုဏ်သတ္တိမှာ သက်စောင့်ဓာတ်ဖြစ်သည့် Omega-3 ပါဝင်မှု  46% မှ 48% ပါဝင်ခြင်းဖြစ်သည်။ ကြယ်ပဲမှ စားသောက်ကုန်ပစ္စည်း၊ သဘာဝအားတိုးဆေး၊ဆေးဝါး ထုတ်ကုန်၊ အလှကုန်ပစ္စည်း စသည်ဖြင့် အမျိုးမျိုး ထုတ်လုပ်နိုင်ပါသည်။ ကြယ်ပဲဆီသည် ခါဘော်လစ်ဓာတ်များစွာ ကြွယ်ဝပြီး Oxydize ထွက်ခြင်းကို တွန်းလှန်နိုင်သဖြင့် ကာလရှည်ကြာ သိုလှောင်ထားသော်လည်း အရသာ၊ အရည်အသွေး ပြောင်းလဲခြင်းမရှိသောကြောင့် ပြင်သစ်နိုင်ငံ၊ ပဲရစ်မြို့တွင် ကျင်းပသော စားသောက်ကုန်စည်ပြပွဲတွင် အကောင်းဆုံးဟင်းသီးဟင်းရွက်ဆီအဖြစ်  ၂၀၀၄ ခုနှစ်မှ ၂၀၀၇ အထိ ၄ နှစ်ဆက်တိုက် ပထမဆု ရရှိထားသော ဆီဖြစ်ပါသည်။

          ကြယ်ပဲဆီတွင် Omega-3 (46%) ၊ Omega- 6 (33%) ပါဝင်ပြီး အဟာရဓာတ်ပါဝင်မှုနှင့်  အရည်အသွေးမြင့်မားမှုတို့ကြောင့် ကြယ်ပဲဆီသည် အကောင်းဆုံးအပင်ထွက်အဆီအဖြစ် လက်ရှိ သိပ္ပံပညာလေ့လာမှုများက ဖော်ပြထားပါသည်။ ဆေးဝါးအနေဖြင့် ငါးကြီးဆီအစားထိုးထုတ်လုပ်ရန် အဓိကထား စိုက်ပျိုးလာကြပါသည်။ Omega-3 ကြွယ်ဝသော ငါးကြီးဆီနှင့် ကြယ်ပဲဆီကို နှိုင်းယှဉ်ကြည့်ပါက ကြယ်ပဲဆီသည် ငါးကြီးဆီထက် အစာကြေလွယ်ခြင်း၊ အနံ့အရသာ ပိုမို ကောင်းမွန်ခြင်း၊ ကြယ်ပဲဆီတွင် မပြည့်ဝဆီ ၉၃.၆၉ % ပါဝင်ပြီး ငါးကြီးဆီတွင် ၆၀% သာပါဝင်ခြင်း၊ ကြယ်ပဲဆီတွင် ပြည့်ဝဆီ ၆.၃၉ % ပါဝင်ပြီး ငါးကြီးဆီတွင် ၂၀% သာပါဝင်ခြင်း၊ ကြယ်ပဲဆီသည် ဓာတုကင်းလွတ်ပစ္စည်းဖြစ်ပြီး ငါးကြီးဆီတွင် ဒိုင်အောက်ဆိုဒ်နှင့် ပြဒါးများပါဝင် ခြင်း၊ ကြယ်ပဲဆီတွင် ကိုလက်စထရောကင်းပြီး ငါးကြီးဆီတွင် ကိုလက်စထရောပါဝင်ခြင်း စသည့် ကြယ်ပဲဆီ၏ အားသာချက်များကို တွေ့ရပါသည်။

          ကြယ်ပဲအညွန့်များကို ကြော်ချက်စားသောက်ခြင်း၊ ပဲစေ့များကို ကြော်လှော်စားခြင်း၊ မုန့် အမျိုးမျိုးပြုလုပ်ခြင်းဖြင့် အသုံးပြုလျှက်ရှိပါသည်။ ပရိုတင်းဓာတ်ကြွယ်ဝသောကြောင့် ပဲမှုန့်အဖြစ် ကြိတ်ပြီးဟင်းချက်ရာတွင် အသုံးပြုခြင်း၊အရွက်ခြောက်များကို ရေနွေးကြမ်းအဖြစ်သောက်သုံးခြင်း ဖြင့်လည်း အသုံးပြုနိုင်ပါသည်။ ကြယ်ပဲပင်ထွက်ကုန်များကို စားသုံးပေးခြင်းဖြင့် ကြယ်ပဲတွင်ပါဝင် သော Omega 3, 6, 9 နှင့် ဗီတာမင် A ၊ ဗီတာမင် E တို့၏ ဂုဏ်သတ္တိများကြောင့် မှတ်ဉာဏ် ကောင်းခြင်း၊ ကိုလက်စထရော(Cholesterol)ကျခြင်း၊ မျက်စိအားကောင်းခြင်း၊  နှလုံးထိခိုက် မှုကိုလျော့ကျစေခြင်း၊ နှလုံးခုန်နှုန်းကိုချိန်ညှိပေးပြီး သွေးပေါင်ပုံမှန်ဖြစ်စေရန် ကူညီပေးခြင်း၊ ဆီးရွှင်စေ၍ ခန္ဓာကိုယ်အတွင်း အဆိပ်အတောက်များ ဖယ်ရှားပေးပြီး ကျောက်ကပ်နှင့် ဆီးလမ်းကြောင်းဆိုင်ရာ ဝေဒနာများ သက်သာစေခြင်း၊ ကိုယ်ခံအားစနစ်ကို အားဖြည့်ပေးပြီး ကင်ဆာဆဲလ်ကြီးထွားမှုကို လျော့ကျစေခြင်း၊ သွေးထဲရှိ သကြားဓာတ်လွန်ကဲမှုကို လျော့ချ စေနိုင်သဖြင့် ဆီးချို၊ သွေးချိုရောဂါနှင့်နာတာရှည်ရောဂါသည် များအတွက် ဖြည့်စွတ်စာအဖြစ် အသုံးပြုနိုင်ခြင်း၊ သွေးခဲခြင်းကိုကာကွယ်ပေးပြီး သွေးကျဲစေသဖြင့် သွေးလည်ပတ်မှုမျှတသော ကြောင့် သွေးတိုးကျစေခြင်းစသည့် ကျန်းမာရေးဆိုင်ရာ အကျိုးကျေးဇူးများကိုလည်း ရရှိစေ ပါသည်။ နောင်တစ်ချိန်တွင် ရောင်းလိုအားများလာသည့်တိုင် ဈေးနှုန်းအနည်းငယ်လျော့ကျသွား နိုင်သည်မှအပ ဆီထွက်သီးနှံ၊ ဆေးဝါးကုန်ကြမ်းသီးနှံ အဆင့်မြင့်စားသုံးကုန်ကြမ်းအဖြစ် ဆက် လက်ရပ်တည်နေမည့် သီးနှံဖြစ်ပါသည်။ နောက်ဆုံးအနေဖြင့် စက်ရုံမှ ကုန်ကြမ်းအဖြစ် မဝယ်ခဲ့ လျှင်လည်း မြေပဲ၊ ကုလားပဲ၊ ပဲပိစပ်၊ စားတော်ပဲ၊ နေကြာ၊ သီဟိုဠ်စေ့များနေရာတွင် အစားထိုး အသုံးပြုနိုင်ပါသည်။

          ကြယ်ပဲပျှမ်းမျှတစ်ဧက စိုက်ပျိုးထုတ်လုပ်မှုကုန်ကျစရိတ်မှာ ကျပ် ၁၀ သိန်းခန့် ကုန်ကျ မည်ဖြစ်ပြီး ဝင်ငွေမှာ တစ်ဧကလျှင် (၅၀၀)ပင်x ပဲစေ့ထွက်နှုန်းတပင်(၄ ကီလို)x ၁၅၀၀ နှုန်းဖြင့် ခန့်မှန်းတွက်ချက်ပါက ပထမနှစ်တွင် ကျပ် ၇ သိန်း မှ နောင်နှစ်များတွင် ကျပ် သိန်း ၃၀ ခန့်အထိ ရရှိနိုင်သည့် ဝင်ငွေရနှစ်ရှည်သီးနှံတစ်မျိုးဖြစ်ပါသည်။ Contract Farming စနစ်ဖြင့် စိုက်ပျိုးလို သူများအတွက် နှစ် ၂၀ အထိ ပေါက်ဈေးအတိုင်း စာချုပ် ချုပ်ဆိုကာ လက်ခံဝယ်ယူပေးသည့် ကုမ္ပဏီများလည်းရှိသည်ဟု သိရပါသည်။ ယခုအခါတွင် ကြယ်ပဲမျိုးစေ့ ၁ ကီလို လျှင် ၂၀၀၀၀ ကျပ်၊ ကြယ်ပဲဆီ ၁ လီတာလျှင် ၃၀၀၀၀ ကျပ်၊ ကြယ်ပဲရေချိုးဆပ်ပြာရည် 200 ml လျှင် ၂၅၀၀ ကျပ် ကြယ်ပဲလက်ဖက်ခြောက် ၈၀ ဂရမ်ပါ တစ်ထုပ်လျှင် ၂၅၀၀ ကျပ်နှင့် ကြယ်ပဲအစေ့လှော် အသန့် ၃၂၀ ဂရမ်ပါ တစ်ထုပ်လျှင် ၃၀၀၀ ကျပ်နှုန်းဖြင့် ရောင်းချလျှက်ရှိကြောင်း ကြယ်ပဲများစိုက်ပျိုးကာ ထုတ်လုပ်ရောင်းချလျှက်ရှိသည် လုပ်ငန်းရှင် တစ်ဦး၏ ပြောကြား ချက်အရ သိရှိရပါသည်။ ထို့ကြောင့် ကြယ်ပဲသီးနှံသည် ကျေးလတ်ဒေသနေထိုင် သူများအတွက် ငွေကြေးများကို ယူဆောင်လာပေးသော သီးနှံဟုလည်းဆိုနိုင်ပါသည်။ ကြယ်ပဲသီးနှံသည် နှစ်ရှည် သီးနှံပင်တစ်မျိုးဖြစ်သောကြောင့် ကုန်စိမ်းဈေးကွက်မဟုတ်ဘဲ နိုင်ငံခြားဈေးကွက် ခိုင်မာစွာ ရရှိနိုင်ခြင်းတို့ကြောင့် စီးပွားဖြစ်စိုက်ပျိုးသင့်ပါကြောင်း အကြံပြု တင်ပြလိုက်ရပါသည်။

Source ;        မြန်မာ့ကြယ်ပဲစိုက်ပျိုးသူများအဖွဲ့

               တောင်ငူခရိုင်၊ ဖြူးမြို့နယ်တွင် ဆီထွက်သီးနှံများဖြစ်သည့် မြေပဲ၊ နှမ်းနှင့် နေကြာများ စိုက်ပျိုးလျှက်ရှိရာ နေကြာစိုက်ပျိုးထုတ်လုပ်မှုလျာထားချက်မှာ ဧက ၃၀၀ ဖြစ်ပြီး စိုက်ပျိုးနိုင်မှုမှာ ၃၆၀ ဧက ဖြစ်ပါသည်။ ဖြူးမြို့နယ်၊ ကျားသောင်ကျေးရွာအုပ်စုတွင် မတ်ပဲနှင့်တွဲကာ ပင်ကြား၊ တန်းကြားအနေဖြင့် စိုက်ပျိုးပြီး ယခုအချိန်မှာ စတင်ရိတ်သိမ်းနေချိန်ကာလ ရောက်ရှိလာပြီဖြစ်ကြောင်း သိရပါသည်။

              ကျားသောင်ကျေးရွာမှ နေကြာစိုက်တောင်သူတစ်ဦးက မြေပဲ၊ နှမ်း၊ နေကြာတို့ကို စိုက်ပျိုးကြောင်း၊ မိမိအနေဖြင့် နေကြာ ၃ ဧကအား မတ်ပဲတွေကြားတွင် တန်းကြားစိုက်ပျိုးကြောင်း၊ နေကြာနှင့် မတ်ပဲကို လေးတောင်ခြားတစ်တန်း စိုက်ရတာဖြစ်သဖြင့် မတ်ပဲလည်းရ၊ နေကြာလည်း ရကြောင်း၊ ယခုနှစ် နေကြာစိုက်ပျိုးပြီးချိန်တွင် မျိုးစေ့ကြဲပြီးနောက် မိုးရွာသဖြင့် မျိုးစေ့အကုန် မပေါက်ကြောင်း၊ ပေါက်လာသည့်အပင်ကလည်း အပင်ကြီးထွားနှုန်းနည်းကြောင်း၊ မိမိတို့ဒေသ ပုံမှန်ထွက်နှုန်းဆိုလျှင် နေကြာတစ်ဧကလျှင် ဆီ ၈ ပုံးမှ ၁၀ ပုံးခန့်အထိ ရကြောင်း၊ ဆီတစ်ပုံးလျှင် နေကြာ ၃ တင်းမှ ၅ တင်းကြိတ်ရကြောင်း၊ အဖျင်းများလျှင် ၅ တင်းကြိတ်မှ ဆီတစ်ပုံးရကြောင်း၊ မိမိတို့ဒေသမှ တောင်သူများမှာ နေကြာကို အစေ့အတိုင်းမရောင်းဘဲ ဆီကြိတ်ကြကြောင်း၊ စားတန် စား၊ ရောင်းတန်ရောင်းပါကြောင်း၊ မြေပဲဆီ၊ နှမ်းဆီနှင့်စာလျှင် နေကြာဆီသည် ဈေးအနည်းဆုံး ဖြစ်ကြောင်း၊ လက်ရှိတွင် မြေပဲဆီ ၁၀ ပိဿာပုံးတစ်ပုံးလျှင် ၉၀၀၀၀ ကျပ်ရှိပြီး နေကြာဆီ ၁၀ ပိဿာ ပုံးတစ်ပုံးလျှင် ၇၅၀၀၀ ကျပ်ရှိကြောင်း ပြောကြားပါသည်။

              မိမိတို့ဒေသတွင် နေကြာစိုက်ပျိုးမှု ပြန်လည်များပြားလာခဲ့ပြီး အခြားဆီထွက်သီးနှံများ ထက် ဝင်ငွေရရှိမှုနည်းသော်လည်း နေကြာစိုက်ရာတွင် အားသာချက်မှာ ပြုပြင်ရလွယ်ကူခြင်း၊ မတ်ပဲနှင့် တွဲစိုက်ပျိုးနိုင်ခြင်းများကြောင့်  ပိုမိုစိုက်ပျိုးနိုင်ရေး ဆောင်ရွက်သွားမည်ဖြစ်ကြောင်း ကျားသောင်ကျေးရွာမှ တောင်သူများထံမှ သိရှိရပါသည်။

DOCA(ပဲခူး)

          မကွေးတိုင်းဒေသကြီးသည် မြန်မာနိုင်ငံအလယ်ပိုင်းတွင်တည်ရှိပြီး ပူးပြင်းခြောက်သွေ့သော ဒေသဖြစ်၍ အပူပိုင်းသီးနှံများဖြစ်ပြီး ထနောင်း၊ ဆီးသီး၊ မန်ကျီးစသည့် သစ်ပင်ကြီးများ အလေ့ကျ ပေါက်ရောက်လျှက်ရှိရာ ယာခင်းခရိုးများတွင် အလေ့ကျပေါက်သော ဆီးပင်များနှင့် သီးနှံသစ်တော ရောနှောစိုက်ပျိုးထားသည့် ဆီးပင်များမှ တောင်သူများအတွက် တဖက်တစ်လမ်းမှ ဝင်ငွေများဖန်တီး ပေးလျှက်ရှိရာ မကွေးတိုင်းဒေသကြီး၊ သရက်ခရိုင်၊ သရက်မြို့နယ်ဦးစီးမှူးရုံးမှ ဒု-ခရိုင်ဦးစီးမှူး ဦးအုန်းမြင့် ဦးဆောင်သောအဖွဲ့သည် (၂၅.၃.၂၀၂၂)ရက်နေ့ (၀၉:၀၀)နာရီအချိန်တွင် သရက်မြို့နယ်၊ ကိုးပင်ကျေးရွာအုပ်စု၊ သရက်-မင်းတုန်းလမ်းဘေးရှိ ဆီးသီးအစို၊ အခြောက် အဝယ်ဒိုင်သို့ သွားရောက်၍ ဆီးသီးအစို၊အခြောက်ဝယ်ယူရရှိမှု၊ ပြန်လည်ရောင်းချမှု၊ ကြိတ်ခွဲထုတ်လုပ်မှုနှင့် တင်ပို့မှုအခြေအနေများ အား ကွင်းဆင်းမေးမြန်းဆောင်ရွက်ခဲ့ပါသည်။

           ဆီးသီးအဝယ်ဒိုင် ဦးကစ်စနား၏ ပြောကြားချက်အရ သရက်မြို့နယ်တွင် ဆီးသီးအဝယ်ဒိုင် (၂)ဒိုင်ရှိကြောင်း၊ မိမိအဝယ်ဒိုင်တွင် ဆီးသီးအခွံချွတ်စက် (၁)လုံးနှင့် ဆီးဆံခွဲစက်(၁)လုံးရှိကြောင်း၊  လုပ်သားအမျိုးသား(၃)ဦး၊ အမျိုးသမီး(၃)ဦးနှင့် မိသားစုဝင်(၅)ဦးဖြင့် လုပ်ငန်းလုပ်ကိုင်ဆောင်ရွက် လျှက်ရှိကြောင်း၊ အမျိုးသားတစ်ဦးလျှင် တနေ့လုပ်သားခ (၇၀၀ဝိ/-) နှုန်းပေးရကြောင်း၊ အမျိုးသမီး များမှာ ဆီးသီးခွဲခြမ်းများ ကိုဇကာချရပြီး (၁)ပိဿာလျှင် ၃၅ဝိ/-နှုန်းဖြင့်ပေးချေရကြောင်း၊ တနေ့လျှင် (၂၀-၃၀)ပိဿာခန့်ဆောင်ရွက်နိုင်သည့်အတွက် (၇၀၀၀မှ၁၀၀၀၀) ကြားဝင်ငွေရှိပါကြောင်း၊ ဆီးသီးအစို၊ အခြောက်များကို နှစ်စဉ်ဇန်နဝါရီလမှစတင်ပြီး ဧပြီလပထမပတ်လောက်ထိ ဝယ်ယူရရှိကြောင်း၊ သရက်မြို့နယ်၊ မင်းတုန်းမြို့နယ်၊ မင်းလှမြို့နယ်များမှလာရောက်ရောင်းချကြောင်း၊ ဆီးသီးအစိုများ အား (၇)ရက်ခန့်ခြောက်အောင်နေလှန်းရကြောင်း၊ နေလှန်းပြီးဆီးသီးခြောက်များအား ရေနှင့်ရော၍ အခွံချွတ်စက်ဖြင့် ကြိတ်ခွဲရာတစ်နေ့  ကြိတ်အားတင်း(၁၀၀၀)ခန့်ကြိတ်ခွဲနိုင်ကြောင်း၊ ဆီးသီးကြိတ်ဖတ် များကို စပါးခင်း၊ ကြက်သွန်ခင်းများတွင် မြေဩဇာအဖြစ် ပြန်လည်အသုံးပြုရန်အတွက် တောင်သူ များမှလာရောက်ဝယ်ယူကြောင်း၊ ဆီးသီးအစိုဖတ်(၁)တင်းလျှင်(၂၀ဝိ/-)ဖြင့် ရောင်းချရကြောင်း၊ ဓါတ်မြေဩဇာဈေးကြီးမြင့်သည့်အတွက် ထွက်သမျှအကုန်ရောင်းချရကြောင်း၊ ဆီးသီးခြောက်(၅)တင်း ကြိတ်ခွဲလျှင် ဆီးသီးအစေ့(၁)တင်းရရှိကြောင်း၊ ဆီးဆံရရှိရန်အခွံချွတ်ပြီးသား ဆီးစေ့(၁)တင်းအား ကြိတ်ခွဲရာတွင် အဆံ(၁)ပိဿာခန့်ထွက်ရှိပြီး ဆီးဆံ(၁)ပိဿာဈေးနှုန်းကို(၂၃၀၀ဝိ/-)ခန့်ဖြင့် ရောင်းချ ရပါကြောင်း၊ ဈေးကွက်အနေဖြင့် ဆီးဆံများကို မန္တလေး၊ မူဆယ်မြို့များသို့ တင်ပို့ရပါကြောင်း၊ ဆီးခွဲကြမ်း(၁)ပိဿာကို (၆၅)ကျပ်နှုန်းဖြင့် မလိုင်လုံးလုပ်ငန်း၊ ပဲကြော်၊ ပဲလှော်ဖိုများမှ လာရောက် ဝယ်ယူကြောင်း၊ ဆီးသီးအစေ့အခြောက်(၁)တင်းလျှင် ဆီးခွဲကြမ်း(၇)ပိဿာခန့်ထွက်ရှိကြောင်း၊ ဆီးသီးခြောက် ဆီးဆံခွဲစက်မရှိသောအဝယ်ဒိုင်မှလည်း ဆီးစေ့များကို အောင်လံမြို့သို့ တင်ပို့ရောင်းချရာ ဆီးသီးအစေ့ (၁)တင်းကို (၂၂၅၀ဝိ/-)ရရှိကြောင်း၊ အဝယ်ဒိုင်မှ ဆီးသီးအစို/အခြောက်များကို သီးသန့်မခွဲခြားဘဲ ရောနှောဝယ်ယူလျှက်ရှိရာ ယခင်နှစ်က ဆီးသီးတင်း(၃)သိန်း ကျော်ခန့်ဝယ်ယူရရှိ သော်လည်း ယခုနှစ်တွင်ရာသီဥတုအခြေအနေကြောင့် ဆီးသီးတင်း(၁)သိန်းခွဲခန့်သာ ဝယ်ယူရရှိကြောင်း၊  ယခင်နှစ် ဆီးသီးအစို/အခြောက်(၁)တင်း (၁၈၀ဝိ/-၂၀၀ဝိ/-)ခန့်ဖြင့် ဝယ်ခဲ့ရသော်လည်း ယခုနှစ်တွင် စတင်ထွက်ရှိသည့် ဇန်နဝါရီလမှစ၍ အစို/အခြောက်(၁)တင်းလျှင်(၂၈၀ဝိ/-၃၀၀ဝိ/-)ဖြင့်စတင် ဝယ်ယူ ခဲ့ပြီး ယခုလက်ရှိဈေးနှုန်းမှာ (၃၅၀ဝိ/-၄၀၀ဝိ/-)ပေးဝယ်ရပါကြောင်း၊ ယခုနှစ်ဝယ်ယူရရှိသော ဆီးသီး များမှာ အရွယ်အစားသေးငယ်ပြီး အဆံအထွက်နှုန်းနည်းကြောင်း၊ ဆီးသီးအထွက်အနေဖြင့် ယခင်နှစ်ကထက်နည်းသော်လည်း  ဆီးသီးဈေးနှုန်းမှာ ယခင်နှစ်ကထက်ဈေးကောင်း၍ တောင်သူများ အနေဖြင့် လည်းဝင်ငွေပိုမိုရရှိကြောင်း လေ့လာသိရှိရပါသည်။

           စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် Online စနစ်ဖြင့် အရောင်းဝယ်ပြုလုပ်လျက်ရှိကြောင်း သိရှိရပါသည်။ မတ်လ စတုတ္တပတ်တွင် ဖြစ်ပေါ်နေသော ပဲဈေးနှုန်းများမှာ ပဲတီစိမ်း(ကြီး)တစ်တင်းကျပ် ၃၅၀၀၀၊ ပဲစဉ်းငုံ တစ်တင်းကျပ် ၄၄၀၀၀၊ မတ်ပဲ တစ်တင်းကျပ် ၄၄၂၀၀၊ ကုလားပဲ ထိုင်ဝမ် တစ်တင်းကျပ် ၄၁၀၀၀၊ ကုလားပဲ 929 တစ်တင်းကျပ် ၄၁၅၀၀၊ ကုလားပဲ V2 တစ်တင်းကျပ် ၄၁၅၀၀၊ ကုလားပဲ V3,7 တစ်တင်းကျပ် ၄၁၃၀၀ ဈေးနှုန်းများဖြင့် အရောင်းအဝယ် ဖြစ်နေကြောင်း သိရပါသည်။

           ဂျုံဖြူသန့်တစ်တင်း ကျပ် ၃၄၀၀၀၊ ဂျုံနီ တစ်တင်းကျပ် ၃၁၀၀၀၊  ပဲကြီး(သစ်) တစ်တင်း ကျပ် ၅၃၀၀၀၊ ပဲနီလုံး ရိုးရိုး တစ်တင်းကျပ် ၄၁၀၀၀၊ ပဲနီလုံးကြား တစ်တင်းကျပ် ၄၁၅၀၀၊  ပဲပုတ်စေ့ တစ်တင်း ကျပ် ၄၇၇၀၀၊ ထောပတ်ပဲ တစ်တင်းကျပ် ၄၆၀၀၀၊  မြေထောက်ပဲ တစ်တင်းကျပ် ၅၅၀၀၀၊ အစေ့ထုတ်ပြောင်း(CP) တစ်တင်း ကျပ် ၁၈၃၀၀၊ ဆီထွက်သီးနှံများ ဖြစ်သော နှမ်းသီးနှံ ပေါက်ဈေးနှုန်း များမှာ နှမ်းညိုတစ်တင်းကျပ် ၅၃၀၀၀၊ နှမ်းနက်တစ်တင်းကျပ် ၅၇၀၀၀-၇၀၀၀၀၊ နှမ်းဖြူ တစ်တင်းကျပ် ၄၈၀၀၀-၅၈၀၀၀၊ မြေပဲလုံးဆံနီ တစ်ပိဿာ ကျပ်၃၇၀၀၊ မြေပဲလုံးဆံဖြူ တစ်ပိဿာကျပ် ၃၈၀၀၊ ပဲဖတ်တစ်ပိဿာကျပ် ၁၅၄၀၊ နှမ်းဖတ် တစ်ပိဿာကျပ် ၁၁၅၀၊ နေကြာဖတ် တစ်ပိဿာကျပ် ၉၅၀ ဈေးနှုန်းအသီးသီး ဖြင့် အရောင်းအဝယ်ဖြစ်နေကြောင်း သိရပါသည်။

             ယခုအပတ်ဈေးနှုန်းများမှာ ယခင်အပတ်နှင့် နှိုင်းယှဉ်လျှင် ပဲဈေးနှုန်းများမှာ အနည်းငယ်ဈေးကျ နေပြီး၊ ဆီထွက်သီးနှံ ဈေးနှုန်းများဖြစ်သော မြေပဲဆံနှင့် နှမ်းသီးနှံ ဈေးနှုန်းများမှာလည်း ပုံမှန် အရောင်း အဝယ်ဖြစ်နေကြောင်း သိရှိရပါသည်။

            မတ်လ တတိယပတ်တွင် မုံရွာဈေးကွက်သို့ (နွေ) ကြက်သွန်နီအသစ်များ ဝင်ရောက်မှုရှိနေပြီး၊ စစ်ကိုင်းတိုင်း ဒေသကြီး၊ ကျွဲရဲ၊ ကျောက်စစ်ပုံ၊ နဘူးတော၊ စုန်းချောင်းတို့မှ ပိဿာ (၃၀)ဝင်အိတ် ၂၀၀ခန့် ရက်ခြား အဝင် ရှိသည်။

            ဈေးနှုန်းများအနေဖြင့် ကြက်သွန်နီပွဲရုံ လက်ကားဈေးတစ်ပိဿာလျှင် (ကြီး၊ လတ်၊ သေး) ကျပ် ၇၀၀၊ ၆၅၀၊ ၆၀၀ နှုန်းရှိပြီး၊ လက်လီဈေးနှုန်းတွင် ( ကြီး၊ လတ်၊ သေး )ကျပ် ၁၀၀၀၊ ၈၀၀၊ ၇၀၀ နှုန်းတို့ဖြင့် ရောင်းဝယ်လျက်ရှိနေပါသည်။

         အရောင်းအဝယ်အနေဖြင့် (၂)ရက်လျှင်ကား(၁)စီးစာ ပိဿာ(၈၅၀၀)  ရန်ကုန်သို့ ပို့ ပေးရပါသည်။ ပြည်ပသို့ တရုတ်၊ အိန္ဒိယ၊ ဘင်္ဂလား၊ မြဝတီ၊ ထိုင်း၊ဗီယက်နမ်၊လာအိုသို့တင်ပို့ရပါသည်။ ရေလမ်းကြောင်း ဖြင့် ဟုမ္မလင်း၊ ခန္တီး ပိဿာ(၃၀)ဝင်အိတ်(၃)အိတ်ခန့် ရက်ခြားအရောင်းအဝယ်ဖြစ်ပြီး၊ ပြည်ပအနေဖြင့် မြဝတီသို့ ပိဿာချိန်(၃)သိန်းခန့်အရောင်းအဝယ်ဖြစ်ကြောင်း သိရပါသည်။