ပြည်တွင်းကုန်သွယ်မှုသတင်း

          အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဧပြီလ (၁)ရက်နေ့မှ ဧပြီလ (၇)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါတယ်။ ထိုသို့ဝင်ရောက် ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၅၀၀ မှ ၈၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၄၀၀ မှ ၇၀၀ အတွင်း၊ ပန်းဂေါ်ဖီ(ထုပ်)ကျပ် ၄၀၀ မှ ၅၀၀ အတွင်း၊ အာလူး(ပိဿာ)ကျပ် ၁၃၀၀ မှ ၂၃၀၀ အတွင်း၊ မုန်လာဥနီ(ပိဿာ) ကျပ် ၁၀၀၀ မှ ၁၅၀၀ အတွင်း၊ ရွှေဖရုံသီး(လုံး)ကျပ် ၁၀၀၀ မှ ၂၀၀၀ အတွင်း၊ ဗူးသီး(လုံး) ကျပ် ၆၀၀ မှ ၂၅၀၀ အတွင်း၊ မုန်ညှင်း(ထုပ်)(ပိဿာ)ကျပ် ၁၀၀၀ မှ ၁၅၀၀ အတွင်း၊ ကြက်သွန်နီ(ဆိပ်ဖြူ)ကျပ် ၅၀၀ မှ ၁၂၀၀ အတွင်း၊ ကြက်သွန်ဖြူ(ရှမ်း)(ပိဿာ) ၁၃၀၀ မှ ၂၃၅၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၄၃၀၀ မှ ၅၅၀၀ အတွင်း၊ ချင်း(ပိဿာ)ကျပ် ၅၀၀ မှ ၁၁၀၀ အတွင်း၊ ဆလပ်ရွက်(စီး)ကျပ် ၆၀ မှ ၁၂၀ အတွင်း၊ ချဉ်ပေါင်ရွက်(စီး) ကျပ် ၉၀ မှ ၁၀၀ အတွင်း၊ ခရမ်းသီး(ရှည်)(ပိဿာ)ကျပ် ၉၀၀ မှ ၁၃၀၀ အတွင်း၊ သံပရာသီး(လုံး)ကျပ် ၈၀ မှ ၁၅၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ) ၁၀၀၀ မှ ၁၄၅၀ အတွင်း၊ ဖရဲသီး(အကြီး၊ အလတ်၊ အသေး)ကျပ် ၃၀၀၀ မှ ၆၀၀၀ အတွင်း ဖြစ်ကြောင်း သိရှိရပါတယ်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီးအလုံးပေါင်း (၁၀၉၅၀၀)ကျော်၊ ခရမ်းသီး(ရှည်)(လုံး) (၁၀၈၅၂)ကျော်၊ ဗူးသီးအလုံးပေါင်း (၄၂၃၀)ကျော်၊ ရွှေဖရုံသီးအလုံးပေါင်း (၅၃၀၀)ကျော်၊ ဂေါ်ဖီထုပ်ပေါင်း (၃၆၆၀၀)ကျော်၊ ပန်းဂေါ်ဖီထုပ်ပေါင်း (၁၄၀၀၀)ကျော်၊ မုန်ညှင်းထုပ်(ပိဿာ)ပေါင်း (၁၄၈၉၅)ကျော်၊ ဖရဲသီးလုံးပေါင်း (၁၆၇၀၀)ကျော် အသီးသီးကုန်အဝင်ရှိကြောင်း သိရပါတယ်။

DOCA(ရန်ကုန်)

          စစ်ကိုင်းတိုင်းဒေသကြီး၊ မုံရွာမြို့၌ ကြက်ဥအရောင်းဒိုင်‌ (၁၀) ဒိုင်ကျော်ရှိရာ ကိုဗစ်ကာ-၁၉ ကာလ ပထမလှိုင်းမှစ၍ ၂၀၂၂ ခုနှစ်၊ မတ်လကုန် အထိ ကြက်ဥစားသုံးမှုများလာသည့်အတွက် မုံရွာကြက်ဇုန်မှ ထွက်ရှိသော ကြက်ဥများဖြင့် ရောင်းချရန် လုံလောက်မှုမရှိ၍ ဈေးကွက်လိုအပ်ချက်အရ ကျောက်ဆည်၊ မြစ်သားမြို့များရှိ ကြက်ဇုန်များအထိ နှစ်ရက်ခြားသွားရောက်၍ ဝယ်ယူရောင်းချကြရကြောင်း သိရှိရသည်။

           ကြက်ဥတစ်ကဒ်တွင် အလုံး(၃၀) ပါရှိပြီး (၁၀)ကဒ်တွဲ တစ်စီးတွင် အလုံး(၃၀၀) ပါရှိကြောင်း၊ ကြက်ဥကိုပိဿာချိန်ဖြင့် ရောင်းချကြကြောင်း အရွယ်အစားပေါ် မူတည်၍ တစ်ပိဿာလျှင် (၂၂)လုံးမှ (၃၀) လုံးအထိပါရှိကြောင်း သိရသည်။ ကိုဗစ်-၁၉ ပထမလှိုင်း မတိုင်မီက ကြက်ဥတစ်ပိဿာလျှင် (၂၀၀၀) ကျပ်မှ (၂၅၀၀)ကျပ်ဈေးရှိခဲ့ပြီး ယနေ့ ဈေးကွက်တွင် လက်ကားတစ်ပိဿာ (၃၅၀၀)ကျပ်နှုန်း၊ လက်လီတစ်ပိဿာ (၃၉၀၀)ကျပ် ပေါက်ဈေး ဖြစ်ပေါ်နေပြီး မြို့တွင်းလက်လီလက်ကားဈေးဆိုင်များ၊ စားသောက်ဆိုင်များ၊ မုန့်လုပ်ငန်းရှင်များသို့ ရောင်းချရသလို နယ်ဈေးကွက်အားဖြင့် ယင်းမာပင်၊ ဆားလင်းကြီး၊ ကနီ၊ ဘုတလင်၊ စိုင်ပြင်၊ ရေဦး၊ တန့်ဆည်၊ အရာတော်မြို့နယ်များမှ နေ့စဉ်အဝင်ရှိ၍ အရောင်းအဝယ်သွက်လျက်ရှိသည်ဟု ကြက်ဥ အရောင်းဒိုင်များမှ သိရှိရသည်။

DOCA(စစ်ကိုင်း)

            ဧရာဝတီတိုင်းဒေသကြီးသည် စိုက်ပျိုးရေးကိုအခြေပြုပြီး အသေးစားအိမ်တွင်း စက်မှုလက်မှုလုပ်ငန်းများ ဖွံ့ဖြိုးတိုးတက်အောင် ဆောင်ရွက်လျက်ရှိသော တိုင်းဒေသကြီးတစ်ခု ဖြစ်ပါသည်။ ဧရာဝတီတိုင်း‌ဒေသကြီးအတွင်းတွင် အကြီးစားစက်မှုလက်မှု လုပ်ငန်း(၄၁)ခု၊ အလတ်စားစက်မှုလက်မှုလုပ်ငန်း(၆၁)ခု၊ အသေးစားစက်မှုလက်မှုလုပ်ငန်း (၃၄၁)ခု ရှိပါသည်။ ထိုအသေးစားစက်မှုလက်မှုလုပ်ငန်းများတွင် ဧရာဝတီတိုင်းဒေသကြီးအတွင်း ပြည်တွင်း မုန့်လုပ်ငန်းများအတွက် အရောင်းအဝယ်ဖြစ်နေသည့် (ကော်ပြန့်စိမ်းရွက်) ထုတ်လုပ်ပုံအား တင်ပြလိုက်ပါသည်။

          (ကော်ပြန့်စိမ်းရွက်)အား လက်ဖက်ရည်ဆိုင်၊ မုန့်ဆိုင်များတွင် စမူဆာ၊ ကော်ပြန့်စိမ်းနှင့် အခြားအသားအရွက်များဖုံးအုပ်၍ ကော်ပြန့်ကြော်ပြုလုပ်၍  ပြည်သူများစားသုံးရန် နေ့စဉ် အသုံးပြုနေသော ပစ္စည်းဖြစ်ပါသည်။ ပြုလုပ်ပုံမှာ ဂျုံမှုန့်အား ရေစိမ်၍ စက်ဖြင့် ပျော့ပျောင်းအောင် ပြုလုပ်ပြီး ရရှိသော ဂျုံဖက်အား လျှပ်စစ်ဓါတ်အားဖြင့် ကွိုင်ကို အပူပေးထားသော မီးခံသံပြားတွင် အဝိုင်းပြားသဏ္ဍာန်ပါးပါးလက်ဖြင့် ဆွဲ၍ တင်ကာ ခေတ္တအပူပေးခြင်းဖြင့် အဆိုပါ(ကော်ပြန့်စိမ်း)ရွက်အား ရရှိပါသည်။

          ဂျုံတစ်အိတ်(၂၄)ပိဿာလျှင် အဆိုပါကော်ပြန့်စိမ်းရွက်များ(၃၀၀၀)ခန့်ရရှိပါသည်။ ဂျုံ တစ်အိတ်စျေးနှုန်းမှာ (၇၀၀၀ဝိ/-)ခန့်ဖြစ်ပြီး ကော်ပြန့်စိမ်းရွက်တစ်ရွက်လျှင် (၄၀ဝိ/-)ခန့်ဖြင့် အရွက်(၁၀၀)အထုပ်များထုပ်၍ မုန့်ဆိုင်များသို့ တင်ပို့ရောင်းချကြောင်းသိရှိရပါသည်။ အဆိုပါ အသေးစားစက်မှုလက်မှုလုပ်ငန်းမှ တစ်နေ့လျှင် ဂျုံ(၂)အိတ်မှ(၃)အိတ်ခန့်ကုန်ပြီး တစ်နေ့ လျှပ်စစ်မီတာခ(၃၀၀၀ဝိ/-)ခန့်၊ လုပ်သား(၅)ဦး၊ မနက်စာ/ညစာထမင်းကျွေးပြီး နေ့တွက်ငွေ (၄၀၀၀ဝိ/-)ခန့်ကုန်ကြောင်း၊ အဆိုပါကော်ပြန့်စိမ်းများအား ဧရာဝတီတိုင်းအတွင်းရှိ ငွေဆောင်၊ ချောင်းသာ၊ သာပေါင်း၊ ပုသိမ်မြို့များသို့ နေ့စဉ်တင်ပို့ရောင်းချနေပြီး အိမ်တွင်း အသေးစားစက်မှုလက်မှုလုပ်ငန်းမှ မိသားစုအတွက် နေ့စဉ် သိန်းဂဏန်းခန့် ဝင်ငွေရရှိနေသော တစ်နိုင်တစ်ပိုင် စီးပွားရေးလုပ်ငန်းတစ်ခုဖြစ်ပါကြောင်း လေ့လာတင်ပြလိုက်ပါသည်။

DOCA(ဧရာဝတီ)

          စစ်ကိုင်းတိုင်းဒေသကြီး၊ မုံရွာမြို့နယ်၊ ကျောက်ဆစ်ပုံ(မြောက်)ကျေးရွာတွင် လွန်ခဲ့သောနှစ်(၆၀)ခန့်ကတည်းက မိရိုးဖလာ လက်ရက်ကန်းများဖြင့် အသက်မွေးဝမ်းကြောင်းပြုခဲ့ကြရာမှ ယခုအချိန်တွင် အိန္ဒိယနိုင်ငံ မီဇိုရမ်ပြည်နယ်သို့ သွားရောက်၍ ရက်ကန်းရက်လုပ်သင်ယူခဲ့ပြီး ဈေးကွက်တန်းဝင် (မ) ဝတ်လုံချည်များ ရက်လုပ်ရောင်းချလျက် ရှိကြောင်းသိရသည်။ ကျေးရွာအတွင်းရှိ အိမ်တိုင်းတွင် လက်ရက်ကန်းစင်များရှိကြပြီး အဓိကကုန်ကြမ်းများဖြစ်ကြသည့် ၂/၄၀ ချည်နှင့် ပိုးချည်တို့ကို မုံရွာမြို့နှင့် ကလေးမြို့တို့မှ ဝယ်ယူရရှိပြီး ၂၀၁၉ ခုနှစ်က အိန္ဒိယချည်ထုတ် တစ်ထုပ်လျှင် ၂၄၀၀၀ ကျပ်၊ ပိုးချည် (ပန်းချည်) တစ်ထုပ်လျှင် (၇၀၀၀) ကျပ် ရှိရာမှ ၂၀၂၂ ခုနှစ်၊ မတ်လတွင် အိန္ဒိယချည်ထုပ် တစ်ထုပ် လျှင် (၄၂၀၀၀) ကျပ်၊ ပိုးချည်(ပန်းချည်) တစ်ထုပ် လျှင် (၁၁၀၀၀) ကျပ်ဖြင့် ဝယ်ယူရက်လုပ်ကြကြောင်း၊ တရုတ် ချည်ထုပ် တစ်ထုပ်ကို ၂၀၁၉ ခုနှစ်က (၂၀၀၀၀‌) ကျပ်ရှိခဲ့ရာမှ ယခုအခါ (၄၀၀၀၀) ကျပ်ဈေး ဝယ်ယူခဲ့ရသည်ဟု သိရှိရသည်။

           ကျောက်ဆစ်ပုံ (မြောက်)ကျေးရွာတွင် ယခင်က ရက်ကန်းစင်ပေါင်း (၃၀၀) ကျော်ရှိခဲ့ရာ ကုန်ကြမ်းဈေးကြီးမြင့်မှုကြောင့် လက်ရှိအချိန်တွင် ရက်ကန်းစင် (၁၀၀) ခန့်သာရက်လုပ်နိုင်သည်ဟု သိရှိရသည်။ အိုက်ဇောလုံချည်၊ ချင်းရိုးရာအဆင်၊ ကချင်ရိုးရာအဆင်၊ သက်မွန်မြင့်အဆင်၊ ချိတ်အဆင်၊ ဗွီမိတ်အဆင်များသာမက ဒီဇိုင်းမျိုးစုံ တီထွင် ရက်လုပ်ကြပြီး ရိုးရိုးရက်လုပ်ခတစ်ကွင်း ၁၈၀၀၊ ၂၀၀၀ ကျပ်ရရှိပြီး တစ်နေ့(၂) ကွင်းပြီးစီးကြောင်း၊ (မ)ဝတ်လုံချည် ရိုးရိုးဒီဇိုင်းတစ်ကွင်း ၅၀၀၀ ကျပ်မှ ၈၀၀၀ ကျပ်ထိ‌ ရောင်းချရသလို ဒီဇိုင်းဆန်းအဆင်များကို (၁)ရက်ကြာ ရက်လုပ်ရပြီး (၂၀၀၀၀)ကျပ် (၃၀၀၀၀) ကျပ်နှုန်းဖြင့်ရောင်းချရကြောင်း၊ ပြည်ပဈေးကွက်၌ အိန္ဒိယ၊ မလေးရှား၊ ထိုင်းနှင့် စင်္ကာပူနိုင်ငံထိရောင်းချရသလို ပြည်တွင်းဈေးကွက်အနေဖြင့် ကလေး၊ မြစ်ကြီးနား၊ ရန်ကုန်၊ မန္တလေး၊ ရွှေဘိုမြို့ရှိ အထည်ဆိုင်များသို့ မုံရွာအထည်ဒိုင်မှတဆင့် ဖြန့်ဖြူးရောင်းချရကြောင်း သိရှိရသည်။ ရက်လုပ်ကြသော ရိုးရာအဆင်များကို ရာသီမပြတ် အဝယ်ရှိ၍ ကျောက်ဆစ်ပုံ(မြောက်)ကျေးရွာမှ (မ)ဝတ်လုံချည်များ အရောင်းသွက်ဈေးကွက်ဝင်နေကြောင်း ရက်ကန်းလုပ်ငန်းရှင်များထံမှ သိရှိရသည်။

DOCA(စစ်ကိုင်း)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူးရုံးမှ ဟင်္သာတမြို့နယ် တာဝန်ခံဦးမိုးကျော်နှင့် မြို့နယ်အထွေထွေအုပ်ချုပ်ဦးစီးဌာန၊ မြို့နယ်စည်ပင်တို့နှင့်ပူးပေါင်း၍ (၁.၄.၂၀၂၂) ရက်နေ့ နံနက်(၉:၀၀)နာရီအချိန်တွင်           မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်းစီစဉ်မှုဖြင့် စားသုံးသူပြည်သူများကို သက်သာသောဈေးနှုန်းဖြင့် ဝယ်ယူရရှိနိုင်ရန်ရည်ရွယ်၍ ဗဟိုဘဏ်မှ ရည်ညွှန်းငွေလဲနှုန်းဖြင့် တိုက်ရိုက်ရောင်းချပေးသည့် နိုင်ငံခြားငွေ အမေရိကန်ဒေါ်လာဖြင့် ပြည်ပမှ မှာယူတင်သွင်းခဲ့သည့် စားအုံးဆီများအား ဟင်္သာတမြို့အတွက်ခွဲတမ်းရောင်းချခွင့်ရ စားသုံးဆီများအနက်မှ ဟင်္သာတမြို့နယ်၊ ဆင်းဧကရီလမ်းရှိ ငြိမ်းချမ်းကုန်စုံဆိုင်အားလည်းကောင်း၊ နတ်မော်လမ်းရှိ စိန်တောင်ဆီစက်မှလည်းကောင်း စားအုန်းဆီ(၄၉၅၀)ပိဿာများကို (၁.၄.၂၀၂၂) ရက်နေ့မှစ၍ တစ်ပိဿာလျှင် ၅၉ဝဝ ကျပ် သက်သာသော ဈေးနှုန်းဖြင့် ရောင်းချပေးလျှက်ရှိပြီး ရောင်းချနေသော စားသုံးဆီများကို အလေးချိန်နှင့် ဈေးနှုန်းမှန်ကန်မှုရှိစေရေး၊ စားသုံးသူစိတ်ကျေနပ်မှုရှိစေရေးတို့အတွက် ကွင်းဆင်းစစ်ဆေးဆောင်ရွက်ခဲ့ကြကြောင်း သိရှိရပါသည်။

DOCA(ဧရာဝတီ)