ပြည်တွင်းကုန်သွယ်မှုသတင်း

   စွန်ပလွန်သီးဟာ အရှေ့အလယ်ပိုင်းနိုင်ငံတွေရဲ့ အဓိကအစားအစာ တစ်မျိုးအဖြစ် နှစ်ပေါင်း များစွာ စားသုံးခဲ့ကြပါတယ်။ စွန်ပလွန်ပင်သည် အုန်းပင်၊ထန်းပင်မျိုးတို့ အမျိုးအစားတွင် ပါဝင်၍ ရာသီဥတု ပူပြင်းခြောက်သွေ့သောဒေသများတွင်ပေါက်ရောက်ပြီး အပန်းဖြေရန် အရိပ်ကောင်းပေးသည့် အပင်ဖြစ်သည်။စွန်ပလွန်ပင်သည် လှပတင့်တယ်သော သစ်ပင်မျိုးဖြစ်၍ အချို့နိုင်ငံများတွင် စွန်ပလွန်ပင်များကို အလှအပသက်သက်ဖြင့် စိုက်ပျိုးထားကြသည်။

     လူကြိုက်များပြီး ဒေသဈေးကွက်နှင့်နိုင်ငံတကာဈေးကွက်တို့တွင် ရောင်းချနိုင်သောကြောင့် စီးပွားဖြစ်စိုက်ပျိုးသူတို့အတွက် အကျိုးကျေးဇူးများစွာရရှိနိုင်သောအပင်ဖြစ်ပါသည်။ ယခုအခါတွင် စွန်ပလွန်သီးအမျိုးအစား အများအပြားရှိလာရာမှ အရောင်အသွေးနှင့် အရသာများလည်း ကွာခြားလျက်ရှိလာပါသည်။ လတ်ဆတ်သော စွန်ပလွန်သီးများကို ပြည်တွင်းတွင် ရောင်းချကြသလို အစားအသောက်ပြုပြင်ရောင်းချသည့်ကုမ္ပဏီများသို့ရောင်းချပြီး ကုန်တိုက်နှင့် စျေးများသို့ တင်ပို့ ရောင်းချကြသည်။ စွန်ပလွန်သီး(10kg) တစ်ပုံးလျှင်(၈၀၀၀၀) ကျပ်မှ(၁၀၀၀၀၀)ကျပ်အထိ ဈေးရှိကြောင်းနှင့် ထိုင်း၊မလေးရှားစသည့် နိုင်ငံများမှတဆင့် မြန်မာနိုင်ငံသို့ ဝင်ရောက်လျက်ရှိကြောင်း သိရှိရသည်။ ၎င်းတွင် ထူးခြားသောအရသာနှင့် ကျန်းမာရေး အကျိုးကျေးဇူးကြောင့် စွန်ပလွန်သီးကို နိုင်ငံအနှံ့အပြားတွင် စားသုံးကြကြောင်း လေ့လာသိရှိရပါသည်။

DOCA(တနင်္သာရီ)

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့သစ်သီးဈေးကွက်သို့ ဩဂုတ်လ ပထမပတ်အတွင်း မင်းကွတ်သီးနှင့် ကြက်မောက်သီးများ ဝင်ရောက်မှု လျော့နည်းလာကြောင်း၊ မင်းကွတ်သီးများသည် မော်လမြိုင်ဒေသထွက်နှင့် မန္တလေးတိုင်းဒေသကြီးမှလည်း ဝင်ရောက် ကြောင်းသိရှိရသည်။ ၂၀၂၅ ခုနှစ်၊ ဩဂုတ်လ ပထမပတ်အတွင်း ကန့်ဘလူမြို့သစ်သီးဈေးကွက် တွင်မင်းကွတ်သီး အကြီး(၁)လုံးလျှင် (၅၀၀)ကျပ်၊ အသေး(၁)လုံး(၄၀၀)ကျပ် တို့ဖြင့်ရောင်းချ ကြောင်း၊ ဩဂုတ်လ ပထမပတ်အတွင်း ကြက်မောက်သီး အသေး(၁)လုံးလျှင် (၃၀၀)ကျပ်၊ အကြီး (၁)လုံးလျှင် (၅၀၀)ကျပ်နှင့် (၁၀)လုံးလျှင် (၄၈၀၀)ကျပ် တို့ဖြင့်ရောင်းချလျက်ရှိပြီး ယခုပတ်အတွင်း မင်းကွတ်သီးနှင့် ကြက်မောက်သီးများ အရောင်းသွက်လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)

  စစ်ကိုင်းတိုင်းဒေသကြီးသည် မြန်မာအမျိုးသမီးများ ကြိုက်နှစ်သက်စွာ အသုံးပြုနေကြသည့် သနပ်ခါးပင်များ စိုက်ပျိုးထွက်ရှိရာ ဒေသတစ်ခုဖြစ်ကြောင်း သိရသည်။ မြန်မာ့သနပ်ခါးသည် ကဗျာ၊ သီချင်းများ စပ်ဆိုရသည်အထိ ထင်းရှားပြီး၊ ရှေးယခင်ကပင် သနပ်ခါးကို နန်းတွင်းအလှကုန်အဖြစ် အသုံးပြုခဲ့ကြောင်း၊ မြန်မာ့ရိုးရာ အလှတရားတွင် သနပ်ခါးသည် အရေးပါသောအခန်းကဏ္ဍတွင် ပါဝင်ပြီး အမျိုးသမီးများသည် မျက်နှာတွင် သနပ်ခါးဖြင့် အလှဆင်လေ့ရှိကြောင်း သိရှိရပါသည်။

      မြန်မာနိုင်ငံတွင် သနပ်ခါးသည် သဘာဝအလှကုန်ပစ္စည်းအဖြစ် ဈေးကွက်တွင် အရေးပါပြီး နိုင်ငံတကာတွင်လည်း စိတ်ဝင်စားမှုများလာကြောင်း၊ သနပ်ခါးသည် ကျန်းမာရေးနှင့် အလှအပတို့ အတွက် တန်ဖိုးမဖြတ်နိုင်သော သဘာဝလက်ဆောင်တစ်ခုဖြစ်ပြီး၊ ကန့်ဘလူမြို့မဈေးတွင် ရောင်းချ နေသော သနပ်ခါးတုံးများသည် ကန့်ဘလူခရိုင်အတွင်းမှ ထွက်ရှိသလို၊ ရွှေဘိုမြို့ရှိ လက်လီ၊လက္ကား သနပ်ခါးတုံး အရောင်းဆိုင်များမှလည်း ဝယ်ယူရောင်းချကြောင်း၊ ဩဂုတ်လ ပထမပတ်အတွင်း မြန်မာ့ရိုးရာသနပ်ခါး(၁)တုံးလျှင် (၅၀၀၀မှ ၆၀၀၀)ကျပ်၊ အသေး(၁)တုံးလျှင် (၂၀၀၀)ကျပ်နှင့် (၃) တုံးလျှင် (၅၀၀၀)ကျပ်ဖြင့် ရောင်းချလျက်ရှိရာ အရွယ်အစားနှင့် အရည်အသွေးပေါ်မူတည်၍ ဈေးနှုန်းများကွာခြားကြောင်း လုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

 စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် သီးနှံမျိုးစုံစိုက်ပျိုးလျက်ရှိရာ စားဖိုဆောင်သီးနှံများကို ရာသီချိန်အလိုက် စိုက်ပျိုးကြကြောင်း၊ မုန့်ညှင်းရွက်ကို မြို့ပေါ်ရပ်ကွက်များတွင်သာမက ကန့်ဘလူမြို့နယ်အတွင်းရှိ ကျေးရွာများတွင်လည်း မိမိတို့နေအိမ်ခြံဝင်းများ၊ ယာကွက်များတွင် တစ်နိုင်တစ်ပိုင် စိုက်ပျိုးကြကြောင်း သိရှိရသည်။

    ၂၀၂၅ ခုနှစ်၊ ဩဂုတ်လ ပထမပတ်အတွင်း ကန့်ဘလူမြို့မဈေးတွင် မုန့်ညှင်းချဉ် (၁)ပုဂံလျှင် (၃၀၀)ကျပ်၊ (၂)ပုဂံလျှင် (၅၀၀)ကျပ်ဖြင့်လည်းကောင်း၊ ဩဂုတ်လ ပထမပတ်အတွင်း မုန့်ညှင်း ရွက်လက်လီ(၁)စီးလျှင် (၃၀၀)ကျပ်၊ (၁၀) စီးလျှင် (၂၈၀၀)ကျပ်ဖြင့်လည်းကောင်း  လက္ကား(၂)စီး လျှင် (၅၀၀)ကျပ်နှင့် မုန့်ညှင်းရွက်(၄)စီးလျှင် (၁၀၀၀)ကျပ်ဖြင့် ရောင်းချကြောင်း၊ စားသောက်ဆိုင် များ၊ ထမင်းဆိုင်များစသည့်တို့မှ နေ့စဉ်ဝယ်ယူသည့်အတွက် အရောင်းအဝယ်ဖြစ်လျက်ရှိကာ မိသားစုအပိုဝင်ငွေရရှိကြောင်း  ဟင်းသီးဟင်းရွက် ရောင်းချသူထံမှ သိရှိရပါသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ ကန့်ဘလူမြို့နယ်သည် စိုက်ပျိုးရေးလုပ်ငန်းကို အဓိကလုပ်ကိုင်ပြီး လယ်ယာထွက်ကုန်သီးနှံများအပြင် ဥယျာဉ်ခြံသီးနှံများကိုလည်း တစ်နိုင်တစ်ပိုင် စိုက်ပျိုးကြ ကြောင်းသိရသည်။ မြန်မာနိုင်ငံ၌ စိုက်ပျိုးလျက်ရှိသော နဂါးမောက်မျိုးများမှာ အပြင်အခွံအနီ ရောင်နှင့် အတွင်းသားအဖြူရောင်ရှိသောမျိုး၊ အပြင်ခွံအနီရောင်နှင့် အတွင်းသားအနီရောင်ရှိ သောမျိုး၊ အပြင်ခွံအဝါရောင်နှင့် အတွင်းသားအဖြူရောင်ရှိသောမျိုးတို့ ဖြစ်ကြောင်း သိရသည်။

       ကန့်ဘလူမြို့နယ် ဆိတ်ဖူးမြောင်ကျေးရွာ၊ အင်ကြင်းစုကျေးရွာနှင့် အခြားကျေးရွာများတွင် နဂါးမောက်သီးများကို တစ်နိုင်တစ်ပိုင်စိုက်ပျိုးကြရာ ယခုအချိန်သည် နဂါးမောက်သီး ခူးဆွတ် ရာသီဖြစ်သောကြောင့် ဈေးကွက်အတွင်းလှိုင်လှိုင် ဝင်ရောက်လျက်ရှိကြောင်း၊ နဂါးမောက်သီး သည် မေလမှ အောက်တိုလာလအထိ (၇-၈)ကြိမ်ခန့်ခူးဆွတ်ရပြီး တစ်နှစ်လျှင် (၅-၆)လခန့် ဝင်ငွေရရှိနေသော စီးပွားရေးတွက်ခြေကိုက်သည့် ဥယျာဉ်ခြံထွက် သီးနှံတစ်ခုဖြစ်ကြောင်း၊  ဩဂုတ်လ ပထမပတ်အတွင်း ကန့်ဘလူမြို့ သစ်သီးဈေးကွက်တွင် ရောင်းချနေသော နဂါးမောက် သီးဈေးနှုန်းများမှာ အသေးတစ်လုံးလျှင် (၅၀၀မှ ၁၀၀၀)ကျပ်နှင့် အကြီးတစ်လုံးလျှင် (၁၂၀၀မှ ၁၅၀၀) ကျပ်ဖြင့် အရောင်းအဝယ်ဖြစ်လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)