ပြည်တွင်းကုန်သွယ်မှုသတင်း

  မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ကြက်သွန်နီသီးနှံကို အဓိက သီးနှံအဖြစ် နှစ်စဉ်စိုက်ပျိုးလျက်ရှိပြီး မြို့ပေါ်ရှိ ကြက်သွန်နီကုန်စည်ဒိုင်နှင့် ပွဲရုံဈေးကွက်တွင် နေ့စဉ် အ‌ရောင်းအဝယ်ဖြစ်လျက်ရှိသည်။ ၂၀၂၅ခုနှစ်၊ ဇူလိုင်လ(ဒုတိယပတ်)တွင် ကြက်သွန်နီဈေးငြိမ်၍ အရောင်းအဝယ်ဖြစ်လျက်ရှိပါသည်။ ဈေးကွက်သို့ စိုက်ပျိုးမှုများသော တပေါင်၊ ကံတွင်း၊ အုန်းမင်၊ ကဇွဲ၊ ဆင်နီတောင်၊ ဆင်လမ်းချောင်း၊ ကူရှည်ကျေးရွာများမှ အများဆုံးဝင်ရောက်ပြီး တစ်ရက်လျှင် ကြက်သွန်နီပျမ်းမျှ ကုန်ချိန်ပိဿာ(၁)သောင်းခွဲခန့် ဝင်ရောက်ကြောင်း ကုန်စည်ဒိုင် ဈေးကွက်မှ သိရှိရသည်။ ဈေးနှုန်းအနေဖြင့် ၂၀၂၅ခုနှစ်၊ ဇူလိုင်လ(ဒုတိယပတ်)တွင် အရောင်းအဝယ် ဖြစ်သော ကြက်သွန်နီ ဈေးနှုန်းမှာ သီးနှံအရည်အသွေးလိုက်၍ တောဈေး(ဂျွန်) တစ်ပိဿာလျှင် အမြင့်ဈေး ကျပ်(၁၀၀၀)၊ အလတ်ဈေး ကျပ်(၉၀၀)၊ အနိမ့်ဈေး ကျပ်(၈၀၀)ဖြင့် အရောင်းအဝယ်ဖြစ်ကြောင်း၊ (ပထမပတ်)နှင့် ဈေးနှုန်းနှိုင်းယှဉ်ပါက ဈေးကျ၍ အရောင်းအဝယ်ဖြစ်ကြောင်း၊ ပွဲရုံများမှ ကြက်သွန်နီများကို ပြန်လည်သန့်စင်ပြီး ရောင်းချသော ဈေးနှုန်းမှာ ကြက်သွန်နီတစ်ပိဿာလျှင် အမြင့်ဈေး (ရှယ်)ကျပ်(၁၆၀၀)၊ လတ်ကြီးတစ်ပိဿာလျှင် ကျပ်(၁၅၀၀)၊ လတ်ချောတစ်ပိဿာလျှင် ကျပ်(၁၄၀၀)၊ လတ်သန့် တစ်ပိဿာလျှင် ကျပ်(၁၃၀၀)၊ အသေးစ တစ်ပိဿာလျှင် ကျပ်(၁၂၀၀) ဈေးအသီးသီးဖြင့် ဒေသအနှံ့အပြားသို့ ဖြန့်ဖြူးရောင်းချလျက်ရှိကြောင်း၊ ဆိပ်ဖြူမြို့ ပတ္တမြားဈေး အတွင်း အရောင်းအဝယ်ဖြစ်သော လက်လီဈေးနှုန်းမှာ အရည် အသွေး၊ အရွယ်အစားလိုက်၍ တစ်ပိဿာလျှင် ကျပ် (၁၅၀၀- ၁၃၀၀- ၁၀၀၀) ဈေးဖြင့် အရောင်း အဝယ်ဖြစ်ကြောင်း သိရှိရသည်။ ပြည်တွင်းဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့် နောင် ပွဲရုံသို့ ကုန်ချိန် အများဆုံးတင်ပို့ပြီး ပြည်ပဈေးကွက်သို့ တင်ပို့မှုနည်းကြောင်း၊ ဇူလိုင်လ (ဒုတိယပတ်)တွင် ကြက်သွန်နီ ကုန်ချိန်ပိဿာ(၁)သိန်းခန့်၊ တန်ချိန်အားဖြင့် (၁၆၃)တန်ခန့် ကုန်စည်စီးဆင်းခဲ့ကြောင်း ဈေးကွက်မှ သိရှိရသည်။

DOCA( မကွေး)

   မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့  ကုန်စိမ်းသီးနှံဈေးကွက်တွင် စားသုံးသူများ ဝယ်ယူသုံးစွဲလျက်ရှိသည့် ကြက်သွန်ဖြူသီးနှံများ ၂၀၂၅ခုနှစ်၊ ဇူလိုင်လ(ဒုတိယပတ်) တွင် ဈေး အနည်းငယ်မြင့်တက်၍ အရောင်းအဝယ်ဖြစ်ကြောင်း သိရှိရသည်။ စိုက်ပျိုးမှုအနေဖြင့် မကွေးတိုင်း ဒေသကြီး အအေးပိုင်းဒေသများဖြစ်သည့် ဆော၊ ကျောက်ထု၊ ပေါက်ဒေသများတွင် အများဆုံး စိုက်ပျိုးကြောင်း၊ ယခုအချိန်တွင် ပခုက္ကူဈေးကွက်သို့  ယောဒေသထွက် ကြက်သွန်ဖြူများ ဝင်ရောက်ပြီး ဈေးမြင့်၍ အရောင်းအဝယ် ဖြစ်ကြောင်း  သိရှိရသည်။

       ဈေးနှုန်းအနေဖြင့် ၂၀၂၅ခုနှစ်၊ ဇူလိုင်လ(ဒုတိယပတ်)တွင် ဗမာကြက်သွန်ဖြူ အလုံးအကြီး အသေးနှင့် အရည်အသွေးလိုက်၍ တစ်ပိဿာလျှင် ကျပ်(၁၈၀၀၀-၉၀၀၀)ဈေးဖြင့် အရောင်းအဝယ် ဖြစ်ကြောင်း၊ ရှမ်းကြက်သွန်ဖြူ(ဥကြီး)မျိုး တစ်ပိဿာလျှင် ကျပ်(၁၇၀၀၀-၈၀၀၀)ဈေးရှိပြီး ယခင် ဇွန်လ(ဒုတိယပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၂၀၀၀)ဈေးတက်ပြီး အရောင်းအဝယ်ဖြစ်ကြောင်း ကုန်စိမ်းသီးနှံရောင်းဝယ်ရေးဈေးကွက်မှ သိရှိရပါသည်။

DOCA(မကွေး)

မကွေးတိုင်းဒေသကြီး၊ ပခုက္ကူခရိုင်အတွင်းရှိ ပခုက္ကူ၊ မြစ်ခြေ၊ ကမ္မနှင့် မြိုင်မြို့နယ်အတွင်းရှိ ကျေးရွာများတွင် သီးနှံမျိုးစုံစိုက်ပျိုးလျက်ရှိရာ နှစ်ရှည်သီးနှံဩဇာပင်ကို ဥယာဉ်ခြံမြေများ၊ စိုက်ခင်း များ နေအိမ်ခြံစည်းရိုးများတွင် အများဆုံး စီးပွားဖြစ် စိုက်ပျိုးကြသည်။ မြိုင်မြို့နယ်တွင် စီးပွားဖြစ် အများဆုံးစိုက်ပျိုးပြီး သနပ်ခါးစိုက်ခင်းများ စည်းရိုးတန်းတွင် စိုက်ပျိုးမှု များကြောင်း သိရှိရသည်။ 

ဩဇာပင်ကို မိုးဦးကျကာလများဖြစ်သည့် ဇွန်လနှင့်ဇူလိုင်လများတွင် စိုက်ပျိုးပြီး (၅)နှစ် သက်တမ်းအကြာတွင် အသီးများ စတင်ဆွတ်ခူးရကြောင်း၊ မျိုးအနေဖြင့် ဩဇာသီး အညိုရောင်နှင့် အစိမ်းရောင်နှစ်မျိုးရှိပြီး အစိမ်းရောင်မျိုးကို အများဆုံးစိုက်ပျိုးကြကြောင်း၊ စိုက်ပျိုးရာတွင် ဩဇာ စေ့ကို ပျိုးထောင်၍ (၆)လသားအရွယ်တွင် ကျင်းဖွဲ့ပြီး မြေဆွေးများထည့်၍ ရေလောင်းနှပ်ထားပြီး စိုက်ပျိုးကြောင်း၊ စိုက်ပျိုးရာတွင် ပင်ကြားတန်းကြား(၈)ပေအကွာစိုက်ပျိုးကြောင်း၊ တစ်ဧကလျှင် ဩဇာပင်(၂၅၀)ခန့် စိုက်ပျိုးနိုင်ကြောင်း၊ ဩဇာပင်သည်နှစ်ရှည်သီးနှံဖြစ်သောကြောင့် နှစ်စဉ်ပြုစု ပျိုးထောင်ရပြီး အသီးဆွတ်ခူးရသည်အထိ တစ်ဧက သိန်း(၄၀)ခန့်ကုန်ကျကြောင်း၊ အထွက်နှုန်း အနေဖြင့် ဩဇာတစ်ပင်လျှင် အလုံးရေ(၃၀) မှ (၅၀) ထိ ထွက်ရှိပြီး တစ်ဧကဩဇာသီးအလုံးရေ (၁၅၀၀၀ မှ ၂၀၀၀၀) ဝန်းကျင် ထွက်ရှိကြောင်း၊ တောင်သူတစ်ဦးချင်းအနေဖြင့် စိုက်ပင်ပြုစုပျိုး ထောင်မှုအပေါ်မူတည်ပြီး သီးနှံဖြစ်ထွန်းအောင်မြင်မှု ကွာခြား၍ အထွက်နှုန်းမှာလည်း မတူညီ ကြောင်း၊ ဈေးနှုန်းအနေဖြင့် ၂၀၂၅ခုနှစ်၊ ဇူလိုင်(ဒုတိယပတ်)တွင် ဩဇာသီးအလုံးအကြီးအသေးပေါ် မူတည်၍ တစ်လုံးလျှင် ကျပ်(၁၅၀၀-၁၀၀၀)၊ တစ်ပိဿာလျှင် ကျပ်(၆၀၀၀-၅၀၀၀)ဈေးဖြင့် အရောင်းအဝယ် ဖြစ်လျက်ရှိကြောင်း၊ ဈေးကွက်အနေဖြင့် ပခုက္ကူမြို့၊ မြို့မဈေးကြီးနှင့် မြို့ပေါ်ရှိ သစ်သီးအရောင်းဆိုင်များသို့ တင်ပို့ရောင်းချပြီး တစ်ဧကလျှင် ကျပ်သိန်း(၃၀)ခန့် အကျိုးအမြတ် ရရှိကြောင်း၊ ယခုနှစ်တွင် ရာသီဥတုကောင်းမွန်ခြင်းကြောင့် ဩဇာသီးအထွက်နှုန်းကောင်းပြီး ဈေးကွက်ကောင်းမွန် သည့်အတွက် ထိုက်သင့်သည့် အကျိုးအမြတ်ရရှိ၍ တောင်သူအဆင်ပြေ ကြောင်း သိရှိရသည်။

DOCA(မကွေး)

မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့တွင် ရာသီပေါ်ပိန္နဲသီးများ အရောင်းအဝယ် သွက်လျက်ရှိကြောင်း သိရှိရသည်။ ပိန္နဲပင်သည် မြန်မာနိုင်ငံအလယ်ပိုင်း အပူပိုင်းဒေသများတွင် စိုက်ပျိုးဖြစ်ထွန်းပြီး အအေးပိုင်းဒေသများတွင် ဖြစ်ထွန်းအောင်မြင်မှုနည်းကြောင်း၊ ပိန္နဲပင်ကို ဥယျာဉ်ခြံမြေများ၊ လူနေအိမ်ခြံစည်းရိုးများတွင် စိုက်ပျိုးမှုများကြသည်။ ပိန္နဲသီးသည် အပူပိုင်းဒေသ သီးနှံဖြစ်သည်။ ပူအိုက်စိုစွတ်သော ရာသီဥတုဖြစ်သည့် မြန်မာပြည်အလယ်ပိုင်း မိုးနည်းဒေသ များတွင် ရေသွင်း၍ စိုက်ပျိုးကြသည်။ ပိန္နဲသီးပင်ကို မေလနှင့်ဇွန်လများတွင် စိုက်ပျိုးမှုများပြီး (၅)နှစ်အကြာတွင် အသီးဆွတ်ခူးကြောင်း၊ စိုက်ပျိုးရာတွင် အကိုင်းကို မြေထုတ်ဆွဲနည်းဖြင့် စိုက်ပျိုး ခြင်းနှင့် အစေ့ကိုပျိုး၍ စိုက်ပျိုးခြင်း (၂)နည်းဖြင့် စိုက်ပျိုးကြသည်။ ပိန္နဲတစ်ပင်လျှင် အလုံး(၂၀ မှ ၅၀ ထိ) အသီးတင်ပြီး ဇွန်၊ ဇူလိုင်လများတွင် လှိုင်လှိုင်ပေါ်၍  အရောင်းအဝယ်ဖြစ်ကြောင်း၊ အသီး အရွယ်အစားပေါ်မူတည်ပြီး ပိန္နဲသီးတစ်လုံးလျှင် ဈေးနှုန်းကျပ်(၁၀၀၀၀ မှ ၂၀၀၀၀ထိ) အရောင်း အဝယ်ဖြစ်ကြောင်း၊ ဈေးနှုန်းကောင်းမွန်သည့်အတွက် စိုက်တောင်သူ အဆင်ပြေကြောင်း သိရှိရ သည်။

          ပိန္နဲသီးမမှည့်ခင် ဟင်းအဖြစ် ချက်ပြုတ်စားသုံးခြင်း၊ အတို့အမြှပ်အဖြစ် စားသုံးခြင်းနှင့် ပိန္နဲ သီးအမှည့်ကို အဆံလိုက်စားသုံးကြသည်။ ပိန္နဲသီးတွင် အိမ်ပျော့၊ အိမ်မာ (၂)မျိုးရှိသည်။ အိမ်မာမှာ စားသုံးရာတွင် ပိုမိုအရသာရှိ၍ ဝယ်ယူစားသုံးမှု များပြီး ဈေးပိုမိုရရှိသည်။ ပိန္နဲသီးစားသုံးခြင်းဖြင့် လေဖြတ်ခြင်း၊ သွေးကြောကျဉ်းခြင်း၊ အူမကြီးကင်ဆာနှင့် နှလုံးရပ်ခြင်းရောဂါများကို ကျန်းမာစေ ခြင်းနှင့် ဆီးချိုရေားဂါဖြစ်နိုင်ခြေကိုလည်း လျော့ပါးစေကြောင်း မြန်မာဆေးကျမ်းများတွင် ဖော်ပြ ထားရှိ၍ ကျန်းမာရေးဆေးဖက်ဝင် သီးနှံတစ်မျိုးဖြစ်ကြောင်း သိရှိရသည်။

          လက်ရှိကာလတွင် ပိန္နဲသီးပင်အား တနိုင်တပိုင် စိုက်ပျိုးမှုသာ များပြီး စီးပွားဖြစ် စိုက်ပျိုး တောင်သူ နည်းပါးလျက်ရှိသည်။ ပိန္နဲပင်သည် နှစ်ရှည်ခံသီးနှံဖြစ်သည့်အပြင် ကုန်ကျစရိတ် နည်းပါး ပြီး ရရှိသောအသီးများသည်လည်း ဈေးကောင်းရရှိ၍ စိုက်ပျိုးသူများအတွက် မိသားစုစီးပွားရေး အပိုဝင်ငွေရရှိစေသည့် သီးနှံအမျိုး အစားဖြစ်၍ ပိုမိုစိုက်ပျိုးသင့်သောသီးနှံဖြစ်ကြောင်း သိရှိရသည်။

DOCA(မကွေး)

    ကန့်ဘလူခရိုင်၊ ကျွန်းလှမြို့နယ်အတွင်း ငါးဈေးနှုန်းများ အနည်းငယ်မြင့်တက်လျက်ရှိရာမှ သဖန်းဆိတ်ဆည်မှ ထွက်ရှိသည့် ရေချို ပုဇွန်ဆိတ် ဈေးနှုန်းသည်လည်း ဈေးကောင်းဖြင့် ရောင်းချလျက်ရှိကြောင်း သိရှိရပါသည်။

    ၂၀၂၅ ခုနှစ် ၊ ယခု ဇူလိုင်လ တတိယပတ်အတွင်း ကျွန်းလှမြို့၌ ဖြစ်ပေါ်လျက်ရှိသော ပုဇွန်ဆိတ် ဈေးနှုန်းအနေဖြင့်  ပုဇွန်ဆိတ် ဆကာတင် အကောင်ကြီး တစ်ပိဿာလျှင် လက္ကားဈေး (၂၀၀၀၀)ကျပ်၊ လက်လီဈေး တစ်ပိဿာ(၂၃၀၀၀)ကျပ်နှင့် ပုဇွန်ဆိတ် အလတ်စ လက္ကား တစ်ပိဿာ(၁၅၀၀၀)ကျပ်၊ လက်လီဈေး(၁၈၀၀၀)ကျပ်နှင့် ပုဇွန်ဆိတ် ဆကာကျ အကောင်သေး  လက္ကား တစ်ပိဿာလျှင်(၁၃၀၀၀)ကျပ်၊ လက်လီ တစ်ပိဿာလျှင်(၁၅၀၀၀)ကျပ်ဈေးနှုန်း အသီးသီးတို့ဖြင့် ရောင်းချလျက်ရှိ ကြောင်းနှင့် ကျွန်းလှမြို့ သဖန်းဆိပ်ဆည်မှ ထွက်ရှိသည့် ရေချိုပုဇွန်ဆိတ်သည် အကောင်သေးပြီး အရမ်းချိုကာ အသားကျစ်လစ်သည့်အတွက် လူကြိုက်များပြီး  အရောင်းသွက်ကာ ဈေးကောင်းရရှိလျက်ရှိကြောင်း သိရသည်။

DOCA(စစ်ကိုင်း)