ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ ပြည်ခရိုင်အတွင်းရှိ မြို့နယ်များသည် ကျောက်ဖရုံသီးကို စီးပွားဖြစ်စိုက်ပျိုးရသောဒေသများဖြစ်သောကြောင့် ကျောက်ဖရုံးသီးအများအပြားထွက်ရှိသော ဒေသလည်းဖြစ်ပါသည်။ ထွက်ရှိလာသောကျောက်ဖရုံသီးများကို ရန်ကုန်သီရိမင်္ဂလာဈေးသို့ တင်ပို့ရောင်းချလျက်ရှိပါသည်။ ကျောက်ဖရုံသီးကို ဒေသတွင်းရောင်းချသည့်အပြင် ရန်ကုန်ဈေးကွက်သို့ တစ်အိတ်လျှင် အလုံး (၂၀)လုံးမှ (၂၅)လုံးဝင် ကျောက်ဖရုံသီးအိတ်များဖြင့် တင်ပို့လျက်ရှိပါသည်။ ကျောက်ဖရုံသီးမှာ ဇွန်လလောက်ကတည်းက ထွက်ပေါ်နေပြီဖြစ်သောကြောင့် ယခုအချိန်၌ ဈေးကွက်အတွင်း ရှားပါးနေကြောင်းသိရပါသည်။ တစ်ပင်လျှင် အလုံး (၅၀)လုံးမှ (၇၀)လုံးလောက်အထိခူးဆွတ်ရကြောင်းလည်းသိရပါသည်။ ပြည်ဈေးကွက်အနေဖြင့် ကျောက်ဖရုံသီးတစ်လုံးလျှင် အကြီး (၂၀၀၀)ကျပ်မှ (၂၅၀၀)ကျပ်ထိဈေးရှိကြောင်းသိရပါသည်။ အနုသီးအသေးတစ်လုံးလျှင် (၁၀၀၀)ကျပ်မှ (၁၂၀၀)ကျပ်အထိရောင်းချကြောင်းသိရပါသည်။

DOCA(ပဲခူး)

    ပြည်ခရိုင်တွင် မိုးမြေပဲနှင့် ဆောင်းမြေပဲဟူ၍ (၂)မျိုးရှိပြီး မိုးမြေပဲကို ဦးစားပေး၍စိုက်ပျိုးကြပါသည်။ ပြည်ခရိုင်တွင် မြေပဲအများဆုံးစိုက်ပျိုးသောမြို့မှာ ပေါက်ခေါင်းမြို့ဖြစ်ပြီး ဒုတိယမှာ ပန်းတောင်းမြို့တို့တွင်စိုက်ပျိုးကြောင်းသိရပါသည်။ ရွှေတောင်မြို့၊ ကျွန်းများရှိ မြစ်ရေများကျဆင်းချိန်၌ သဲသောင်ခုံများပေါ်တွင် စိုက်ပျိုးကြသဖြင့် မိုးမြေပဲအချိန်မဟုတ်သော၊ ဆောင်းမြေပဲအချိန်မဟုတ်သော စကမြေပဲများကိုစိုက်ပျိုးကြပါသည်။ စကမြေပဲမှာ ဆောင်းမြေပဲများမပေါ်မီအချိန်တွင် ထွက်ပေါ်လာပြီး အထွက်နှုန်းအနေဖြင့် အနည်းငယ်သာထွက်သဖြင့် ဈေးကွက်သို့ အနည်းငယ်သာတင်ပို့ရောင်းချကြောင်းသိရပါသည်။ ယခုအချိန်တွင် ဆောင်းမြေပဲများစိုက်ပျိုးနေချိန်ဖြစ်ပြီး စိုက်ဧကမှာ(၁၈၀၀၀) ဧကနီးပါးစိုက်ပျိုးထားရှိကြောင်းသိရပါသည်။ ဆောင်းမြေပဲများစိုက်ပျိုးချိန်ဖြစ်၍ ပြည်မြို့ရှိပွဲရုံများနှင့် ဈေးကွက်များသို့ ဧရာဝတီမြစ်အနောက်ဖက်ကမ်းရှိ ပန်းတောင်း၊ ဥသျှစ်ပင်၊ ကံမဘက်မှ မြေပဲဆန်အိတ် (၂၀)ပိဿာဝင်အိတ်(၁၀၀)ခန့်ဝင်ရောက်လျက်ရှိပြီး ဝင်သလောက်အရောင်းအဝယ်ဖြစ်လျက်ရှိပါသည်။ မြေပဲဆံဈေးနှုန်းများအနေဖြင့် နိုဝင်ဘာလ နောက်ဆုံးပတ်တွင် ဆီဆန်(အဖြူ)တစ်ပိဿာလျှင် (၅၂၀၀)ကျပ်၊ (အနီ)တစ်ပိဿာလျှင် (၅၀၀၀)ကျပ်ဖြင့်ရောင်းချလျက်ရှိ၍ ယခင်အပတ်အတိုင်း ဈေးတည်ငြိမ်နေပါသည်။ မြေပဲလုံးဆံဈေးနှုန်းမှာ (အဖြူ) တစ်ပိဿာလျှင် ၅၆၀၀ကျပ်၊ (အနီ)တစ်ပိဿာလျှင် ၅၄၀၀ကျပ်ဖြင့် ယခင်အပတ်ထက် ဈေးနှုန်းအနည်းငယ်ကျဆင်းလာပြီး တစ်ပိဿာလျှင် (၂၀၀/၃၀၀) ကျပ်ခန့်ဈေးနှုန်းကျဆင်းလာခဲ့ပါသည်။ အရောင်းအဝယ်ဖြစ်မှုမှာ လည်း နေ့စဉ်အရောင်းအဝယ်ဖြစ်ပြီး (၂၀)ပိဿာဝင်အိတ်(၂၀၀)အိတ်ခန့်အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ပဲခူး)

   ပြည်ခရိုင်အတွင်း တွင်လျှော်ဖြူစိုက်ဧကမှာ (၉၅၁) ဧကရှိပြီး အပင်ရေမှာ ၁၁၇၀၅၀ပင်စိုက်ပျိုးထားကြောင်းသိရပါသည်။ ယခု၂၀၂၃ခုနှစ်တွင် ၎င်းအခင်းများအနက် ရွှေတောင်၊ ပြည်၊ ပေါက်ခေါင်းမြို့နယ်များရှိ လျှော်ဖြူအပင်ရေ ၁၉၈၀ပင်ကို မန်းထစ်ထားပြီး ကြာဇံအစေးများကို စမ်းသပ်ထုတ်လုပ်မည်ဟုသိရှိရပါသည်။ လျှော်ဖြူဈေးကွက်တွင် ရိုးရိုးလျှော်ဖြူစေးနှင့် ကြာဇံစေးဟူ၍ (၂)မျိုးရှိပြီး ရိုးရိုးလျှော်ဖြူစေးထုတ်လျှင် ကုန်ကျစရိတ်နှင့်တွက်ချေမကိုက်သည့်အတွက်ကြောင့် ထုတ်ယူခြင်းမပြုဘဲ ကြာဇံစေးသာစမ်းသပ်ထုတ်လုပ်မည်ဖြစ်ပါသည်။ လျှော်ဖြူ ဈေးကွက်အနေဖြင့် မန္တလေးဈေးကွက်သို့ တင်ပို့ရောင်းချမှုရှိပြီး မန္တလေးဝယ်လက်များကလည်း လာရောက်ဝယ်ယူလျက်ရှိပါသည်။ ယခုအချိန်တွင် လျှော်ဖြူစေးထွက်ရှိမှုနည်းပါးနေသောကြောင့် မန္တလေးဈေးကွက်သို့ ကားဖြင့်သာချိတ်ဆက်တင်ပို့ရောင်းချမှုများရှိပြီး ဈေးနှုန်းအနေဖြင့် စတင်မန်းထစ်ချိန်တွင် ရိုးရိုးစေးတစ်ပိဿာလျှင် (၈၀၀၀-၁၀၀၀၀) ကျပ်နှင့် ကြာဇံစေး တစ်ပိဿာလျှင် (၁)သိန်းခန့်ပေး၍ဝယ်ယူမှုရှိခဲ့ပြီး ယခုအချိန်တွင် ရိုးရိုးအစေးတစ်ပိဿာလျှင် (၅၀၀၀-၆၀၀၀) ကျပ်နှင့် ကြာဇံအစေးတစ်ပိဿာလျှင် (၈၀၀၀၀-၈၅၀၀၀) ကျပ်းရရှိကြောင်း သိရှိရပါသည်။

DOCA(ပဲခူး)

     စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ သက္ကယ်ချင်း၊ လယ်ဇင်၊ ပုလ္လင်၊ ဇီးကျွန်းနှင့် မအူကျေးရွာများ၌ ဆီးပန်းသီးပင်များကို အများဆုံးစိုက်ပျိုးကြကြောင်းသိရသည်။ တစ်ဧကလျှင် ၁၅ပေပတ်လည်အကျယ်ဖြင့် အပင်၁၀၀ခန့်စိုက်ပျိုးနိုင်ပြီး ဇွန်လနှင့် ဇူလိုင်လတို့မှစတင်၍ ဆီးပန်းသီးကိုင်းကူးပျိုးပင်တစ်ပင်ကို ငွေကျပ်၄၀၀နှုန်းဖြင့်ဝယ်ယူစိုက်ပျိုးကာ နိုဝင်ဘာလ၊ဒီဇင်ဘာလနှင့်  ဇန်နဝါရီလတို့တွင် ဆီးပန်းသီးပင်များကို ခူးဆွတ်ရောင်းချရကြောင်းသိရသည်။ ဆီးပန်းသီးတစ်ဧက၌ တစ်နေ့လျှင် ဆီးပန်းသီး ပြည်(၆၀)ကျော် (လေးတင်းခန့်)ခူးဆွတ်ရရှိကြောင်းနှင့် ဆီးပန်းသီးတစ်ပြည်လျှင် ငွေကျပ်၂၀၀၀နှုန်း၊ လက်ရွေးတစ်ဖာလျှင် ငွေကျပ်၂၀၀၀၀နှုန်းဖြင့် မုံရွာ-မန္တလေး ကားလမ်းမကြီးပေါ်တွင် ဆိုင်များဖွင့်လှစ်ရောင်းချခြင်းနှင့် ရန်ကုန်၊ မန္တလေး၊ ပြင်ဦးလွင်မြို့များသို့ တင်ပို့ရောင်းချလျက်ရှိကြောင်း၊ တစ်ဧကကုန်ကျစရိတ်အနေဖြင့် ပျိုးပင်၊ ထွန်ယက်ခ၊ မြေပြုပြင်ခြင်း၊ မြေဩဇာနှင့် လုပ်သားခအပါအဝင် စုစုပေါင်းငွေကျပ် ၁၁ သိန်းခန့်ကုန်ကျကြောင်း၊ တစ်ဧကလျှင် ဆီးပန်းသီးထွက်ရှိနှုန်း ပြည်၂၀၀၀ကျော်ခန့်ထွက်ရှိရာ ဝင်ငွေအနေဖြင့် ငွေကျပ်၂၀သိန်းခန့်ရရှိကြောင်း၊ တစ်ဧကလျှင် အကျိုးအမြတ်အနေဖြင့် ငွေကျပ်ကိုးသိန်းခန့်ရရှိကာ တွက်ချေကိုက်၍ စိုက်ပျိူးသူများအဆင်ပြေနေကြကြောင်း သတင်းရရှိပါသည်။

DOCA(စစ်ကိုင်း)

     မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကိုအဓိကထား လုပ်ကိုင်ဆောင်ရွက်သောဒေသဖြစ်ရာ ကျေးလက်နေတောင်သူအများစုသည် မိုးစပါးများကိုသာ အဓိကထား အများဆုံးစိုက်ပျိုးကြပါသည်။ ၂၀၂၃-၂၀၂၄ ဘဏ္ဍာနှစ်တွင် မိုးစပါးစိုက်ဧက(၁၄၄၆၈၆)ဧက စိုက်ပျိုးထားရှိပြီး ယခုအချိန်တွင် မိုးစပါးများ စတင်ထွက်ပေါ်နေပြီဖြစ်ရာ  မြစ်သားမြို့နယ်တွင်(၂၃၀၅) ဧကရိတ်သိမ်းနိုင်ခဲ့ပြီး အထွက်နှုန်းအနေဖြင့်(၁၀၁)တင်း ၊ အထွက်စုစုပေါင်း (၂၃၂၈၉၃) တင်းထွက်ရှိ ကြောင်းလယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏စာရင်းများအရသိရှိရပါသည်။ ယခုနှစ်တွင်မိုးရွာသွန်းမှုကောင်းသောကြောင့် မိုးစပါးများအထွက်နှုန်းပိုမိုကောင်းမွန်ကြောင်း သိရှိရပါသည်။

      မိုးစပါးစျေးနှုန်းများအနေဖြင့် ဧရာပဒေသာစပါး တင်း(၁၀၀)လျှင် ( ၂၅၀၀၀၀ဝိ/- မှ ၂၆၀၀၀၀ဝိ/-) ကျပ်၊ မနောသုခစပါး တင်း(၁၀၀)လျှင်( ၁၉၀၀၀၀ဝိ/- မှ ၂၀၀၀၀၀ဝိ/-)ကျပ် စျေးနှုန်းများရှိကြောင်း ၊ စပါးအရည်အသွေးပေါ်မူတည်ပြီး စက်ပိုင်ကုန်သည်များမှဝယ်ယူကြောင်း ၊ ဆန်စျေးနှုန်းများအနေဖြင့် ဧရာပဒေသာဆန် တစ်တင်းခွဲတစ်အိတ်လျှင်(၉၅၀၀ဝိ/- မှ ၁၀၀၀၀ဝိ/-)ကျပ် ၊ မနောသုခဆန် တစ်တင်းခွဲတစ်အိတ်လျှင် (၇၅၀၀ဝိ/- မှ ၈၀၀၀ဝိ/-)ကျပ် စျေးနှုန်းများဖြင့် ရောင်းဝယ်လျှက်ရှိ ကြောင်းသိရှိရပါသည်။ ဧရာပဒေသာ စပါးတစ်ဧကလျှင် ကုန်ကျစရိတ်(၇၅၀၀၀ဝိ/-)ကျပ်ဝန်းကျင် ခန့်ကုန်ကျကြောင်း ၊ ဆန်စပါးစျေးနှုန်းအနေဖြင့် ယခင်နှစ်နှင့်နှိုင်းယှဉ်လျှင် စျေးနှုန်းမြင့်တက်လျှက် ရှိပြီးစျေးကောင်းရသောကြောင့် အကျိုးအမြတ်အနေဖြင့် စပါးအထွက်နှုန်းပေါ်မူတည်ပြီး အကျိုး အမြတ်များစွာရရှိကြောင်း မိုးစပါးစိုက်တောင်သူတစ်ဦး၏ ပြောကြားချက် အရသိရှိရပါသည်။

DOCA(မန္တလေး)