ပြည်တွင်းကုန်သွယ်မှုသတင်း

     မအူပင်မြို့သို့ ဘိတ်၊ကော့သောင်း ကွမ်းသီးများ ဝင်ရောက်လျှက်ရှိပြီး တစ်ပါတ်လျှင်  ၆ဘီးကား (၃)စီး၊ ၁၂ဘီကား (၃)စီး မအူပင်မြို့သို့ ဝင်ရောက်နေကြောင်း သိရသည်။

       ၂၀၂၅ခုနှစ်၊ ဇူလိုင်လအတွင်း၌ မအူပင်ဈေးကွက်တွင်ရောင်းချသော ကွမ်းသီး ဈေးနှုန်းများမှာ ကွမ်းသီးအကြီးအလုံးလှ ၁လုံးလျှင် ၂၅၀-၃၀၀ကျပ်၊ အလတ် ၂၀၀ကျပ်၊ အသေး ၁၅၀ကျပ်ဖြင့် လုံးကောက်ရောင်းချနေကြောင်းတွေ့ရှိရသည်။ ကွမ်းသီးတစ်အိတ်လျှင် အလုံး၁၀၀၀ပါဝင်ပြီး ၁အိတ်ဈေး  ငွေကျပ် ၁၂၀၀၀၀-၁၇၀၀၀၀-၂၂၀၀၀၀ကျပ်ဖြင့် မှာယူရောင်းချရပြီး တစ်ပါတ်လျှင် ကွမ်းသီးအိတ် ၅၀အိတ် ၁၀၀ ထိရောင်းချရကြောင်း မအူပင်ဈေးကွက်အတွင်းရောင်းချသူထံမှ သိရသည်။ အကျိုးအမြတ်အနေဖြင့် ကွမ်းသီးတစ်အိတ်လျှင် ၃၀၀၀၀-၅၀၀၀၀-၇၀၀၀၀ကျပ်ထိ အကျိုးအမြတ်ကျန်ရှိကြောင်း ကွမ်းသီးရောင်းချသူထံမှ သိရသည်။ တစ်ချို ကွမ်းနှင့် ဆေးရွက်အမျိုးမျိုး ရောင်းချသည့် ဆိုင်များမှ လည်း တစ်လ အတွင်း ကွမ်းသီး အိတ် ၅၀၀-၈၀၀ အထိ ရောင်းချရကြောင်းသိရသည်။ တစ်ချို့ ကွမ်းသီးများကို အခွံချွတ်၍ ရောင်းချကြပြီး ဈေးပိုရကြောင်း ကွမ်းသီးအခွံချွတ် အလုံးသန့် တစ်ပိဿာလျှင် ၄၀၀၀-၄၅၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း သိရသည်။  ယူခုလို မိုးရာသီကာလတွင် ကွမ်းသီးများ မအူပင်သို့ အဝင်များလျက်ရှိပြီး ဈေးကောင်းလျက်ရှိကြောင်း သိရသည်။ DOCA(ဧရာဝတီ)

     စစ်ကိုင်းတိုင်းဒေသကြီး ကန့်ဘလူခရိုင်၊ ကန့်ဘလူမြို့နယ် တောင်သူများအနေဖြင့် ဆန်စပါး အပြင် နေ့စဉ်မိသားစုဝင်ငွေရရှိရေး စားဖိုဆောင်သီးနှံများ  စိုက်ပျိုးရောင်းချလျက်ရှိရာ ကန့်ဘလူ မြို့၊ အမှတ်(၂)ရပ်ကွက်တွင် ခရမ်းသီးအရှည်မျိုး စိုက်ပျိုးသူများ အောင်မြင်ဖြစ်ထွန်းကာ နေ့စဉ်ခူး ဆွတ်ရောင်းချပြီး ဈေးကောင်းရသဖြင့် မိသားစုစားဝတ်နေရေး အဆင်ပြေလျက်ရှိကြောင်း သိရှိရသည်။

   ခရမ်းသီးနှံစိုက်ပျိုးမည်ဆိုပါက မြေကိုကောင်းစွာပြုပြင်ပြီး ပျိုးသက် (၁)လသားအရွယ်တွင် မြေပြင်ထားသော စိုက်ခင်းထဲကို ပြောင်းရွေ့စိုက်ပျိုးကြောင်း၊ ရေသွင်းရေထုတ် လွယ်ကူစေရန်အတွက် မြေဘောင်များပြုလုပ်ပြီး တစ်ပင်နှင့်တစ်ပင် (၄-၅)ပေခြားစိုက်ပျိုးကာ အစိုဓာတ်မပြတ် စေရန်ရေသွင်းပေးရကြောင်း အပင်ငယ်ချိန်တွင် မြေဆွခြင်း၊ ပေါင်းမြက်ရှင်းလင်းခြင်းများ ဆောင် ရွက်ရကြောင်း၊ လိုအပ်တဲ့အချိန်တွင် အာမိုမြေဩဇာ၊ အပင်အားတိုးဆေးနှင့် ပိုးသတ်ဆေးများဖျန်း ပေးရကြောင်း၊ စတင်ခူးဆွတ်ချိန်တွင် တစ်ရက်ခြားခူးဆွတ်ရပြီး အသီးလှိုင်ချိန်တွင် နေ့စဉ်ခူးဆွတ် ရောင်းချရကြောင်း၊ ရောင်းဈေးအနေဖြင့် ဇူလိုင်လ တတိယပတ်အတွင်း ကန့်ဘလူမြို့မဈေးတွင် ခရမ်းသီး(၅၀)ကျပ်သားလျှင် (၁၅၀၀)ကျပ်၊ ခရမ်းသီးတစ်ပိဿာလျှင်  (၂၈၀၀မှ ၃၀၀၀)ကျပ်အထိ ရောင်းချရသဖြင့် မိသားစုဝင်ငွေရရှိကာ အဆင်ပြေလျက်ရှိကြောင်း၊ ခရမ်းအပင် တစ်နိုင်တစ်ပိုင် စိုက်ပျိုးထားသည့်  ဦးဝင်းအောင်၏ ပြောပြချက်အရ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူမြို့ “မြို့မဈေး”သည် နေ့စဉ်ဈေးရောင်းသူများ၊ ဈေးဝယ် သူများနှင့်စည်ကားလျက်ရှိပြီး ရာသီပေါ်သီးနှံများ၊ ဒေသထွက်ကုန်များအပြင် အခြားဒေသမှဝင် ရောက်သည့် လူသုံးကုန်နှင့် စားသောက်ကုန်ပစ္စည်းများကို ရောင်းချပေးလျက်ရှိကြောင်း သိရသည်။

       ၂၀၂၅ ခုနှစ်၊ ဇူလိုင်လ တတိယပတ်အတွင်း ကန့်ဘလူ“မြို့မဈေး”ရှိ ကုန်မျိုးစုံဆိုင်များတွင် ရောင်းချနေသည့်  ခရမ်းသီးခြောက် (၁)ပြည်လျှင်(၁၅၀၀)ကျပ်၊ (၂)ပြည်လျှင် (၂၇၀၀)ကျပ်ဖြင့် ရောင်းချကြောင်း၊ ဇူလိုင်လ တတိယပတ်အတွင်း သရက်သီးခြောက်ဈေးနှုန်းမှာ (၁၀)ကျပ်သားလျှင် (၄၀၀)ကျပ်နှင့် (၁)ပိဿာလျှင် (၃၉၀၀)ကျပ်ဖြင့် ရောင်းချလျက်ရှိကြောင်း၊ အသီးခြောက်များကို မြို့ပေါ်ရပ်ကွက်နှင့် ကန့်ဘလူမြို့နယ် ဆိတ်ဖူးမြောင်ကျေးရွာ၊ နတ်ပေးကျေးရွာတို့မှ ယခုလို သရက်သီးလှိုင်လှိုင်ပေါ်ချိန်တွင် အသီးစိမ်းများကိုအခြောက်လှမ်း၍ လာရောက်ရောင်းချကြောင်း ကုန်မျိုးစုံရောင်းချသည့် လုပ်ငန်းရှင်များထံမှ သိရှိရသည်။

DOCA(စစ်ကိုင်း)

စစ်ကိုင်းတိုင်းဒေသကြီး၊ မုံရွာမြို့၊ အနီးတစ်ဝိုက်ရှိ ကျေးရွာများတွင် ရာသီပေါ်သီးနှံ များကို စိုက်ပျိုးရောင်းချလျက်ရှိရာ ယခုအခါ ကင်ပွန်းချဉ်ပင်များကို နေအိမ်ခြံဝင်းများတွင် လည်းကောင်း၊ ယာကွက်ခြံစည်ရိုးများတွင်လည်းကောင်း တစ်နိုင်တစ်ပိုင်စိုက်ပျိုး၍ ရောင်းချ လျက်ရှိကြောင်း သိရသည်။ ကင်ပွန်းပင်သည် ကင်ပွန်းချဉ်ရွက်အပြင် ကင်ပွန်းသီးများကိုပါ ရရှိနိုင်ပါသည်။ ကင်ပွန်းသီးသည် ခေါင်းလျှော်ရည်ထဲတွင် ထည့်သွင်းအသုံးပြုနိုင်ပြီး ကင်ပွန်းရွက်မှာ အိမ်ရှင်မများ ချက်ပြုတ်ရာတွင် ဟင်းရည်သောက်အဖြစ် အသုံးပြုနိုင်ပြီး ကျန်းမာရေးနှင့် ညီညွတ်သောအပင်တစ်မျိုးဖြစ်ပါသည်။ ကန်သာယာဈေး၌ ဇူလိုင်လ တတိယပတ်တွင် ကင်ပွန်းချဉ်ရွက်ဈေးနှုန်းမှာ (၁) စည်းလျှင် (၂၅၀)ကျပ်မှ (၃၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။

Doca(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့မဈေးရှိ သစ်သီးဆိုင်များတွင် သစ်သီး မျိုးစုံရောင်းချလျက်ရှိရာ ပန်းသီးများလည်းရောင်းချလျက်ရှိကြောင်း သိရှိရသည်။ ပန်းသီးများကို မန္တလေးမြို့ရှိ သစ်သီးပွဲရုံများမှ မှာယူရောင်းချလျက်ရှိကြောင်း၊ ပန်းသီးသည် ကျန်းမာရေးအတွက် အထောက်အကူများစွာ ပြုပေးသည့်အတွက် စားသုံးသူများ ကြိုက်နှစ်သက်သည့် အသီးတစ်မျိုးဖြစ်ကြောင်း သိရှိရသည်။

     ၂၀၂၅ ခုနှစ် ၊ ဇူလိုင်လ တတိယပတ်အတွင်း ကန့်ဘလူမြို့ရှိ သစ်သီးဆိုင်များတွင် ပန်းသီး အလုံးကြီး(၁)လုံးလျှင် (၂၀၀၀မှ ၄၀၀၀)ကျပ်၊ ပန်းသီးအလုံးသေး(၄)လုံးလျှင် (၁၀၀၀၀)ကျပ်ဖြင့် ရောင်းချလျက်ရှိကြောင်း၊ ပန်းသီးသည် နူးညံ့ထူးကဲသော အရသာပေးစွမ်းသည့်အတွက် စားကြည့် မိသူတိုင်း ကြိုက်နှစ်သက်ကြသည့်အတွက် အရောင်းသွက်သော သစ်သီးစာရင်းတွင် ပန်းသီးလည်း အပါဝင်ဖြစ်ကြောင်း သစ်သီးရောင်းချသူများထံမှ သိရှိရပါသည်။

DOCA(စစ်ကိုင်း)