ပြည်တွင်းကုန်သွယ်မှုသတင်း

          နနွင်းတက်အပင်များသည် မိုးတွင်းကာလတွင် အပင်များစတင်ထွက်ပေါ်လာပြီး ဝါဆိုလနှင့် ဝါခေါင်လများတွင်နနွင်းပွင့်များ စတင်ထွက်ပေါ်လာချိန်သာ ဖြစ်ပါသည်။ မိုးတွင်းကာလဖြစ်သည့်အတွက် နနွင်းတက်များလှိုင်လှိုင်ထွက်ပေါ်လာခြင်းမရှိသော်လည်း ယခင်နှစ်ကထွက်ရှိလာသည့် နနွင်းတက်များကို ကုန်သည်များမှ ပွဲရုံများသို့ရောင်းချထားသည့်နနွင်းတက်အဟောင်းများသာ ဈေးကွက်အတွင်းအရောင်းအဝယ်ဖြစ်နေကြောင်း သိရပါသည်။ နနွင်းတက်ပေါ်ချိန် မဟုတ်သည့်အတွက် ဈေးနှုန်းမှာ ယခင်လများဈေးနှုန်းနှင့် နှိုင်းယှဉ်လျှင် အနည်းငယ်မြင့်တက်ကြောင်းသိ ရပါသည်။ နနွင်းတက်ဈေးမှာ ယခင်အပတ်တွင် နနွင်းတက်အကြီး ၁ပိဿာလျှင် (၁၄၀၀၀)ကျပ် ဈေးနှုန်းရှိပြီး ယခုအပတ်တွင် (၁၅၀၀၀)ကျပ် ဈေးနှုန်းရှိပါသည်။ ခြင်ဆေးခွေအဖြစ်အသုံးပြုသည့် နနွင်းတက်အသေးများမှာ ယခင်အပတ်တွင် ၁ပိဿာလျှင် (၁၀၀၀၀)ကျပ်နှင့် ယခုအပတ်တွင် (၁၀၅၀၀)ကျပ် ဈေးနှုန်းနှင့်ဈေးကွက်အတွင်းတွင် အရောင်းအဝယ်ဖြစ်နေကြောင်း သိရှိရပါသည်။

DOCA(ပဲခူး)

            မြန်မာနိုင်ငံတွင် ဗာဒံပင်များ အလေ့ကျအများအပြားပေါက်ရောက်လျက် ရှိကြပါသည်။ ဗာဒံပင်ကို အရိပ်ရပင်မျိူးအဖြစ် အိမ်များတွင်အများဆုံး စိုက်ပျိုးကြပြီး ဗာဒံပင်၏ အသီးထဲမှ အဆန်ကို လူတိုင်းစားသုံးရကောင်းမှန်းမသိကြပါ။ ထို့ကြောင့် သိသူဖော်စား မသိသူကျော်သွား ဆိုသလို မသိသူများမရှိအောင် ကျန်းမာရေးအတွက် အရေးပါကြောင်း အများသိရှိအောင် ရေးသားလိုက်ရပါသည်။

             ဗာဒံစေ့ကို ပြည်မြို့လေးဆူဓာတ်ပျော်ရွှေဆံ‌တော်မြောက်စောင်းတန်းလမ်းနှင့် စစ်ကဲလမ်း ထောင့်တွင် ဗာဒံသီးများကို အခြောက်ခံထု၍ အဆန်များကို ရောင်းချလျက်ရှိကြောင်း တွေ့ရပါသည်။ ဗာဒံသီးအဆန်များကို နို့ဆီဗူးတစ်ဗူးလျှင် (၂၀၀၀)ကျပ်ဖြင့် ‌ရောင်းချခြင်းများရှိသလို (၁၀၀၀)ကျပ်၊ (၅၀၀)ကျပ်ဖိုးအထိလည်း ရောင်းချကြပါသည်။ ဒေသတွင်းစားသူများကလည်း ဝယ်ယူစားသုံးကြ သလိုနယ်ဘက်မှ လာသောသူများကလည်း ဝယ်ယူသွားကြသည့်အတွက် နေ့စဉ်နေ့တိုင်းဗာဒံစေ့များ အ‌ရောင်းအဝယ် ဖြစ်နေကြောင်းသိရပါသည်။ ‌ဗာဒံဆီကို ဆံပင်ကျွတ်သူများ အနေဖြင့်လည်း လိမ်းနိုင်ပါသည်။

            ဗာဒံစေ့ ဝယ်/ ရောင်းဒိုင်များကို ရန်ကုန်၊ ပြည်၊ မန္တလေး၊ မော်လမြိုင်၊ ထားဝယ်၊ မြိတ်၊ မြစ်ကြီးနားမြို့များတွင် ဖွင့်လှစ်ထားကြောင်းသိရပါသည်။ ဈေးနှုန်းများမှာ ဗာဒံစေ့(အဆန်) တစ်ပိဿာလျှင် (၂၀၀၀၀)ကျပ် ဖြင့်ရောင်းချပြီး တစ်ပိဿာလျှင် ဗာဒံစေ့ (အဆန်) (၃)ထောင် နီးပါး ပါဝင်သည်ဟု သိရပါသည်။ လက်ကားဝယ်ယူသူများအတွက် ပိဿာချိန် (၃၀)အထက် တစ်ပိဿာ လျှင် (၁၇၀၀၀/၁၈၀၀၀)ကျပ်ဖြင့်လည်းကောင်း၊ အချိန်(၅၀)အထက်တစ်ပိဿာလျှင် (၁၃၀၀၀)ကျပ် ဈေးဖြင့်လည်းကောင်း ရောင်းချလျက်ရှိကြောင်း သိရှိရပါသည်။

DOCA(ပဲခူး)

             ဖြူးမြို့နယ် ညောင်ကားယာကျေးရွာရှိ တောင်သူလယ်သမားများသည် လယ်ယာလုပ်ငန်းမှ အားလပ်သည့်အချိန်များတွင် ဝါးခမောက်လုပ်ငန်းလုပ်ကိုင်ခြင်းဖြင့် မိသားစုအပိုဝင်ငွေရရှိလျှက်ရှိ ပါသည်။ ဝါးခမောက်ပြုလုပ်ရာတွင် အဓိကကုန်ကြမ်းဖြစ်သော ဝါးဖတ်များကို ရန်ကုန်တိုင်းဒေသကြီး တိုက်ကြီးမြို့နယ်မှ မှာယူစုဆောင်းထားရပါသည်။ ဝါးကိုမူ ဖြူးမြို့၌ပင် ဝယ်ယူရရှိနိုင်ကြောင်းသိရသည်။

              ဝါးခမောက်ပြုလုပ်ရာတွင် ကြက်သောင်းဝါး ကိုခွဲစိပ်၍ ဝါးခွေပြုလုပ်ရပါသည်။  ဝါးဖတ်ကို အဝိုင်းဆိုဒ်တိုင်းပြီး ကပ်ကြေးဖြင့်ညှပ်ရပါသည်။ ပုံဖေါ်ညှပ်ထားသော ဝါးဖတ်များကို ကွပ်ဝါးတပ်၍ ဝါးညှပ်တံဖြင့်ဖိပြီး ချည်ကြိုးဖြင့်ချုပ်ရပါသည်။ အပေါ်ခွံအုပ်လေး ပြုလုပ်ရန်အတွက် ဝါးဖတ်အတိုအစလေးများအား ညီညာစွာဖြတ်တောက်၍ အလှဆင်ချုပ်လုပ်ရပါသည်။ ထို့နောက် ပျားဖယောင်းဖြင့် ဝါးခမောက်အား အချောကိုင်ပွတ်တိုက်၍ ဝါးခမောက်အပေါ်ခွံအုပ်တည့်တည့်တွင် အချောကိုင်ထားသော လက်ပံဆူး ဘုကလေးတပ်ဆင်ပြီးစီးပါက ရောင်းတန်းဝင်းသော ဝါးခမောက်တစ်လုံး ရရှိပါသည်။

              ဝါးခမောက်များကို တစ်လုံးလျှင် ၃၅၀၀ ကျပ်ဖြင့် ဖြူးမြို့၊ တောင်ငူမြို့၊ ညောင်လေးပင် မြို့၊ ဒိုက်ဦးမြို့များရှိ အရောင်းဆိုင်များနှင့် ရန်ကုန်မြို့ရှိဘုရင့်နောင်ဈေးများသို့ ပို့ဆောင်ပေးရကြောင်း ဝါးခမောက်ပြုလုပ်သူ ဒေါ်မြင့်မြင့်ခိုင်ထံမှ သိရှိရပါသည်။

DOCA(ပဲခူး)

            ဧရာဝတီတိုင်းဒေသကြီး၊ ဓနုဖြူမြို့နယ်အတွင်းရှိ ထုံးပုံကျေးအုပ်စု။ စာဖြူစုကျေးရွာတွင် ကျေးရွာများတွင် မုန့်ညှင်းသီးနှံကို စိုက်ပျိုးလျက်ရှိပြီး ဒေသတွင်းဟင်းသီးဟင်းရွက် သီးနှံများကို ယာမြေခြံများပေါ်တွင် တောင်သူများမှ စိုက်ပျိုးလျက်ရှိပြီး တစ်ပိုင်တစ်နိုင်ရာသီပေါ် မုန်ညင်းစိုက်ပျိုး လုပ်ကိုင်ရောင်းချရာမှ မိသားစုအတွက် ဝင်ငွေများတိုးပွားလျက်ရှိကြောင်း သိရသည်။

            မုန်ညင်းမျိုးကို သက်ငယ်၊ သက်လတ်နဲ့ သက်ကြီးဆိုပြီး သုံးမျိုးသုံးစားခွဲပြီးတော့ စိုက်ပျိုးပြီး  မုန်ညင်းသက်ငယ်မျိုးကိုတော့ ဝါဆိုလနဲ့ဝါခေါင်လမှာ စတင်စိုက်ပျိုးပါတယ်။ မုန်ညင်း သက်လတ်မျိုး ကိုတော့ တော်သလင်းလနဲ့ သီတင်းကျွတ်လမှာ စိုက်ပျိုးပါတယ်။ နောက်ဆုံး မုန်ညင်းသက်ကြီးမျိုးကို တော့ တန်ဆောင်မုန်းလကနေ့စပြီးတော့မှ ယခုလအထိပေါ့ စိုက်ပျိုးပြီး ရောင်းချပါတယ်။ မုန်ညင်း (၁၀) စည်းပါ တစ်ထုံးကိုငွေကျပ် (၂၅၀၀၀) နှုန်းဖြင့် ဖောက်သည်သွင်းရကြောင်းသိရသည်။

            မျိုးအနေဖြင့်  တြိဂံထုတ်ကိုဝယ်ယူပြီး တစ်ထုပ်လျှင် ၁၀၀၀၀ ကျပ်နှုန်းဖြင့်  ဝယ်ယူ၍ စိုက်ဧက ၀.၁၀ ဝန်းကျင်ကို မျိုးထုပ် ၂ ထုပ်ခန့် စိုက်ပျိုးရကြောင်း၊ စိုက်ပျိုးမှုအနေဖြင့် မြေဘောင်ပြုလုပ်ကာ  မြေချစနစ်ဖြင့် စိုက်ပျိုးကြောင်း၊ ၄၅ ရက်သားအရွယ်တွင် အပင်ကိုစတင် နှုတ်ရကြောင်း၊ ဒီဇင်ဘာလတွင်စိုက်ပျိုူးပြီး  စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင်  ၀.၁၀ ဧကလျှင် ငွေကျပ် ၁၀၀၀၀၀ ခန့်သာကုန်ကျပြီး အထွက်နှုန်း အနေဖြင့်   ၁လအတွင်း ထွက်ရှိသဖြင့် (၁)သိန်းခွဲ ဝန်ကျင်းခန့် အကျိုးအမြတ်ရရှိကြောင်း ဦးတင်ဝင်းမှ ပြောပြခဲ့ကြောင်းသိရှိရပါသည်။

           တင်ပို့မှု ဈေးကွက်အနေဖြင့် အဖျောက်မြို့ကျေးရွာနှင့် ရန်ကုန်သီရိမင်္ဂလာဈေး ဘက်သို့တင်ပို့ကြောင်း  မုန်ညင်းများအပြင် အခြားရာသီပေါ်သီးနှံများဖြစ်သည့် ဘူးသီး၊ ခဝဲသီး၊ ငရုတ်သီး၊  သခွားသီး၊  ပဲတောင့်ရှည်၊ ကြက်ဟင်းခါးသီးနှင့် ပန်းမုန်လာစသည့် သီးနှံများကိုလည်း စိုက်ပျိုးလုပ်ကိုင်လျက်ရှိကြောင်း သိရှိရပါသည်။

DOCA (ဧရာဝတီ)

         ဧရာဝတီတိုင်းဒေသကြီး၊ ဓနုဖြူမြို့နယ်အတွင်းရှိ ထုံးပုံကျေးအုပ်စု။ စာဖြူစုကျေးရွာတွင် ဆလပ်သီးနှံကို စိုက်ပျိုးလျက်ရှိပြီး ယခုနှစ်တွင် ဓနုဖြူမြို့နယ်တွင် ဟင်းသီးဟင်းရွက် စိုက်ဧက ၈၆၁ ကျော် စိုက်ပျိုးထားရှိကြောင်း သိရသည်။

            မျိုးအနေဖြင့်  တြိဂံထုတ်ကိုဝယ်ယူပြီး တစ်ထုပ်လျှင် ၇၀၀၀ ကျပ်နှုန်းဖြင့်  ဝယ်ယူ၍ စိုက်ဧက ၀.၁၀ ဝန်းကျင်ကို မျိုးထုပ် ၂ ထုပ်ခန့် စိုက်ပျိုးရကြောင်း၊ စိုက်ပျိုးမှုအနေဖြင့် မြေဘောင်ပြုလုပ်ကာ  မြေချစနစ်ဖြင့် စိုက်ပျိုးကြောင်း၊ ၄၀ ရက်သားအရွယ်တွင် အပင်ကို စတင်နှုတ်ရကြောင်း၊ ဒီဇင်ဘာလတွင်စိုက်ပျိုးပြီး  စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ အပါအဝင်  ၀.၁၀ ဧကလျှင် ငွေကျပ် ၁၀၀၀၀၀ ခန့်သာကုန်ကျပြီး အထွက်နှုန်းအနေဖြင့်   ၁လအတွင်း ထွက်ရှိသဖြင့် (၃)သိန်းဝန်ကျင်ခန့် အကျိုးအမြတ်ရရှိကြောင်း နှစ်စဉ် ဆလပ်သီးနှံကို မိုးအကုန် နွေအကူးအထိ  ၅ကြိမ်ခန့် စိုက်ပျိုးကြောင်း တောင်သူ ဦးအောင်မိုးမှ ပြောပြခဲ့ကြောင်းသိရသည်၊

          ဈေးနှုန်းအနေဖြင့် ၂၀.၁၂.၂၀၂၄ရက်နေ့ ဆလပ် ၂ခိုင် တစ်စီး လက်လီဈေး ၁၀၀၀ကျပ်ဖြင့် ရောင်းချကြပြီး လက်ကားဈေး ၈၀၀ကျပ်ဖြင့် ပေး၍ ရောင်းချရကြောင်း၊ တင်ပို့မှု ဈေးကွက်အနေဖြင့် အဖျောက်မြို့ကျေးရွာဘက်သို့တင်ပို့ရပြိး နှစ်စဉ်မှာယူကြောင်း  ဆလပ်ထွက်ပေါ်ချိန်တွင် ဈေးနှုန်းကောင်းမွန်မှုကြောင့် အကျိုးအမြတ်များရရှိကြောင်းကို ဆလပ်စိုက်ပျိုးသူ ဦးအောင်မိုးထံမှ သိရှိရပါသည်။

DOCA (ဧရာဝတီ)