ပြည်တွင်းကုန်သွယ်မှုသတင်း

   ၁၆.၁၁.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

     ပဲခူးတိုင်းဒေသကြီး(အနောက်)၊ ပြည်မြို့နယ်တွင် ပန်းဂေါ်ဖီအဖြူများကို ၂၀၂၃ခုနှစ်၊ အောက်တိုဘာလ တတိယပတ်မှစတင်၍ ရောင်းချနေပြီး ပြည်မြို့အနီးတဝိုက်ရှိ ကျေးရွာများ၊ မှော်ဇာ၊ ပုတီးကုန်းမြို့နယ်များတွင် ရေလောင်းစိုက်ပျိုးကြပြီး ပြည်စည်ပင်သာယာဈေးကြီးနှင့် အခြားမြို့နယ်များသို့လည်း တင်ပို့ရောင်းချကြောင်းသိရပါသည်။ နိုဝင်ဘာလ ပထမပတ်မှစတင်၍ ပန်းဂေါ်ဖီများလှိုင်လှိုင်ပေါ်လာပြီဖြစ်သောကြောင့် စားသုံးသူများအနေဖြင့် ဈေးနှုန်းချိုသာစွာ ဝယ်ယူစားသုံးနိုင်ကြပြီး အရောင်းအဝယ်သွက်နေကြောင်းသိရပါသည်။ ပန်းဂေါ်ဖီအပွင့်ကြီးတစ်ပွင့်လျှင် ကျပ်၁၁၀၀၊ အပွင့်သေးတစ်ပွင့်လျှင် (၄၀၀/၅၀၀)ကျပ်တို့ဖြင့် ရောင်းချကြောင်းသိရှိရပါသည်။ ထို့ကြောင့် စိုက်ပျိုးသူများအနေဖြင့်လည်း တွက်ခြေကိုက်ကြောင်းသိရှိရပါသည်။

DOCA(ပဲခူး)

     ပဲခူးတိုင်းဒေသကြီး (အနောက်ပိုင်း)၊ ပြည်ခရိုင်၊ ပြည်မြို့တွင် မုန်လာဥဖြူများပေါ်ပေါက်လာပြီဖြစ်ပါသည်။ မုန်လာဥဖြူမှာ ဆောင်းရာသီသီးနှံများထဲတွင်ပါဝင်ပြီး မိုးတွင်းအခါတွင် စိုက်ပျိုးနိုင်သော်လည်း ဆောင်းမုန်လာဥကဲ့သို့ မဖွံ့ဖြိုးဘဲ အလုံးမကြီးကြောင်းသိရပါသည်။ မုန်လာဥဖြူသည် သုံးတတ်လျှင် ဟင်းဖြစ်စေသော မြန်မာ့အစားအစာတစ်မျိုးဖြစ်ပါသည်။ မုန်လာဥဖြူသည် လူ၏ကျန်းမာရေးကို အထူးကောင်းမွန်စေသည်။ ဆီးကျောက်ကိုကျေစေနိုင်ပြီး အသည်းထဲသို့ဝင်ရောက်မည့် အဆိပ်အတောက်များကိုဖယ်ရှားပေးပါသည်။ အရေပြားရောဂါကိုကာကွယ်ပေး၍ အဆီကျစေပြီး ကင်ဆာရောဂါကိုပါကာကွယ်ပေးသည်။

     ယခုအခါ ပြည်ဈေးကွက်သို့ မုန်လာဥအဖြူများကို ပုတီးကုန်း၊ သဲကုန်း၊ အင်းမနှင့်ဝက်ပုတ်ဘက်တို့မှ ဝင်ရောက်လာပြီး မှော်ဇာဘက်မှလည်း အများဆုံးဝင်ရောက်လျက်ရှိပါသည်။ ၂၀၂၃ခုနှစ်၊ နိုဝင်ဘာလ လဆန်းပိုင်းတွင် ရောင်းချသောဈေးနှုန်းများမှာ မုန်လာဥဖြူ ၅လုံးပါတစ်တွဲလျှင် ၄၀၀ကျပ်နှင့် ၅၀၀ကျပ်ဖြင့် လက်ကားဝယ်ယူရပြီး လက်လီရောင်းချသူများက ၅လုံးပါတစ်တွဲလျှင် ၆၀၀ကျပ်နှင့် ၇၀၀ကျပ်နှုန်းဖြင့် ရောင်းချလျက်ရှိကြောင်းသိရှိရပါသည်။

DOCA(ပဲခူး)

     ပြည်ဈေးကွက်သို့ ရှမ်းပြည်နယ်၊ တောင်ကြီး၊ ဟိုပုံး၊ ပင်လောင်း၊ ပင်းတယဘက်တို့မှ ဝင်ရောက်မှုရှိနေသော ဂျူးမြစ်မှာ ၁၀ရက်ခြားတစ်ခါ ဝင်ရောက်မှုရှိနေပြီး လမ်းခရီးအကွာအဝေးကြောင့် ရေခဲပုံးများထဲတွင်ထည့်၍ သယ်ယူရောင်းချကြောင်းသိရပါသည်။ ရေခဲပုံးတစ်ပုံးတွင် ဂျူးမြစ်ပိဿာချိန် ၃၀ပိဿာပါဝင်ပြီး တစ်ခါဝင်လျှင် ပြည်ဈေးကွက်သို့ ရေခဲပုံး (၅)ပုံးခန့်ဝင်ရောက်မှုရှိနေပါသည်။ ဂျူးမြစ်ကို ပြည်ခရိုင်အတွင်း ဘူးသီး၊ ဂေါ်ရခါးသီး၊ ပန်းဂေါ်ဖီ၊ ခရမ်းချဉ်သီး၊ ငါးခေါင်းတို့နှင့်ရော၍ အချဉ်ဟင်းချက်စားကြပြီး မြေပဲ၊ ပဲပုပ်၊ အသားတု၊ ငရုတ်သီးစိမ်းမှုန့်တို့နှင့်ရော၍ အကြွပ်ကြော်၍စားကြကာ သက်သက်လွတ်သမားများ အများဆုံးစားသုံးကြကြောင်းသိရပါသည်။ အချိုကြိုက်သူများမှာ ထမင်းသုပ်နှင့်တို့၍ စားကြကြောင်းလည်းသိရပါသည်။

    ဂျူးမြစ်တွင် အက်ဆစ်ဓာတ်နှင့် အမျှင်ဓာတ်ပမာဏမြင့်မားစွာပါဝင်သဖြင့် အယ်ဇိုင်းမားနှင့် အိုမင်းရင့်ရော်ခြင်းတို့ကိုကာကွယ်ပေးခြင်း၊ သွေးဖိအားပုံမှန်ဖြစ်စေခြင်း၊ ဘက်တီးရီးယားဗိုင်းရပ်စ်နှင့်မှိုရောဂါများ၊ အရိုးပါး၊ အဆုတ်နှင့်အူလမ်းကြောင်းကင်ဆာရောဂါများကိုပါ ကာကွယ်ပေးနိုင်ကြောင်းသိရပါသည်။ ပြည်ဈေးကွက်ရှိ မြို့ပေါ်ဈေးများတွင် ဂျူးမြစ်ကို အေးမြသောဆောင်းရာသီတွင် ပိုမိုဝင်ရောက်မှုရှိပြီး လက်ဆတ်သည့်အမြစ်များမှာ ဖြူဖွေးလျက်ရှိပြီး ပူပြင်းသောနွေရာသီ၌ ဝင်ရောက်မှုရှိသော်လည်း အမြစ်တိုကာ မဲညစ်ညစ်အရောင်သန်းလျက်ရှိကြောင်းသိရပါသည်။ ယခုကာလဈေးနှုန်းများမှာ ရှမ်းပြည်နယ်မှ တစ်ပိဿာလျှင် ကျပ်၄၀၀၀ခန့် လက်ကားဝယ်ယူကာ လက်လီ(၁၀)ကျပ်သားလျှင် ကျပ် (၅၀၀-၆၀၀) ခန့်ဖြင့် ပြန်လည်ရောင်းချမှုရှိနေကြောင်းသိရပါသည်။ ရှားပါးချိန်နွေရာသီတွင် ၁၀ကျပ်သားလျှင် ကျပ်၁၀၀၀ခန့်ထိဈေးရှိကြောင်းသိရပါသည်။

DOCA(ပဲခူး)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကြက်သွန်နီကုန်စည်ဒိုင်တွင် ကြက်သွန်နီစိုက်ပျိုးရာဒေသများဖြစ်ကြသော ပေါက်၊ ဆိပ်ဖြူ၊ ရေပြာ၊ ကမ္မ၊ ရေစကြိုနှင့် ပခုက္ကူကျွန်းများမှ ဆောင်း စိုက်ပင်စိုက်များ အရောင်းအဝယ်ဖြစ်လျက်ရှိသည့်အပြင် အခြားဒေသများဖြစ်သော ပုလဲ၊ မြင်းခြံမြို့၊ တောင်သာနယ်၊ တမိုက်သာ၊ ပခုက္ကူတောင်ဘက်ကျွန်း၊ ဆူးလေကုန်းရွာများမှ ဆောင်းစိုက် (ပင်စိုက်) ကြက်သွန်နီများ ဝင်ရောက်အရောင်းအဝယ်ဖြစ်နေပါသည်။

     ၂၀၂၃ခုနှစ်၊ နိုဝင်ဘာလ(ပထမပတ်)တွင် ပခုက္ကူကြက်သွန်နီကုန်စည်ဒိုင်၏ ကြက်သွန်နီ ဒိုင်ပြတ်ဈေးမှာ ဆူးလေကုန်းကြက်သွန်နီ ထိပ်စ တစ်ပိဿာလျှင် ကျပ်(၃၁၅၀)၊ အလတ်စ တစ်ပိဿာလျှင် ကျပ်(၃၁၀၀)၊ အနိမ့်စ တစ်ပိဿာလျှင် ကျပ်(၃၀၀၀)၊ တမိုက်သာကြက်သွန်နီ ထိပ်စ တစ်ပိဿာလျှင် ကျပ်(၃၁၅၀)၊  အလတ်စ တစ်ပိဿာလျှင် (၃၁၀၀)၊ အနိမ့်စ တစ်ပိဿာလျှင် ကျပ် (၃၀၀၀)ဖြင့် နေ့စဉ် ကုန်ချိန်(၁၀၀၀၀)ကျော် အရောင်းအဝယ်ဖြစ်နေပြီး မြို့မစည်ပင်သာယာဈေးတွင် ကြက်သွန်နီ ထိပ်စတစ်ပိဿာလျှင် ကျပ်(၃၅၀၀)၊  အလတ်စ တစ်ပိဿာလျှင် (၃၄၀၀)၊ အနိမ့်စ တစ်ပိဿာလျှင် ကျပ်(၃၀၀၀)ဖြင့် ရောင်းဝယ်နေကြောင်း၊ တင်ပို့မှုအနေဖြင့် ရန်ကုန် ဘုရင့်နောင်သို့ တင်ပို့လျက်ရှိကြောင်း ကုန်သည်များထံမှ သိရှိရပါသည်။

DOCA(မကွေး)