ပြည်တွင်းကုန်သွယ်မှုသတင်း

    ၁၄.၁၁.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

     ၁၄.၁၁.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

   ဘားအံမြို့ အနီးဝန်းကျင်ရှိ ထုံးကျောက်တောင်များတွင်  ယခုရက်ပိုင်းအတွင်း ကျောက်ခက်ပန်းများ စပေါ်လာပြီး ဈေးများတွင် ရောင်းချနေကြောင်း သိရသည်။ ကရင်လူမျိုးများအနေဖြင့် အဆိုပါ ကျောက်ခက်ပန်းကို လုံဖော့ဟုလည်း ခေါ်ကြသည်။ ကျောက်ခက်ပန်းများသည် ဘားအံမြို့ ဇွဲကပင်တောင်နှင့် တခြားထုံးကျောက်‌တောင်များ၌ ဆောင်းဦးကာလတွင် သဘာဝအတိုင်းပေါ်ပေါက်လာသော ပန်းတစ်မျိုး ဖြစ်သည့်အပြင် ဘားအံမြို့နယ်အတွင်း ထုံးကျောက်တောင်ပေါင်း တစ်ရာကျော်ခန့်ရှိပြီး အဆိုပါ ကျောက်ခက်ပန်းများသည် ထုံးကျောက်တောင်များတွင်သာ ပေါက်လေ့ရှိပြီး ဘားအံဒေသကလွဲလျှင် တခြားဒေသများမှာ ကျောက်ခက်ပန်းများကို တွေ့ရဖို့ခက်ခဲလှသည်။

  ကျောက်ခက်ပန်းများသည် ဘုရားပန်းထိုးလျှင်  အနည်းဆုံး ၁၅ ရက်လောက်အထိ တာရှည်ခံ ပါသည်။ ဘားအံမြို့ပေါ်ရှိဈေးများတွင် ကျောက်ခက်ပန်းများကို အစည်းကြီး (၁) စည်းလျှင်- ၂၀၀၀/ကျပ် အစည်းသေး (၁)စည်းလျှင်- ၁၀၀၀/-ကျပ်နှုန်းဖြင့် ရောင်းချလျက်ရှိပြီး ယခုလိုရာသီတွင် ဒေသခံပြည်သူများအနေဖြင့် ကျောက်ခက်ပန်း ခူးထွက်ခြင်း၊ ဈေးတွင် အလွယ်တကူဝယ်ယူ၍ ဘုရားပန်းအဖြစ် ကပ်လှူပူဇော်ကြသော  ပန်းတစ်မျိုးဖြစ်ကြောင်း သိရသည်။

   ထုံးကျောက်တောင်များပေါ်တွင်သာ ပေါက်လေ့ရှိသည့် ကျောက်ခက်ပန်းများသည်   တောင်များပေါ် မူတည်၍ အရောင်ကွဲတတ်ကြသေးသည်။ ယခုလိုအချိန်တွင် ဇွဲကပင်တောင်တက်ပါက ‌တောင်နံရံများ၌ ကျောက်ခက်ပန်းများကို တွေ့ရှိရပြီး ဆောင်းရာသီကုန်ချိန်တွင် ကျောက်ခက်ပန်းများ   နွမ်းခြောက်ကုန်ပါသည်။ ယခုလို ကျောက်ခက်ပန်းပေါ်ချိန်တွင် ကရင်ပြည်နယ်၊ ဘားအံမြို့နယ်ရှိ ကျောက်တောင်ကြီးများပေါ်၌ သဘာဝအတိုင်းလှချင်တိုင်းလှနေသော ကျောက်ခက်ပန်း သို့မဟုတ် ဒေသပန်းများကို လှပစွာ မြင်တွေ့ရလျက်ရှိကြောင်း ရေးသားတင်ပြလိုက်ရပါသည်။

DOCA(ကရင်)

 မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီကုန်စည်ဒိုင်သို့ ဒေသတွင်းစိုက်ပျိုးထွက်ရှိရာကျေးရွာများမှ ကြက်သွန်နီများ နေ့စဉ် ဝင်ရောက်ရောင်းဝယ်ဖောက်ကားလျက်ရှိသည်။ ၂၀၂၃ခုနှစ်၊ နိုဝင်ဘာလ(ပထမပတ်)တွင် နေ့စဉ် ပျှမ်းမျှပိဿာ(၄)သောင်း၊ တစ်ပတ်အတွင်း ကုန်ချိန်(၃)သိန်းခန့် အရောင်းအဝယ်ဖြစ်လျက်ရှိပြီး ဆိပ်ဖြူမြို့မှ စီးဆင်းမှုအနေဖြင့်  နိုဝင်ဘာလ(၁)ရက်နေ့မှ(၇)ရက်နေ့အထိ (ပထမပတ်)အတွင်း ကြက်သွန်နီပိဿာ(၅)သိန်းခန့်ကို ရန်ကုန်၊ ပြည်၊ မော်လမြိုင်၊ မြဝတီ၊ စစ်တွေမြို့များသို့ တင်ပို့ရောင်းချလျက်ရှိကြောင်းသိရှိရပါသည်။

 ဆိပ်ဖြူကြက်သွန်နီသည် နိုဝင်ဘာလ(ပထမပတ်)တွင် ဈေးနှုန်းမြင့်ပြီး အရောင်းအဝယ်ဖြစ်လျက်ရှိသည်။ ကြက်သွန်နီဈေးကွက်အနေဖြင့် နိုဝင်ဘာလ(ပထမပတ်)အစောပိုင်းတွင်  အမြင့်ဈေးတစ်ပိဿာလျှင် ကျပ်(၂၇၀၀မှ ၃၂၀၀)ဈေးနှုန်းဖြင့် အရောင်းအဝယ်ဖြစ်ခဲ့ပြီး  အလယ်ပိုင်းတွင်  ကျပ်(၂၇၅၀မှ ၃၁၅၀)၊  (ပထမပတ်)နှောင်းပိုင်းတွင် တစ်ပိဿာလျှင် ကျပ်( ၂၇၀၀မှ ၃၁၀၀)ဈေးနှုန်းဖြစ်ခဲ့ပြီး နိုဝင်ဘာလ(ပထမပတ်)အတွင်း ကြက်သွန်နီတစ်ပိဿာလျှင် အမြင့်ဈေး ကျပ်(၃၀၀၀)ခန့်ဖြင့်ဈေးငြိမ်ပြီး အရောင်းအဝယ်ဖြစ်ခဲ့သည်။ ယခင်အောက်တိုဘာလ(စတုတ္ထပတ်)၌ အမြင့်ဈေးတစ်ပိဿာလျှင် ကျပ်(၃၁၅၀)ဖြစ်ခဲ့ပြီး ယခု၂၀၂၃ခုနှစ်၊ နိုဝင်ဘာလ ပထမပတ်တွင် အမြင့်ဈေးမှာ  တစ်ပိဿာလျှင် ကျပ်(၃၂၀၀)ဈေးနှုန်းဖြစ်၍ ထိပ်စတစ်ပိဿာလျှင် ကျပ်(၅၀)၊ အလတ်စနှင့် အသေးစ ကျပ်(၁၀၀)ခန့်စီဈေးတက်ပြီး အရောင်းအဝယ်ဖြစ်နေကြောင်း ဈေးကွက်မှသိရှိရသည်။

     နိုဝင်ဘာလ(ပထမပတ်)အတွင်း ဆိပ်ဖြူကြက်သွန်နီသည် ဒေသတွင်းဖြန့်ဖြူးရုံသာမက ပြည်ပနိုင်ငံများဖြစ်သော ထိုင်း၊ ဗီယမ်နမ်၊ ဘင်္ဂလားဒေရှ့်နိုင်ငံများက အဝယ်လိုက်၍ ဈေးမြင့်တက်နေကြောင်းသိရှိရပါသည်။ ရန်ကုန်၊ ဘုရင့်နောင်ပွဲရုံသို့ ကုန်စည်အများဆုံးစီးဆင်းခဲ့ကြောင်းသိရှိရပြီး ကြက်သွန်နီစုစုပေါင်းပျမ်းမျှပိဿာ (၃)သိန်းခန့်၊ (၁၁၅၃၈)အိတ်၊ တန်ချိန်(၄၉၀)ခန့်ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် စိုက်ပျိုးရေးနှင့်မွေးမြူရေးလုပ်ငန်းကိုအခြေခံပြီး စီးပွားဖြစ်လုပ်ကိုင်ကြသည်။ စိုက်ပျိုးရေးလုပ်ငန်းအနေဖြင့် ကြက်သွန်နီသီးနှံကိုအဓိကထား၍ စိုက်ဧကအများဆုံးစိုက်ပျိုးပြီး နှစ်စဉ် မိုး၊ ဆောင်း နှစ်ရာသီစိုက်ပျိုးကြသည်။ ယခုမိုးနှောင်းရာသီ အောက်တိုဘာလမှစ၍ နိုဝင်ဘာလလယ်အထိ ကြက်သွန်နီ (ဥ) စိုက်များကို လှိုင်လှိုင်စိုက်ပျိုးကြသည်။  စိုက်ပျိုးမှုအနေဖြင့် ဆိပ်ဖြူမြို့၏ ဧရာဝတီမြစ်နှင့် ယောချောင်း ဆုံရာမြစ်ရိုးတစ်လျှောက်ရှိ မြို့ပေါ်(၄)ရပ်ကွက်နှင့် ကိုးထောင့်အုပ်စု၊ ကမ္ဘာကြီးအုပ်စု၊ ချင်တောင်အုပ်စု၊ အောက်ဆိပ်အုပ်စု၊ မြင်ကဝအုပ်စုရှိကျေးရွာများမှ မြစ်ရေဝင်ကိုင်းကျွန်းမြေများတွင် အများဆုံးစိုက်ပျိုးကြောင်းသိရှိရပါသည်။

  ကြက်သွန်နီ(ဥ)စိုက် စိုက်ပျိုးမှုအခြေအနေများကိုသိရှိနိုင်ရန် မြို့ပေါ်ရှိ ဒေသခံကြက်သွန်နီစိုက်ပျိုးထုတ်လုပ်ရောင်းဝယ်မှုလုပ်ငန်းရှင်တစ်ဦးနှင့်ဆက်သွယ်မေးမြန်းခဲ့ရာ ယခုနွေကြက်သွန်နီ (ပင်စိုက်)များမှာ ရောင်းဝယ်ချိန်ရာသီကုန်ခါနီးတွင် ကြက်သွန်နီဈေးနှုန်းမြင့်တက်လာ၍ ဒေသခံစိုက်တောင်သူများ ယခင်နှစ်ထက် စိုက်ပျိုးမှုများလာ၍ စိုက်ဧကများလာကြောင်း၊ ယခင်နှစ်တွင် ဧက(၇၀၀)ခန့်စိုက်ပျိုးခဲ့ပြီး ယခုနှစ်တွင် ဧက(၁၀၀၀)ခန့်မှန်းကြောင်း၊ မျိုးဥများကို ဒေသထွက် မျိုးစေ့ကျဲပက်မှရရှိပြီး အရည်အသွေးကောင်း၍ အထားခံသည့် အခွံထူရွှေဖလား(ထိပ်မောက်)မျိုးကိုစိုက်ပျိုးကြောင်း၊ မျိုးဥအနေဖြင့် (ကျမ်းကျွံ)နှင့်(ဇော်မွှား)မျိုးကိုစိုက်ပျိုးကြောင်း၊ (ကျမ်းကျွံ)မျိုးဥ တစ်ပိဿာလျှင် ကျပ် (၂၂၀၀/၂၃၀၀)၊ (ဇော်မွှား)တစ်ပိဿာလျှင် ကျပ်(၃၂၀၀/၃၅၀၀)တို့ဖြင့်ဝယ်ယူရကြောင်း၊ တစ်ဧကစိုက်ပျိုးရာတွင် လက်ပေါက်အစိပ်အကြဲနှင့် ဥအကြီး/အသေးမူတည်၍ ကျမ်းကျွံဥပိဿာ(၃၅၀မှ ၄၀၀)ပိဿာ၊ ဇော်မွှားဥပိဿာ(၂၀၀မှ ၂၅၀)ပိဿာခန့်ကုန်ကျကြောင်း၊ ကြက်သွန်နီ(မိုး)ကို ဒီဇင်ဘာလတွင် စတင်တူးဖော်ပြီး ဇန်နဝါရီလတွင် လှိုင်လှိုင်တူးဖော်မည်ဖြစ်ကြောင်း၊ တစ်ဧကလျှင် ယခင်နှစ်တွင် ပျမ်းမျှပိဿာ(၄၀၀၀မှ ၅၅၀၀)ပိဿာခန့်ထွက်ရှိကြောင်းသိရှိရပါသည်။

  စိုက်တောင်သူမှာ ယခုနှစ်တွင် ကြက်သွန်နီ မိုးစိုက်(ဥစိုက်)(၃)ဧကစိုက်ပျိုးကြောင်း၊ ကျမ်းကျွံဥမျိုးစိုက်ပျိုးပြီး တစ်ဧကလျှင် ပိဿာ(၄၀၀)ခန့်နှင့် သုံးဧကလျှင် ပိဿာ(၁၂၀၀)ခန့်ကုန်ကျပြီး တစ်ပိဿာလျှင် ကျပ် (၂၅၀)ဈေးဖြင့်ဝယ်ယူရ၍ မျိုးဥစိုက်ပျိုးစရိတ်မှာ ကျပ်သိန်း(၃၀)ကုန်ကျကြောင်း၊ ယခင်နှစ်တွင် တစ်ဧကလျှင် ကုန်ကျစရိတ် ကျပ်(၂၅)သိန်းခန့်ကုန်ကျကြောင်း၊ တစ်ဧကလျှင် ပိဿာ(၅၀၀၀)ခန့်ထွက်ရှိပြီး တစ်ပိဿာလျှင် ကျပ်(၂၀၀၀)ဖြင့်ရောင်းချရ၍ အကျိုးအမြတ်များစွာရရှိခဲ့ကြောင်း၊ ယခုနှစ်တွင်လည်း ရာသီဥတုကောင်းမွန်၍ အထွက်နှုန်းကောင်းပြီး ကြက်သွန်နီ(ဥ)တစ်ပိဿာလျှင် အနိမ့်ဈေး ကျပ်(၂၀၀၀) ခန့်ဖြင့်ရောင်းချရပါက စိုက်ပျိုးတောင်သူများ အကျိုးအမြတ်များစွာရရှိမည်ဟုမျှော်လင့်ကြောင်း၊ စိုက်ပျိုးသူတောင်သူများအနေဖြင့် (၃)ဧကစိုက်ပျိုး၍ ဒီဇင်ဘာလကုန်တွင်တူးဖော်ပြီး အခင်းကျွတ်များ၌ သီးထပ်သီးနှံအဖြစ် ကြက်သွန်နီ ဆောင်းစိုက်/ပင်စိုက်စိုက်ပျိုးရန်နှင့် မျိုးစေ့ပက်ပျိုးခုံများပြုလုပ်ရန်အတွက် မြေပြုပြင်ဆောင်ရွက်လျက်ရှိကြကြောင်းသိရှိရပါသည်။

DOCA(မကွေး)