ပြည်တွင်းကုန်သွယ်မှုသတင်း

      ဗီယက်နမ်နိုင်ငံမြောက်ပိုင်း Boc Giang ခရိုင်ရှိ လိုင်ချီးသီးများ အထွက်နှုန်းကျဆင်းမှုကြောင့် အသီးဈေးနှုန်းများ ၅၀ရာခိုင်နှုန်းမြင့်တက်ခဲ့ကာ လိုင်ချီးလယ်သမားများအတွက် ငွေကြေးဆုံးရှုံးမှုများစွာဖြစ်လာစေခဲ့ပါသည်။

          လွန်ခဲ့သောနှစ်က Oanh မိသားစုလိုင်ချီးပင် ၄၀ပင်သည် အသီးအနှံများပြည့်နေသဖြင့် VND (Vietnamese dong) ၁၅၀သန်း (အမေရိကန်ဒေါ်လာ၅၉၀၀) ရရှိခဲ့သည်။ သို့သော် ယခုနှစ်တွင် အသီးအနှံအထွက်နှုန်းနည်းပါးလာကာ ဝင်ငွေမှာ VND ၁၀၀သန်းသို့လျော့နည်းသွားခဲ့သည်။

       မိုးများရွာသွန်းပြီးနောက် လိုင်ချီးပင်များပျက်စီးသွားကြောင်း Bac Giang မှ လိုင်ချီးစိုက်ပျိုး သော ‌တောင်သူတစ်ဦးကပြောကြားခဲ့သည်။ ထုတ်လုပ်မှုသည်လည်း ၉၀ရာခိုင်နှုန်းခန့်ကျဆင်းသွားကြောင်း ဆက်လက်၍ ပြောကြားခဲ့သည်။

          Thanh Son ရပ်ကွက်မှ လိုင်ချီးစိုက်ပျိုးသူတစ်ဦးကလည်း သူ၏မိသားစုပိုင်လိုင်ချီး ၅ဟတ်တာမှာ ယခင်နှစ်ထက် အထွက်နှုန်း ၅၀ရာခိုင်နှုန်းကျဆင်းသွားခဲ့ကြောင်းပြော သည်။ ဈေးနှုန်းများသည် ပုံမှန်ထက် ၁.၅ဆမြင့်တက်လာခဲ့သော်လည်း ဝင်ငွေသည် ယခင်နှစ်နှင့်နှိုင်းယှဉ်ပါက ၈၀ရာခိုင်နှုန်းခန့်သာပိုမည်ဖြစ်သည်။

          Hung Yen, Hai Duong နှင့် Central Highland ကဲ့သို့သော အခြားဒေသများတွင် လိုင်ချီးသီးဥယျာဉ်များသည် ကောင်းစွာဖြစ်ထွန်းပြီး ယမန်နှစ်အလားတူကာလ၏ ၅၀ရာခိုင်နှုန်းမှ ၆၀ရာခိုင်နှုန်းအထိ ထုတ်လုပ်မှုကျဆင်းခဲ့သည်။

          Hung Yen ဒေသရှိ Minh Tien စိူက်ပျိုးရေးသမဝါယမဒါရိုက်တာ Dang Thi Thu Huang က သမဝါယမမှ လိုင်ချီးသီး ၄၀၀ဟတ်တာသည် ယခုနှစ်တွင် ထက်ဝက်ခန့် ထုတ်လုပ်မှုကျဆင်းသွားကြောင်းပြောကြားခဲ့သည်။ ယမန်နှစ်က လိုင်ချီးသီး ဗီယက်နမ်ငွေ ၁၅၀၀၀ဖြင့်ရောင်းချခဲ့သော်လည်း ယခုနှစ်တွင် ဗီယက်နမ်ငွေ ၂၅၀၀၀ဖြစ်သွားနိုင်ကြောင်းသိရသည်။

          “ဈေးနှုန်းများမြင့်တက်နေသော်လည်း ထုတ်လုပ်မှုများကျဆင်းနေသောကြောင့် သမဝါယမ၏ ယခုနှစ်ခန့်မှန်းဝင်ငွေသည် ယခင်နှစ်အလားတူကာလနှင့်နှိုင်းယှဉ်ပါက (၂၀/၃၀) ရာခိုင်နှုန်းကျဆင်းသွားမည်ဖြစ်ကြောင်း ဒါရိုက်တာ Huang က ပြောကြားခဲ့သည်။

          Bac Criang စိုက်ပျိုးရေးဌာနမှ လက်ထောက်ညွှန်ကြားရေးမှူး Le Ba Thanh က ယမန်နှစ်တွင် ပေါများသောရိတ်သိမ်းမှုများကြောင့် ယခုနှစ်တွင် အလားတူအထွက်နှုန်း ရရှိနိုင်ရန် အာမခံကြောင်းပြောကြားခဲ့သည်။ သို့သော်လည်း သီးနှံစိုက်ပျိုးထုတ်လုပ်ရေးဌာနအကြီးအကဲ Nguyen Nhu Cuang က ဈေးနှုန်းများမြင့်တက်လာခြင်းသည် လိုင်ချီးလယ်သမားများကို အမြတ်အစွန်းများစွာရရှိစေနိုင်ကြောင်းပြောကြားခဲ့သည်။

        ပို့ကုန်လုပ်ငန်းရှင်များကလည်း လိုင်ချီးအထွက်နှုန်းနည်းခြင်းနှင့် ဈေးနှုန်းမြင့်တက်ခြင်းတို့ကြောင့် ၎င်းတို့၏အစီအစဉ်များကို ပြုပြင်ပြောင်းလဲလျက်ရှိကြောင်းသိရသည်။

        ရောင်းလိုအားနည်းပါးခြင်းနှင့် ဝယ်လိုအားမြင့်မားခြင်းသည် ဗီယက်နမ်နိုင်ငံမှ လိုင်ချီးများကို ပြည်ပသို့တင်ပို့ရန် အခက်အခဲဖြစ်စေပြီး တရုတ်နိုင်ငံနှင့် မက္ကဆီကိုနိုင်ငံကဲ့သို့သော လိုင်ချီးတင်ပို့သည့်နိုင်ငံများနှင့် ပြိုင်ဆိုင်မှုကိုလည်းပြင်းထန်လာစေပါသည်။

Source: e.venxpress.net

DOCA(ရန်ကုန်)

     မြန်မာနိုင်ငံသည် အရှေ့တောင်အာရှ၊ တောင်အာရှနှင့် အရှေ့အာရှတို့၏ အချက်အချာကျသော နေရာတွင် တည်ရှိနေပြီး အရှေ့ဘက်တွင် ထိုင်းနိုင်ငံနှင့် လာအိုနိုင်ငံ၊ မြောက်ဖက်တွင် တရုတ်နိုင်ငံ၊ အနောက်ဖက်တွင် ဘင်္ဂလားဒေ့ရှ့်နှင့် အိန္ဒိယနိုင်ငံတို့နှင့် ထိစပ်နေသည်။ ထို့အပြင် တောင်ပိုင်းတွင် ဘင်္ဂလားဒေ့ရှ်ပင်လယ်အော်ရှိပြီး အိန္ဒိယသမုဒ္ဒရာနှင့်လည်း ထိစပ်နေပါသည်။

     မြန်မာနိုင်ငံသည် အရှေ့တောင်အာရှတွင် အကြီးဆုံးနိုင်ငံဖြစ်ပြီး နိုင်ငံ၏မြောက်ဖက်၊ အရှေ့ဖက်နှင့် အနောက်ဖက်တို့တွင် တောင်တန်းများဝန်းရံလျက်ရှိသည်။ နိုင်ငံအတွင်းတွင် မြစ်ကြီး လေးစင်းရှိပြီး ဧရာဝတီ၊ ချင်းတွင်းနှင့် စစ်တောင်းမြစ်ဝှမ်းဒေသများတွင် စိုက်ပျိုးရေးကို အဓိကထား လုပ်ကိုင်နေကြကြောင်း သိရှိရသည်။

     မြန်မာနိုင်ငံသည် အဓိကအားဖြင့် စိုက်ပျိုးရေးကိုအခြေခံသည့် နိုင်ငံဖြစ်သည့် အားလျော်စွာ ပို့ကုန်အများစုမှာလည်း လယ်ယာထွက်ကုန်ပစ္စည်းများ ဖြစ်နေပါသည်။ အခြားပို့ကုန်များမှာ ရေနံထွက်ပစ္စည်းများ၊ သဘာဝဓာတ်ငွေ့နှင့် ကျွန်းသစ်၊ ကျောက်မျက်ရတနာနှင့် ရေထွက်ပစ္စည်းများ စသည်တို့ ဖြစ်ပါသည်။

    ထို့အပြင် မြန်မာနိုင်ငံတွင် အဓိကသီးနှံအနေဖြင့် စပါး၊ ပြောင်း၊ မြေပဲ၊ နှမ်း၊ နေကြာ၊ ပဲအမျိုးမျိုး၊ ဝါ၊ ကြံတို့အား စိုက်ပျိုးပြီး တစ်နိုင်ငံလုံး၏ စိုက်ပျိုးထုတ်လုပ်မှုတွင် ပဲမျိုးစုံ စိုက်ပျိုး ထုတ်လုပ်မှုသည် ဒုတိယအများဆုံး  ဖြစ်ကြောင်းလည်း စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနမှထုတ်ပြန်သော စာရင်းဇယားများအရ သိရှိရသည်။

     မြန်မာနိုင်ငံတွင် ပဲမျိုးစုံအနေဖြင့် တစ်နိုင်ငံလုံး၏ လယ်ယာထွက်ပစ္စည်းထွက်ရှိမှု၏ (၃၃%)ကို စိုက်ပျိုးထုတ်လုပ်လျက်ရှိကြောင်းသိရှိရပြီး နိုင်ငံတစ်ဝန်း စိုက်ပျိုးမြေဧရိယာ၏ (၂၀%) ခန့်သည် ပဲမျိုးစုံ စိုက်ပျိုးပါသည်။ ပဲမျိုးစုံစိုက်ဧက၏ (၇၂%)ခန့်သည် မတ်ပဲ၊ ပဲတီစိမ်း၊ ပဲစဉ်းငုံများဖြစ်ပြီး ပဲလွန်း၊ မြေထောက်ပဲ၊ ထောပတ်ပဲ၊ ပဲယင်း၊ ကုလားပဲ၊ ပဲပုပ်၊ စားတော်ပဲနှင့် အခြားပဲများလည်း စိုက်ပျိုးကြသည်။

     မြန်မာနိုင်ငံသည် ပို့ကုန်အနေဖြင့် စိုက်ပျိုးရေးထွက်ကုန်ပစ္စည်းများကို အများဆုံးတင်ပို့နေပြီး ပြည်တွင်း၌ စိုက်ပျိုးထုတ်လုပ်သော ပဲအမျိုးမျိုးကိုလည်း အိမ်နီးချင်းနိုင်ငံများလည်းဖြစ်ရ ဈေးကွက်လည်းကျယ်ပြန့်သော တရုတ်နိုင်ငံနှင့် အိန္ဒိယနိုင်ငံတို့သို့ အဓိကထား တင်ပို့လျက်ရှိကြောင်း သိရသည်။

    အိန္ဒိယနိုင်ငံသည် ပဲမျိုးစုံကို အမြောက်အမြား စားသုံးပြီး စိုက်ပျိုးသူ ဖြစ်သော်လည်း ပဲအမျိုးမျိုး (ကုလားပဲ၊ ပဲနီလေး၊ မတ်ပဲ၊ ကုလားပဲလုံးနှင့် ပဲစဉ်းငုံ)တို့ကို အဓိကထား တင်သွင်း စားသုံးနေကြောင်း သိရှိရသည်။

     မြန်မာနိုင်ငံ အလယ်ပိုင်းတွင် ပဲအမျိုးမျိုးကို အဓိကထား စိုက်ပျိုးထုတ်လုပ်လျက်ရှိပြီး ပြည်တွင်းတွင်လည်း စားသုံးသူဈေးကွက် အခိုင်အမာရှိလျက်ရှိကြောင်း သိရှိရသည်။ ပဲသည် မြန်မာလူမျိုးတို့၏ မရှိမဖြစ် အစားအစာထဲတွင် ပါဝင်ပြီး ပဲကို အမယ်မျိုးစုံ လုပ်စားကြသည်။ မြန်မာလူမျိုးတို့သည် ကုလားပဲ၊ မတ်ပဲ၊ စားတော်ပဲ၊ ပဲပုပ်နှင့် ပဲစဉ်းငုံတို့ကို အဓိကထားစားသုံးကြပြီး မြေထောက်ပဲ၊ ပဲထောပတ်၊ ပဲယင်းတို့ကိုလည်း နှစ်ခြိုက်စွာ စားသုံးကြသည်။

   ထို့အပြင် မြေပဲမှလည်း မြေပဲဆီအဖြစ် ထုတ်လုပ်စားသုံးနိုင်ပြီး ပြည်တွင်းစားသုံးဆီ ဈေးကွက်တွင် နေရာတစ်နေရာ အခိုင်အမာရထားသည်။ မြေပဲဆီသည် သန့်ရှင်းကြည်လင်ပြီး ကျန်းမာရေးနှင့်လည်း အထူးညီညွတ်ပါသည်။ မြေပဲကို ဆီအဖြစ်သာမက သရေစာအနေဖြင့်ပါ ပြည်တွင်းတွင် လူအများ နှစ်ခြိုက်စွာ စားသုံးကြပါသည်။

     မတ်ပဲ၊ ပဲစဉ်းငုံ၊ ပဲပုပ်၊ ကုလားပဲတို့သည် အာဟာရတန်ဖိုး မြင့်မားသာပဲများဖြစ်ကြပြီး ပြည်ပမှ ဝယ်လိုအား ရှိသည့်အတွက် ပြည်တွင်းတွင်အဓိကထား စိုက်ပျိုးသင့်သော ပဲအမျိုးအစားများလည်းဖြစ်သည်။ ပြည်တွင်းစားသုံးမှုအတွက် လုံလောက်‌အောင်သာမက ပြည်ပတင်ပို့မှုအတွက် ပိုလျှံအောင်ပါ စိုက်ပျိုးသင့်သည်။ နိုင်ငံ၏‌ ဘေးနှစ်ဖက်နှစ်ချက်တွင် ပဲစားသုံးသူ ထောင်ချီကျော်သော ဈေးကွက်ကြီး ရှိနေသည့်အတွက် မိမိတို့၏ ပဲလုပ်ငန်းရှင်များအနေဖြင့် လိုအပ်‌သော အရင်းအနှီးနှင့် နည်းပညာများကို ကြိုတင်ပြင်ဆင်ထားရန် လိုအပ်ပါသည်။

DOCA(ပဲခူး)

    ပဲခူးတိုင်းဒေသကြီး တောင်ငူမြို့နယ် ကန်ရိုးကျေးရွာ ရန်ကုန်-မန္တလေးလမ်းဟောင်းဘေးရှိ Green Farm ကုမ္ပဏီသည် ဒေသထွက်ကုန် ပရဆေးကုန်ကြမ်းများ၊ ဒေသထွက်ပစ္စည်းများကို ပြည်ပဈေးကွက်ရရှိအောင် ဆောင်ရွက်၍ နိုင်ငံခြားဝင်ငွေရရှိအောင် ဆောင်ရွက်ပေးနေသည်။

     ယခု ပွင့်လင်းရာသီချိန် မတ်လတွင် ပျဉ်းမရွက်ခြောက်၊ ဆနွင်း၊ ပိန်းရိုးခြောက်စသည့် ဒေသထွက်ပစ္စည်းများကို ပင်လယ်ရေကြောင်းမှ တောင်ကိုရီးယားနိုင်ငံ ဘူဆန်မြို့သို့ တင်ပို့နေသည်။ ပိန်းရိုး ခြောက်ကုန်ကြမ်းများကို ၂၀၂၃ နိုဝင်ဘာလမှ စတင်၍ တင်ပို့လာရာ ယခုအချိန်ထိ မှာယူသူ များပြားသောကြောင့် အများဆုံးတင်ပို့နေရသည်။

      မြန်မာ့ရေမြေတွင် အလေ့ကျပေါက်နေကြသော ပိန်းပင်များသည် ပြည်ပဈေးကွက်တွင် ဈေးကွက် ခိုင်မာစွာရှိနေပါသည်။ ဒေသခံပြည်သူများသည် ပိန်းရိုးကို ဝက်စာအဖြစ်သာ အသုံးပြုလျက်ရှိကြသည်။ ဈေးကွက်ကောင်းရှိက ဝယ်ယူ၍ ပြည်ပတင်ပို့ခြင်းများလည်း အနည်းငယ်ရှိကြောင်း သိရှိရသည်။

      ပိန်းရိုးပင်များသည် ဆည်မြောင်း တာတမံဘေး အနိမ့်ပိုင်းနေရာများ၊ ရေမြောင်းများ၊ အင်းအိုင်များတွင် အလေ့ကျပေါက်နေသည့် အပင်မျိုး ဖြစ်သည်။ လူတစ်ဦးသည် ပိန်းရိုးတစ်ရက် ခုတ်ပါက အစို ပိဿာအချိန် ၁၅၀ခန့် ရရှိကြောင်း၊ အစို ပိဿာ ၁၅၀ ကို အခြောက်လှမ်းပါက ၄၅ ပိဿာမှ ၄၈ ပိဿာအထိ ရရှိကြကြောင်း သိရှိရသည်။

       ၂၀၂၄ခုနှစ် မေလနောက်ဆုံးပတ်တွင် Myanmar Green Farm Co,LTD သည် ပိန်းရိုးအခြောက် တစ်ပိဿာကို ၅၅၀၀ ကျပ်ဖြင့် ဝယ်ယူပြီး ပြည်ပတင်ပို့ပါက တစ်ကီလိုဂရမ် ၆၅၀၀ ကျပ် တင်ပို့ရကြောင်း၊ မြန်မာ့ရေမြေတွင် အလေ့ကျပေါက်နေသော ပိန်းရိုးအခြောက်သည် ပြည်ပဈေးကွက်ကို အခိုင်အမာရရှိနေသောကြောင့် ပိန်းရိုးခုတ်သည့် ဒေသခံများလည်း အပိုဝင်ငွေ ရရှိနေကြကြောင်း Myanmar Green Farm Co,LTD တာဝန်ရှိသူ၏ ပြောပြချက်အရ သိရှိရသည်။

DOCA(ပဲခူး)

    ယခုရာသီများထဲတွင် လူကြိုက်အများဆုံးအသီးဖြစ်သည့် ပိန္နဲသီးများကို ပဲခူးတိုင်းတွင် စိုက်ပျိုးရောင်းချနေပြီဖြစ်သည်။ ပိန္နဲသီးများကို ပဲခူးမြို့အနီးရှိ ကျေးရွာများမှ ပဲခူးမြို့ပေါ်စျေးများသို့ လာရောက်ရောင်းချကြသည်။ ပိန္နဲသီးကို မှည့်မှည်ချိုချိုလေးမှ စားလို့ရခြင်းမဟုတ်၊ ခပ်နုနုအရွယ် အစိမ်းမှာတင် အစိမ်းလိုက်လှီး အစေးထွက်အောင် ရေစိမ်၍ အတို့အမြှုပ်အနေနဲ့ ပြုတ်စားလို့ရသလို အတုံးလေးတွေ တုံးပြီး ချက်စားလို့လည်းရကြောင်း သိရှိရပါသည်။

     ပိန္နဲသီးသည် B2, B3, B6, B9 နှင့် အမျှင်ဓာတ်များပါဝင်သော အသီးတစ်မျိုးဖြစ်သည်။ ပိန္နဲသီးစားခြင်းဖြင့် သွေးတွင်း ကိုလက်စထရောကိုကျဆင်းစေနိုင်ပြီး နှလုံးကျန်းမာစေဖို့ အထောက်အကူပြုကြောင်းကိုလည်း လေ့လာတွေ့ရှိရပါသည်။

       ၂၀၂၄ ခုနှစ်၊ မေလနောက်ဆုံးပတ်တွင် ရောင်းချသောစျေးနှုန်းအနေဖြင့် ပိန္နဲသီးတစ်လုံးလျှင် ကျပ် ၂၅၀၀ မှ ကျပ် ၁၂၀၀၀ အထိရောင်းချ‌ကြောင်း သိရသည်။

DOCA(ပဲခူး)

        ၂၇.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ ရေးမြို့နယ်တာ၀န်ခံသည် ရေးမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ “စားသုံးသူ တိုင်ကြားမှုအပေါ်ဖြေရှင်းဆောင်ရွက်ပုံအဆင့်အဆင့်နှင့် ပတ်သက်၍ (Talk Show)” ဆွေးနွေးပွဲဆောင်ရွက်ခဲ့ကြောင်း သိရှိရပါသည်။   

        အဆိုပါ (Talk Show) တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိက  (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးပြီး စားသုံးသူရေးရာဦးစီးဌာန၊ ရေးမြို့နယ်တာ၀န်ခံ ဒေါ်အိဖြိုးမှ စားသုံးသူနစ်နာဆုံးရှုံးမှုများနှင့် စပ်လျဉ်း၍ တိုင်ကြားလိုပါက လူကိုယ်တိုင် သို့မဟုတ် လူထုဆက်သွယ်ရေး နည်းလမ်းဖြင့် လည်းကောင်း၊ စားသုံးသူရေးရာဦးစီးဌာန၏ website ရှိ Complaint System တွင်လည်းကောင်း၊ DOCA Mobile Application တွင်လည်းကောင်း၊ Consumer Call Center -1535 သို့ ဖုန်းခေါ်ဆို၍လည်းကောင်း တိုင်ကြားနိုင်ပါကြောင်း၊ စားသုံးသူရေးရာဦးစီးဌာန အနေဖြင့် တိုင်ကြားလာမှုနှင့်ပတ်သက်၍ အဆိုပါတိုင်ကြားမှုမှာ မှန်ကန်မှု ရှိ/မရှိ စစ်ဆေးခြင်းနှင့် ဖြေရှင်းဆောင်ရွက်ပုံအဆင့်ဆင့်တို့ကို အကျယ်တဝင့်ရှင်းလင်း ဆွေးနွေးခဲ့ကြောင်း သိရှိရပါသည်။

DOCA(မွန်)