ပြည်တွင်းကုန်သွယ်မှုသတင်း

    သာယာဝတီခရိုင်အတွင်း၌ ယခုနှစ်တွင် သရက်သီးများကို ဥယျာဉ်ခြံမြေနှင့် အိမ်ခြံမြေများတွင် စိုက်ဧကပေါင်း ၈၃၀၇ ဧက စိုက်ပျိုးလျက်ရှိပါသည်။ ခရိုင်အတွင်းရှိ မြို့နယ်များတွင် အများဆုံး စိုက်ပျိုးသော သရက်သီးအမျိုးအစားမှာ (ရင်ကွဲ ) သရက်သီးဖြစ်ပါတယ် ။ အသီးကင်းစမှစပြီး ရင့်မှည့်ချိန်ထိ ရောင်းချ / တင်ပို့၍ရသော သရက်သီးမျိုးဖြစ်ပြီး ယခုအချိန်တွင် သရက်သီးမှည့်ချိန်ဖြစ်၍ ဈေးကွက် ရောင်းတန်းဝင် အသီးမှည့်များကို ဈေးကွက်အတွင်း၌ ရောင်းချပြီး အမှည့်လွန်အသီးများနှင့် ရောင်းတန်းမဝင်သော အသီးများကို သရက်ပြင်ပြုလုပ်၍ မိသားစု တစ်ပိုင်တစ်နိုင်ဝင်ငွေများ ရရှိလျက်ရှိပါသည်။

    သရက်ပြင် ပြုလုပ်ရာမှာ ရင်ကွဲသရက်သီးမှာ အကောင်းဆုံးဖြစ်ပါသည်။ သရက်သီး (၁) ပိဿာကို ကျိုချက်ပြီး အခြောက်ခံနေလှန်းရပါသည်။ နေလှန်းအခြောက်ခံပြီးပါက အသင့်စားသုံးနိုင်သော သရက်ပြင်များ ရရှိပါသည်။ ၁ ပိဿာကျိုချက်လျှင် သရက်ပြင် (၂၀) ကျပ်သားခန့်ရရှိပြီး၊ ဈေးအနေဖြင့် အချဉ် ၁ ပိဿာလျှင် ၆၀၀၀ ကျပ်ခန့်၊ အချိုဆိုလျှင် ၁ ပိဿာကို ၉၀၀၀ ကျပ်ခန့် ရရှိပါသည်။ ယခုအချိန်မှာ ရာသီစာဖြစ်သည့် သရက်ပြင်များ ဈေးကောင်ရရှိပြီး အကျိုးအမြတ်များလည်း ရရှိနေကြောင်း သိရှိရပါသည်။

DOCA(ပဲခူး)

    အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၃ခုနှစ်၊ ဇွန်လ (၃) ရက်နေ့မှ ဇွန်လ (၁၃) ရက်နေ့အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်း၊ ထိုသို့ ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်တစ်ပိဿာလျှင် ကျပ်၁၂၀၀မှ ကျပ်၁၆၀၀အတွင်း၊ ဂေါ်ဖီထုပ်တစ်ထုပ်လျှင် ကျပ်၅၀၀မှ ကျပ်၁၈၀၀အတွင်း၊ ပန်းဂေါ်ဖီတစ်ထုပ်လျှင် ကျပ်၁၀၀၀မှ ကျပ်၂၀၀၀အတွင်း၊ အာလူးတစ်ပိဿာလျှင် ကျပ်၂၀၀၀မှ ကျပ်၂၇၀၀အတွင်း၊ မုန့်လာဥနီတစ်ပိဿာလျှင် ကျပ်၁၆၀၀မှ ကျပ်၂၂၀၀အတွင်း ရွှေဖရုံသီးတစ်လုံးလျှင် ကျပ်၂၀၀၀မှ ကျပ်၅၀၀၀အတွင်း၊ ဘူးသီးတစ်လုံးလျှင် ကျပ်၁၂၀၀မှ ကျပ်၂၀၀၀အတွင်း၊ မုန်ညှင်းထုပ်တစ်ပိဿာလျှင် ကျပ်၂၀၀၀မှ ကျပ်၂၅၀၀အတွင်း၊ ကြက်သွန်နီ (ဆိပ်ဖြူ) ကျပ်၁၈၀၀မှ ကျပ်၂၂၀၀အတွင်း၊ ကြက်သွန်ဖြူ (ရှမ်း) တစ်ပိဿာလျှင် ကျပ်၄၅၀၀မှ ကျပ်၆၆၀၀အတွင်း၊ ကြက်သွန်ဖြူ (ကြူကုတ်) တစ်ပိဿာလျှင် ကျပ်၆၈၀၀မှ ကျပ်၆၉၀၀အတွင်း၊ ချင်းတစ်ပိဿာလျှင် ကျပ်၄၅၀၀မှ ကျပ်၈၀၀၀အတွင်း၊ ဆလပ်ရွက်တစ်စည်းလျှင် ကျပ်၂၀၀မှ ကျပ်၂၅၀အတွင်း၊ ချဉ်ပေါင်ရွက်တစ်စီးလျှင် ကျပ်၇၅မှ ကျပ်၁၀၀အတွင်း၊ ခရမ်းသီး  (ရှည်) တစ်ပိဿာလျှင် ကျပ်၁၈၀၀မှ ကျပ်၂၂၀၀အတွင်း၊ သံပရာသီးတစ်လုံးလျှင် ကျပ်၅၀မှ ကျပ်၂၀၀အတွင်း၊ ငရုတ်သီးစိမ်း (ကျောက်စိမ်း) တစ်ပိဿာလျှင် ကျပ်၂၅၀၀မှ ကျပ်၄၅၀၀အတွင်း၊ ဖရဲသီး (အကြီး၊ အလတ်၊ အသေး) တစ်လုံးလျှင် ကျပ်၁၅၀၀မှ ကျပ်၈၀၀၀အတွင်းဖြစ်ကြောင်း၊ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပရာသီးအလုံးပေါင်း (၂၁၁၉၀၀) ကျော်၊ ခရမ်းသီး (ရှည်) ပိဿာပေါင်း (၁၇၄၈၀) ကျော်၊ ဘူးသီးအလုံးပေါင်း (၁၉၅၀) ကျော်၊ ရွှေဖရုံသီးအလုံးပေါင်း (၂၈၅၀) ကျော်၊ ဂေါ်ဖီထုပ်ပေါင်း (၄၃၀၀) ကျော်၊ ပန်းဂေါ်ဖီထုပ်ပေါင်း (၂၆၀၀၀) ကျော်၊ မုန်ညှင်းထုပ်ပိဿာပေါင်း (၉၃၄၅) ကျော်၊ ဖရဲသီးလုံးပေါင်း (၇၂၀၀) ကျော်  အသီးသီးကုန်အဝင်ရှိကြောင်း သိရှိရပါသည်။

DOCA(ရန်ကုန်)

          ဝဥကြာဇံသည် ဂလူကိုမန်နန်အမှုန့်အား ရေ အဆ(၅၀) ခန့်နှင့်ရောပြီးလျှင် ကယ်လဆီယမ် ဆားရေနှင့်ရောစပ်ကာပြုလုပ်ထားခြင်းဖြစ် ကြောင်းသိရှိရပါသည်။ ဝဥကြာဇံသည် လွန်ခဲ့သော နှစ်နှစ်ခန့်မှစ၍ ဈေးကွက်အတွင်း ဝယ်ယူစားသုံးမှု များပြားလာသော ကုန်ပစ္စည်းတစ်မျိုးဖြစ်ပါသည်။ ဝဥကြာဇံသည် တောင်ကိုရီးယားနိုင်ငံ၊ ဂျပန်နိုင်ငံတို့အပါအဝင် အာရှနိုင်ငံအများစုတွင် (Diet) ပြုလုပ်နေသူများအကြားရေပန်းစားလူကြိုက်များပြီး Zero Noodle  အမည်ဖြင့်လည်း ကျော်ကြားပါသည်။

          ဝဥကြာဇံသည်အဆီဓါတ်၊ သကြားဓါတ်များမပါရှိသောကြောင့် ကိုယ်တွင်းအချိုဓါတ်များ လျော့ကျစေပြီးဝမ်းချုပ်သူများ၊သွေးတိုးဆီးချိုရှိသူများ၊ကိုယ်အလေးချိန်ထိန်းလိုသူများအတွက် အထူးသင့်လျော် သောကျန်းမာရေးဓါတ်စာအဖြစ်ဝယ်ယူစားသုံးကြပါသည်။ ဝဥကြာဇံကို မိမိတို့ နှစ်သက်ရာ အသားအသီးအရွက်များဖြင့်  ကြော်စားခြင်း၊ ပြုတ်စားခြင်း၊ သုတ်စားခြင်း များပြုလုပ်နိုင်ပါသည်။

          ဈေးကွက်အတွင်း ဝဥကြာဇံ ရိုးရိုးတစ်ခွေလျှင် (၅၀၀)ကျပ် မှ (၇၀၀) ကျပ်အထိလည်းကောင်း၊ ဝဥကြာဇံ (မာလာအရသာ) ၊ (အစပ်အရသာ) များဖြင့် ထုတ်လုပ်သော အသင့်စားခေါက်ဆွဲ ထုပ်/ဗူး များကို ထုတ်ပိုးမှုအရွယ်အစားအလိုက် တစ်ထုပ်/ဗူး လျှင် (၁၅၀၀)ကျပ်မှ (၂၅၀၀-၃၀၀၀) ကျပ်အထိလည်းကောင်း အသီးသီး ပေါက်ဈေးရှိနေကြောင်းသိရှိရပါသည်။

DOCA(ရှမ်း)

    ယခုတစ်ပတ် ပြည်ပဲမျိုးစုံဈေးကွက်မှာ ကုလားပဲနှင့် ပဲစင်းငုံသီးနှံများအနေဖြင့် ဈေးပြိုင်ရလျက်ရှိနေကြောင်း သိရပါသည်။ မတ်ပဲသီးနှံဈေးမြင့်တက်လာသော်လည်း ကုလားပဲနှင့် ပဲစင်းငုံဈေးကို မမီဘဲ ကျပ် (၈)သောင်းအောက်သာ ရရှိနေခဲ့ပါသည်။ ကုလားပဲသီးနှံမှာ တစ်တင်း (၈၅၀၀၀)ကျပ်ဖြင့် ဈေးအမြင့်ဖြင့် ဆက်လက်အရောင်းအဝယ်ဖြစ်နေပြီး ပဲခွဲစက်သမားများအပြင် ရန်ကုန်ဝယ်လက်ပါ အဝယ်ရှိနေတာကြောင့် တစ်ရက်အိတ် (၂၀၀/၃၀၀)ကျော် ရောင်းဝယ်မှုရှိခဲ့ကြပါသည်။ ပဲအဝင်မရှိဘဲ လက်ကျန်ပဲများရှိနေသောကြောင့် ဈေးကွက်အတွင်း ဝယ်လိုအား ရှိသလောက် ရောင်းချနိုင်ကြောင်း သိရပါသည်။

DOCA(ပဲခူး)

    ပြည်ခရိုင်၊ ပေါက်ခေါင်းမြို့နယ်တွင် သခွားသီးများ စိုက်ပျိုးထားရှိသဖြင့် စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံနှင့် ဝန်ထမ်းများသည် (၆.၆.၂၀၂၃)နေ့တွင် သွားရောက်၍ ကွင်းဆင်းလေ့လာခဲ့ပါသည်။

   ပေါက်ခေါင်းမြို့နယ်၊ သဖန်းချိုအုပ်စု၊ လေးကြီးကျေးရွာတွင် သခွားသီးစိုက်ပျိုးသူတောင်သူ ဒေါ်အုန်းကြည်နှင့် တွေ့ဆုံပြီး သခွားသီးစိုက်ပျိုးမှုနှင့် ကုန်ကျစရိတ်၊ အကျိုးအမြတ်တို့ကို မေးမြန်းရာ သခွားသီးကို မေလတွင် စတင်စိုက်ပျိုးပြီး တစ်လခွဲအကြာတွင် ထွက်ပေါ်လာမည်ဖြစ်ပါသည်။ သခွားသီးစိုက်ပျိုးဧကမှာ ဧကဝက်ရှိပြီး စိုက်ပျိုးထုတ်လုပ်ကုန်ကျစရိတ်အနေဖြင့် ထွန်စက်မောင်းခ တစ်စပ်ထွန် (၃၀၀၀၀)ကျပ်၊ စိုက်ပျိုးရန်ဘောင်ဖော်လုပ်သားခ (၂)ဦး (၆၀၀၀)ကျပ်၊ သခွားမျိုးစေ့ (၄)ထုပ်လျှင် (၂၃၂၀၀)ကျပ်၊ စိုက်ပျိုးရန်လုပ်သားခ (၆၀၀၀)ကျပ်၊ စိုက်ပျိုးသည့်တိုင်ဖိုး (၂၀၀၀၀) ကျပ်၊ ချည်ရန်ကြိုး (၁၄၄၀၀)ကျပ်၊ ပီနန်ကြိုး(၈၀၀၀)ကျပ်၊ ရေလောင်းလုပ်သားခ (၃၀၀၀၀)ကျပ်၊ သွင်းအားစု (၂၆၄၀၀)ကျပ်နှင့် သခွာသီးခူးဆွတ်ခ (၂၀၀၀၀)ကျပ်ဖြင့် စုစုပေါင်း (၁၈၄၀၀၀)ကျပ်ခန့် ကုန်ကျကြောင်း သိရပါသည်။ သခွားသီးများထွက်ပေါ်ချိန် ဧကဝက်တွင် အလုံးရေ(၈၀၀၀)ခန့် ထွက်ရှိကြောင်းသိရပါသည်။ သခွားသီးရောင်းဈေးအနေဖြင့် တစ်လုံးလျှင် (၆၀)ကျပ်ဖြင့် ရောင်းချရသဖြင့် တစ်ဧကဝင်ငွေမှာ (၄၈၀၀၀၀)ကျပ်ခန့် ရရှိကြောင်းသိရပါသည်။ ဧကဝက် အကျိုးအမြတ်အနေဖြင့် (၂၉၆၀၀၀)ကျပ်ခန့်ရရှိကြောင်း သိရှိရပါသည်။

    သခွားသီးစိုက်တောင်သူများအနေဖြင့် သခွားသီးစိုက်ပျိုးချိန်တွင် ဝင်ငွေများရရှိနိုင်ပြီး နှစ် ပတ်လည်စိုက်ပျိုးနိုင်မည်ဆိုပါက တစ်နှစ်ပတ်လုံးဝင်ငွေများ ရရှိနိုင်မည်ဖြစ်ကြောင်း သိရှိရပါသည် ။

DOCA(ပဲခူး)