ပြည်တွင်းကုန်သွယ်မှုသတင်း

     တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

      မိုးသီးနှံကို နှစ်စဉ် မေ၊ ဇွန်လများ၌ စတင်စိုက်ပျိုးရာ ၂၀၂၃ခုနှစ်၊မေလလယ်၌ မိုခါမုန်တိုင်းကြောင့် မိုးရွာသွန်းမှုရှိခဲ့ရာ မြေယာပြုပြင်ရန် တောင်သူများအတွက် လွယ်ကူချောမွေ့ကြောင်း သိရသည်။ မြေယာပြုပြင်ရာ၌ ထယ်ထိုးရာတွင် စက်ထယ်မှာ တစ်ဧကလျှင် (၃၅၀၀၀) ကျပ်၊ နွားထယ်မှာ (၁၀၀၀၀) ကျပ်ရှိကြောင်း သိရသည်။ မြေပြင်ပြုပြင်ပြီးနောက် မိုးသီးနှံစိုက်ရန် မြေခံမြေသြဇာကို သုံးစွဲကြရာ ဒေသတွင်းတောင်သူများအနေဖြင့် ရှေးရိုးမပျက် နွားချေးကို ပုံမှန်သုံးစွဲလေ့ရှိပါသည်။ နွားချေး စျေးမှာ နွားလှည်းတစ်စီးလျှင် (၂၀၀၀၀) ကျပ် ရှိပြီး မြေခံမြေသြဇာအဖြစ် အသုံးပြုကြပါသည်။ ယခုနှစ်မိုးသီးနှံကို မေလလယ်၌ မိုခါမုန်တိုင်းအပြီး ပြုပြင်ခဲ့ကြပြီး မိုးသီးနှံ နှမ်း၊ ဝါ၊ မြေပဲတို့ကို စိုက်ပျိုးခဲ့ကြ ပါသည်၊၊ မျိုးစျေးအနေဖြင့် မျိုးနှမ်းတစ်တင်း (၉၀၀၀၀) ကျပ်၊ ဝါစေ့ တစ်ပိဿာ (၃၅၀၀) ကျပ်နှင့် မြေပဲဆံ တစ်ပြည် (၈၀၀၀) ကျပ်ဖြင့် စိုက်ပျိုးခဲ့ပါသည်။ စိုက်ပျိုးပြီးနောက် အပင်များပေါက်လာကာ နောက်ပိုင်း မိုးရွာသွန်းမှုမရှိ၍ တောင်သူများ စိုးရိမ်ပူပန်ခဲ့ရပါသည်။ ယခုအခါ ဇွန်လဆန်း၌ မိုးကောင်းစွာရွာသွန်းမှုကြောင့် တောင်သူများပြုံးပျော်နေကြောင်း သိရသည်။

DOCA(မန္တလေး)

   စားသုံးသူရေးရာဦးစီးဌာန ၊ မန္တလေးတိုင်းဒေသကြီး ၊ မိတ္ထီလာခရိုင်မှ ဝန်ထမ်းများသည် ခရိုင်ဦးစီးမှူး၏ ကြီးကြပ်မှုဖြင့် (၆-၆-၂၀၂၃) ရက်နေ့ ၊နံနက် (၁၀:၃၀) ချိန်တွင် ထမုန်ကန်အုပ်စု စက်ပစ်တောင်ကျေးရွာနှင့် ကွက်ငယ်အုပ်စု ဇီးချိုကုန်းကျေးရွာ စပါးစိုက်ခင်းများတွင် နိုင်ငံ့စီးပွားမြင့်တင်ရေး ရန်ပုံငွေဖြင့် စိုက်ပျိုးထားသော နွေးစပါးစိုက်တောင်သူများနှင့် ကွင်းဆင်းတွေ့ဆုံဆွေးနွေးခဲ့ပါသည်။

    တွေ့ဆုံရာတွင် ဆည်မြောင်းနှင့်ရေသုံးချမှုစီမံခန့်ခွဲရေးဦးစီးဌာနမှ မြို့နယ်အတွင်းရှိ ဒေသခံတောင်သူများ နွေစပါးနှင့်အခြားသီးနှံအချိန်မှီ စိုက်ပျိုးနိုင်ရန်နှင့် စိုက်ပျိုးရေဖူလုံစေရေးတို့အတွက် ဆည်၊ ကန်၊ တမံများမှ လယ်ယာမြေ စိုက်ခင်းများအရောက် စနစ်တကျ ဖြန့်ဝေပေးလျက်ရှိကြောင်း၊ မြို့နယ်အတွင်း၌ နွေစပါး စိုက်ပျိုးရန် စိုက်ဧက (၉၃၀)ဧက လျာထားသတ်မှတ်ပြီး၊ ယင်းစိုက်ဧကများအနက် နွေစပါးစိုက်ဧက (၂၀၀)အား နိုင်ငံ့စီးပွားမြှင့်တင်ရေးရန်ပုံငွေဖြင့် ကန်ထရိုက်လယ်ယာစနစ် အကောင်ထည်ဖော်ဆောင်ရွက်လျက်ရှိကြောင်း သိရှိရပါသည်။

     ယခုနှစ်တွင် နှစ်စဉ်စိုက်ပျိုးနေကျ ဆင်းသုခမျိုးစပါး (၁၃၅) ရက်အပြင်၊ ထိုင်းနှံကောက်မျိုးစပါး (၁၁၅) ရက်များကိုလည်း စမ်းသပ်စိုက်ပျိုးထားရာ အောင်မြင်ဖြစ်ထွန်းလျက်ရှိကြောင်း သိရှိရပါသည်။ နွေစပါးကို နိုင်ငံ့စီးပွားမြှင့်တင်ရေးရန်ပုံငွေဖြင့် စက်ပစ်တောင်ကျေးရွာတွင် တောင်သူ (၃၄) ဦးဖြင့် ဧက (၁၀၀) ၊ ဇီးချိုကုန်းကျေးရွာတွင် တောင်သူ (၂၆) ဦးဖြင့် ဧက (၅၀) စိုက်ပျိုးထားကြောင်းသိရှိရသည်။ နွေ စပါးကို ဖေဖော်ဝါရီလ (၂၀) ရက်ကျော်လျှင် စတင်ပျိုးထောင်ပြီး မတ်လ (၂၀) ရက် တစ်လခန့်အကြာတွင် စတင်စိုက်ပျိုးကြောင်း၊ သယ်ယူခ ခန့်မှန်းကုန်ကျစရိတ်အဖြစ်  (၃၅၀၀၀၀-၄၀၀၀၀၀)ကျပ်ထိရှိကြောင်း၊ စပါးမျိုးနှင့်မြေသြဇာများကို စိုက်ပျိုးရေးဌာနမှ သက်သာသောနှုန်းထားဖြင့် ထုတ်ပေးသည့်အတွက် ကုန်ကျစရိတ်သက်သာစွာဖြင့် ဝယ်ယူရရှိကြောင်း သိရှိရပါသည်။

  နွေစပါးကိုယခုနှစ်တွင် စနစ်တကျစိုက်ပျိုးထားသည့်အတွက် ယခင်နှစ်အထွက်နှုန်း (ဆင်းသုခ ) မျိုးစပါး တစ်ဧက (၆၀)တင်း ထွက်ရှိရာမှ  ယခုနှစ်တွင် တစ်ဧက (၇၀)တင်းမှ(၇၅) တင်းခန့်ထွက်ရှိကြောင်း ၊ ထိုင်းနှံကောက်မျိုးစပ်စပါး ဆိုလျှင်တစ်ဧက(၈၀)တင်းမှ (၉၀)တင်းထိ ထွက်ရှိနိုင်ကြောင်း သိရှိရပြီး ၊ ယခုလကုန်တွင် နွေစပါးများ ရိတ်သိမ်းနိုင်တော့မည်ဖြစ််ကြောင်း တောင်သူများထံမှ သိရှိရ ပါသည်။

   ဈေးနှုန်းအနေဖြင့် ယခင်နှစ်ကာလတူအချိန်တွင် ဆင်းသုခစပါး တစ်တင်းလျှင် ၁၂၀၀၀ ကျပ်၊ ထိုင်းနှံကောက်စပါး တစ်တင်းလျှင် ၁၄၀၀၀ ကျပ်ရှိခဲ့ကြောင်းသိရှိရပါသည်။ အဖွဲ့ဝင်တောင်သူများ၏ ထွက်ရှိလာသော စပါးများကို စိုက်ပျိုးရေးဦးစီးဌာနမှ ကာလပေါက်ဈေးထက်ပိုမိုပေး၍ မျိုးစပါးအဖြစ် ဝယ်ယူသွားမည် ဖြစ်ကြောင်း သိရှိရပါသည််။

    ဈေးကွက်အနေဖြင့် ယခင်က ကျေးရွာလာရောက်ဝယ်ယူသော ပွဲစားများကိုလည်းကောင်း၊ ဒေသစက်ပိုင်များထံတွင်လည်းကောင်း ရောင်းချခဲ့ရပါသည်။ တောင်သူများမှ ထွက်ရှိလာသော စပါးများကို ဆန်လုပ်ငန်းရှင်၊ဆန်ကုန်သည်များနှင့် တိုက်ရိုက်ထိတွေ့ချိတ်ဆက်ဆောင်ရွက်နိုင်လျှင် ‌ ဈေးကွက်ပိုမိုရရှိနိုင်ပြီး အမြတ်အစွန်းပိုမိုရရှိနိုင်ကြောင်း ဒေသခံတောင်သူများထံမှ သိရှိရပါသည်။

    ဒေသခံတောင်သူများ တစ်ဧကအထွက်နှုန်း တိုးတက်လာစေရေး၊ ဈေးနှုန်းနှင့်ဈေးကွက်သေချာရေး၊ အမြတ်ပိုမိုရရှိစေရေး၊ အလုပ်အကိုင်အခွင့်အလမ်းများ ပိုမိုတိုးတက်ရရှိစေရေး ၊ပုဂ္ဂလိကလုပ်ငန်းရှင်များ ပြည်ပဈေးကွက်ကို ပိုမိုချိတ်ဆက်လာစေရေးနှင့် ပူးပေါင်းဆောင်ရွက်တတ်သည့် အလေ့အကျင့်ကောင်းများရရှိစေရေးတို့အတွက် မိမိတို့ဌာနမှ သက်ဆိုင်ရာဦးစီးဌာနများနှင့် ပူးပေါင်း၍ အကောင်အထည်ဖော်ဆောင်ရွက်လျက်ရှိကြောင်း သိရှိရပါသည်။

DOCA(မန္တလေး)

    တောင်ငူခရိုင်၊ ဖြူးမြို့တွင် ရွှေဘိုပေါ်ဆန်းတစ်အိတ်လျှင် ၁၀၅၀၀၀ကျပ်၊ ဧည့်မထ (မိုး) တစ်အိတ်လျှင် ၇၂၀၀၀ကျပ်၊ ဧည့်မထ (နွေ) တစ်အိတ်လျှင် ၆၀၀၀၀ကျပ်ဖြင့် ယခင်အပတ်အတိုင်း ဈေးနှုန်းတည်ငြိမ်နေပါသည်။

      မြေပဲဆီမှာ ယခင်အပတ်တွင် တစ်ပိဿာလျှင် ၁၅၀၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၁၅၅၀၀ကျပ်ဖြင့် ဈေးနှုန်းအနည်းငယ်တက်လာခဲ့ပြီး စားအုန်းဆီမှာ တစ်ပိဿာလျှင် ၆၅၀၀ကျပ်ဖြင့် ဈေးနှုန်းတည်ငြိမ်နေပါသည်။

     ကြက်သွန်နီမှာ ယခင်အပတ်တွင် တစ်ပိဿာလျှင် အသေး ၂၅၀၀ကျပ်၊ အလတ် ၂၇၀၀ကျပ်နှင့် အကြီး ၃၀၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် အသေး ၂၄၀၀ကျပ်၊ အလတ် ၂၆၀၀ကျပ်နှင့် အကြီး ၂၇၀၀ကျပ်တို့ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

     ကြက်သွန်ဖြူမှာ ယခင်အပတ်တွင် တစ်ပိဿာလျှင် အသေး ၅၅၀၀ကျပ်၊ အလတ် ၆၀၀၀ကျပ်နှင့် အကြီး ၆၅၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် အသေး ၅၀၀၀ကျပ်၊ အလတ် ၅၅၀၀ကျပ်နှင့် အကြီး ၆၀၀၀ကျပ်တို့ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

     ငရုတ်ခြောက်အရှည်မှာ ယခင်အပတ်တွင် တစ်ပိဿာလျှင် ၁၄၀၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၁၅၀၀၀ကျပ်၊ ချင်းမှာ ယခင်အပတ်တွင် တစ်ပိဿာလျှင် ၈၀၀၀ကျပ်မှ ယခုအပတ်တွင် ၁၁၀၀၀ကျပ်ဖြစ်၍ ဈေးနှုန်းအနည်းငယ်တက်လာခဲ့ပြီး အာလူးမှာ ယခင်အပတ်တွင် တစ်ပိဿာလျှင် ၂၅၀၀ကျပ်မှ ၂၈၀၀ကျပ်ထိရှိခဲ့ရာမှ ယခုအပတ်တွင် တစ်ပိဿာလျှင် ၂၄၀၀ကျပ်ဖြစ်၍ ဈေးနှုန်းအနည်းငယ်ကျဆင်းလာခဲ့ပါသည်။

      ကုလားပဲခြမ်းမှာ ယခင်အပတ်တွင် တစ်ပိဿာလျှင် ၅၀၀၀ကျပ်မှ ယခုအပတ်တွင် တစ်ပိဿာလျှင် ၅၈၀၀ကျပ်၊ ကုလားပဲလုံးမှာ ယခင်အပတ်တွင် တစ်ပိဿာလျှင် ၄၅၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၅၂၀၀ကျပ်၊ မြေပဲဆံ (အဖြူ) မှာ ယခင်အပတ်တွင် တစ်ပိဿာလျှင် ၇၅၀၀ကျပ်မှ ယခုအပတ်တွင် တစ်ပိဿာလျှင် ၇၈၀၀ကျပ်၊ မြေပဲဆံ (အနီ) မှာ ယခင်အပတ်တွင် တစ်ပိဿာလျှင် ၈၅၀၀ကျပ်ရှိခဲ့ရာမှ ယခုအပတ်တွင် တစ်ပိဿာလျှင် ၈၈၀၀ကျပ်ဖြစ်၍ ဈေးနှုန်းတက်လာခဲ့ကြောင်း သိရပါသည်။

DOCA(ပဲခူး)

    တောင်ငူမြို့တွင် ၂၀၂၃ခုနှစ်၊ ဇွန်လ၊ ပထမပတ်အတွင်း ရွှေဘိုပေါ်ဆန်းတစ်အိတ်လျှင် ၁၁၀၀၀၀ကျပ်၊ ဖျာပုံပေါ်ဆန်းတစ်အိတ်လျှင် ၁၀၃၀၀၀ကျပ်၊ ဒေသပေါ်ဆန်းတစ်အိတ်လျှင် ၉၈၀၀၀ကျပ်၊ ဧည့်မထ (မိုး) တစ်အိတ်လျှင် ၇၂၀၀၀ကျပ်၊ ဧည့်မထ (နွေ) တစ်အိတ်လျှင် ၅၈၀၀၀ကျပ်၊ မိုးစပါးတင်း၁၀၀လျှင် ၂၁၀၀၀၀၀ကျပ်နှင့် နွေစပါးတင်း၁၀၀လျှင် ၁၆၅၀၀၀၀ကျပ်တို့ဖြင့် မေလကုန်ပိုင်းအတိုင်း ဈေးနှုန်းတည်ငြိမ်နေပါသည်။

   မေလ၊ လကုန်ပိုင်းတွင် ဆန်ကွဲကြီးတစ်အိတ်လျှင် ၄၅၀၀၀ကျပ်၊ ဆန်ကွဲသေးတစ်အိတ်လျှင် ၄၃၀၀၀ကျပ်နှင့် ဖွဲနုတစ်အိတ်လျှင် ၂၆၅၀၀ကျပ်တို့ရှိခဲ့ရာမှ ယခုအပတ်တွင် ဆန်ကွဲကြီးတစ်အိတ်လျှင် ၄၄၀၀၀ကျပ်၊ ဆန်ကွဲသေးတစ်အိတ်လျှင် ၄၂၀၀၀ကျပ်နှင့် ဖွဲနုတစ်အိတ်လျှင် ၂၆၀၀၀ကျပ်တို့ဖြင့် ဈေးနှုန်းအနည်းငယ်ကျဆင်းလာခဲ့ပါသည်။

  မေလ၊ လကုန်ပိုင်းတွင် မတ်ပဲ (၃၀ပိဿာအိတ်) တစ်အိတ်လျှင် ၁၁၀၇၀၀ကျပ်၊ ပဲတီစိမ်း (၃၀ပိဿာအိတ်) တစ်အိတ်လျှင် ၈၅၀၀၀ကျပ်ရှိခဲ့ရာမှ ယခုအပတ်တွင် မတ်ပဲတစ်အိတ်လျှင် ၁၁၄၀၀၀ကျပ်၊ ပဲတီစိမ်းတစ်အိတ်လျှင် ၈၅၀၀၀ကျပ်မှ ၉၀၀၀၀ကျပ်ထိဖြစ်၍ ဈေးနှုန်းအနည်းငယ်တက်ခဲ့ပြီး ပဲလွန်းဖြူ (၃၀ပိဿာအိတ်) မှာ မေလကုန်ပိုင်းတွင် တစ်အိတ်လျှင် ၆၇၀၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၆၂၀၀၀ကျပ်ဖြင့် ဈေးနှုန်းအနည်းငယ်ကျဆင်းလာခဲ့ကြောင်း တောင်ငူမြို့ရှိ ဆန်၊ စပါး၊ ပဲပွဲရုံများမှ သိရပါသည်။

DOCA(ပဲခူး)