ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်ရှိ မီးလောင်အုပ်စု၊ ဝါးလည်ကျေးရွာတွင် ရွှေဖရုံသီး (လက်ရိုက်သီး)ကို စိုက်ပျိုးထားသဖြင့် စားသုံးသူရေးရာဦးစီးဌာန၊ မြို့နယ်တာဝန်ခံ ဦးအောင်နိုင်ဦး နှင့်ဝန်ထမ်းများသည် (၂၂.၅.၂၀၂၃) နေ့ နံနက် (၁၀:၀၀)အချိန်တွင် ကွင်းဆင်း လေ့လာခဲ့ပါသည်။

        ရွှေတောင်မြို့နယ်၊ မီးလောင်အုပ်စုတွင် ရွှေဖရုံသီး (လက်ရိုက်သီး) စိုက်ပျိုးသူ တောင်သူ (၁၂)ဦးရှိပြီး စိုက်ပျိုးသည့် စင်ပေါင်း (၁၂)စင် စိုက်ပျိုးထားကြောင်း သိရပါသည်။ ရွှေဖရုံသီး (လက်ရိုက်သီး) ဆိုသည်မှာ တစ်ခါစား အလုံးသေးမျိုးဖြစ်ပြီး မျိုးမှာ ထိုင်ဝမ်မျိုးဖြစ်ပါသည်။ ရွှေဖရုံသီးကို တန်ခူးလဆန်းတွင် စတင်စိုက်ပျိုးပြီး၊ ဝါဆိုလဆန်းတွင် အသီးများစတင်ထွက်ပေါ်၍ ခူးဆွတ်ရောင်းချရကြောင်း သိရပါသည်။ ရွှေဖရုံစိုက်ပျိုးရာ စင်ထိုး၍ စိုက်ပျိုးရပြီး တစ်စင်လျှင် ကုန်ကျစရိတ်အနေဖြင့် စင်ဖိုးအပါအဝင် (၂)သိန်းကျပ်ခန့် ကုန်ကျကြောင်းသိရပါသည်။ ထိုရွှေဖရုံစင်ကို (၂)နှစ် အသုံးပြု၍ရပြီး ရွှေဖရုံ တုံးပါက အခြားနွယ်ပင်များဖြစ်သည့် ကျောက်ဖရုံ၊ ပဲပင် များကို ဆက်လက်စိုက်ပျိုးကြောင်း သိရပါသည်။ ရွှေဖရုံသီး ခူးဆွတ်ချိန်တွင် တစ်ပတ်လျှင် တစ်ကြိမ်ခူးဆွတ်ရပြီး (၂)လခန့် ခူးဆွတ်ရကြောင်းသိရပါသည်။ ရွှေဖရုံတစ်ခင်းတွင် (လက်ရိုက်သီး) အလုံးပေါင်း (၁၄၀၀)ခန့် ရရှိကြောင်း သိရှိရပါသည်။ ဈေးနှုန်းအနေဖြင့် ယခင်နှစ်တွင် အထိုင်ဈေး တစ်လုံးလျှင် (၅၀၀)ကျပ်ဖြင့် ရောင်းချကြောင်းသိရပါသည်။ ယခုနှစ်ရွှေဖရုံသီး ထွက်ပေါ်ချိန်တွင် ယခင်နှစ်ကဈေးအတိုင်း ရရှိနိုင်ကြောင်း တောင်သူထံမှ သိရှိရပါသည်။ ယခုအချိန်တွင် ရွှေဖရုံသီး စိုက်ပျိုးနေချိန်ဖြစ်ပြီး လာမည့် ဝါဆိုလတွင် စတင်ထွက်ပေါ် လာမည် ဖြစ်သဖြင့် ယခင်နှစ်ကအတိုင်း အသီးတင်မည်ဆိုလျှင် ဝင်ငွေရရှိမှုမှာ (၇)သိန်းကျပ်ခန့်ရရှိမှာဖြစ်ပြီး အကျိုးအမြတ်အနေဖြင့် ရွှေဖရုံစင်တစ်စင်လျှင် (၅)သိန်းကျပ်ခန့် ရရှိနိုင်မည်ဖြစ်ကြောင်း သိရပါ သည်။

ရွှေဖရုံသီးကို လူအများက ရာသီစာအသီးအနှံအဖြစ် စားသုံးကြသဖြင့် ယခုလို တစ်ခါစား လက်ရိုက်သီးများသည် အလေအလွင့်မရှိဘဲ ဈေးနှုန်းအနေဖြင့်လည်းသက်သာသဖြင့် ဝယ်ယူ စားသုံးကြပါသည်။ စိုက်ပျိုးသူတောင်သူများအနေဖြင့်လည်း ရာသီချိန်တစ်နှစ်လျှင် အမြတ်အစွန်း များစွာရရှိသဖြင့်  ပိုမိုတိုးချဲ့ စိုက်ပျိုးသင့်ကြောင်း ကွင်းဆင်းလေ့လာ သုံးသပ်တင်ပြလိုက်ရပါသည်။

DOCA(ပဲခူး)

         တောင်ပို့မှိုကို အချို့က ခြမှိုဟုလည်းခေါ်ကြပါသည်။ တောင်ပို့မှိုဟု ဆိုသည့်အတိုင်း တောင်ပို့မှိုရှိရာမြေအောက် ခြကောင်ရှိသောနေရာတွင် နွေအကုန်မိုးဦးအစ မိုးတစ်ပြိုက် နှစ်ပြိုက်ရွာအပြီးတွင် ပေါက်ရောက်တတ်ပါသည်။ တောင်ပို့မှိုသည်ဈေးကောင်းသော အစားအစာ တစ်မျိုး ဖြစ်ပါသည်။ တောင်ပို့မှိုကို သဘာဝအတိုင်း တူးယူ၍ရသလို သဘာဝနည်းဖြင့်လည်း စိုက်ပျိုး၍ ရကြောင်းလည်း သိရှိရပါသည်။ စိုက်ပျိုးနည်းမှာ ပါဝင်ပစ္စည်း(၃)မျိုးသာရှိပြီး မိမိ ပတ်ဝန်းကျင်တွင် အလွယ်တကူရှာဖွေရသော ပစ္စည်းများဖြစ်ပါသည်။ ခြတောင်ပို့အတွင်းပိုင်းမှ မြေသား (၂၀)ကျပ်သားခန့်၊ ထမင်းဖြူ (၆၅)ကျပ်သား နှင့် ရေ(၂)လီတာတို့ဖြစ်ပါသည်။ ပထမဦးစွာ တောင်ပို့ မြေနှင့် ထမင်းဖြူကို ဇလုံတစ်ခုထဲတွင် သမအောင်မွှေပေးရပါမည်။ ထို့နောက် ရေကိုဖြန်းလိုက် မွှေလိုက်ဖြင့် ရေသန့်ဘူး(၂)ဘူး ကုန်သည်အထိမွှေပေးရပါမည်။ ထို့နောက် ဇလုံကိုနေရောင်ခြည် တိုက်ရိုက်မကျသော မပူလွန်း၊ မအေးလွန်းသော နေရာတွင် ရွေ့ပြောင်းခြင်း မပြုဘဲ (၇)ရက်ခန့် ထားရပါမည်။ (၇)ရက်ကျော်သောအခါ ဇလုံ၏မျက်နှာပြင်ပေါ်တွင် အမြုပ်အဖတ်ဖြူဖြူမဲမဲလေးများ တက်လာသည်ကို တွေ့ရပါသည်။ ထိုအဖတ်များသည် မှိုဖေါက်ရန် ကျူလ္လင်ဆီ (မှိုမျိုးစေ့) များ ဖြစ်ပါသည်။ ထိုမှိုမျိုးများကို ခပ်ယူ၍ အစိုဓါတ်ရှိသော မြေဆွေးပုံ၊ ကောက်ရိုးဆွေးပုံ၊ သစ်ပင်အောက်ရှိမြေဆွေးပုံအပေါ် နှံစပ်အောင်ချထားပေးရပါမည်။ မှိုမျိုးစေ့များ ချထားသော နေရာအား (၇)ရက်၊ (၈)ရက် တစ်ကြိမ်ရေစိုရုံသာ ဖျန်းပေးရုံဖြင့် မှိုဖူးလေးများ ထွက်လာမှာ ဖြစ်ပါသည်။ ယခုအချိန်ပေါ်ဦးပေါ်ဖျား တောင်ပို့မှိုများဈေးကွက်တွင် ရောင်းချနေပြီဖြစ်ပါသည်။ အဖူးများဖြစ်သောကြောင့် ပိုချို၊ ပိုနု၍ စားလို့အလွန်ကောင်းပါသည်။ တောင်ပို့မှု (၅၀)ကျပ်သား လျှင် (၁၅၀၀၀)ကျပ်၊ တစ်ပိဿာလျှင် (၃)သောင်းကျပ်ဖြင့် ရောင်းချကြောင်း သိရပါသည်။ တောင်ပို့မှိုကို သဘာဝနည်းဖြင့် အလွယ်ကူဆုံးနှင့် ကုန်ကျစရိတ်နည်းနည်းဖြင့် မြေအများကြီးရှိဖို့ မလိုဘဲ အိမ်တွင်းတိုက်ခန်း၊ ကွန်ဒိုနေသူများပါ ပန်းအိုးအတွင်း မြေဆွေးထည့်၍ စိုက်ပျိုးနိုင်ပါသည်။

        ထို့ကြောင့် တောင်ပို့မှိုသည် စီးပွားဖြစ်ထုတ်လုပ်ရောင်းချနိုင်သလို၊ တစ်နိုင်တစ်ပိုင် စိုက်ပျိုး၍ မိသားစုဝင်ငွေရရှိအောင် စိုက်ပျိုးထုတ်လုပ်ရောင်းချနိုင်သဖြင့် စိုက်ပျိုးသင့်သော ဟင်းအမယ်တစ်မျိုးဖြစ်ကြောင်း လေ့လာတင်ပြလိုက်ရပါသည်။

DOCA(ပဲခူး)

           တောင်ငူမြို့ ညောင်ပင်ဈေးတွင် ကြက်သား(အိမ်မွေးကြက်)မှာ ယခင်အပတ်က တစ် ပိဿာလျှင် ၂၀၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၁၈၀၀၀ ကျပ်ဖြင့် ဈေးနှုန်း အနည်းငယ်ကျပါသည်။ မွေးမြူးရေးကြက်(စီပီကြက်)မှာ အသားသီးသန့် တစ်ပိဿာလျှင် ၁၂၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်နေပြီး အခြမ်းလိုက်ဈေးမှာ ယခင်အပတ်က တစ်ပိဿာလျှင် ၈၀၀၀ ကျပ်မှ ယခုအပတ်တွင် တစ်ပိဿာလျှင် ၁၀၀၀၀ ကျပ်ဖြင့် ဈေးနှုန်းအနည်း ငယ်မြင့်တက်ပါသည်။

              ဝက်သား(ရေလွတ်သား)မှာ သုံးထပ်သား တစ်ပိဿာလျှင် ၁၆၀၀၀ ကျပ်၊ ပေါင်သား တစ် ပိဿာလျှင် ၁၈၀၀၀ ကျပ်၊ အသားသီးသန့် တစ်ပိဿာလျှင် ၂၀၀၀၀ ကျပ်ဖြင့် ယခင်ကအပတ်က အတိုင်း ဈေးနှုန်းတည်ငြိမ်နေပါသည်။

              ငါးကြင်းမှာ ယခင်အပတ်က အကောင်လိုက်ဈေးမှာ တစ်ပိဿာလျှင် ၁၀၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၁၂၀၀၀ ကျပ်ဖြင့် ဈေးနှုန်းအနည်းငယ်တက်ခဲ့ပြီး အသားသီးသန့် တစ်ပိဿာလျှင် ၁၄၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်နေပါသည်။

              ငါးကြင်းဖြူမှာ ယခင်လက အကောင်လိုက်ဈေး တစ်ပိဿာလျှင် ၁၆၀၀၀ ကျပ်၊ အမြီး လွတ်ခေါင်းလွတ် တစ်ပိဿာလျှင် ၁၈၀၀၀ ကျပ်ရှိရာမှ ယခုအပတ်တွင် အကောင်လိုက်ဈေး ၁၈၀၀၀ ကျပ်၊ အမြီးလွတ်ခေါင်းလွတ် တစ်ပိဿာလျှင် ၂၀၀၀၀ ကျပ်ဖြင့် ဈေးနှုန်းအနည်းငယ် မြင့်တက်ပါသည်။

              ငါးရံ့ တစ်ပိဿာလျှင် အသေး ၁၅၀၀၀ ကျပ်၊ အလတ် ၁၈၀၀၀ ကျပ်နှင့် အကြီး ၂၀၀၀၀ ကျပ်၊ ငါးခူ တစ်ပိဿာလျှင် အသေး ၁၈၀၀၀ ကျပ်၊ အလတ် ၂၀၀၀၀ ကျပ်နှင့် အကြီး ၂၂၀၀၀ ကျပ်ဖြင့် ယခင် အပတ်ကအတိုင်း ဈေးနှုန်းတည်ငြိမ်နေပါသည်။

              ပုဇွန်ဆိတ်မှာ တစ်ပိဿာလျှင် ၈၀၀၀ ကျပ်၊ ပုဇွန်အသေး တစ်ပိဿာလျှင် ၂၄၀၀၀ ကျပ် ဖြင့် ဈေးနှုန်းတည်ငြိမ်နေပြီး ပုဇွန်အလတ်မှာ ယခင်အပတ်က ၂၆၀၀၀ ကျပ်မှ ယခုအပတ်တွင် ၂၈၀၀၀ ကျပ်နှင့် ပုဇွန်အကြီးမှာ ယခင်အပတ်က တစ်ပိဿာလျှင် ၂၈၀၀၀ ကျပ်မှ ယခုအပတ်တွင် တစ်ပိဿာ လျှင် ၃၀၀၀၀ ကျပ်ဖြင့် ဈေးနှုန်းအနည်းငယ်မြင့်တက်ကြောင်း  သိရပါသည်။

DOCA(ပဲခူး)

              ပဲခူးတိုင်းဒေသကြီး၊ တောင်ငူမြို့တွင် ယခင်အပတ်က 92 RON တစ်လီတာလျှင် ၁၉၅၀ ကျပ်၊ 95 RON တစ်လီတာလျှင် ၂၀၄၀ ကျပ်၊ ဒီဇယ် တစ်လီတာလျှင် ၁၉၀၀ ကျပ်နှင့် ပရီမီယံ ဒီဇယ် တစ်လီတာလျှင် ၁၉၈၀ ကျပ် ရှိခဲ့ပါသည်။

              ယခုအပတ်တွင် 92 RON တစ်လီတာလျှင် ၂၀၂၅ ကျပ်၊ 95 RON တစ်လီတာလျှင် ၂၁၂၀ ကျပ်၊ ဒီဇယ် တစ်လီတာလျှင် ၁၉၃၅ ကျပ်နှင့် ပရီမီယံ ဒီဇယ် တစ်လီတာလျှင် ၂၀၁၅ ကျပ် ရှိခဲ့ပါသည်။

              သို့ဖြစ်ပါ၍ စက်သုံးဆီဈေးမှာ ယခင်အပတ်ကထက် 92 RON တစ်လီတာလျှင် ၇၅ ကျပ်၊ 95 RON တစ်လီတာလျှင် ၈၀ ကျပ်၊ ဒီဇယ် တစ်လီတာ လျှင် ၃၅ ကျပ်နှင့် ပရီမီယံဒီဇယ် တစ်လီတာလျှင် ၃၅ ကျပ် ဈေးတက်ကြောင်း သိရှိရပါသည်။

DOCA(ပဲခူး)

              ၂၀၂၃ ခုနှစ်၊ မေလ (စတုတ္ထပတ်)အတွင်း၌ တောင်ငူမြို့ ညောင်ပင်လေးဈေးရှိ ဟင်းသီးဟင်းရွက်ဈေးတွင် ငရုတ်သီးစိမ်း (မိုးထောင်သီး) တစ်ပိဿာလျှင် ၉၀၀၀ ကျပ်၊ ကုလားအော်သီး တစ်ပိဿာလျှင် ၂၀၀၀၀ ကျပ်၊ ခရမ်းသီး (အဖြူ)  တစ်ပိဿာလျှင် ၁၅၀၀ ကျပ်၊ ခရမ်းသီး(အညို) တစ်ပိဿာလျှင် ၂၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်နေပါသည်။

              ဒေသသခွားသီးမှာ ယခင်အပတ်က တစ်ပိဿာလျှင် ၈၀၀ ကျပ်အထိရှိရာမှ ယခု အပတ်တွင် တစ်ပိဿာလျှင် ၁၀၀၀ ကျပ်၊ ရှမ်းပြည်သခွားသီးမှာ ယခင်အပတ်က တစ်ပိဿာလျှင် ၁၀၀၀ ကျပ်ရှိရာမှ ယခုအပတ်တွင် တစ်ပိဿာလျှင် ၁၂၀၀ ကျပ်၊ ဂေါ်ဖီမှာ ယခင်အပတ်က တစ်ပိဿာလျှင် ၁၅၀၀ ကျပ် အထိ ရှိရာမှ ယခုအပတ်တွင် တစ်ပိဿာလျှင် ၁၆၀၀ ကျပ်သို့ ဈေးနှုန်း အနည်းငယ် မြင့်တက်ပါသည်။

              ခရမ်းချဉ်သီး တစ်ပိဿာလျှင် ၁၃၀၀ ကျပ်မှ ၁၅၀၀ ကျပ်၊ ပြောင်းဖူး အကြီး တစ်ဖူးလျှင် ၂၀၀ ကျပ်မှ ၂၅၀ ကျပ်အထိ၊ ပြောင်းဖူးအသေး တစ်ဖူးလျှင် ၁၃၀ ကျပ်မှ ၁၅၀ ကျပ်အထိဖြင့် ယခင် အပတ် ကအတိုင်း ဈေးနှုန်းတည်ငြိမ်နေပါသည်။

              နံနံပင်မှာ ယခင်အပတ်က တစ်ဆယ်ကျပ်သားလျှင် ၅၀၀ ကျပ်မှ ယခုအပတ်တွင် တစ်ဆယ် ကျပ်သားလျှင် ၆၀၀ ဖြင့် ဈေးနှုန်းအနည်းငယ် မြင့်တက်ပါသည်။ ကန်စွန်းရွက်မှာ တစ်စည်း ၁၀၀ ကျပ်၊ ၁၀ စည်းယူလျှင် ၇၀၀ ကျပ်၊ ချဉ်ပေါင်ရွက်မှာ တစ်စည်း ၁၀၀ ကျပ်၊ ၁၀ စည်းယူလျှင် ၇၀၀ ကျပ်ရှိ ကြောင်း သိရပါသည်။

DOCA(ပဲခူး)