ပြည်တွင်းကုန်သွယ်မှုသတင်း

    နေပြည်တော်၊ ရန်ကုန်၊ မန္တလေး နှင့် ပုသိမ်မြို့ကြီးများ၏ အခြေခံစားကုန်(လက်လီ)၊ ပြည်ပပို့ကုန်၊ စက်သုံးဆီ နှင့် ရွှေဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယနေ့ ကာလတူ နှိုင်းယှဉ်၍ ပြုစုတင်ပြအပ်ပါသည်။

    တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

       တောင်ငူခရိုင်၊ အုတ်တွင်းမြို့နယ်၊ ကျွဲပွဲမြို့၊ ကျင်းကြီးရပ်ကွက်၊ ငုဝါလမ်းတွင် လုပ်ငန်းရှင် ဦးထွန်းထွန်းနိုင်က သစ်သားအခြေခံ မီးဖိုချောင်သုံးပစ္စည်းများကို တွင်ကျယ်စွာ ထုတ်လုပ် ရောင်းချလျက် ရှိပါသည်။ အဓိကအားဖြင့် ငရုပ်ဆုံ၊ ဇွန်းနှင့် ယောင်းမတို့ကို ထုတ်လုပ်လျက်ရှိပြီး ပန်းအိုး၊ ဆွမ်းအုပ်နှင့် ဆွမ်းတော်တင်ကလပ်တို့ကို အော်ဒါမှာယူပါက ထုတ်လုပ်ပေးပါသည်။ လုပ်သား ၃ ဦးဖြင့် ထုတ်လုပ်လျက်ရှိပါသည်။

    အသုံးပြုသောသစ်သားမှာ ကုက္ကိုသားနှင့် ဘင်္ဂသားဖြစ်ပါသည်။ ကုက္ကိုသားတစ်တန်လျှင် ၆၀၀၀၀၀ ကျပ်ဖြင့် ဒေသတွင်းမှပင် ဝယ်ယူပါသည်။ ၁၀ လက်မ ဆွမ်းအုပ်တစ်လုံးအတွက် ကုန်ကျ စရိတ်ဖြစ်သည့် သစ်သားဖိုး၊ လက်ခနှင့် ဆေးဖိုးမှာ ၃၁၀၀၀ ကျပ်ဖြစ်ပြီး ရောင်းဈေးမှာ တစ်လုံးလျှင် ၃၄၀၀၀ ကျပ် ဖြစ်ပါသည်။ ၈ လက်မ အလတ်စားဆွမ်းအုပ်တစ်လုံးလျှင် ၂၅၀၀၀ ကျပ်၊ ၆ လက်မ အသေးစားဆွမ်းအုပ်တစ်လုံးလျှင် ၁၅၀၀၀ ကျပ်ဖြင့် ရောင်းချပါသည်။ တစ်ရက်လျှင် လုပ်သား တစ်ဦးက ဆွမ်းအုပ် ၂ လုံး ထုတ်လုပ်နိုင်ပါသည်။

    ငရုတ်ဆုံ၊ ဇွန်းနှင့် ယောင်းမတို့ကို ဘင်္ဂသားဖြင့် ပြုလုပ်ရပြီး တစ်တန်လျှင် ၉၀၀၀၀ ကျပ် ပေးဝယ်ရပါသည်။ ပစ္စည်းများကို အရွယ်အစားမျိုးစုံ ထုတ်လုပ်ပါသည်။ ၁၆ လက်မ ယောင်းမ တစ်ချောင်း၏ ကုန်ကျစရိတ်မှာ ၄၆၅ ကျပ်ရှိပြီး ရောင်းဈေးမှ ၅၀၀ ကျပ်ဖြစ်ပါသည်။ တစ်ရက်လျှင် လုပ်သားတစ်ဦးက ယောင်းမ အချောင်း ၁၀၀ ထုတ်လုပ်နိုင်ပါသည်။

     ငရုတ်ဆုံမှာ သင်္ဘောသီးထောင်းသည့်အရွယ် အကြီးဆိုဒ် တစ်ပေပတ်လည်တစ်လုံးလျှင် ကျည်‌ပွေ့ အပါအဝင် ကုန်ကျစရိတ် ၃၆၀၀၀ ခန့်ရှိပြီး တစ်လုံးလျှင် ၄၀၀၀၀ ကျပ်ဖြင့် ပြန်လည် ရောင်းချပါသည်။ ၈ လက်မအရွယ်တစ်လုံးလျှင် ကုန်ကျစရိတ် ၁၀၀၀၀ ကျပ်ရှိပြီး ၁၃၀၀၀ ကျပ်ဖြင့် ပြန်လည်ရောင်းချပါသည်။ ၆ လက်မအရွယ်တစ်လုံးလျှင် ကုန်ကျစရိတ် ၆၀၀၀ ကျပ်ရှိပြီး ၈၀၀၀ ကျပ်ဖြင့် ပြန်လည်ရောင်းချပါသည်။

      ၎င်းသစ်သားအခြေခံ မီးဖိုချောင်သုံးပစ္စည်းမားကို ဖြူးမြို့၊ တောင်ငူမြို့နှင့် ပဲခူးမြို့များသို့ တင်ပို့ရောင်းချပြီး ဒေသတွင်းမှာယူပါက အိမ်အရောက်စနစ်ဖြင့် ပို့ဆောင်ပေးကြောင်း လုပ်ငန်းရှင် ပြောပြချက်အရ သိရပါသည်။

DOCA(ပဲခူး)

    မင်းကွတ်သီးသည် အပူပိုင်းဒေသထွက်သီးနှံတစ်မျိုးဖြစ်ပြီး ဖြူးမြို့ရှိသစ်သီးဆိုင်များတွင် ကျောက်ကြီးဒေသထွက် မင်းကွတ်သီးများ အရောင်းသွက်လျက်ရှိပါသည်။ မင်းကွတ်သီး တစ်လုံးလျှင် (၄၀၀)ကျပ်မှ (၇၀၀)ကျပ်အထိ အလုံးအကြီးအသေးပေါ်မူတည်၍ ဈေးနှုန်းမှာအနည်းငယ် အပြောင်းအလဲရှိပါသည်။ မင်းကွတ်သီးသည် ချိုချိုချဉ်ချဉ်အရသာရှိသောကြောင့် လူအများက အအီပြေစေသည့် အသီးအဖြစ် စားသုံးကြပါသည်။

 မင်းကွတ်သီးတွင် ဗီတာမင်စီ၊ ပိုတတ်ဆီယမ်၊ ကယ်ဆီယမ်၊ မဂ္ဂနီစီယမ်၊ ဖော့စ်ဖရပ်၊ သွပ်ဓါတ်၊ သံဓါတ်နှင့် ဆိုဒီယမ်ဓါတ်တို့လည်း အနည်းငယ်စီပါဝင်ပါသည်။ မင်းကွတ်သီး စားသုံး ခြင်းကြောင့် ကယ်လိုရီနည်းခြင်း၊ ဗီတာမင်စီပါဝင်ခြင်း၊ သွေးလည်ပတ်မှု ကောင်းမွန်စေခြင်း၊ ကင်ဆာဖြစ်ပွားမှုကိုလျှော့ချပေးခြင်း၊ ကိုယ်ခံစွမ်းအားကို တိုးမြှင့်ပေးခြင်း၊ သွားဖုံးနှင့်ပတ်သတ် သောရောဂါများကို သက်သာစေခြင်း၊ သွေးတွင်းသကြားဓါတ်ကိုလျှော့ချပေးခြင်းနှင့် နှလုံး သွေးကြောဆိုင်ရာ ရောဂါများကို ကာကွယ်ပေးခြင်းစသည့် အကျိုးကျေးဇူးများရရှိပါသည်။

     မင်းကွတ်သီးသည် အခြားသီးနှံများနှင့်မတူဘဲ အကျိုးကျေးဇူးများစွာရှိသည့် အသီးဖြစ်သောကြောင့် ယခုလိုပူအိုက်သောရာသီတွင် အရောင်းသွက်လျက်ရှိကြောင်း သိရှိရပါသည်။

DOCA(ပဲခူး)

   တောင်ငူခရိုင်၊ အစားအသောက်နှင့် ဆေးဝါးကွပ်ကဲရေးဦးစီးဌာနက ဆေးဆိုင်နှင့် ဈေးများသို့ ကွင်းဆင်းစစ်ဆေးရာတွင် ပူးပေါင်းပါဝင်ဆောင်ရွက်ပေးနိုင်ပါရန် ညှိနှိုင်းချက်အရ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ စစ်ဆေးရေးအရာရှိ ဦးစီးမှူး ဦးမင်းဇော်နှင့် ဒုတိယဦးစီးမှူး ဦးနေစိုးထက်တို့သည် ယနေ့နံနက်ပိုင်းတွင် အစားအသောက်နှင့်ဆေးဝါးကွပ်ကဲရေး ဦးစီးဌာန၊ ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများ ပါဝင်သည့် ပူးပေါင်းအဖွဲ့နှင့်အတူ ကွင်းဆင်းစစ်ဆေးဆောင်ရွက်ခဲ့ပါသည်။

  ရှေးဦးစွာ ပူးပေါင်းအဖွဲ့သည် တောင်ငူမြို့ ညောင်ပင်ဈေး(ကုန်စိမ်းဈေး)အတွင်း ရောင်းချနေသော စားသောက်ကုန်များ၌ ခွင့်မပြုဓါတုဆိုးဆေးပါဝင်မှုရှိ/မရှိ၊ ရက်လွန်အစားအသောက်များ ရောင်းချမှုရှိ/မရှိတို့ကို စစ်ဆေးခဲ့ပြီး စားသောက်ကုန်အချို့ကို နမူနာကောက်ယူခဲ့ပါသည်။ ထို့နောက် ပူးပေါင်းအဖွဲ့သည် တောင်ငူမြို့ မြို့မဈေးကြီးပတ်ဝန်းကျင်ရှိ ဆေးဆိုင်များသို့ သွားရောက်၍ တရားမဝင်ဆေးဝါးများ၊ သက်တမ်းလွန်ဆေးဝါးများ ရောင်းချခြင်း ရှိ/မရှိကို ကွင်းဆင်း စစ်ဆေး ခဲ့ပါသည်။

    စားသုံးသူရေးရာဦးစီးဌာနမှ စစ်ဆေးရေးအရာရှိ ဦးမင်းဇော်က တရားမဝင်ကုန်စည်များ ရောင်းချခြင်းသည် နိုင်ငံတော်က ရသင့်ရထိုက်သည့် အခွန်ငွေများမရသဖြင့် နိုင်ငံတော်အတွက် များစွာနစ်နာမှုရှိပါသဖြင့် တရားမဝင်ကုန်စည်များအား ရောင်းချခြင်းမပြုရန်၊ စားသုံးသူကို အန္တရာယ် ဖြစ်စေနိုင်သည့် အစားအသောက်များနှင့် ရက်လွန်အစားအသောက်များရောင်းချခြင်း သည် စားသုံးသူကာကွယ်ရေးဥပဒေပါ ပြဌာန်းချက်များနှင့် ငြိစွန်းပါသဖြင့် ရောင်းချခြင်းမပြုရန် သက်ဆိုင်ရာဆိုင်ပိုင်ရှင်များနှင့် အရောင်းကိုယ်စားလှယ်များအား အသိပေးဆွေးနွေးခဲ့ကြောင်း သိရပါသည်။

DOCA(ပဲခူး)