ပြည်တွင်းကုန်သွယ်မှုသတင်း

     ပခုက္ကူကုန်စည်ဒိုင်၌ ၂၀၂၃ုခုနှစ်၊ မေလ(ပထမပတ်)တွင် ပဲစင်းငုံတစ်တင်းလျှင် ကျပ်(၇၇၂၀၀)ဖြင့် အိတ်(၁၀၀)ခန့်အရောင်းအဝယ်ဖြစ်ခဲ့ပြီး ဒုတိယအပတ်တွင် ပဲစင်းငုံတစ်တင်းလျှင် ကျပ်(၇၉၃၀၀)ဖြစ်၍ ကျပ်(၂၁၀၀)ဈေးမြင့်တက်ခဲ့ပြီး တစ်ရက်ကို အိတ်(၁၃၀)ခန့် ရန်ကုန်မြို့နှင့် မန္တလေးမြို့များသို့ တင်ပို့ခဲ့ပါသည်။

     မေလ(ပထမပတ်)တွင် ကုလားပဲဟော်လန်တစ်တင်းလျှင် ကျပ်(၇၁၃၀၀)ရှိပြီး ဒုတိယအပတ်တွင် အနည်းငယ်ဈေးတက်၍ ကျပ်(၇၁၇၀၀)ဖြင့် တစ်ရက်ကို အိတ်(၈၀)ခန့်အရောင်းအဝယ်ဖြစ်ခဲ့ပါသည်။ ပထမအပတ်တွင် ကုလားပဲ(V6)တစ်တင်းလျှင် ကျပ်(၇၁၈၀၀)၊ ကုန်လားပဲ(V2)တစ်တင်းလျှင် ကျပ် (၇၁၃၀၀)မှ ဒုတိယအပတ်တွင် ပဲနှစ်မျိုးလုံးလျှင် ကျပ်(၇၂၀၀၀)ဖြင့် တစ်ရက်ကို အိတ်(၁၅၀)ခန့် မြို့တွင်းပဲကြော်လုပ်ငန်းရှင်များနှင့် ရန်ကုန်မြို့သို့တင်ပို့မှုများရှိခဲ့ပါသည်။

      မေလ(ပထမပတ်)တွင် ပဲတီစိမ်းတစ်တင်းလျှင် ကျပ်(၆၇၀၀၀)ရှိခဲ့ပြီး ဒုတိယအပတ်တွင် ကျပ် (၆၅၈၀၀)ဖြစ်၍ ကျပ်(၁၂၀၀)ခန့်ဈေးကျခဲ့ပြီး တစ်ပတ်အတွင်း အိတ်(၁၂၀၀)ခန့်အရောင်းအဝယ်ရှိခဲ့ပါသည်။ စွန်တာနီ(ကျွန်း)မှာ ပထမအပတ်တွင် ကျပ်(၄၆၀၀၀)ဖြစ်ပြီး ဒုတိယအပတ်တွင် ကျပ်(၄၅၀၀၀)ဖြစ်၍ ဈေးအနည်းငယ်ကျခဲ့ပါသည်။ ရန်ကုန်နှင့် မန္တလေးမြို့များသို့ အများဆုံးတင်ပို့ပြီး တစ်ရက်လျှင် အိတ်(၁၀၀)ခန့်အရောင်းအဝယ်ဖြစ်ခဲ့ပါသည်။

       ပဲဇီးကွက်မှာ မေလ(ပထမပတ်)တွင် ကျပ်(၄၂၄၀၀)ဈေးရှိပြီး ဒုတိယအပတ်တွင်လည်း ဈေးနှုန်းအတတ်အကျမရှိဘဲ တည်ငြိမ်နေပြီး ကျပ်(၄၂၄၀၀)ဖြင့်ပင် အရောင်းအဝယ်ဖြစ်ခဲ့ပါသည်။ ဒေသတွင်းစားသုံးမှုပိုများ၍ တစ်ရက်လျှင် အိတ်(၈၀)ခန့် မြို့တွင်းအဝယ်ရှိခဲ့ပါသည်။

      ပခုက္ကူကုန်စည်ဒိုင်တွင် ပဲမျိုးစုံအရောင်းအဝယ်ဖြစ်နေသကဲ့သို့ မန်ကျည်းသီးတောင့်များလည်း အရောင်းအဝယ်ဖြစ်လျက်ရှိရာ မေလ(ပထမပတ်)တွင် တစ်ပိဿာလျှင် ကျပ်(၁၀၃၀)မှ ဒုတိယအပတ်တွင် ကျပ်(၉၃၀)သို့ကျဆင်းခဲ့သော်လည်း တစ်နေ့လျှင် ပိဿာ(၂၀၀၀၀)ခန့်အရောင်းအဝယ်ဖြစ်နေကြောင်း ကုန်စည်ဒိုင်မှ သိရှိရပါသည်။

DOCA(မကွေး)

   ပဲခူးတိုင်းဒေသကြီး၊ ကျောက်ကြီးမြို့နယ်၊ ကျောက်ကြီးမြို့တွင် ကျောက်ကြီးဒူးရင်းသီးများ လှိုင်လှိုင်ပေါ်၍ စျေးကောင်းရရှိလျက်ရှိပါသည်။ ဒူးရင်းသီးပေါ်ချိန်တွင် ကျောက်ကြီးဒူးရင်းသီးသည် နာမည်တစ်လုံးဖြင့် ရပ်တည်ခဲ့သည်မှာလည်း ဆယ်စုနှစ်တစ်ခုရှိနေပြီး ဖြစ်ပါသည်။ ကျောက်ကြီး ဒူးရင်းသီးတွင် ကိုင်းဆတ်သီး၊ ပင်ပျိုသီး၊ ကျောက်စိမ်းသီးဟူ၍ အမျိုးစားအလိုက်ရှိပါသည်။ ဒူးရင်းသီး ပေါ်ချိန်ကာလတွင် ကျောက်ကြီးဒူးရင်းသီးသည် တစ်ခြားနယ်များမှ ထွက်ရှိသည့် ဒူးရင်းသီးများနှင့် မတူဘဲ တစ်မူထူးခြားကာ အစေ့သေး၍ အသားထူပြီး အရသာမှာအထူးကောင်းမွန်သည့် အထဲတွင် ပါဝင်ပါသည်။

    ယခင်နှစ်ကဒူးရင်းသီးစျေးမြင့်တက်လျက် ရှိသော်လည်း ယခုနှစ်လောက်စျေးကောင်းမရရှိခဲ့ပါ။ ယခုနှစ်တွင် ကျောက်ကြီးဒူးရင်း အသေး‌တစ်လုံးလျှင် ၅၀၀၀မှ ၇၀၀၀ကျပ်ထိ ရရှိနေပြီး အကြီး၊ အလတ် အရွယ်စားအလိုက် စျေးကောင်းရရှိနေကာ ဒူးရင်းသီးများ လှိုင်လှိုင်ပေါ်လျက်ရှိပါသည်။ စျေးကွက်အနေဖြင့် ကျောက်ကြီးဒူးရင်းသီးများကို ဒေသတွင်းသာမက အခြားပြည်နယ်/ တိုင်းဒေသကြီးများသို့လည်း ဖြန့်ဖြူးရောင်းချမှုရှိနေကြောင်း သိရပါသည်။

DOCA(ပဲခူး)

      ပခုက္ကူမြို့သည် စပါးစိုက်ဧကနည်းပြီး ဆန်လိုအပ်ရာဒေသဖြစ်သောကြောင့် အခြားတိုင်းဒေသများနှင့် မြို့နယ်များမှ ဆန်တင်သွင်းရသောမြို့ဖြစ်ပါသည်။ ပခုက္ကူမြို့သို့ ပုသိမ်၊ မြောင်းမြမြို့များမှလည်းကောင်း၊ ရွှေဘိုခရိုင်မှလည်းကောင်း၊ ဆင်ဖြူကျွန်း၊ စလင်း၊ ပွင့်ဖြူဒေသများမှလည်းကောင်း နေ့စဉ်ဝင်ရောက်လျက်ရှိပါသည်။

      လူအများစားသုံးသောဆန်ဖြစ်သည့် ဧရာပဒေသာဆန်မှာ ၂၀၂၃ခုနှစ်၊ မေလ(ဒုတိယပတ်)တွင် မြောင်းမြဧရာပဒေသာတစ်အိတ်လျှင် ကျပ်(၇၄၀၀၀)၊ စလင်းမြို့နယ်၊ ပွင့်ဖြူမြို့နယ်၊ ကုန်းဇောင်းနှင့် ရှောက်တောမှလာသော ဧရာပဒေသာတစ်အိတ်လျှင် ကျပ်(၉၀၀၀၀)၊ ဧည့်မထဆန်ဈေးမှာ တစ်အိတ်လျှင် ကျပ်(၆၇၀၀၀-၇၀၀၀၀)၊ မနောသုခဆန်တစ်အိတ်လျှင် ကျပ်(၇၁၀၀၀)၊ ဧရာမင်းဆန်တစ်အိတ်လျှင် ကျပ်(၉၈၀၀၀)၊ ဝန်ကြီးပဒေသာဆန်တစ်အိတ်လျှင် ကျပ်(၉၇၀၀၀)၊ မနောဖြူဆန်တစ်အိတ်လျှင် ကျပ်(၇၁၀၀၀)စသည့်ဈေးနှုန်းများဖြင့် အရောင်းအဝယ်ဖြစ်လျက်ရှိပါသည်။

    ပေါ်ဆန်းမွှေးမှာ ဒုတိယအများဆုံးစားသုံးသောဆန်ဖြစ်ပြီး မြောင်းမြဒေသမှ ဝင်ရောက်သကဲ့သို့ ရွှေဘိုဒေသမှလည်း အများဆုံးဝင်ရောက်ပါသည်။ ရွှေဘိုပေါ်ဆန်းမွှေးမှာ ပိုမိုအရည်အသွေးကောင်းမွန်ပြီး ပထမအပတ်တွင် တစ်အိတ်လျှင် ကျပ်(၈၅၀၀၀ - ၉၀၀၀၀)မှ ယခုမေလ(ဒုတိယပတ်)တွင် ကျပ်(၁၀၅၀၀၀)ထိဈေးတက်လာခဲ့ပါသည်။ မြောင်းမြပေါ်ဆန်းမှာ တစ်အိတ်လျှင် ကျပ်(၈၃၀၀၀ - ၈၅၀၀၀)မှ ကျပ်(၈၇၀၀၀ - ၉၅၀၀၀)ထိဈေးနှုန်းများမြင့်တက်ခဲ့ကြောင်း သိရှိရပါသည်။

DOCA(မကွေး)

     ပဲခူးတိုင်းဒေသကြီး၊ တောင်ငူမြို့ရှိ ပေါင်းလောင်းတိန်ကျေးရွာတွင် ပဲတောင့်ရှည်များ စိုက်ပျိုးထားကြပါသည်။ ထိုကျေးရွာတွင် နွေစပါးနှင့်မတ်ပဲတင်မကဘဲ အသီးအရွက်များစွာကိုလည်း တစ်ရွာလုံး နီးပါး စိုက်ပျိုးကြပါသည်။ ထိုသို့ စိုက်ပျိုးကြသည့်သီးနှံများတွင် ယခုအချိန်စျေးကွက်တွင် စျေးကောင်ရရှိနေသည့် ပဲတောင့်ရှည်များကိုလည်း စိုက်ပျိုးထားကြပါသည်။ ပဲတောင့်ရှည်ကို စိုက်ပျိုးမည်ဆိုလျှင် တစ်ဧကလျှင် ပဲမျိုးစေ့(၂၅)ထုပ် စိုက်ပျိုးရပါသည်။ ထိုင်းပဲမျိုးစေ့(၁)ထုပ်လျှင် ပဲစေ့ အစေ့(၆၀၀)ခန့် ပါရှိပါသည်။ ပဲတောင့်ရှည်ကို (၁)ဧကစိုက်မည်ဆိုပါက ထို(၁)ဧကလုံးအား ပေါက်တူးဖြင့် ကျင်းများ ပေါက်ပေးရပါသည်။ ထိုကျင်း(၁)ကျင်းနှင့် (၁)ကျင်းအား တစ်လက်မ စီခြားပြီး (၁)ကျင်းလျှင် ပဲမျိုးစေ့(၂)စေ့ထည့်၍ မြေကြီးပြန်အုပ်ပေးရပါသည်။ စိုက်ပြီးနောက်နေ့တွင် ရေတင်၍ ပဲစေ့လေးများ အညှောင့်ထွက်ပြီး အညွန့်များထွက်လာလျှင် ထိုကျင်း(၁)ကျင်းတွင် ပဲတိုင် ထောင်ဝါး(၁)‌ချောင်းစီ ထောင်ပေးရပါသည်။ အညွန့်များရှည်လာလျှင် ထိုဝါးတွင် အညွန့်ကို ရစ်ပတ်‌ပေးရပါသည်။ ထို့နောက် ပိုးမွှားအန္တရာယ်များမှ ကင်းဝေးရန်နှင့် အသီးများလှပစေရန် အသီးအားဆေး ဖျန်းပေးရပါသည်။ ထိုနောက်စိုက်ပျိုးပြီး(၂)လအကြာတွင် ခူးရောင်းရပါသည်။ ယခု အချိန်တွင် ပဲတောင့်ရှည်သည် အတောင့်၅၀စည်း (၁)စည်းလျှင် (၁၅၀၀) ကျပ်နှုန်းဖြင့် တောင်ငူမြို့ ညောင်ပင်လေးစျေးတွင် လက်ကားရောင်းချကြောင်း သိရှိရပါသည်။  တစ်ကြိမ်ခူးလျှင် ပျမ်းမျှအားဖြင့်  အတောင့်(၅၀)စည်း အစည်း(၁၀၀၀)ခန့် ထွက်ရှိသည်ဟု သိရပါသည်။ ထိုပဲတောင့်ရှည်အား (၂)ရက်ခြား (၁)ကြိမ်ခူးရပါသည်။ပဲတောင့်ရှည် တစ်ဧက စိုက်ပျိုးလျှင် ကုန်ကျစရိတ်အနေဖြင့် ၁၅ သိန်းခန့် ကုန်ကျပြီး အသားတင်အကျိုးအမြတ်အားဖြင့် (၂၀)သိန်းခန့် ရရှိကြောင်း သိရှိရသည်။ ယခင်နှစ်များ၌ တွင်ကျယ်စွာစိုက်ပျိုးကြသော်လည်း ယခုနှစ်ကဲ့သို့‌ စျေးကောင်းမရပါ။ ထို့ကြောင့် ယခုအချိန်အခါတွင် ပဲတောင့်ရှည်များအား တွင်ကျယ်စွာ စိုက်ပျိုးနေကြပါသည်။ ဖြန့်ဖြူးမှုအနေဖြင့် တောင်ငူ ပဲတောင့်ရှည်ကို တောင်ငူမြို့တွင်းသာမက ရန်ကုန် ၊ ပဲခူးနယ်များသို့လည်း ရောင်းချဖြန့်ဖြူးလျက်ရှိကြောင်း သိရှိရပါသည်။

DOCA(ပဲခူး)

    တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။