ပြည်တွင်းကုန်သွယ်မှုသတင်း

    မြန်မာနိုင်ငံစက်သုံးဆီတင်သွင်း/သိုလှောင်/ဖြန့်ဖြူးခြင်းလုပ်ငန်းကြီးကြပ်ရေးကော်မတီက တိုင်းဒေသကြီး/ပြည်နယ်အလိုက် မြို့ကြီးများ၏စက်သုံးဆီရည်ညွှန်းလက်ကားဈေးနှုန်းများအား နေ့စဉ် ထုတ်ပြန်ပေးလျက်ရှိပါသည်။

      မကွေးမြို့ပေါ်၌ စက်သုံးဆီဆိုင်(၂၁)ဆိုင်ရှိရာ ပုံမှန်ဖွင့်လှစ်ရောင်းချလျက်ရှိကြပြီး ၂၀၂၃ခုနှစ်၊ ဧပြီလ၊ စတုတ္ထအပတ်နှင့် မေလ၊ ပထမအပတ်တို့၌ စက်သုံးဆီစျေးနှုန်းများမှာ ဓာတ်ဆီ (92) (၁)လီတာလျှင် ယခင်အပတ်တွင် ကျပ်(၁၉၂၅)ဖြစ်ခဲ့ပြီး ယခုအပတ်တွင်လည်း ကျပ်(၁၉၂၅)၊ ဒီဇယ်(ရိုးရိုး) (၁)လီတာလျှင် ယခင်အပတ်တွင် ကျပ်(၁၈၅၅)ဖြစ်ခဲ့ပြီး ယခုအပတ်တွင် ကျပ်(၁၈၈၀)ဖြစ်၍ ကျပ်(၂၅)စျေးမြင့်လာခဲ့ကြောင်း၊ ဒီဇယ်(ပရီမီယမ်) (၁)လီတာလျှင် ယခင်အပတ်တွင် ကျပ်(၁၉၃၅)ဖြစ်ခဲ့ပြီး ယခုအပတ်တွင် ကျပ်(၁၉၆၀)ဖြစ်၍ ကျပ်(၂၅)စျေးမြင့်လာခဲ့ကြောင်း၊ ဓာတ်ဆီ (၉၅) (၁)လီတာလျှင် ယခင်အပတ်တွင် ကျပ်(၁၉၉၅)ဖြစ်ခဲ့ပြီး ယခုအပတ်တွင် ကျပ်(၂၀၁၅)ဖြစ်၍ ကျပ်(၂၀)ခန့် စျေးနှုန်းအသီးသီးတက်လာကြောင်း စက်သုံးဆီအရောင်းဆိုင်များမှ သိရှိရပါသည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်အတွင်း ယခုနှစ် နွေရာသီကာလ၌ စားသုံးဆီဖူလုံရေးအတွက် မင်းဘူးမြို့နယ်တွင် (၁၂၈၅၉) ဧက၊ ပွင့်ဖြူမြို့နယ်တွင် (၄၈၀၇၈) ဧက၊ ငဖဲမြို့နယ်တွင် (၇၇၅) ဧက၊ စလင်းမြို့နယ်တွင် (၂၈၈၄) ဧက၊ စေတုတ္တရာမြို့နယ်တွင် (၆၄၄) ဧက၊ စုစုပေါင်းနွေနှမ်းစိုက်ဧကပေါင်း (၉၁၂၀၂) ဧကစိုက်ပျိုးနိုင်ခဲ့ကြောင်း စိုက်ပျိုးရေးဦးစီးဌာနမှ သိရှိရပါသည်။

     နွေနှမ်းစိုက်ပျိုးနိုင်ရန် စိုက်ပျိုးရေများကို ဆည်/တမံရေ/လျှပ်စစ်မြစ်ရေတင်/မြေအောက်ရေတို့ဖြင့် စိုက်ပျိုးကြပြီး အပူဒဏ်ခံနိုင်ရည်ရှိသောနှမ်းမျိုးများဖြစ်သည့် စမုံနက်နှမ်းမျိုး၊ ဆင်းရတနာ (၃) နှမ်းမျိုးများကို အဓိကစိုက်ပျိုးကြကြောင်း၊ အပူချိန်ပြင်းထန်သည့်အတွက် တောင်သူအများစုသည် စိုက်ပျိုးရေလိုအပ်ချက်နည်းပြီး ရက်တိုတိုနှင့်စိုက်ပျိုး၍ အထွက်နှုန်းကောင်းသည့်နှမ်းမျိုးများကိုစိုက်ပျိုးကြကြောင်း၊ နွေစပါး(၁)ဧကစိုက်ပျိုးရေလိုအပ်ချက်သည် နွေနှမ်း(၃)ဧကစိုက်ပျိုးရေလိုအပ်ချက်နှင့်တူညီမှုရှိကြောင်း၊ ယခင်နှစ်တွင် နွေစပါးကိုအဓိကစိုက်ပျိုးကြပြီး ယခုနှစ်တွင် စိုက်ပျိုးစရိတ်သက်သာပြီး ဈေးကောင်းရရှိသည့်နွေနှမ်းသီးနှံကို ပြောင်းလဲစိုက်ပျိုးကြကြောင်း၊ ဧပြီလဆန်းပိုင်းတွင် စတင်စိုက်ပျိုးပြီး ဇူလိုင်လတွင် ရိတ်သိမ်းသွားမည်ဖြစ်ကြောင်း၊ နှမ်း(၁)ဧက စိုက်ပျိုးလျှင် နှမ်းမျိုးစေ့ (၃) ပြည်ကြဲပက်စိုက်ပျိုးရပြီး နှမ်း(၁)ဧကတွင် (၁၅ မှ ၂၀) တင်းအထိထွက်ရှိကြောင်း၊ (၁)ဧကကုန်ကျစရိတ်အနေဖြင့် ကျပ်(၂၀၀၀၀၀) ခန့်ကုန်ကျပါကြောင်း နွေနှမ်းစိုက်တောင်သူတစ်ဦး၏ပြောကြားချက်အရ သိရှိရပါသည်။

DOCA(မကွေး)

   မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်ရှိကျေးရွာများ၌ သရက်သီးများလှိုင်လှိုင်ပေါ်ချိန်ဖြစ်၍ သရက်ချဉ်လုပ်ငန်းကို အိမ်တွင်းစီးပွားရေးလုပ်ငန်းအနေဖြင့်လုပ်ကိုင်ကာ မိသားစုစားဝတ်နေရေးအဆင်ပြေလျက်ရှိကြောင်း သိရှိရပါသည်။

     ယခုနှစ်တွင် သရက်သီးစိမ်းများကို အလုံး(၁၀၀)လျှင် ကျပ်(၂၀၀၀ မှ၂၅၀၀)ဖြင့်ဝယ်ယူရပါကြောင်း၊ ပထမဦးစွာ သရက်ချဉ်ပြုလုပ်ရန် သရက်သီးကိုဂျစ်နှင့်ခြစ်ရပြီး အချဉ်ထည့်ရကြောင်း၊ သရက်သီးဂျစ်ခြစ်ခအနေဖြင့် သရက်သီးစိမ်း(၁)တင်းလျှင် လုပ်အားခ ကျပ်(၃၀၀၀ မှ ၃၅၀၀)ထိပေးရကြောင်း၊ အလုပ်သမားတစ်ဦးလျှင် သရက်သီး (၅)တင်းမှ (၇)တင်းထိခြစ်နိုင်ကြောင်း၊ ဂျစ်ခြစ်ထားသောသရက်သီးအသားများကို ရေနှင့်ဆေးကြောပြီး ဆားရည်ဖြင့် (၂)ရက်ခန့်စိမ်ထားရကြောင်း၊ ထို့နောက် သရက်သီးအသားများကိုဆားရည်စိမ်ပြီး ဆယ်ယူရေစစ်၍ ပိဿာ(၅၀)ဆံ့ စဉ့်အိုးကြီးများနှင့် ထည့်သိပ်ထားရကြောင်း၊ သိပ်ထားပြီး ရက်(၃၀)အကြာတွင် ဖော်ကာရောင်းချနိုင်ပါကြောင်း၊ လက်ရှိအချိန်တွင် သရက်ချဉ်(၁)ပိဿာလျှင် ကျပ်(၆၀၀၀)ခန့်ရောင်းချရပါကြောင်း၊ သရက်ချဉ်လုပ်ငန်းလုပ်ကိုင်သူတစ်ဦးလျှင် ပိဿာ(၅၀)ဆံ့ စဉ့်အိုးကြီးများဖြင့် စဉ့်အိုးအလုံး(၅၀ မှ ၁၀၀)ဝန်းကျင်အထိ အချဉ်ထည့်ထားပြီး‌ရောင်းချရပါကြောင်း၊ ဝါတွင်းကာလအလှူပွဲများတွင် ပိုမိုရောင်းချရပြီး အဆင်ပြေလျက်ရှိကြောင်း ရှောက်တောကျေးရွာနေ သရက်ချဉ်လုပ်ငန်းလုပ်ကိုင်သူတစ်ဦးထံမှ သိရှိရပါသည်။

          ပွင့်ဖြူမြို့နယ်သည် မြေဩဇာထက်သန်ပြီး ရေမြေရာသီဥတုကောင်းမွန်၍ ဥယျာဉ်ခြံမြေများတွင် သရက်ပင်များပေါများပေါက်ရောက်သည့်အတွက် သရက်သီးလှိုင်လှိုင်ပေါ်ချိန်ကာလများ၌ သရက်ချဉ်လုပ်ငန်းလုပ်ကိုင်ကြပြီး မကွေး၊ မင်းဘူး၊ ရန်ကုန်၊ မန္တလေး၊ နေပြည်တော်မြို့ကြီးများထိ တင်ပို့ရောင်းချလျက်ရှိသောကြောင့် ဒေသတွင်း အလုပ်အကိုင်အခွင့်အလမ်းများဖန်တီးပေးလျက်ရှိပါကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်အတွင်း မြေအောက်ရေဖြင့်စိုက်ပျိုးသော တိုင်ထောင်ခရမ်းချဉ်သီးများမှာ အထွက်နှုန်းကောင်းပြီး ဈေးကောင်းရရှိနေကြောင်း ခရမ်းချဉ်သီးစိုက်ပျိုးသောတောင်သူတစ်ဦးထံမှ သိရှိရပါသည်။

   တိုင်ထောင်ခရမ်းချဉ်သီးမျိုးကို အပင်(၅၀၀၀)စိုက်ပျိုးထားရှိပြီး (၂)ရက်လျှင် တစ်ကြိမ်ခူးဆွတ်ရ၍ တစ်ကြိမ်လျှင် ပိဿာ(၂၀၀)ခန့်ခူးဆွတ်ရကြောင်း၊ ဆောင်းရာသီခရမ်းချဉ်သီးပေါ်စတွင် (၁)ပိဿာလျှင် ကျပ်(၈၀၀ မှ ၁၀၀၀)ထိ‌ဈေးရရှိခဲ့ပြီး ခရမ်ချဉ်သီးလှိုင်လှိုင်ထွက်ရှိချိန်တွင် (၁)ပိဿာလျှင် ကျပ်(၄၀၀ မှ ၅၀၀)ဝန်းကျင်သာဈေးရှိခဲ့၍ အကျိုးအမြတ်ရရှိမှုနည်းခဲ့ကြောင်း၊ ယခုနွေရာသီကာလတွင် မြေအောက်ရေဖြင့်ရေသွင်း၍ စိုက်ပျိုးသောခရမ်းချဉ်သီးများထွက်ရှိချိန်တွင် (၁)ပိဿာလျှင် (၁၃၀၀ မှ ၁၅၀၀)ထိရောင်းချရကြောင်း၊ ထွက်ရှိသောခရမ်းချဉ်သီးများကို ပွဲရုံများတွင် ဖောက်သည်ပေးရပြီး အလုံးကြီး(၁)ပိဿာလျှင် ကျပ်(၁၅၀၀)နှင့် အလုံးသေး(၁)ပိဿာလျှင် ကျပ်(၁၃၀၀)ဖြင့်ရောင်းချရကြောင်း၊ နွေကာလတွင်  ရှမ်းပြည်နယ်မှ ခရမ်းချဉ်သီးအဝင်နည်း၍ ဒေသစုံစိုက်ပျိုးမှုနည်းသည့်အတွက် ယခုနှစ်သီးနှံထွက်ရှိချိန်၌ ခရမ်းချဉ်သီးစိုက်ပျိုးသောတောင်သူများမှာ ဈေးကောင်းရ၍ အဆင်ပြေလျက်ရှိကြောင်း ရေမြက်ကျေးရွာနေ ခရမ်းချဉ်သီးစိုက်တောင်သူတစ်ဦးထံမှ သိရှိရပါသည်။

DOCA(မကွေး)

    ရှေးယခင်မှ ယခုတိုင် နွေရာသီကာလရောက်ပြီဆိုလျှင် သောက်ရေအိုးအသစ်လေးများကိုဝယ်ယူသောက်သုံးကြကာ သောက်ရေအိုးလေးအား အေးမြစေရန် ရေစိုအဝတ်လေးပတ်ပြီး သောက်သုံးကြသည်မှာ ယနေ့တိုင် ကျေးရွာတော်တော်များများတွင် တွေ့မြင်နေရပြီး နေပူပူကပြန်လာပြီး  သောက်ရေအိုးလေးထဲမှ ရေအေးအေးလေးကို သောက်လိုက်ရခြင်းဖြင့် အမောများပြေစေနိုင်ပါသည်။

     မကွေးတိုင်းဒေသကြီး၊ အညာမြေဒေသ၌ နွေရာသီကာလအပူချိန်များပြင်းထန်နေသဖြင့် သောက်ရေအတွက် ရှေးယခင်ကပင်အသုံးပြုခဲ့သည့် သောက်ရေအိုး(မြေအိုး)လေးများအဝယ်လိုက်ကာ အရောင်းအဝယ်ကောင်းနေကြောင်းကို သောက်ရေအိုးရောင်းချသူများထံမှ သိရှိရပါသည်။ နွေရာသီကာလ၏ ယခုကဲ့သို့ နေ့အပူချိန်တွေပြင်းသည့်ကာလတွင် သောက်ရေအတွက် သောက်ရေအိုး(မြေအိုး)လေးများစွာရောင်းရပါကြောင်း၊  မိမိ၏ဆိုင်တွင် မင်းဘူးမြို့နယ်၊ ရွာသာယာ‌ကျေးရွာမှထွက်ရှိသောအိုးများနှင့် မကွေးမြို့နယ်၊ ကုက္ကိုလ်ခွကျေးရွာမှထွက်ရှိသည့်မြေအိုးများကို မှာယူရောင်းချလျက်ရှိပါကြောင်း၊ ၎င်းအိုးများအနက် မင်းဘူးမြို့နယ်၊ ရွာသာယာကျေးရွာမှထွက်ရှိသော သောက်ရေအိုး(မြေအိုး)မှာ ဒေသအကြိုက်အိုးဖြစ်ပါကြောင်း၊  ရွာသာယာကျေးရွာထွက် ပြာသိုအိုးမှာ ပြာသိုလ၌ ဖုတ်သည့်အိုးဖြစ်ပြီး တစ်နှစ်ပတ်လုံး အေးမြနေသည့်သောက်ရေအိုးမှာ ကျွန်တော်တို့ဒေသတွင်မူ နာမည်ကျော်မြေအိုးဖြစ်ပါကြောင်း၊ ထိုမြေအိုးများကို  နွေမတိုင်ခင် ကြိုတင်မှာယူပြီး သိုလှောင်ထားကာ ယခုချိန်၌ ပြန်လည်ရောင်းချရပါကြောင်း မင်းဘူးမြို့၊ သောက်ရေးအိုးအရောင်းဆိုင်ရှင်တစ်ဦးက ပြောကြားလာပါသည်။  

   မင်းဘူးမြို့နယ်၊ ရွာသာယာကျေးရွာထွက် သောက်‌ရေအိုး(မြေအိုး)ကျောက်အိုးကြီးတစ်လုံးလျှင် (၂၀၀၀)ကျပ်၊ ကျောက်အိုးလတ်တစ်လုံးလျှင် (၁၃၀၀)ကျပ်၊ ကျောက်အိုးသေးတစ်လုံးလျှင် (၇၀၀) ကျပ်ဖြင့် ရောင်းချလျက်ရှိပြီး မကွေးမြို့နယ်၊ ကုက္ကိုလ်ခွကျေးရွာထွက် သောက်ရေအိုးကြီးတစ်လုံးလျှင် (၂၆၀၀)ကျပ်၊ သောက်ရေအိုးလတ်တစ်လုံးလျှင် (၁၈၀၀)ကျပ်၊ သောက်ရေအိုးသေးတစ်လုံးလျှင် (၁၂၀၀)ကျပ်တို့ဖြင့် ရောင်းချနေပါကြောင်း၊  ရွာသာယာကျေးရွာထွက် သောက်ရေအိုးများသည် အိုးသားပါးပြီး ကျောက်အိုးလေးများဖြစ်သည့်အတွက် ယခုလိုနွေရာသီကာလဆိုလျှင် လွန်စွာအေးမြပါကြောင်း၊  ယခုရက်ပိုင်းတွေဆိုလျှင် တစ်ရက်ကို သောက်ရေအိုးအလုံး(၅၀)ကျော်လောက် ရောင်းချနေရပါကြောင်း သိရှိရပါသည်။

     နွေကာလရောက်ပြီဆိုလျှင် သောက်ရေအိုးလေးများကိုဝယ်ယူကာ အိုးသစ်နဲ့အိုးဟောင်းလဲလှယ်ပြီး သောက်သုံးကြကြောင်း၊ လယ်ထဲ၊ ယာထဲမှပြန်လာ၍ မောမောပန်းပန်းရှိချိန်၌ သောက်ရေအိုးလေးထဲမှ ရေ‌လေးသောက်လိုက်ရလျှင် အမောပြေစေကြောင်း၊ တောသူတောင်သားတို့အနေဖြင့် လယ်ထဲ၊ ယာထဲသို့အလုပ်သွားလျှင် သောက်ရေအိုးလေးကို ရေစိုအဝတ်နှင့်ပတ်ပြီးသယ်သွားကြကြောင်း၊ နွေရာသီကာလဆိုလျှင် တောသူ/တောင်သားများအဖို့  ရေအိုးထဲမှ ရေအေးအေးလေးကိုထန်းလျက်လေးနှင့်တွဲ၍သောက်သုံးခြင်းဖြင့် ဘဝအမော၊ သောကအမောများပြေပျောက်သွားစေပါကြောင်း၊ သဘာဝမြေအိုးထဲမှရေသည် အေးမြစေသည့်ရေဖြစ်၍ ရေခဲသေတ္တာထဲမှ ရေထက်ဘေးကင်း၍ အမောပန်းများပြေစေပါကြောင်း သိရှိရပါသည်။