ပြည်တွင်းကုန်သွယ်မှုသတင်း

     ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်(၁၄)ဆိုင်ဖွင့်လှစ်ရောင်းချလျက်ရှိပြီး စက်သုံးဆီဈေးနှုန်းများသည် ယခင်ဧပြီလထက် ဈေးနှုန်းများဆက်လက်လက်ကျဆင်းလျက်ရှိရား စက်သုံးဆီလက်လီဈေးနှုန်းများမှာ ယခင်ဧပြီလ(စတုတ္ထပတ်)အတွင်း ဒီဇယ်(ရိုးရိုး)တစ်လီတာလျှင် (၂၀၇၅) ကျပ်၊ ဒီဇယ်(ပရီမီယမ်)တစ်လီတာလျှင် (၂၁၅၅) ကျပ်၊ ဓာတ်ဆီ(92)တစ်လီတာလျှင် (၂၁၃၅) ကျပ်၊ ဓာတ်ဆီ(95)တစ်လီတာလျှင် (၂၂၃၀) ကျပ်တို့ဖြင့် ရောင်းချလျက်ရှိပါသည်။ ရှိပြီး ယခုမေလ ၂၀၂၃ခုနှစ်၊ (ဒုတိယပတ်)အတွင်း ဒီဇယ်(ရိုးရိုး)တစ်လီတာလျှင် (၁၉၂၀) ကျပ်၊ ဒီဇယ်(ပရီမီယမ်)တစ်လီတာလျှင် (၂၀၀၀) ကျပ်၊ ဓာတ်ဆီ(92)တစ်လီတာလျှင် (၁၉၇၀) ကျပ်၊ ဓာတ်ဆီ(95) တစ်လီတာလျှင် (၂၀၅၅) ကျပ်တို့ဖြင့် ရောင်းချလျက်ရှိပါသည်။

     ယခင်ဧပြီလ(စတုတ္ထပတ်)နှင့် ယခုမေလ(ဒုတိယပတ်)အတွင်း ဖြစ်ပေါ်နေသောစက်သုံးဆီဈေးနှုန်းများအား နှိုင်းယှဉ်ကြည့်လျှင် ဒီဇယ်(ရိုးရိုး)တစ်လီတာလျှင် (၁၅၅) ကျပ်၊ ဒီဇယ်(ပရီမီယမ်)တစ်လီတာလျှင် (၁၅၅) ကျပ်၊ ဓာတ်ဆီ(92)တစ်လီတာလျှင် (၁၆၅) ကျပ်နှင့် ဓာတ်ဆီ(95)တစ်လီတာလျှင် (၁၇၅) ကျပ်ခန့် ဈေးနှုန်းကျဆင်းလာကြောင်း စက်သုံးဆီအရောင်းဆိုင်တစ်ဆိုင်ထံမှ သိရှိရပါသည်။

DOCA(ကယား) 

    ကယားပြည်နယ်သည် စပါး၊ ပြောင်းနှင့် ဆီထွက်သီးနှံတို့အပြင် ပဲစင်းငုံသီးနှံကိုလည်း အနည်းငယ်စိုက်ပျိုးကြပါသည်။ (၂၀၂၂-၂၀၂၃) ခုနှစ်၊ ပြည်နယ်အတွင်း ပဲစင်းငုံစိုက်ဧကမှာ (၄၅၉၆)ဧက၊ ရိတ်ဧက(၄၅၉၆)ဧက၊ တစ်ဧကအထွက်နှုန်းမှာ(၁၃)တင်းခန့်နှင့် စုစုပေါင်းအထွက်နှုန်းမှာ (၆၁၀၅၈)တင်းထွက်ရှိကြောင်း သက်ဆိုင်ရာဌာနစာရင်းအရ သိရှိရပါသည်။

 ၂၀၂၃ခုနှစ်၊ မေလ(ဒုတိယပတ်)အတွင်းဖြစ်ပေါ်နေသောပဲစင်းငုံဈေးနှုန်းမှာ တစ်ပိဿာလျှင် (၃၅၀၀)ကျပ် တစ်တင်းလျှင် (၇၀၀၀၀)ကျပ်ခန့်ဖြင့် အရောင်းအဝယ်ဖြစ်လျက်ရှိပါကြောင်း၊ ပဲစင်းငုံဈေးနှုန်းသည် ယခင်နှစ်များထက် ဈေးနှုန်းမြင့်လာသော်လည်း စိုက်ပျိုးထုတ်လုပ်သည့်တောင်သူများသည် ဒေသအခြေအနေအရ ယခင်နှစ်များထက် စိုက်ပျိုးထုတ်လုပ်မှုပို၍လျော့နည်းလာလျက်ရှိပါကြောင်း ပဲမျိုးစုံရောင်းဝယ်သူတစ်ဦးထံမှ သိရှိရပါသည်။

DOCA(ကယား)

    ပဲခူးတိုင်းဒေသကြီး၊ တောင်ငူမြို့တွင် ဧပြီလ(နောက်ဆုံးပတ်)က 92 RON တစ်လီတာလျှင် ၂၀၉၀ကျပ်၊ 95 RON တစ်လီတာလျှင် ၂၁၈၀ကျပ်၊ ဒီဇယ်တစ်လီတာလျှင် ၂၀၂၅ကျပ်နှင့် ပရီမီယံဒီဇယ်တစ်လီတာလျှင် ၂၁၀၀ကျပ်တို့ရှိခဲ့ပါသည်။     

     ယခုအပတ်တွင် 92 RON တစ်လီတာလျှင် ၁၉၂၀ကျပ်၊ 95 RON တစ်လီတာလျှင် ၂၀၁၀ကျပ်၊ ဒီဇယ်တစ်လီတာလျှင် ၁၈၇၀ကျပ်နှင့် ပရီမီယံဒီဇယ်တစ်လီတာလျှင် ၁၉၅၀ကျပ်တို့ရှိခဲ့ပါသည်။

     သို့ဖြစ်ပါ၍ 92 RON မှာ ဧပြီလကုန်ပိုင်းကထက် တစ်လီတာလျှင် ၁၇၀ကျပ်၊ 95 RON မှာ ဧပြီလကုန်ပိုင်းကထက် တစ်လီတာလျှင် ၁၇၀ကျပ်၊ ဒီဇယ်မှာ ဧပြီလကုန်ပိုင်းကထက် တစ်လီတာလျှင် ၁၅၅ကျပ်နှင့် ပရီမီယံဒီဇယ်တစ်လီတာလျှင် ၁၅၀ကျပ်ကျဆင်းနေကြောင်း သိရှိရပါသည်။

DOCA(ပဲခူး)

  တောင်ငူမြို့၊ ညောင်ပင်လေးဈေးရှိ ဟင်းသီးဟင်းရွက်ဈေးတွင် ငရုတ်သီးစိမ်း(မိုးထောင်သီး)တစ်ပိဿာလျှင် ၄၀၀၀ကျပ်မှ ၄၅၀၀ကျပ်အထိ၊ ကုလားအော်သီးစိမ်းတစ်ပိဿာလျှင် ၇၅၀၀ကျပ်မှ ၈၀၀၀ကျပ်အထိဖြင့် ဈေးတက်ပါသည်။ ခရမ်းသီးဖြူတစ်ပိဿာလျှင် ၅၅၀ကျပ်မှ ၆၀၀ကျပ်အထိ၊ ခရမ်းသီးညိုတစ်ပိဿာလျှင် ၁၃၀၀ကျပ်မှ ၁၅၀၀ကျပ်အထိ၊ ဒေသသခွားသီးတစ်ပိဿာလျှင် ၇၀၀ကျပ်မှ ၁၀၀၀ကျပ်အထိနှင့် ရှမ်းပြည်သခွားသီးတစ်ပိဿာလျှင် ၁၂၀၀ကျပ်တို့ဖြင့် ဈေးနှုန်းတည်ငြိမ်နေပါသည်။

      ခရမ်းချဉ်သီးမှာ ၂၀၂၃ခုနှစ်၊ ဧပြီလကုန်ပိုင်းက တစ်ပိဿာလျှင် ၁၈၀၀ကျပ်မှ ၂၂၀၀ကျပ်အထိရှိရာမှ ယခုမေလဆန်းပိုင်းတွင် တစ်ပိဿာလျှင် ၁၃၀၀ကျပ်မှ ၁၅၀၀ကျပ်အထိ၊ ဂေါ်ဖီမှာ ဧပြီလကုန်ပိုင်းက တစ်ပိဿာလျှင် ၂၅၀၀ကျပ်မှ ၂၈၀၀ကျပ်အထိရှိရာမှ ယခုအပတ်တွင် တစ်ပိဿာလျှင် ၁၆၀၀ကျပ်မှ ၁၈၀၀ကျပ်အထိ ဈေးနှုန်းကျဆင်းပါသည်။

     ဂေါ်ရခါးသီးမှာ ဧပြီလကုန်ပိုင်းက တစ်လုံးလျှင် ၁၈၀ကျပ်မှ ၂၀၀ကျပ်အထိရှိရာမှ ယခုအပတ်တွင် တစ်လုံးလျှင် ၂၀၀ကျပ်မှ ၂၅၀ကျပ်အထိ ဈေးနှုန်းအနည်းငယ်မြင့်တက်ပါသည်။ ပြောင်းဖူးမှာ ဧပြီလကုန်ပိုင်းက အကြီးတစ်ဖူးလျှင် ၂၅၀ကျပ်၊ အသေးတစ်ဖူးလျှင် ၁၅၀ကျပ်ရှိရာမှ ယခုအပတ်တွင် အကြီးတစ်ဖူးလျှင် ၁၈၀ကျပ်မှ ၂၀၀ ကျပ်အထိ၊ အသေးတစ်ဖူးလျှင် ၁၃၀ကျပ်မှ ၁၅၀ကျပ်အထိ ဈေးနှုန်းကျဆင်းပါသည်။

   နံနံပင်မှာ ဧပြီလကုန်ပိုင်းက တစ်ဆယ်ကျပ်သားလျှင် ၃၀၀ကျပ်ရှိရာမှ ယခုအပတ်တွင် တစ်ဆယ်ကျပ်သားလျှင် ၄၀၀ကျပ်အထိမြင့်တက်ပါသည်။ ကန်စွန်းရွက်တစ်စည်းလျှင် ၁၀၀ကျပ်ဖြင့်ရောင်းချပြီး ၁၀စည်းယူလျှင် ၇၀၀ကျပ်၊ ချဉ်ပေါင်ရွက်တစ်စည်းလျှင် ၁၀၀ကျပ်ဖြင့်ရောင်းချပြီး ၁၀စည်းဝယ်လျှင် ၆၀၀ကျပ်ဖြင့်ရောင်းချကြောင်းနှင့် အရောင်းအဝယ်မှာ ပုံမှန်အတိုင်းရှိနေကြောင်း သိရှိရပါသည်။

DOCA(ပဲခူး)

    တောင်ငူခရိုင်၊ အုတ်တွင်းမြို့နယ်၊ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် ၁၃၂/၃၏အနောက်ဖက်တွင်ရှိသော စိန်တလုံးသရက်စိုက်ခင်းများမှာ အောင်မြင်ဖြစ်ထွန်းလျက်ရှိရာ ယခုအခါ အသီးများပေါ်နေပြီဖြစ်ပါသည်။

       စိန်တလုံးသရက်သီးမျိုးကို မန္တလေးတိုင်းဒေသကြီး၊ ကျောက်ဆည်မြို့နယ်၊ ဟန်မြင့်မိုရ်ရွာတွင် သွားရောက်ဝယ်ယူပြီး အပင်သက် ၅နှစ်တွင် အသီးစတင်သီးပါသည်။ အသီးသီးခါစက တစ်ပင်လျှင် အလုံး ၂၀မှ အလုံး ၃၀အထိသာသီးပြီး အပင်သက်တမ်းရင့်လျှင် အလုံး ၈၀မှ ၁၀၀အထိသီးပါသည်။

        အသီးတိုင်းကို အိတ်စွပ်ပေးရပါသည်။ ယခင်နှစ်က အစွပ်အိတ်တစ်အိတ်လျှင် ၄၅ကျပ်ပေးရပြီး ယခုနှစ်တွင် တစ်အိတ်လျှင် ၆၀ကျပ်ပေးရပါသည်။ ၎င်းသရက်ခြံမှထွက်ရှိသောသရက်သီးများကို ရန်ကုန်မြို့၊ သီရီမင်္ဂလာဈေးသို့ အဓိကတင်ပို့ရောင်းချပြီး တချို့ကို   ဒေသတွင်းဖြစ်သော တောင်ငူမြို့၊ အုတ်တွင်းမြို့၊ ဖြူးမြို့များရှိ သစ်သီးဆိုင်များသို့ တင်ပို့ရောင်းချပါသည်။

        ယခင်နှစ်က စိန်တလုံးသရက်သီးတစ်လုံးလျှင် အကြီး ၁၀၀၀ကျပ်၊ အလတ် ၇၀၀ကျပ်နှင့် အသေး ၅၀၀ကျပ်ရောင်းချရပြီး ယခုနှစ်တွင် စိန်တလုံးသရက်သီးအကြီးတစ်လုံးလျှင် ၁၂၀၀ကျပ်၊ အလတ်တစ်လုံးလျှင် ၈၀၀ကျပ်နှင့် အသေးတစ်လုံးလျှင် ၆၀၀ကျပ်တို့ဖြင့် ရောင်းချရကြောင်း သိရှိရပါသည်။

DOCA(ပဲခူး)