ပြည်တွင်းကုန်သွယ်မှုသတင်း

            မကွေးတိုင်း‌ဒေသကြီး၊ စားသုံးသူရေးရာဦးစီးဌာန၊ မကွေးခရိုင်၊ ဒု-ခရိုင်ဦးစီးမှူး ဦးမျိုးဝင်း (မကွေးမြို့နယ်တာဝန်ခံ) နှင့် ဦးလင်းကိုကိုဖြိုး (ရုံးအကူ) တို့သည် (၂၅.၇.၂၀၂၂) ရက်နေ့ နံနက် (၁၀း၀၀) အချိန်တွင် မကွေးကုန်စည်ဒိုင်၌ တောင်သူနှင့်ကုန်သည်များ၏ ဒေသထွက်ကောက်ပဲသီးနှံများ ရောင်းဝယ်ဖောက်ကားနေမှုကို သွားရောက်တွေ့ဆုံမေးမြန်းခဲ့ပါသည်။ ယခင်က တောင်သူတစ်ဦး ကုန်ပစ္စည်းရောင်းချင်လျှင် ပွဲရုံသို့သွား၍ စျေးစုံစမ်းပြီးမှ ရောင်းချရကြောင်း၊ အချိန်ကုန်၊ လူပင်ပန်းပြီး ယခုအခါ ကုန်စည်ဒိုင်တွင် စုဝေးရောင်းချနိုင်ပြီးဖြစ်သဖြင့်  စျေးနှုန်း၊ အလေးချိန်  စိတ်ချလာရပြီဖြစ်ကြောင်း၊ ကုန်စည်ဒိုင်တွင်  စျေးကွက်ပေါက်စျေးများအား  လေ့လာနိုင်ပါကြောင်း၊  မှန်ကန်သောစျေးနှုန်းများဖြင့်  ဝယ်ယူနိုင်အောင်  စီစဉ်ထားကြောင်းနှင့်  ယခင်နှစ်က Covid-19 ကပ်ရောဂါကြောင့်  ကျင်းပနိုင်ကြောင်း မကွေး ကုန်စည်ဒိုင်ဥက္ကဋ္ဌ ဦးကျော်ထွန်းမှ ပြောကြားခဲ့ပါသည်။

            ကုန်စည်ဒိုင်၌ ကုန်သည်များသည် ကောက်ပဲသီးနှံပစ္စည်းများကို စျေးနှုန်းနှင့်ရောင်းလိုသည့်အိတ်၊ အရေအတွက်များဖြင့် နမူနာများဖြင့် ခင်းကျင်းပြသထားပါသည်။ ယနေ့အရောင်းအဝယ်ဖြစ်သောကောက်ပဲသီးနှံများမှာ နှမ်း (၉၂၅) အိတ်၊  ကုလားပဲ (၃၀) အိတ်၊ ကုလားပဲ (929) (၃၅၀) အိတ်၊ ကုလားပဲ (HL) (၅၀၀) အိတ် ရောင်းချရကြောင်း သိရှိရပါသည်။ အရောင်းအဝယ်ဖြစ်သော နှမ်းမျိုးများမှာ ပွင့်ဖြူ၊ စလင်း၊ ဆင်ဖြူကျွန်းဒေသတို့မှ ထွက်ရှိသည့် ရေသွင်းနှမ်းမျိုးဖြစ်ကြောင်း သိရှိရပါသည်။

            ယနေ့ မကွေးကုန်စည်ဒိုင်၌ နှမ်းစျေးနှုန်းများမှာ နှမ်းနက်စမုံ (အဟောင်း) (၁) တင်းလျှင် (၆၄၉၅ဝိ/-)၊ နှမ်းဖြူ (အဟောင်း) (၁) တင်းလျှင် (၆၄၉၅ဝိ/-)၊ နှမ်းနီ (အညို) (၁) တင်းလျှင် (၆၄၅၀ဝိ/-)၊ နှမ်းဖြူ (ဂျပန်) (၁)တင်းလျှင် (၇၅၆၀ဝိ/-) ‌စျေးနှုန်းများရှိ‌ကြောင်းသိရှိရပါသည်။ နှမ်းများကိုဝယ်ယူရာတွင် အက်စစ်ဓာတ်တိုင်းတာခြင်းနှင့် အစိုဓာတ်များရှိ/ မရှိ ကြည့်ရှု၍ဝယ်ယူကြောင်း းသိရှိရပါသည်။ ယနေ့အရောင်းအဝယ်ပွဲကို ပွဲစားကုန်သည်လူဦးရေ (၅၀) ခန့် တက်ရောက်ကြောင်း သိရှိရပါသည်။

DOCA(မကွေး)

                ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်၊ အင်ငါးခွကျေးရွာအုပ်စု၊ အင်ငါးခွ ကျေးရွာတွင် မိုးမြေပဲများစတင်စိုက်ပျိုးနေပြီဖြစ်သဖြင့် မိုးမြေပဲများစိုက်ပျိုးသူ တောင်သူနှင့် တွေ့ဆုံ၍ ကွင်းဆင်း လေ့လာခဲ့ပါသည်။

          စားသုံးသူရေးရာဦးစီးဌာန၊ ပြည်ခရိုင်၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် ဝန်ထမ်းများသည် (၂၀.၇.၂၀၂၂)ရက်နေ့ နံနက် (၁၀:၀၀) အချိန်တွင် ပေါက်ခေါင်းမြို့နယ်၊ အင်ငါးခွကျေးရွာအုပ်စု၊ အင်ငါးခွကျေးရွာရှိ မိုးမြေပဲစိုက်ပျိုးသူတောင်သူ ဦးတင်ဇော်မျိုးနှင့် တွေ့ဆုံ၍ မေးမြန်းရာ ပေါက်ခေါင်းမြို့နယ်အနေဖြင့် မိုးမြေပဲစိုက်ပျိုးဧက (၁၅၃၃၄) ဧကစိုက်ပျိုးပြီး ဖြစ်ပါသည်။ အဆိုပါတောင်သူမှ မိုးမြေပဲ (၅)ဧကကို မေလဒုတိယပတ်တွင် စတင်စိုက်ပျိုးပြီး စိုက်ပျိုးပြီး ရက်၉၀/၁၀၀ အကြာတွင် စတင်နှုတ်သိမ်းရမည်ဟု သိရပါသည်။ မိုးမြေပဲများ စိုက်ပျိုးရာတွင် တစ်ဧက လျှင် မြေပဲဆန်ဒေသမျိုး (၁၀)ပြည်နှုန်းဖြင့် စိုက်ပျိုးကြောင်း သိရပါသည်။ မျိုးမြေပဲဈေးနှုန်းများမှာ တစ်တင်းလျှင် (၆၅၀၀၀)ကျပ်ဖြင့် ဝယ်ယူ၍စိုက်ပျိုးရသည်ဟု သိရပါသည်။ ယခုနှစ် မိုးမြေပဲများ စိုက်ပျိုးရာတွင် သွင်းအားစုများဖြစ်သော မြေဩဇာနှင့် ပိုးသတ်ဆေး ဈေးနှုန်းများ မြင့်မား နေသည့်အတွက် တစ်ဧကကုန်ကျစရိတ်များမြင့်မည်ဟုသိရပါသည်။ မိုးမြေပဲများ မနှုတ်သိမ်းခင်အထိ တစ်ဧကကုန်ကျစရိတ်မှာ ခန့်မှန်းခြေ (၂၁၅၀၀၀)ကျပ်အထိ ကုန်ကျကြောင်း သိရပြီး၊ မြေပဲနှုတ်သိမ်းချိန်တွင် နှုတ်သိမ်း၊ ရိတ်သိမ်းခများထည့်လျှင် ဒီထက်မက ကုန်ကျစရိတ်များ မြင့်မားလာမည် ဖြစ်ကြောင်း သိရပါသည်။

             မိုးမြေပဲများ ထွက်ပေါ်ချိန်တွင် တစ်ဧကအထွက်များကောင်းပြီး၊ ဈေးနှုန်းများ ကောင်းမည် ဆိုပါက တောင်သူများအတွက် အကျိုးအမြတ်များ ပိုမိုရရှိမည်ဖြစ်ကြောင်း လေ့လာသိရှိရပါသည်။

DOCA(ပဲခူး)

                   တောင်ငူခရိုင် ဖြူးမြို့နယ်တွင် သီးမွှေးငှက်ပျော၊ ဖီးကြမ်းငှက်ပျောနှင့် ရခိုင်ငှက်ပျောများကို စိုက်ပျိုးကြရာတွင် ဈေးကွက်အတွင်း သီးမွှေးငှက်ပျောမှာ ဈေးကောင်းရလျှက်ရှိပါသည်။ ငှက်ပျောသီးကို စားသုံးမှုအတွက်သာမကဘဲ မြန်မာ့ယဉ်ကျေးမှုအရ ဘုရားပွဲ၊ နတ်ပွဲများတွင်လည်း အသုံးပြုကြ သဖြင့် ဈေးကွက်ခိုင်မာသော သစ်သီးဝလံတစ်မျိုးဖြစ်ပါသည်။

              ဖြူးမြို့နယ် အနောက်ပိုင်းရှိ ပဲခူးရိုးမတောင်ယာတွင်စိုက်ပျိုးသော သီးမွှေးငှက်ပျောသီးမှာ ဒေသတွင်းသာမက အခြားမြို့ရွာများအထိ နာမည်ရသော သစ်သီးဝလံတစ်မျိုးဖြစ်ပါသည်။ ဒေသခံများအနေဖြင့် အခြားဒေသမှမိတ်ဆွေ သင်္ဂဟများအား လက်ဆောင်ပေးရာတွင် သီးမွှေး ငှက်ပျောသီးမှာ မျက်နှာပန်းလှသော သီးနှံတစ်မျိုးဖြစ်ပါသည်။

              ဖြူးမြို့ပေါ်ရှိ ငှက်ပျောဆိုင်များတွင် ရောင်းချနေသော သီးမွှေးငှက်ပျောသီးဈေးနှုန်းမှာ အသေးတစ်ဖီးလျှင် ၁၅၀၀ ကျပ်၊ အလတ်တစ်ဖီးလျှင် ၂၀၀၀ ကျပ်နှင့် အကြီးတစ်ဖီးလျှင် ၂၅၀၀ ကျပ် အသီးသီးရှိကြောင်း ငှက်ပျောဆိုင်ပိုင်ရှင် ဒေါ်လှလှဝင်း၏ပြောပြချက်အရ သိရှိရပါသည်။

DOCA(ပဲခူး)

               မိတ္ထီလာခရိုင်အတွင်း ရာသီဥတုအခြေအနေကြောင့် နွေးစပါးစိုက်ပျိုးမှုမရှိဘဲ မိုးစပါးကိုသာ စိုက်ပျိုးသော်လည်း ဆန်စက်များအနေဖြင့် တစ်နှစ်ပတ်လုံး ကြိတ်ခွဲနိုင်ကြောင်းသိရသည်။ မိတ္ထီလာခရိုင်အတွင်း နှစ်စဉ်မိုးစပါး ဧက (၅) သောင်းကျော် စိုက်ပျိုးသော ဝမ်းတွင်းမြို့နယ်ရှိ ဆန်စက်များမှာ နဝလီ (အငှား) ကြိတ်ခွဲသည့် ဆန်စက်နည်းကြောင်း သိရသည်။ ဝမ်းတွင်းမြို့နယ်ရှိ ဆန်စက်အများစုမှာ ၎င်းတို့ ကြိတ်ခွဲရန်လိုအပ်သောစပါးကို ဝယ်ယူစုဆောင်းထားလေ့ရှိရာ ယခုအခါစပါးပေါက်စျေးအနေဖြင့် မိုးစပါးအဟောင်းတွင် မနောသုခမှာ တင် း(၁၀၀) လျှင် (၁၀) သိန်းကျပ်၊ ပဒေသာမှာ (၁၃) သိန်းကျပ်ရှိကြောင်းနှင့် ဆန်းစျေးမှာ မိုးဆန်အဟောင်းာ မနောသုခ တစ်အိတ်လျှင် (၃၆၀၀၀ )နှင့် ပဒေသာတစ်အိတ်လျှင် (၄၅၀၀၀မှ ၄၆၀၀၀) ရရှိကြောင်း သိရသည်။

DOCA(မန္တလေး)

            မကွေးတိုင်း‌ဒေသကြီး၊ စားသုံးသူရေးရာဦးစီးဌာန၊ မကွေးခရိုင်ဦးစီးမှူး ဒေါ်တင်တင်လှနှင့် ဦးလင်းကိုကိုဖြိုး(ရုံးအကူ)တို့သည် (၂၁.၇.၂၀၂၂)ရက်နေ့ နံနက်(၁၀:၃၀)အချိန်တွင် မကွေးကုန်စည်ဒိုင်၌ တောင်သူနှင့်ကုန်သည်များ၏ ဒေသထွက်ကောက်ပဲသီးနှံများ ရောင်းဝယ်ဖောက်ကားမှု အခြေအနေများအား ကွင်းဆင်းလေ့လာမေးမြန်းခဲ့ပါသည်။

ကွင်းဆင်းလေ့လာမေးမြန်းမှုအရ တောင်သူနှင့်ကုန်သည်များ၏ ဒေသထွက် ကောက်ပဲသီးနှံများကို  ဇူလိုင်လ(၂၁)ရက်နေ့မှ စတင်၍ ရောင်းဝယ်ဖောက်ကားဝယ်ယူနိုင်ကြောင်း၊ ယခင်က တောင်သူတစ်ဦး ကုန်ပစ္စည်းရောင်းမည်ဆိုလျှင် ပွဲရုံသို့သွား၍ စျေးစုံစမ်းပြီးမှ ရောင်းချရကြောင်း၊ အချိန်ကုန်၊ လူပင်ပန်းပြီး ယခုအခါ ကုန်စည်ဒိုင်တွင် စုဝေးရောင်းချနိုင်ပြီဖြစ်သဖြင့် စျေးနှုန်း၊ အလေးချိန် စိတ်ချလာရပြီဖြစ်ကြောင်း၊ ကုန်စည်ဒိုင်တွင် စျေးကွက်ပေါက်စျေးများအား လေ့လာနိုင်ကြောင်း၊ စံကတ္တားများဖြင့် မှန်ကန်သောစနစ်နှင့် ရေရှည်တည်တံ့အောင် ထိန်းကျောင်းပေးလျက်ရှိကြောင်း မကွေးတိုင်းကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဌ ဦးဖိုးနီ၏ ပြောကြားချက်အရ သိရှိရပါသည်။

          ကုန်စည်ဒိုင်၌ ကုန်သည်များသည် ကောက်ပဲသီးနှံပစ္စည်းများကို စျေးနှုန်းအိတ်၊ ပစ္စည်းပမာဏ အရေအတွက်များကို နမူနာများဖြင့် ခင်းကျင်းပြသထားပါသည်။ ယနေ့အရောင်း အဝယ်ဖြစ်သော သီးနှံမှာ နှမ်းဖြစ်ပြီး အရောင်းအဝယ်ဖြစ်သော နှမ်းမျိုးများမှာ ပွင့်ဖြူ၊ စလင်း၊ ဆင်ဖြူကျွန်းဒေသတို့မှ ထွက်ရှိသည့် ရေသွင်းနှမ်းမျိုးများဖြစ်ပါသည်။

          မကွေးကုန်စည်ဒိုင်၌ နှမ်းစျေးနှုန်းများမှာ နှမ်းဖြူ(၁)တင်းလျှင် (၇၀၀၅ဝိ/-)၊ နှမ်းနက်(ရိုးရိုး) (၁)တင်းလျှင် (၅၈၃၅ဝိ/-)၊ နှမ်းနက်(စမုံ)(၁)တင်းလျှင်(၇၃၃၅ဝိ/-)၊ နှမ်းညိုကြား(၁)တင်းလျှင် (၆၁၆၅ဝိ/-) နှမ်းနီ(၁)တင်းလျှင် (၆၁၆၅ဝိ/-)စျေးနှုန်းများရှိကြောင်း သိရပါသည်။ နှမ်းများကို ဝယ်ယူရာတွင် အက်စစ်ဓာတ်တိုင်းတာခြင်းနှင့် အစိုဓာတ်များရှိ/ မရှိ ကြည့်ရှု၍ဝယ်ယူကြောင်း သိရပါသည်။ ယနေ့ အရောင်းအဝယ်ပွဲကို ပွဲစားကုန်သည် လူဦးရေ(၁၅၀)ခန့် တက်ရောက်ကြောင်း သိရှိရပါသည်။

DOCA(မကွေး)